Gênesis 45:1-28
45 Rü düxwa ga Yúche rü marü tama yaxna namaxã naxĩnü ga nax naxauxchaü̃xü̃ ga norü duü̃xü̃güpe̱xewa. Rü yemaca̱x norü duü̃xü̃güxü̃ tagaãcü nhanagürü: —¡Guxãma i pemax, rü ípechoxü̃ i nua! —nhanagürü. Rü nüxicatama naeneegümaxã yéma nayaxǘãchitanü.
2 Rü poraãcü naxaxu. Rü yema nax poraãcü naxaxuxü̃, rü guxü̃ma ga Eyítuanecüã̱x ga ãẽ̱xgacüpatawa yexmagüxü̃ rü nüxü̃ naxĩnüe. Rü düxwa Faraóũxü̃tawa nanguchiga ga yema.
3 Rü nhu̱xũchi ga Yúche rü naeneegüxü̃ nhanagürü: —Chama chixĩ i Yúche. ¿Rü tamaxü̃xü̃ ya papá? —nhanagürü. Rü nüma ga naeneegü rü poraãcü naba̱i̱xãchiãxẽgü, rü taxuxü̃maama nanangãxü̃güéga.
4 Notürü ga Yúche rü naeneegüxü̃ nhanagürü: —¡Ẽcü númaxü̃ra pexĩ! —nhanagürü. Rü yexguma ga yema naeneegü rü naxü̃tawaama naxĩ. Rü nüma rü nhanagürü nüxü̃: —Chama nixĩ i peenexẽ ya Yúche chixĩxü̃ ga pema Eyítuanegu chamaxã petaxegüxü̃.
5 Notürü tama chanaxwa̱xe i penaxĩ̱xãchiãẽtanü rü pegüchitama pexaie naxca̱x ga yema chamaxã nax petaxegüxü̃. Yerü Tupana nixĩ ga woetama pepe̱xegu nua choxü̃ mucü nax tama taiyamaxã peyuexü̃ca̱x.
6 Rü nhu̱xmax rü marü taxre ya taunecü nixĩ nax taiya ngúxü̃ i nhaa nachixü̃anewa. Rü nhu̱xmax rü 5 ya taunecüama ínayaxǘ i nagu taxuxü̃táma i nanetü rüxüxü̃ ega woo itoegu.
7 Notürü Tupana nixĩ ya pepe̱xegu choxü̃ imucü nax ngẽmaãcü tama taiyamaxã peyuexü̃ca̱x rü íyaxügüxü̃ca̱x i petaagü i nhama i naanewa. Rü ngẽmaãcü tama nagu íperüxĩnüeyane rü Tupana chaugagu pexü̃ namaxẽxẽxẽ.
8 --
9 ¡Ẽcü, paxa pewoegu i tümaxü̃tawa ya papá, rü nhapegü tüxü̃: “Rü cune ya Yúche rü nhanagürü: ‘Tupana rü ãẽ̱xgacüxü̃ choxü̃ ningucuchixẽxẽ nax Eyítuanemaxã ichacuáxü̃ca̱x! ¡Rü paxa nua naxũ rü choxü̃ íyada̱u̱x!
10 Rü Gochéü̃anewa tá cungu wüxigu namaxã i cunegü rü cutaagü rü cuxü̃nagü rü guxü̃ma i ngẽma cuxü̃́ ngẽxmaxü̃. Rü ngẽmaãcü tá chorü ngaicamána cungexma.
11 Rü nua rü tá õna pexna chaxã i cuma rü guxü̃ma i cutanüxü̃gü nax taxuxü̃ma pexü̃́ taxuxü̃ca̱x. Erü 5 ya taunecüama ínayaxǘ nax taiya tá ngúxü̃’ ”, nhapegü tüxü̃ ya papá.
12 Rü chauenexẽ ya Bẽyamí rü guxãma i pema nixĩ i nüxü̃ pexĩnüexü̃ nax chamatama ngẽma nhachaxü̃ pexü̃.
13 ¡Rü papámaxã nüxü̃ pexu nax chama chixĩxü̃ i ãẽ̱xgacü i nua Eyítuanewa! ¡Rü tümamaxã nüxü̃ pexu i guxü̃ma i nua nüxü̃ pedauxü̃ nax nhuxãcü chauga naxĩnüexü̃ i duü̃xü̃gü! ¡Rü paxa pewoegu rü tüxü̃ peyaga ya papá! —nhanagürü.
14 Rü yexguma ga Yúche rü naenexẽ ga Bẽyamína nana̱i̱xãchi rü naxaxu. Rü yexgumarüxü̃ ta ga Bẽyamí rü naxaxu rü Yúchena nana̱i̱xãchi.
15 Rü nhu̱xũchi ga Yúche rü guxü̃ma ga naeneegüxü̃ nachúxu, rü naxauxãcüma nüxna nana̱i̱xãchichigü. Rü yemawena ga naeneegü rü marü tama namuü̃eãcüma namaxã nidexagü.
16 Rü düxwa Faraóũxü̃tawa nanguchiga nax yéma Yúchexü̃tawa nax nangugüxü̃ ga naeneegü. Rü nüma ga Faraóũ rü norü ngü̃xẽẽruü̃gü rü poraãcü nataãxẽgü.
17 Rü yexguma ga Faraóũ rü nhanagürü Yúchexü̃: —¡Namaxã nüxü̃ ixu i cueneegü rü norü búrugü yamexẽẽgü rü paxa nachixü̃aneca̱x nawoegu i Canaã́anewa!
18 ¡Rü paxa nua tüxü̃ nagagü ya penatü rü guxü̃ma i petanüxü̃gü! Rü chama rü tá tüxna chanaxã i ngẽma rümemaexü̃ i naane i Eyítuanewa ngẽxmaxü̃. Rü nua rü tá mexü̃ tangõ̱xgü rü taxuxü̃táma tüxü̃́ nataxu.
19 ¡Rü namaxã nüxü̃ ixu i cueneegü rü númacüã̱x ya cárugü ya búrugü itúgüne ne yangegü nax yimagügu nua tüxü̃ nagagüxü̃ca̱x ya naxma̱xgü rü naxacügü rü penatü!
20 ¡Rü tauxü̃́ i norü naaneca̱x naxoegaãẽgüxü̃! Erü nua Eyítuanewa rü ngẽma rümemaexü̃ i naane rü noxrügü tá nixĩ —nhanagürü.
21 Rü yexguma ga Yúche rü nanaxü ga yema Faraóũ namaxã nüxü̃ ixuxü̃. Rü naeneegüna nanaxã ga cárugü rü naxchirugü rü õnagü ga norü namawaü̃.
22 Notürü guma naenexẽ ga Bẽyamína rü nanaxã ga 5 ga naxchiru rü 300 tachinü ga diẽru.
23 Rü nanatüca̱x yéma nanamugü ga 10 ga búrugü ga yema Eyítuanewa rümemaexü̃ ga yemaxü̃maxã ixãxwetaxü̃, rü 10 ga búru ga trígupüü̃maxã ixãxwetaxü̃, rü naguxü̃raü̃xü̃ ga õna ga nanatüarü namawaü̃.
24 Rü nhu̱xũchi naeneegüxü̃ inamuãchitanü. Rü nayaxucu̱xẽgü rü nhanagürü nüxü̃: —¡Rü tauxü̃́ i pegü ipeyaxüáxü̃ i namawa! —nhanagürü.
25 Rü nüma ga naeneegü rü inaxĩãchi, rü Canaã́aneca̱x nawoegu ga nanatüxü̃tawa.
26 Rü yexguma ínangugügu, rü nanatümaxã nüxü̃ nixugügü rü nhanagürügü: —Yúche rü namaxü̃. Rü nüma nixĩ i Eyítuanemaxã inacuáxü̃ —nhanagürügü. Notürü ga nüma ga Yacú ga Iraéugu ãégacü rü tama nüxü̃́ nayaxõ, yerü marü tama Yúchegu narüxĩnü.
27 Notürü yexguma tümamaxã nüxü̃ yaxugügügu ga yema Yúchearü dexa, rü nüxü̃ tada̱xgu ga guma cárugü ga ixããcune namaxã ga yema õnagü ga Yúche tümaca̱x yéma mugüxü̃, rü tayaxõ rü tataãxẽxü̃chi.
28 Rü yexguma ga nüma ga Yacú rü nhanagürü: —Rü aixcumaeca yixĩxü̃ ya chaune ya Yúche i namaxü̱̃xü̃. Rü ngẽ́ma tá chaxũ rü tá nüxü̃ chadau naxü̃pa nax chayuxü̃ —nhanagürü.
