Isaías 11:1-16
11 “Rü nhama wüxi i naichime irüxüxü̃rüxü̃ tá nixĩ nax Dawínatü ga Yechéwa nangóxü̃ i wüxi i nataxa i guxãarü ãẽ̱xgacü tá ixĩxü̃.
2 Rü Cori ya Tupanaãxẽ rü guxü̃gutáma namaxã inacua̱x. Rü tá nüxna nanaxã i cua̱x nax mea naãxẽxü̃ nacuáxü̃ca̱x. Rü tá nüxna nanaxã i tauxcha nax naxuãẽxü̃ca̱x. Rü tá nüxna nanaxã i pora rü tá nüxü̃ narüngü̃xẽẽ nax Tupanaarü ngúchaü̃xü̃ nacuáxü̃ rü naga naxĩnüxü̃.
3 Rü nüma rü ngẽxguma duü̃xü̃güna naca̱xgu i norü maxü̃chiga, rü taxũtáma ngẽma norü düxétüwa ngóxü̃ca̱xicatama nüxna naca. Notürü ngẽma norü ĩnüwa ngẽxmaxü̃ca̱x tá nixĩ i nüxna nacaxü̃. Rü taxũtáma nanapoxcu naxca̱x i ngẽma togü nüxü̃ ixugümarexü̃, notürü ngẽma chixexü̃ i naxügüxü̃ca̱x tá nixĩ i napoxcuexü̃.
4 Rü yíxema togüme̱xẽwa ngẽxmagüxe rü ngẽxguma tümaarü maxü̃chiga tüxna naca̱xgu rü mea tá tümamaxã nanamexẽxẽ. Rü tümaétüwa tá nachogü ya yíxema ngearü diẽruã̱xgüxe i tümaarü ãẽ̱xgacü chixri tümamaxã cua̱xgüxe. Rü ngẽma norü ore rü nhama wüxi i cua̱i̱xruü̃rüxü̃ tá nixĩ naxca̱x i ngẽma chixexü̃ ügüxü̃. Rü wüxi i naa̱xmaxã cue nhaxü̃maxã tá nanadai i ngẽma duü̃xü̃gü i chixexü̃ ügüxü̃.
5 Rü nüma ya yimá ãẽ̱xgacü rü meama guxü̃ma i norü duü̃xü̃gümaxã tá inacua̱x. Rü ngẽma ore i aixcuma ixĩxü̃icatama tá nixu.
6 Rü ngẽxguma yangucuchigu ya yimá ãẽ̱xgacü, rü ngẽma airu i naixnecücüã̱x rü carnérumaxã rü taxũtáma nügüchi naxaie. Rü ngẽma ai rü tá bóyixacümaxã wüxigu nacagü. Rü ngẽma wocaxacü rü ngẽma aixacü rü tá wüxigu nayae. Rü wüxi i buxü̃ tá namaxã inacua̱x.
7 Rü ngẽma woca rü ngẽma ócha i düraxü̃ rü nügümücü tá nixĩgü rü naxacügü rü wüxigu tá nacagü. Rü ngẽma ai i leóü̃ rü wocarüxü̃ tá maxẽ nanangõ̱x.
8 Rü ngẽxguma i wüxi ya buxe ya maixe ãxtapemaxü̃étüwa naxĩnüca̱xwa̱xegu, rü woo ngẽma ãxtapemaxü̃gu yaxücuchime̱xẽgu rü taxũtáma nüxü̃́ naxãũcüma.
9 Rü guxü̃nema ya yima ma̱xpǘne ya chapata nawa ngexmanewa rü tataxuma ya texé ya chixexü̃ üxe. Erü nhama Már i dexámaxã napaxü̃rüxü̃ rü nhama i naane rü ngẽma duü̃xü̃gü i choxü̃ cua̱xgüxü̃maxã tá nanapá.
10 Rü ngẽxguma yimá Dawítaxa ingucuchigu nax ãẽ̱xgacü yixĩxü̃ca̱x rü tá wüxi i cua̱xruxü̃ nixĩ naxca̱x i guxü̃ma i duü̃xü̃gü. Rü guxü̃ i nachixü̃anegücüã̱x rü tá naxca̱x nayadaugü rü naxca̱x nangutaque̱xegü. Rü ngẽma nachica i nawa nangexmaxü̃ rü tá naxüüne.
Iraéutanüxü̃ rü tá nachixü̃aneca̱x nawoegu
11 Rü ngẽxguma yimá Dawítaxa ingucuchigu nax ãẽ̱xgacü yixĩxü̃ca̱x rü nüma ya Cori ya Tupana rü tá wena inanawe̱x i norü pora. Rü wena tá nanangutaque̱xexẽxẽ i norü duü̃xü̃gü i Achíriaanewa, rü Eyítuanewa, rü Pátuanewa, rü Echiopíaanewa, rü Eráũanewa, rü Chináruanewa, rü Amáchianewa rü nachixü̃anegü i márcutüwa ngẽxmagüxü̃wa. Rü tá wena Iraéuaneca̱x nanawoeguxẽxẽ.
12 Rü nüma ya Cori rü guxü̃ i nachixü̃anegüxü̃ tá nüxü̃ nadauxẽxẽ i wüxi i cua̱xruxü̃. Rü tá nanangutaque̱xexẽxẽ i ngẽma Iraéutanüxü̃gü i woonexü̃. Rü naanearü guxü̃cüwawa tá ne nanagagü nax nanutaque̱xeãxü̃ i ngẽma duü̃xü̃gu i Yudáanecüã̱x ga woonemarexü̃”, nhanagürü ga Ichaía.
13 --
14 --
15 --
16 --