Isaías 53:1-12
53 “¿Texé tá tayaxõ ga yema ore ga nüxü̃ ixuxü̃? ¿Rü texéca̱x nixĩ ga nango̱xẽxẽãxü̃ ga norü pora ya Cori ya Tupana?
2 Rü nüma ya Cori ya Tupana rü nanaxwa̱xe ya yimá norü duü̃ rü nhama wüxi i nanetü i ngexwaca̱x rüxüxü̃ rü naxchúma̱xã i waixümü i paanewa ixücuxü̃rüxü̃ nax yixĩxü̃. Rü nüma rü tama namechiwe rü ngẽmaca̱x taxúxeaxü̃́ma nangúchaü̃.
3 Rü ga duü̃xü̃gü rü tama naga naxĩnüechaü̃, rü nüxü̃ naxoe. Rü nüma rü wüxi ga duü̃ ga poraãcü ngúxü̃ ingecü nixĩ, rü namaxã nixü nax ngúxü̃ yangexü̃. Rü yixema rü yexguma nüxü̃ idaugügu rü tama nüxü̃ tacua̱xgüchaü̃ rü nhama wüxi i duü̃xü̃ i taxuwama mexü̃rüxü̃ tayaxĩxẽxẽ. Rü yemaacü nüxü̃ taxoe rü tama tanayauxgüchaü̃.
4 Notürü ga nüma rü nayange ga tórü da̱xaweanegü rü tórü guxchaxü̃gü rü yemagagu nixĩ ga ngúxü̃ yangexü̃. Rü yixema nagu rüxĩnüegu rü noxrütama chixexü̃gagu nixĩ ga Tupana ngúxü̃ nüxü̃ ingexẽẽxü̃ rü napoxcuãxü̃ rü ãne nüxü̃ yangexẽẽxü̃.
5 Notürü tórü chixexü̃gagu nixĩ ga napi̱xẽẽgüãxü̃. Rü tórü pecádugagu nixĩ ga ngúxü̃ yangexü̃. Notürü yema ngúxü̃ nax yangexü̃gagu nixĩ ga Tupana tamaxã rüngüxmüxü̃. Rü yema norü o̱xrigügagu nixĩ ga taxca̱x yataanegüxü̃.
6 Rü guxãma ga yixema rü itarütauxe nhama carnérugü irütauxexü̃rüxü̃. Yerü wüxichigü ga yixema rü nagu taxĩ ga tóxrütama ngúchaü̃. Notürü nüma ga Cori ya Tupana rü gumá norü duü̃cüxü̃ nayangexẽxẽ ga guxü̃ma ga tórü chixexü̃gü.
7 Rü nanacua̱i̱xgü, notürü nüma rü nügü inaxã rü tama nügüétüwa nidexa. Rü nhama carnéru i ma̱xwa nagagüxü̃rüxü̃ namaxã nixĩgü. Notürü nüma rü nachianemare nhama wüxi i carnéru i yo̱xta̱xawa nagagüxü̃rüxü̃.
8 Rü ma̱xwa nanagagü woo taxuxü̃ma ga chixexü̃ naxü, rü tataxuma ga texé ga ínapoxü̃xe. Rü taxúema texé naétüwa tachogü. Rü ínanata̱xüchigü ga nhama ga naanewa. Rü chautanüxü̃güarü chixexü̃gagu nayama̱xgü.
9 Rü duü̃xü̃gü ga ichixexü̃xü̃tagu nanata̱xgü. Rü duü̃xü̃gü i chixri maxẽxü̃ íta̱xgüxü̃tanügu nanata̱xgü. Rü yemaacü namaxã nixĩgü woo taguma namáeta rü taguma doramaxã texéxü̃ nawomüxẽxẽ.
10 Rü Cori ya Tupanaarü ĩnü nixĩ nax ngúxü̃ yangexü̃. Rü nüma rü nügü naxã naxca̱x ga tórü chixexü̃gü. Rü ngẽmaca̱x nüxü̃́ nangexma i maxü̃ i taguma gúxü̃ rü tá tamuxũchi ya yíxema noxrü ixĩgüxe. Rü nagagu nixĩ i mea ínanguxuchixü̃ i ngẽma Tupana nagu rüxĩnüxü̃.
11 Notürü nawena ga yema poraãcü ngúxü̃ nax yangexü̃ rü nayuxü̃ rü wena tá namaxü̃. Rü yimá Tupanaarü duü̃ rü tá nataãxẽ erü tá tüxü̃ nadau ya muxetama ya marü Tupanape̱xewa imexe nagagu nax tümaarü chixexü̃ca̱x nayuxü̃.
12 Rü ngẽmaca̱x i nüma ya Tupana rü tá nanatachigaxẽxẽ, rü tá ngẽma iporaexüchixü̃tanüwa nanangexmaxẽxẽ, yerü nügü inaxã nax pecáduca̱x nayuxü̃ca̱x. Rü nüma ga duü̃xü̃gü rü nhama wüxi i máetaxü̃rüxü̃ nayaxĩxẽxẽ, notürü ga nüma rü guxü̃ma ga duü̃xü̃güarü pecádu ninge nax yemaacü naétüwa nachogüxü̃ca̱x ga yema pecáduã̱xgüxü̃.”
