Isaías 6:1-13
6 “Rü gumá taunecü ga ãẽ̱xgacü ga Uchía nagu yucü rü nüxü̃ chadau ga Cori ya Tupana ga wüxi ga tochicaxü̃ ga dauxü̃wa yexmaxü̃wa nax natoxü̃. Rü yema norü üünemaxã nanapá ga yema ínayexmaxü̃wa.
2 Rü naétüwa nayexmagü ga dauxü̃cüã̱x ga íya̱u̱xratanücüüxü̃. Rü wüxichigü ga yema rü nüxü̃́ nayexma ga 6 ga naxpe̱xátü. Rü taxre ga naxpe̱xátümaxã rü nügü nidüxchiwegü, rü guma nái ga taxre ga naxpe̱xátümaxã nügü nidüxparagü, rü guma nái ga taxremaxã rü nixüüxü̃.
3 Rü guxü̃ma ga yema dauxü̃cüã̱x rü nügü nhanagürügü: ‘Naxüüne, naxüüne, naxüüne ya Cori ya Tupana ya guxãétüwa ngẽxmacü.’ Rü ngẽma norü üüne rü nhama i naane namaxã nanapá.
4 Rü yema nagamaxã rü guma Tupanapataarü ĩã̱x rü naxĩã̱xãchi. Rü nümatama ga guma Tupanapata rü caixanexü̃maxã nanapá.
5 Rü yexguma ga chamax rü nhaxü̃gu charüxĩnü: ‘Nhu̱xmawaxi rü chaugümaxã changechaü̃ erü tá chayu. Erü chama nax duü̃xü̃ chixĩxü̃ rü chauxetümaxã nüxü̃ chadau ya yimá ãẽ̱xgacü ya Cori ya guxãétüwa ngẽxmacü. Rü chauã̱x rü naxãũãchi rü duü̃xü̃gü i ãũãchiarü dexaã̱xgǘxü̃tanüwa chamaxü̃.’
6 Rü yexguma rü wüxi ga yema dauxü̃cüã̱x rü nigoe rü ãmarearü guchicaxü̃wa wüxi ga ãchataxü̃maxã wüxi ga ã́xwe cha̱u̱xca̱x nayaxu.
7 Rü guma ã́xwe rü chauã̱xwa nayaxũ̱xãchixẽxẽ, rü nhanagürü choxü̃: ‘¡Dücax! daa ã́xwe rü cuã̱xwa nixũ̱xãchi rü ngẽmaca̱x i curü chixexü̃ rü marü inayarüxo. Rü ngẽma curü chixexü̃gü rü Tupana rü marü cuxü̃́ nüxü̃ narüngüma’, nhanagürü.
8 Rü yexguma rü nüxü̃ chaxĩnü ga naga ga Cori ya Tupana ga nhaxü̃: ‘¿Rü texéxü̃ tá ichamuãchixü̃ i nhu̱xmax? ¿Rü texé tá tixĩ ya yíxema tórü orearü ngeruxü̃ ixĩxe?’, nhanagürü. Rü yexguma ga chamax rü chanangãxü̃ rü nhachagürü: ‘Daxe chixĩ, Pa Corix. Ẽcü, ¡choxü̃ inamuãchi!’ nhachagürü.
9 Rü nüma rü nhanagürü choxü̃: ‘¡Ẽcü inaxũãchi rü chorü duü̃xü̃gümaxã nüxü̃ ixu i nhaa ore!: Rü woo nüxü̃ nax naxĩnüexü̃ i chorü ore rü taxũtáma nüxü̃ nacua̱xgü nax ta̱xacüchiga yixĩxü̃. Rü woo nüxü̃ nax nadaugüxü̃ i ngẽma mexü̃ i chaxüxü̃ rü taxũtáma nüxü̃ nacua̱xgüéga nax ta̱xacüchiga yixĩxü̃.
10 Rü ngexrüma nax chorü oremaxã cuyaxucu̱xẽgüxü̃ i ngẽma duü̃xü̃gü i norü ĩnügutama rüxĩnüexü̃, erü taxũtáma cuga naxĩnüe. Rü nüétama ega nügü yangauxchi̱xẽxẽẽgu naxcha̱xwa i chorü ucu̱xẽgü nax tama nüxü̃ naxĩnüexü̃ca̱x. Rü nüétama ega nügü yangexetü̱xgu naxcha̱xwa i ngẽma mexü̃ i naxca̱x chaxüxü̃ nax tama nüxü̃ nadaugüxü̃ca̱x rü ngẽmaãcü tama cha̱u̱xca̱x nawoeguxü̃ca̱x nax chama naxca̱x chayataanexẽẽgüxü̃ca̱x’, nhanagürü choxü̃.
11 6:11-12 Rü yexguma ga chama rü nüxna chaca rü nhachagürü: ‘¿Nhuxre i ngunexü̃ tá nixĩ i ngẽmaãcü yixĩxü̃, Pa Corix?’ nhachagürü. Rü yexguma ga nüma rü choxü̃ nangãxü̃ rü nhanagürü: ‘Rü ngẽmaãcü tá nixĩ nhu̱xmatáta yima ĩanegü rü nagu napogüe, rü taxuxü̃táma i duü̃xü̃ íyaxü rü nhu̱xmatáta ya yima ĩpatagü rü yangearü duü̃xü̃ã̱xgü rü naanegü rü nabáianemare rü nhu̱xmatáta íchanamuxü̃ i ngẽma duü̃xü̃gü i norü naanewa, rü ngẽmaãcü i nachixü̃ane rü nangeãcumare.
12 Nüü̃ nadau 6:11
13 Rü woo chi 100 tanüwa rü 10 i duü̃xü̃gü íyaxüxgu nawa ya yima ĩane rü ngẽma rü ta nadai nhama wüxi i nai i daxüchixü̃rüxü̃. Notürü ngẽma nachimewa rü tá narüxü i wüxi i ngexwaca̱xü̃xü̃ i nane i mexü̃’, nhanagürü ga Tupana.”
