Jó 2:1-13
2 Rü yexguma nawa nanguxgu ga ngunexü̃ nax Tupanape̱xewa wena nangugüxü̃ ga yema norü orearü ngeruü̃gü ga dauxü̃cüã̱x, rü nüma ga Chataná rü ta natanügu naxã.
2 Rü nüma ga Cori ya Tupana rü nüxna naca rü nhanagürü: —¿Ngextá ne cuxũ i cumax? —nhanagürü. Rü nüma ga Chataná rü nanangãxü̃ rü nhanagürü: —Guxü̃ i naanegu íchayaxüegu i duü̃xü̃gütanüwa —nhanagürü.
3 Rü yexguma ga nüma ga Cori ya Tupana rü nhanagürü nüxü̃: —¿Ẽ̱xna cunangugü ya yimá chorü duü̃ ya Yó? Rü tataxuma ya texé ya naxrüxü̃ ixĩxẽ, rü naxrüxü̃ chauga ĩnüxẽ, rü naxrüxü̃ mea maxü̃́xẽ, rü naxrüxü̃ chixexü̃wa ngechigaxe, rü naxrüxü̃ tügüna dáuxe nax taxúemaama chixexü̃ taxüxü̃ca̱x. Rü woo i cuma choxna naxca̱x cuca nax chixexü̃ nüxü̃ cungupetüxẽẽxü̃ca̱x nüma taxuxü̃ma i chixexü̃ naxüyane, notürü nüma rü nanaxaixrügumaraxü̃mare i nacümawa rü taxuxü̃ma i chixexü̃ naxü —nhanagürü.
4 Notürü ga nüma ga Chataná rü Cori ya Tupanaxü̃ nangãxü̃ga rü nhanagürü: —Ngẽxguma taxúema ya texé tümaxü̃nexü̃chimaxã chixexü̃ ü̱xgux ya wüxíe, rü taxuca̱xma tanaxi̱xãchiãxẽ. Rü tügü nax tamaxẽẽxü̃ca̱x rü ítamemare nax itanaxãxü̃ i guxü̃ma i ta̱xacü i tüxü̃́ ngẽxmaxü̃.
5 Notürü ngẽxguma chi naxü̃newaxüchi yadaawexẽẽ̱xgu rü tá nüxü̃ cudau nax chixexü̃ tá cupe̱xewatama cumaxã yaxugüxü̃ —nhanagürü.
6 Rü nüma ga Cori ya Tupana rü Chatanáxü̃ nangãxü̃ga rü nhanagürü: —Marü name. ¡Rü namaxã naxü i ngẽma cuma cunaxwa̱xexü̃, notürü taxũtáma nüxü̃ cudáu i norü maxü̃! —nhanagürü.
7 Rü yexguma ga nüma ga Chataná rü Cori ya Tupanape̱xewa nixũgachi, rü Yóca̱x ínananguxẽxẽ ga wüxi ga cháxüne ga poraxü̃ ga guxü̃ma ga naxü̃newa irüyi̱xixü̃. Rü naeruwa inaxügü rü nhu̱xmata nacutüwa nangu.
8 Rü yexguma ga nüma ga Yó rü tanimucate̱xewa narüto. Rü nanayaxu ga wüxi ga ngáxwechipe nax yemamaxã nügü yawü̱xünexü̃ca̱x.
9 Notürü tüma ga naxma̱x rü nhatagürü nüxü̃: —¿Nhama rü ta pora cuxü nax mea Tupanape̱xewa cumaxü̃xü̃? ¡Rü Tupanamaxã chixexü̃ naxuegu rü noxtacüma nayu! —nhatagürü.
10 Notürü ga nüma ga Yó rü ngĩxü̃ nangãxü̃ga rü nhanagürü: —Pa Nge, tama name i ngẽmaãcü chixexü̃ i oremaxã quidexa. Rü guxü̃guma taãxẽãcü tanayaxu i ngẽma mexü̃gü i Tupana tüxna ãxü̃. ¿Rü nhuxãcü chi i taxũchima nayaxuxü̃ i ngẽma guxchaxü̃gü i taxca̱x ínguxü̃? —nhanagürü. Rü yemaacü ga Yó rü woo yema nüxü̃ nax ngupetüxü̃ rü tama chixexü̃ naxü rü bai ga norü dexawa.
Yóxü̃ ínayadaugü ga namücügü
11 Rü nüma ga Yó rü nüxü̃́ nayexma ga tamaepü̱x ga namücügü, rü wüxi rü Erifá ga Temáü̃anecüã̱x ixĩxü̃, rü to rü Biridá ga Chúaanecüã̱x ixĩxü̃, rü yema to rü Chofá ga Naamáanecüã̱x ixĩxü̃. Rü yexguma nüxü̃ naxĩnüechigagu ga naguxü̃raü̃xü̃ ga guxchaxü̃gü nüxü̃ nax ngupetüxü̃ ga Yó, rü wüxigu naxü̃tawa naxĩ nax nataãxẽgüxẽẽãxü̃ca̱x rü naxümücügüaxü̃ca̱x nawa ga yema ngúxü̃ nax yangexü̃.
12 Rü yexguma yáxü̃gutama naxĩxgu rü Yóxü̃ nadaugü, rü yema poraãcü nax yada̱xawexü̃ rü tama aixcuma nüxü̃ nacua̱xgü. Rü yemaca̱x inanaxügüe ga aita nax naxüexü̃ rü naxauxexü̃. Rü yema taxü̃ ga ngechaü̃ nax yangegüxü̃gagu rü nügü narügáutechirugü rü waixümüte̱xe nügüerugu nagünagüte̱xegü.
13 Rü yemawena rü Yómaxã nhaxtüanewa narütogü. Rü 7 ga ngunexü̃ rü 7 ga chütaxü̃ yéma nayexmagü rü taxuxü̃ma ga dexa nanaxuxuchigü, yerü nüxü̃ nadaugü ga Yó ga taxü̃ ga ngúxü̃ nax yangexü̃.
