Jó 42:1-17
42 Rü yexguma ga nüma ga Yó rü Tupanaxü̃ nangãxü̃, rü nhanagürü:
2 —Nüxü̃ chacua̱x nax guxü̃xü̃ma cucuáxü̃ rü nataxuma i ta̱xacü i cuxü̃́ guxchaxü̃ nax cunaxüxü̃.
3 ¿Rü texé chixĩ i chamax rü ngẽmaca̱x tama cuxü̃́ chanayaxuxü̃ i ngẽma curü ucu̱xẽgü? Rü ngẽmaãcü chanango̱xẽẽxü̃ nax taxuxü̃ma chacuáxü̃. Rü chama rü nachiga chidexa i ta̱xacü i ãũcümaxü̃ i tama nüxü̃ chacuáxü̃ i cuxicatama nüxü̃ cucuáxü̃.
4 Cuma rü nhacurügü choxü̃: “¡Choxü̃́ rüxĩnü rü cumaxã chidexachaü̃! ¡Rü choxü̃ nangãxü̃ nax cuxna chaca̱xü̃!” nhacurügü choxü̃.
5 Noxri rü cuxü̃ chaxĩnüchigaxü̃waxica nixĩ i cuxü̃ chacuáxü̃, notürü i nhu̱xmax rü daa chauxetümaxã cuxü̃ chadau.
6 Rü ngẽmaca̱x i nhu̱xmax rü marü nüxü̃ charüxo ga yema noxri cumaxã nagu charüxĩnüxü̃. Rü ngẽmaca̱x nua waixümüte̱xewa rü tanimucate̱xewa charüto —nhanagürü ga Yó.
Tupana rü wena Yóxü̃ narüngü̃xẽẽ
7 Rü yexguma Yómaxã yadexa̱xguwena ga Tupana rü nhu̱xũchi Erifáxü̃ nhanagürü: —Yimá chorü duü̃ ya Yó rü aixcumaxü̃ nixu ga chauchiga. Notürü poraãcü cumaxã chanu rü namaxã chanu i ngẽma cumücügü yerü tama Yórüxü̃ aixcumaxü̃ pexu ga chauchiga.
8 ¡Rü ẽcü i nhu̱xmax rü 7 i woca i yatüxü̃ peyauxgü rü 7 i carnérugü rü chorü duü̃ ya Yóxü̃tawa penagagü! ¡Rü yimápe̱xewa perü maxü̃ca̱x penadai rü ípeyagu i ngẽma naxü̃nagü! Rü nüma ya yimá chorü duü̃ ya Yó rü tá pexca̱x nayumüxẽ. Rü chama rü tá nüxü̃́ nüxü̃ chaxĩnü i norü yumüxẽ rü taxuxü̃táma chixexü̃ pemaxã chaxü woo nax namexü̃ nax pexü̃ chapoxcuexü̃ nagagu nax tama aixcumaxü̃ pexuxü̃ ga chauchiga yema chorü duü̃ ga Yó aixcumaxü̃ ixuxü̃rüxü̃ —nhanagürü ga Tupana.
9 Rü nüma ga Erifá rü Biridá rü Chofá rü inaxĩãchi rü nanaxügü ga yema Cori ya Tupana namaxã nüxü̃ ixuxü̃. Rü nüma ga Cori ya Tupana rü nüxü̃ naxĩnü rü nanayaxu ga yema Yó namaxã nüxü̃ ixuxü̃ norü yumüxẽwa.
10 Rü yexguma Yó namücügüca̱x yumüxẽguwena rü Tupana rü noxriarü yexera Yóxü̃ narüngü̃xẽẽ.
11 Rü yexgumawena rü guxü̃ma ga naeneegü rü naeya̱xgü rü namücügü rü guxü̃ma ga yema duü̃xü̃gü ga ü̃paacü nüxü̃ cua̱xgüxü̃ rü Yóxü̃tagu nanaxĩane. Rü nachiü̃wa rü namaxã nanaxügü ga wüxi ga taxü̃ ga õna. Rü wüxigu nanataãxẽgüxẽxẽ nax tama nagu naxĩnüxü̃ ga yema ngúxü̃ rü guxchaxü̃gü ga Tupana nüxü̃ ingexẽẽxü̃. Rü wüxichigü ga nüma ga yema namücügü rü nüxna ngĩxü̃ nixãchigü ga nhuxre ga diẽru rü wüxi ga ãnera ga úirungĩxca̱x.
12 Rü Tupana rü poraãcü noxriarü yexera Yóxü̃ narüngü̃xẽẽ ga yexguma marü naya̱xgu. Rü yexguma rü 14,000 wa nangu ga norü carnérugü, rü 6,000 wa ga norü camérugü, rü 1,000 chimüxü̃wa ga norü wocagü ga puracüruxü̃ ixĩgüxü̃, rü 1,000 wa ga norü búru ga ingexü̃.
13 Rü yexgumarüxü̃ ta wenaxarü naxãxacü rü nüxü̃́ nayexma ga 14 ga nanegü rü tamaepü̱x ga naxacü.
14 --
15 --
16 42:16,17 Rü yexgumawena ga Yó rü namaxü̃ ga 140 ga taunecü rü nüxü̃ nadau ga nataagü rü nataaxacügü. Rü yema nataaxacügüacügüxü̃ rü ta nadau. Rü yemaacü marü nayaxüchiãcüma nayu.
17 --
