Jonas 3:1-10
3 Rü wenaxarü Yónamaxã nidexa ga Cori ya Tupana rü nhanagürü nüxü̃:
2 —¡Ẽcü yima taxü̃ne ya ĩane ya Níniwewa naxũ rü duü̃xü̃gümaxã nüxü̃ ixu i ngẽma tá cumaxã nüxü̃ chixuxü̃! —nhanagürü.
3 Rü nüma ga Yóna rü Tupanaga naxĩnü rü inaxũãchi nax Níniwewa naxũxü̃ca̱x. Rü guma Níniwearü ĩane rü tamaepü̱x ga ngunexü̃ ninge nax nagu yaxũãgüchigüxü̃.
4 Rü nüma ga Yóna rü guma ĩanegu naxücu rü guxü̃ma ga yema ngunexü̃ rü nagu nixũãgüchigü, rü tagaãcü nhaxü̃maxã yexma nicaechigü: —Rü 40 i ngunexü̃wa nanguxgu rü Tupana tá nayanaxoxẽxẽ ya daa ĩane ya Níniwe —nhanagürü.
5 Rü yexguma yemaxü̃ naxĩnüegu ga yema Níniwecüã̱x ga duü̃xü̃gü ga iyaexü̃ rü buxü̃gü, rü Tupanaaxü̃́ nayaxõgü. Rü nanaxunagügü nax Tupanaca̱x naxaureexü̃ rü nagu yacu̱xgüxü̃ ga naxchirugü ga nanhoxẽraxü̃, yerü poraãcü nügümaxã nangechaü̃gü.
6 Rü yexguma Níniwearü ãẽ̱xgacüxü̃tawa nanguxgu ga yema dexa, rü nüma rü norü tochicaxü̃wa inachi rü ínacuxuchi ga norü ãẽ̱xgacüchiru rü nanhoxẽraxü̃ ga naxchirugu nicu̱x rü waixümüarü ãte̱xexü̃wa narütomare.
7 Rü nhu̱xũchi nüma ga ãẽ̱xgacü rü norü ngü̃xẽẽruü̃güxü̃ namu nax naxunagügüaxü̃ca̱x ga aurechiga. Rü nhanagürügü: “¡Taxúetáma texé tachibü! ¡Rü ngẽxgumarüxü̃ ta rü taxúetáma texé tanachibüexẽxẽ rü tayaxaxegüxẽxẽ i tümaarü wocagü rü carnérugü!”, nhanagürügü.
8 Rü yexgumarüxü̃ ta nanaxunagü ga ãẽ̱xgacüarü ore ga nhaxü̃: “¡Guxãma i pemax, Pa Duü̃xü̃güx, rü nanhoxẽraxü̃ i naxchirugu picu̱xgü rü ngẽmaãcü ípenawe̱x nax pegümaxã pengechaü̃güxü̃! ¡Rü aixcuma Tupanana pecagü rü namaxã nüxü̃ pexu i perü chixexü̃gü! ¡Rü wüxichigü i pemax rü nüxü̃ perüxoe i pecüma i chixexü̃ rü ngẽma nax pegü pedaixü̃ rü pemáetawa̱xegüxü̃!
9 Rü bexmana ngẽxguma ya Tupana rü tá nüxü̃́ ingechaü̃tümüxü̃gü rü tá narüngüxmü nax tamaxã nanuxü̃, rü taxũtáma tüxü̃ nadai”, nhanagürügü.
10 Rü Tupana rü nüxü̃ nadau ga yema Níniwecüã̱x ga duü̃xü̃gü ügüxü̃ nax nhuxãcü nüxü̃ naxoexü̃ ga nacüma ga chixexü̃. Rü yemaca̱x ga nüma ga Tupana rü ínayachaxãchi ga yema poxcu ga noxri namaxã naxueguxü̃.
