Jonas 4:1-11
4 Rü tama Yónaãxẽwa name ga yema mexü̃ ga Níniwecüã̱xmaxã naxüxü̃ ga Tupana rü poraãcü nanu.
2 Rü yemaca̱x nhaãcü nayumüxẽ: “Dücax, Pa Cori Pa Tupanax, rü ngẽma nhu̱xmax Níniwewa ngupetüxü̃ nixĩ ga yema nüxü̃ chixuxü̃ ga yexguma chauchixü̃anewatama chayexmagu. Rü yemaca̱x nixĩ ga cuxcha̱xwa chixũxü̃táa̱x nax Tárchiawa chaxũxü̃ca̱x, yerü nüxü̃ chacua̱x rü cuma rü wüxi ya Tupana ya mecümacü rü ngechaxü̃wa̱xecü quixĩ rü tama paxa cunu. Rü ngẽma curü ngechaü̃ rü nataxüchi, rü ngẽmaca̱x woo texémaxã poxcu cuxuegu̱xgu rü paxama nagu curüxĩnü, rü tama tüxü̃ cupoxcu ega nüxü̃ tarüxoegu i tümacüma i chixexü̃.
3 Rü ngẽmaca̱x Pa Cori Pa Tupanax, rü chanaxwa̱xe nax noxtacüma choxna cunayaxuxü̃ i nhaa chorü maxü̃. Erü cha̱u̱xca̱x narümemae nax chayuxü̃ rü tama nax chamaxechaxü̃” nhanagürü.
4 Notürü nüma ga Cori ya Tupana rü nanangãxü̃ rü nhanagürü: —¿Rü cuxü̃́ namexü̃ nax ngẽmaãcü cunuxü̃? —nhanagürü.
5 Rü nüma ga Yóna rü ínaxũxũ nawa ga guma ĩane rü üa̱xcü ne íxũxü̃waama naxũ rü yexma nanaxü ga norü düxenü ga naixatünaxca̱x. Rü yéma nüxü̃ nadawenü rü tá ta̱xacü nüxü̃ ngupetü ga guma ĩane.
6 Rü nüma ga Tupana rü naxca̱x yéma nanaxüxẽxẽ ga wüxi ga nanetü ga ãátüxü̃ nax yemamaxã nagauxchipetaxü̃ca̱x, rü tama nangechaü̃xü̃ca̱x. Rü nüma ga Yóna rü poraãcü yemamaxã nataãxẽ.
7 Notürü ga moxü̃ãcü yangunegu rü Tupana yéma nanamu ga wüxi ga baxü nax yema yawaechúma̱xãxü̃ca̱x, rü narünhe̱xe.
8 Rü yexguma üa̱xcü ngunagügu rü Tupana yéma nanamu ga wüxi ga buanecü ga naiẽmacü ga üa̱xcü ne íxũxü̃waama ne bucü. Rü nüma ga üa̱xcü rü Yónaerugu nabaxi rü yemaacü poraãcü nüxü̃́ nangu̱xema rü namaxã nayuéga yerü poraãcü nangu̱xema. Rü yemaca̱x nhanagürü: “Narümemae nixĩ nax noxtacüma chayuxü̃ rü tama nax chamaxü̃xü̃”, nhanagürü.
9 Notürü nüma ga Tupana rü nanangãxü̃ rü nhanagürü: —¿Cuxca̱x rü namexü̃ nax ngẽmaãcü cunuxü̃ nagagu nax nanhexexü̃ i ngẽma nanetü? —nhanagürü. Rü nüma ga Yóna rü Tupanaxü̃ nangãxü̃ rü nhanagürü: “Ngemáacüx, cha̱u̱xca̱x name i ngẽma, erü ngẽma chorü numaxã chayuxchaü̃”, nhanagürü.
10 Rü yexguma ga nüma ga Cori ya Tupana rü nanangãxü̃ rü nhanagürü nüxü̃: —Cuma rü tama icunato ga yema nanetü rü tama cunayaxẽxẽ. Rü wüxitama ga chütaxü̃ rü nango̱x rü to ga chütaxü̃ rü marü nayu. Notürü i cumax rü cuxü̃́ nangu̱x nax nayuxü̃.
11 Rü dücax, chama rü yexeraãcü choxü̃́ nangu̱x nax nayuexü̃ i ngẽma duü̃xü̃gü i Níniwecüã̱xgü, erü yima ĩanewa nangexmagü i 120,000 i buxü̃gü i taxuxü̃ma i chixexü̃ ügüxü̃ rü muxü̃ma i naxü̃nagü —nhanagürü ga Tupana.
