Josué 2:1-24
2 Rü yexguma nachica ga Chitíü̃wa nayexmagügu, rü yéma bexma inanamuãchitanü ga taxre ga ngugütaeruxü̃, rü nhanagürü nüxü̃: —¡Ẽcü peyangugügü i ngẽma naane i natü i Yurdáũarü tocutüwa ngẽxmaxü̃ rü nhu̱xmata yima ĩane ya Yericówa pengugü! —nhanagürü. Rü nüma ga yema taxre rü yéma naxĩ rü wüxi ga ngexü̃ ga ngeãxẽxü̃ ga Raábigu ãégaxü̃patawa nangugü ga Yericówa. Rü ngĩma rü ngĩpatagu inapegüxẽxẽ ga yema chütaxü̃.
2 Notürü nayexmaama ga wüxi ga duü̃xü̃ ga Yericóarü ãẽ̱xgacümaxã nüxü̃ ixuxü̃, rü nhanagürü nüxü̃: —Nhuxre i Iraéutanüxü̃gü nua nangugü i ngewa̱xarü chütaxü̃gu nax yangugügüãxü̃ca̱x i nhaa naane —nhanagürü.
3 Rü yemaca̱x ga guma ãẽ̱xgacü rü yema nge ga Raábixü̃tawa namuga rü nhanagürü: —¡Ínamuxü̃ i ngẽma yatügü i cuxü̃tawa ngugüxü̃ erü ngẽma rü ngugütaewa nua naxĩ! —nhanagürü.
4 Notürü ga ngĩma rü inangãxü̃ rü ngĩgürügü: —Aixcuma nixĩ i taxre i yatü i chauxü̃tawa nangugüxü̃, notürü tama nüxü̃ chacua̱x i ngextácüã̱x yixĩgüxü̃.
5 Rü marü noxri nachütagu nawoegu, erü ngẽma oragu nixĩ i nawãxtaxü̃ ya daa ĩanearü poxeguxü̃arü ĩã̱x, rü tama nüxü̃ chacua̱x i ngextá nax naxĩxü̃. Notürü ngẽxgumachi nhu̱xmatama nawe pengẽgügu rü chi nüxü̃ peyangaugü —ngĩgürügü.
6 Notürü ga ngĩma rü dauxnagu inaxĩgüxẽxẽ ga yema taxre, rü yexma pagüxü̃ ga líũchitüxü̃gu iyacu̱xgü.
7 Rü guma ĩanearü ãẽ̱xgacüarü churaragü rü yema taxre ga ngugütaeruü̃ca̱x nadaugü nagu ga yema nama ga natü ga Yurdáũ ínuxtamaxü̃wa nadaxü̃. Rü yexguma yema churaragü íchoxü̃guwenatama, rü nanawãxtagü ga norü ĩã̱x ga guma ĩanearü poxeguxü̃.
8 Rü naxü̃pa ga nax napeexü̃ ga yema ngugütaeruü̃gü, rü ngĩma ga Raábi rü nawe dauxü̃ ixĩ, rü ngĩgürügü nüxü̃:
9 —Chama nüxü̃ chacua̱x ya Cori ya Tupana rü pexna nanaxã i nhaa naane, rü ngẽmaca̱x i nüma rü toxna naxĩnü nax pexü̃ tamuü̃exü̃chixü̃ca̱x. Rü nhu̱xmax rü guxü̃ma i duü̃xü̃gü i nuxma pegüxü̃ rü poraãcü pexü̃ namuü̃e.
10 Rü nüxü̃ tacua̱x ga yexguma Eyítuanewa ípenguxü̃gu, rü Tupana nixĩ ga yapayexẽẽxü̃ ga Már i Dauchiüxü̃ nax yéma pichoü̃xü̃ca̱x. Rü ngẽxgumarüxü̃ ta nüxü̃ tacua̱x nax nhuxãcü penadaixü̃ ga Cheṹ rü Óyi ga Amuréutanüxü̃güarü ãẽ̱xgacügü ga natü ga Yurdáũarü tocutüwa yexmagüxü̃.
11 Rü yexguma yemaxü̃ tacua̱xgügu rü poraãcü tamuü̃e, rü taxúema tügü tixãũãxü̃ nax pemaxã tügü tadaixü̃ca̱x. Erü yimá Cori ya perü Tupana rü guxãétüwa nangexma i dauxü̃guxü̃ i naanewa rü nhama i naanewa.
12 Rü ngẽmaca̱x pexna chaca rü nhu̱xmatama chanaxwa̱xe i Tupanaégagu chamaxã nüxü̃ pexu rü mea tá namaxã pechopetü i chautanüxü̃gü, ngẽxgumarüxü̃ i chama nax meama pexü̃ chayaxuxü̃rüxü̃. ¡Rü choxna penaxã i wüxi i cua̱xruxü̃ nax ngẽmawa nüxü̃ chacuáxü̃ca̱x nax aixcumaxü̃ chamaxã pexuxü̃!
13 Rü chanaxwa̱xe i guxü̃ma i tümaarü ngẽmaxü̃gümaxã tüxü̃ pengechaü̃ ya chorü papá, rü chorü mamá, rü chaueneegü, rü chaueya̱xgü. ¡Rü tauxü̃́ i toxü̃ pedaixü̃! —ngĩgürügü.
14 Rü nümagü rü ngĩxü̃ nangãxü̃gagü rü nhanagürügü ngĩxü̃: —Toma tátama pexü̃ ítapoxü̃ rü pexna tadau nax taxuxü̃ma pexü̃ üpetüxü̃ca̱x, ega cuma rü tama toxü̃ quixuxgu. Rü ngẽxguma Cori ya Tupana toxna naxãxgu i nhaa naane rü aixcuma tá mea cuxna tadau —nhanagürügü.
15 Rü ngĩma ga Raábi rü wüxi ga ĩ ga ĩanearü poxeguxü̃wa yaxṹxü̃negu ipe. Rü yema poxeguxü̃arü ĩã̱xwa wüxi ga napana̱xãgu íinachüxüe ga yema taxre ga ngugütaeruü̃gü.
16 Rü ngĩgürügü nüxü̃: —¡Ẽcü ma̱xpǘneanewa pexĩ rü ngẽxma peyarücu̱xgü nax tama pexü̃ inayauxgüxü̃ca̱x i ngẽma pexca̱x daugüxü̃! ¡Rü tamaepü̱x i ngunexü̃ tá ngẽxma picu̱xgü, rü nhu̱xmatáta ĩaneca̱x nawoegu i ngẽma pexca̱x daugüxü̃! Rü ngẽmawena rü marü name i ípixĩ —ngĩgürügü.
17 Rü nümagü rü ngĩxü̃ nangãxü̃gagü rü nhanagürügü: —Toma rü tá tayanguxẽxẽ i ngẽma Tupanaégagu toxna naxca̱x cuca̱xaxü̃.
18 Notürü ngẽxguma marü nhaa naanegu tachocu̱xgu, rü nhaa ĩã̱x ga nawa toxü̃ curüchü̱xüexü̃wa tá cunatunütaxẽxẽ i nhaa napana̱xã i dáunütaxü̃. Rü daa cupatagu tá tüxü̃ cungutaque̱xexẽxẽ ya cunatü rü cué rü cueneegü rü guxãma ya cunatütanüxü̃gü.
19 Notürü ngẽxguma chi ngexerüüxe cuchiü̃wa íxũxũ̱xgux rü tümagagutátama nixĩ ega tayu̱xgux, rü marü taxũtáma togagu nixĩ. Notürü ngẽxgumachi ngexerüüxe cuchiü̃wa ngẽxmaxexü̃ yama̱xgügu, rü ngẽxguma rü tá togagu nixĩ.
20 Notürü ngẽxguma chi toxü̃ quixuxgux, rü taxuca̱xma tayanguxẽxẽ i ngẽma Tupanaégagu cumaxã nüxü̃ tixuxü̃ —nhanagürügü.
21 Rü ngĩma rü inangãxü̃ga rü: —Marü name —ngĩgürügü. Rü yexguma ga ngĩma rü nüxü̃ irümoxẽ, rü nümagü rü ngĩxna nawoegu. Rü yemawena rü yema ngĩrü ĩã̱xwa iyana̱i̱x ga napana̱xã ga dáunütaxü̃.
22 Rü yema taxre ga ngugütaeruü̃gü rü ínama̱xpǘneanexü̃wa naxĩ rü tamaepü̱x ga ngunexü̃ yexma narücu̱xgü. Rü yoxni ga churaragü rü guxü̃anegu naxca̱x nadaugü rü taxuguma nüxü̃ nayangaugü, rü düxwa Yericóarü ĩaneca̱x nawoegumare.
23 Rü yexguma ga nüma ga yema taxre ga ngugütaeruü̃gü rü ma̱xpǘneanewa narüchoü̃ rü natü ga Yurdáũarü tocutüwa naxĩ ga Yuchué íyexmaxü̃wa. Rü namaxã nüxü̃ nixugüe ga guxü̃ma ga nüxü̃ ngupetügüxü̃.
24 Rü nhanagürügü: —Nüma ya Cori ya Tupana rü marü tüxna nanaxã i guxü̃ma i ngẽma naane. Rü ngẽmaca̱x i guxü̃ma i ngẽma nachixü̃anecüã̱x i duü̃xü̃gü rü poraãcü tüxü̃ namuü̃e —nhanagürügü.
