Josué 23:1-16
23 Rü mucüma ga taunecü nangupetü nax Tupana rü Iraéutanüxü̃güxü̃ nangü̃xẽẽxü̃ nax norü uanügüxü̃ naporamaegüxü̃ca̱x. Rü yexguma ga Yuchué rü marü naya.
2 Rü nüma ga Yuchué rü guxü̃ma ga Iraéutanüxü̃güarü ãẽ̱xgacügüca̱x nangema. Rü yema wüxitücumüchigüarü ãẽ̱xgacügüca̱x nangema, rü yema ãẽ̱xgacügü ga guxchaxü̃güarü mexẽẽruü̃ca̱x nangema, rü yema churaragüerugüca̱x rü ta nangema. Rü nhanagürü nüxü̃: —Marü chipa erü marü chaya.
3 Pema rü marü nüxü̃ pedau ga yema naxüxü̃ ga Cori ya Tupana ga yexguma nadaiãgu ga yema duü̃xü̃gü ga perü uanügü ixĩgüxü̃. Yerü nüma ga Cori ya Tupana rü peétüwa naxü.
4 Chama rü wüxitücumüchigüna chanaxã ga yema naane ga nagu pinguchigüxü̃. Rü tama yema naane ga marü penapuxü̃ica nixĩ ga pexü̃ chinuxü̃, notürü namaxã chanangauxẽxẽ i ngẽma naane i taxũta penapuxü̃ i natü i Yurdáũwa naxügü i léstewa, rü nhu̱xmata Már i Mediterániuwa nangu i oéstewaama.
5 Rü ngẽma duü̃xü̃gü i nhu̱xmax ngẽma naanegu ãchiü̃güxü̃, rü Cori ya Tupana rü tá nawa ínanawoxü̃. Rü pema rü tá pegüxü̃́ penayaxu ngẽma Cori ya Tupana nüxü̃ ixuxü̃rüxü̃.
6 ¡Rü mea peyanguxẽxẽ i ngẽma mugü i Moichéarü poperagu ümatüxü̃! ¡Rü ngẽma naxümatüxü̃ãcü nagu pemaxẽ!
7 ¡Rü taxũtáma namaxã pexãxma̱xgü rü pexãtegü i ngẽma togü i duü̃xü̃gü i nhu̱xmax rü ta petanügu ãchiü̃güxü̃! ¡Rü taxũtáma norü tupanaxü̃ pecua̱xüxü̃gü, rü bai tá i naga pexĩnüexü̃, rü bai tá i norü tupanaéga penaxuxuchixü̃, rü bai tá i norü tupanaégagu mexü̃ pexueguxü̃!
8 ¡Rü nhu̱xmarüü̃tama rü guxü̃gutáma Cori ya tórü Tupanawe perüxĩ!
9 Rü nüma ga Cori ya Tupana rü marü pepe̱xewa ínanawoxü̃ãcu ga ĩanegü ga itaxü̃ne rü iporane. Rü nhu̱xmata nhama i ngunexü̃wa nangu rü taxúema pexü̃ tarüporamae.
10 Rü wüxíetama i pema rü pexü̃́ natauxcha nax 1,000 i duü̃xü̃güxü̃ nax pibuxmüxẽẽxü̃, erü Cori ya perü Tupana rü peétüwa naxü rü pexca̱x nügü namaxã nadai, yema nümatama pemaxã inaxunetaxü̃rüxü̃.
11 ¡Rü pexuãxẽgü rü pegüna pedaugü i perü maxü̃wa nax tama nüxü̃ iperüngümaexü̃ca̱x ya tórü Cori ya Tupana!
12 23:12-13 Rü chama rü chanaxwa̱xe i nüxü̃ nax pecuáxü̃ rü ngẽxguma tá Tupanana pexĩgachigu rü nhaa duü̃xü̃gü i petanüwa ngẽxmagüxü̃maxã pexãmücügu, rü namaxã pexãxma̱xgügu, rü pexãtegügu, rü nüma ya Cori ya perü Tupana rü taxũtáma pexü̃ narüngü̃xẽẽ nax ípenawoxü̃xü̃ca̱x i ngẽma duü̃xü̃gü i petanüwa ngẽxmagüxü̃. Rü nüma ya Tupana rü perü guxchaxü̃ruxü̃ tá nayaxĩgüxẽxẽ i ngẽma duü̃xü̃gü nax ngẽmaãcü naxme̱xgu peyi̱xü̃ca̱x. Rü ngẽmaãcü nhama texé pexca̱xwena nacua̱i̱xcaxü̃rüxü̃ tá nixĩ nhu̱xmatáta taxúetáma petanüwa íyaxü nawa i nhaa mexü̃ i naane ya tórü Cori ya Tupana pexna ãxü̃.
13 Nüü̃ nadau 23:12
14 Chama rü marü paxa tá chayu. Notürü naxü̃pa nax chayuxü̃ rü chanaxwa̱xe i meama nüxna pecua̱xãchie rü Cori ya Tupana rü marü nayanguxẽxẽ ga guxü̃ma ga yema pemaxã nüxü̃ yaxuxü̃. Rü bai ga wüxi ga yema norü uneta ga nüxü̃ naxüpetüxü̃ ga tama yanguxẽẽxü̃.
15 23:15-16 Notürü ngẽxgumarüxü̃ nax yanguxẽẽãxü̃ i guxü̃ma i ngẽma mexü̃ ga pemaxã inaxunetaxü̃, rü ngẽxgumarüxü̃ tá ta pexca̱x ínananguxẽxẽ i naguxü̃raü̃xü̃ i guxchaxü̃ i ngẽxguma tama aixcuma naga pexĩnüegu i ngẽma uneta ga pemaxã nüxü̃ yaxuxü̃. Rü ngẽxguma to i tupananetagu perüxĩnüegu rü naxca̱x pemaxẽgu, rü nüma ya Cori ya Tupana rü tá pemaxã nanu, rü paxaxüchi tá pexü̃ inayarüxoxẽxẽ nawa i nhaa naane i mexü̃ i nüma pexna naxãxü̃. Rü bai tá ya wüxíe ípeyaxüãchi —nhanagürü ga Yuchué.
16 Nüü̃ nadau 23:15
