Josué 24:1-33
24 24:1-2 Rü yexguma ga Yuchué rü Chiquéü̃gu nanangutaque̱xexẽxẽ ga guxü̃ma ga duü̃xü̃gü ga Iraéutanüxü̃gü, wüxigu namaxã ga yema wüxitücumüchigüarü ãẽ̱xgacügü ga yaxguã̱xgü, rü ãẽ̱xgacügü ga guxchaxü̃arü mexẽẽruxü̃, rü yema churaragüarü ãẽ̱xgacügü. Rü yéma Tupanape̱xewa nhanagürü: —Yimá tórü Tupana i yixema i Iraéutanüxü̃gü rü nhanagürü: “Nũxcüma ga nüma ga Terá rü nanegü ga Abraáũ rü Naó ga perü o̱xigü ixĩgücü, rü taxtü ga Eufrátecutügu naxãchiü̃gü. Rü yéma nixĩ ga togü ga tupanaxü̃ yacua̱xüü̃güxü̃.
2 Nüü̃ nadau 24:1
3 Notürü ga chama ya Tupana rü yéma taxtü ga Eufrátecutüwa chanayaxu ga Abraáũ, rü Canaã́anegu chayaxũgüchigüxẽxẽ. Rü yéma nixĩ ga nane ga Isáqui nüxna chanamuxü̃ nax yemaacü yamuxü̃ca̱x ga nataagü.
4 Rü Isáquina chanamugü ga taxre ga nane ga Yacú rü Echaú. Rü Echaúna chanaxã ga naane ga máxpü̱xanexü̃ ga Cheígu ãégaxü̃. Notürü ga Yacú rü nanegü rü Eyítuanewa naxĩ.
5 Rü yexguma ga chama ga Tupana rü Eyítuanewa chanamu ga Moiché rü Aróũ. Rü chanadai ga yema Eyítuanecüã̱xgü rü nhu̱xmata naxme̱xwa pexü̃ íchanguxü̃xẽxẽ.
6 Rü yexguma perü o̱xigü Eyítuanewa íchoxü̃gu rü nüma ga Eyítuanecüã̱xgüarü churaragü rü tümawe nangẽgü namaxã ga norü cowarugü, rü naweü̃gü ga cowaru itúgüne, rü nhu̱xmata Már i Dauchiüxü̃wa nangugü.
7 Rü nüma ga perü o̱xigü rü cha̱u̱xca̱x nacagü, rü yemaca̱x ga naweama rü chanaxẽanexẽxẽ naxcha̱xwa ga Eyítuanecüã̱xgü. Rü yexgumarüxü̃ ta chanaxü nax már naétügu inhaxü̃chiüxü̃ca̱x ga yema Eyítuanecüã̱xgü nax yexma nayi̱xü̃ca̱x. Rü pematama nixĩ i nüxü̃ pedauxü̃ ga yema chaxüxü̃ ga yexguma. Rü nhu̱xũchi ga pemax ga Iraéutanüxü̃gü rü yema ínachianexü̃ ga taxúema íxãpataxü̃wa peyexmagü mucüma ga taunecü.
8 Rü yemawena nixĩ ga pexü̃ chichocuxẽẽxü̃ nawa ga yema naane ga Amuréutanüxü̃gü nawa yexmagüxü̃ ga natü ga Yurdáũarü tocutüwa. Rü nüma ga Amuréutanüxü̃gü rü pemaxã nügü nadai, notürü ga chama rü pexü̃ charüngü̃xẽẽ nax nüxü̃ perüporamaegüxü̃ca̱x rü pexme̱xẽgu nayi̱xü̃ca̱x. Rü yemaacü penayaxu ga yema naane.
9 Rü nüma ga Baráqui ga Chipú nane ga guma Moábianearü ãẽ̱xgacü rü pemaxã nügü nadai. Rü nüma ga Baráqui rü Baraáũ ga Beú naneca̱x nangema nax chixexü̃ pemaxã naxueguxü̃ca̱x.
10 Notürü ga chama ya perü Tupana rü nüxna chanachu̱xu ga Baraáũ nax chixexü̃ pemaxã naxueguxü̃ca̱x. Rü yemaacü peétüwa chachogü.
11 Rü yemawena ga pema rü pichoü̃ nawa ga yema natü ga Yurdáũ nhu̱xmata Yericóarü ĩanewa pengugü. Rü yema duü̃xü̃gü ga guma ĩanegu ãchiü̃güxü̃ rü pemaxã nügü nadai. Rü yexgumarüxü̃ ta ga yema duü̃xü̃gü ga Amuréutanüxü̃gü, rü Ferechéutanüxü̃gü, rü Canaã́tanüxü̃gü, rü Etéutanüxü̃gü, rü Yerguechéutanüxü̃gü, rü Ewéutanüxü̃gü, rü Yebuchéutanüxü̃gü rü pemaxã nügü nadai. Notürü ga chamax, rü pexü̃ charüngü̃xẽẽ nax nüxü̃ perüporamaegüxü̃ca̱x.
12 Rü tama pema nixĩ ga perü taragümaxã rü perü würagümaxã nüxü̃ perüporamaexü̃ ga yema taxre ga ãẽ̱xgacügü ga Amuréutanüxü̃güarü. Notürü chama nixĩ ga yéma chanamugüxü̃ ga máxegü nax namuü̃exü̃ca̱x rü yabuxmüxü̃ca̱x naxü̃pa nax yéma pengugüxü̃.
13 Rü chama rü marü pexna chanaxã ga naanegü ga tama pema pexüxü̃, rü ĩanegü ga tama pema pexügüne. Rü nhu̱xmax rü yimagu pexãchiü̃gü, rü penangõ̱xgü i úwagü rü oríwagü ga tama pema ipetogüxü̃”, nhanagürü ga Tupana.
14 Rü nüma ga Yuchué rü nhanagürü ta: —Guxü̃ma i ngẽma pemaxã nüxü̃ chixuxü̃ca̱x rü name nixĩ i mea Cori ya Tupanaga pexĩnüexü̃ rü noxrütama ngúchaü̃ pexüxü̃. Rü name nixĩ i nüxna pexĩgachixü̃ i ngẽma nũxcüma ga perü o̱xigüarü tupanagü ga taxtü ga Eufrátecutüwa rü Eyítuanewa nüxü̃ yacua̱xüü̃güxü̃.
15 Notürü ngẽxguma tama Cori ya Tupanawe perüxĩxchaü̃gux ¡rü nhu̱xmatama nüxü̃ pexu i ta̱xacürü tupanawe tá perüxĩxü̃, rüe̱xna ngẽma tupanagü ga nũxcüma ga perü o̱xigü nüxü̃ icua̱xüü̃güxü̃ ga taxtü ga Eufrátecutüwa, rüe̱xna ngẽma norü tupananetagü i Amuréutanüxü̃gü i nhaa naanegu ãchiü̃güxü̃! Notürü i chamax, rü chauxacügü rü Cori ya Tupanawe tá nixĩ i tarüxĩxü̃ —nhanagürü ga Yuchué.
16 Rü yexguma ga nüma ga duü̃xü̃gü rü nhanagürügü: —Tagutáma nüxna tixĩgachi ya tórü Cori ya Tupana, rü bai tá i nhuxgu togümare i tupanagüwe tarüxĩxü̃.
17 Yerü nüma nixĩ ya tórü Cori ya Tupana ga tüxü̃ ínanguxü̃xẽẽ̱xü̃ naxme̱xwa ga yema Eyítuanecüã̱xgü. Rü nüma nixĩ ga tape̱xewa naxüãxü̃ ga yema muxü̃ma ga mexü̃gü ga noxrütama poramaxã naxüxü̃. Rü nüma nixĩ ga tüxna nadauxü̃ rü tüxü̃ ínapoxü̃xü̃ nüxna ga tórü uanügü ga yexguma norü naanewa ichopetügu.
18 Rü nüma ga Cori ya Tupana nixĩ ga tape̱xewa ínawoxü̃ãxü̃ ga Amuréutanüxü̃gü rü yema togü ga duü̃xü̃gütücumügü ga nhaa naanegu ãchiü̃güxü̃. Rü ngẽmaca̱x tá nawe tarüxĩ, erü nüma nixĩ i tórü Tupana yixĩxü̃ —nhanagürügü.
19 Notürü ga nüma ga Yuchué rü duü̃xü̃güxü̃ nangãxü̃ rü nhanagürü: —Pema rü taxũtáma pexü̃́ natauxcha nax Cori ya Tupanaarü ngúchaü̃ pexügüxü̃, erü nüma ya Tupana rü naxüüne rü poraãcü nüxü̃́ tachu̱xu. Rü taxũtáma pemaxã yaxna naxĩnü ega tama naga pexĩnüegu rü chixexü̃ pexügügu.
20 Rü ngẽxguma tá nüxna pexĩgachigu rü togü i tupanagüwe perüxĩxgu, rü nüma ya Cori ya Tupana rü tá pemaxã nanu rü tá pexü̃ napoxcue rü tá pexü̃ nayarüxoxẽxẽ woo mucüma ga taunecügu mea pexna nax nadauxü̃ —nhanagürü ga Yuchué.
21 Rü nüma ga duü̃xü̃gü rü nanangãxü̃ rü nhanagürügü: —Toma rü tagutáma nüxna tixĩgachi ya Cori ya Tupana, rü aixcuma norü ngúchaü̃ tá taxügü —nhanagürügü.
22 Rü yexguma ga nüma ga Yuchué rü nhanagürü: —Nhu̱xma rü pematama nixĩ i nüxü̃ pexuxü̃ nax aixcuma tá norü ngúchaü̃ pexügüxü̃ ya Cori ya Tupana —nhanagürü. Rü nüma ga duü̃xü̃gü rü nanangãxü̃ rü nhanagürügü: —Ngẽmáacüx, tomatama nixĩ i nüxü̃ tixuxü̃ rü nagu tarüxĩnüexü̃ nax aixcuma Coriwe tarüxĩxü̃ —nhanagürügü.
23 Rü yexguma ga nüma ga Yuchué rü nhanagürü: —¡Ẽcü ípenawogü i ngẽma togü i tupananetachicüna̱xãgü i petanüwa ngẽxmagüxü̃, rü aixcuma naxca̱x pewoegu ya yimá Cori ya tórü Tupana ya yixema i Iraéutanüxü̃gü! —nhanagürü.
24 Rü nüma ga duü̃xü̃gü rü nanangãxü̃ rü nhanagürügü: —Toma rü aixcuma tórü Cori ya Tupanaarü ngúchaü̃ tá taxügü, rü ngẽma tomaxã nüxü̃ yaxuxü̃ rü tá tanaxü —nhanagürügü.
25 Rü yema ga ngunexü̃gutama rü Chiquéü̃arü ĩanewa, rü nüma ga Yuchué rü duü̃xü̃gümaxã wüxigu Tupanamaxã inaxügae nax guxü̃gutáma naga naxĩnüexü̃ca̱x. Rü nhu̱xũchi yema duü̃xü̃gümaxã nüxü̃ nixu ga Tupanaarü mugü rü norü ucu̱xẽgü.
26 Rü guxü̃ma ga yema mugü ga duü̃xü̃gümaxã nüxü̃ yaxugüxü̃, rü nanaxümatü nagu i Tupanaarü mugüpane. Rü yemawena ga Yuchué rü nanayaxu ga wüxi ga tacü ga nuta rü yema carabáyu ga Tupanapatacüwawa rüxüxü̃tüü̃gu nayaxǘ.
27 Rü guxü̃ma ga yema duü̃xü̃gümaxã nüxü̃ nixu rü nhanagürü: —Daa nutawa tá nixĩ i nüxna pecua̱xãchiexü̃ i guxü̃ma i ngẽma Cori ya Tupana pemaxã nüxü̃ ixuxü̃. Rü ngẽxgumarüxü̃ ta rü daatama nuta nixĩ ya cua̱xruxü̃ ixĩcü i ngẽxguma pema rü taxũtáma peyanguxẽẽ̱xgu i ngẽma Tupanamaxã nüxü̃ pexuxü̃ —nhanagürü ga Yuchué.
28 Rü yemawena ga nüma ga Yuchué rü ínayamugü ga yema duü̃xü̃gü nax wüxichigü norü naaneca̱x nawoeguxü̃ca̱x.
Yuchuéarü yuxchiga
29 Rü yemawena rü noxre ga ngunexü̃gu namaxü̃ ga Yuchué ga Núu nane ga Tupanaarü duü̃. Rü nayu ga yexguma 110 ga taunecü nüxü̃́ yexmagu.
30 Rü norü naanegutama nayata̱xgü ga Tima-Chéraarü ĩanewa. Rü yima ĩane rü Efraĩ́arü naanearü máxpü̱xanexü̃wa nangexma rü Gaáxarü ma̱xpǘnearü nórchiwa naxü.
31 Rü yexguma Yuchué maxü̱̃xgu rü nüma ga yema Iraéutanüxü̃gü rü mea Cori ya Tupanaga naxĩnüe. Rü woo ga Yuchuéwena rü mea naga naxĩnüe ga yexguma tauta nayueyane ga yema Iraéutanüxü̃güarü yaxguã̱xgü ga nüxü̃ icuáxü̃ ga guxü̃ma ga yema Cori ya Tupana nũxcüma naxca̱x üxü̃.
32 --
33 --
