Josué 3:1-17
3 Rü moxü̃ãcü pa̱xmamaxü̃chi rü nüma ga Yuchué rü guxü̃ma ga Iraéutanüxü̃gümaxã rü Chitíü̃wa inaxĩãchi nhu̱xmata natü ga Yurdáũanacüwa nangugü. Rü naxü̃pa ga nax yachoü̃xü̃ rü yexmatama napegü.
2 3:2-3 Rü yexguma tamaepü̱x ga ngunexü̃ ngupetüguwena rü yema Iraéutanüxü̃güarü ãẽ̱xgacügü rü norü duü̃xü̃gütanü nixĩãgüetanü rü namaxã nüxü̃ nixu rü nhanagürügü: —Ngẽxguma nüxü̃ peda̱xgu i chacherdótegü i Lewítanüxü̃ nax nua nachopetüxü̃ namaxã i ngẽma baú i Cori ya Tupanaarü mugüchixü̃ ¡rü ípechoxü̃ i ngextá ípengexmagüxü̃wa rü nawe perüxĩ!
3 Nüü̃ nadau 3:2
4 Rü ngẽmaãcü tá nüxü̃ pecua̱x nax ngextáama pexĩxü̃ yerü ga ü̃pa rü taguma texé i petanüwa nagu tixũ i ngẽma nama. ¡Notürü taxúetáma nüxna tangaicama i ngẽma baú! ¡Rü guxü̃gutáma wüxi i quirúmetru tá nixĩ i norü yáxü̃ i nawe nax pexĩxü̃tanüxü̃! —nhanagürügü.
5 Rü yexguma ga Yuchué rü yema Iraéutanüxü̃güxü̃ nhanagürü: —¡Tupanape̱xewa pegü pimexẽẽgü! Erü moxü̃ rü nüma ya Cori ya Tupana rü tá pexü̃ nüxü̃ nadauxẽxẽ i wüxi i mexü̃ i taxü̃ i norü poramaxã naxüxü̃ —nhanagürü.
6 Rü yexguma ga nüma ga Yuchué rü yema chacherdótegüxü̃ nhanagürü: —¡Ẽcü wixpe̱xegu peyangetaxü̃ i ngẽma baú i Tupanaarü mugü nawa ngẽxmaxü̃ rü tope̱xe namaxã pexĩ nawa i ngẽma natü i Yurdáũ! —nhanagürü. Rü yexguma ga nüma ga chacherdótegü rü duü̃xü̃güpe̱xegu nayangetaü̃gü ga yema baú.
7 Rü yexguma ga Cori ya Tupana rü nhanagürü Yuchuéxü̃: —Nhu̱xmacürüwa tá cuxü̃ chataxẽxẽ rü yexeraãcü tá cuxna cua̱x chaxã i nape̱xewa i nhaa Iraéutanüxü̃gü. Rü ngẽmaãcü tá nüxü̃ nadaugü nax chama rü aixcuma chacuxü̃taguxü̃ yexgumarüxü̃ ga Moichéxü̃tawa chayexmagurüxü̃.
8 ¡Ẽcü ngẽma chacherdótegüxü̃ namu nax yangetaü̃güãxü̃ca̱x i ngẽma baú i chorü mugü nawa ngẽxmaxü̃! Rü ngẽxguma natü i Yurdáũwa nangugügu ¡rü nachixüwa nachoü̃ rü ngẽxma yachigütanüãchi! —nhanagürü.
9 Rü yexguma ga Yuchué rü yema Iraéutanüxü̃güxü̃ nhanagürü: —¡Nua pexĩ rü iperüxĩnüe i ngẽma ore i Cori ya tórü Tupana nüxü̃ ixuxü̃!
10 Rü ngẽmawa tá nixĩ i nüxü̃ pecuáxü̃ ya Tupana ya maxü̃cü rü petanüwa nax nangexmaxü̃. Rü nüma ya Cori rü tá ínanawoxü̃ i Canaã́tanüxü̃gü, rü Etéutanüxü̃gü, rü Ewéutanüxü̃gü, rü Ferechéutanüxü̃gü, rü Yerguechéutanüxü̃gü, rü Amuréutanüxü̃gü rü Yebuchéutanüxü̃gü nawa i ngẽma naane nax pema nawa pingugüxü̃ca̱x.
11 ¡Rü nüxü̃ perüdaunü i ngẽma baú i Cori ya Tupana i guxü̃ i naanearü yora ixĩcüarü mugüchixü̃ nax nhuxãcü pepe̱xewa yaxüexü̃ i natü i Yurdáũwa!
12 Rü ngẽmaca̱x, Pa Duü̃xü̃güx ¡rü nüxü̃ pexuneta i 12 i yatügü! Rü ngẽma 12 i petücumüwachigü, rü tá nüxü̃ pexuneta i wüxi.
13 Rü ngẽxguma ngẽma chacherdótegü i ngẽma baú i Cori ya Tupanaarü mugüchixü̃ ingegüxü̃ rü natü i Yurdáũchiüwa nachixü̃gu, rü ngẽxguma tá nixĩ i ngẽma natü rü taxregu yayauxyeü̃chiüxü̃, rü ngẽma dexá i dauxquena ne yaxü̃ rü tá ínayachaxãchi, rü nhama yapoxyepe̱xexü̃rüxü̃ tá nixĩ —nhanagürü.
14 3:14-16 Rü nüma ga yema Iraéutanüxü̃gü rü inaxĩãchi ga yema ínapegüxü̃wa ga natü ga Yurdáũwa nax yachoü̃xü̃ca̱x. Rü nanetüarü buxgüarü tauemacü nixĩ ga yexguma, rü yema natü ga Yurdáũ rü poraãcü narübai. Rü nümagü ga chacherdótegü rü duü̃xü̃güpe̱xegu naxĩ namaxã ga yema baú ga Tupanaarü mugü nawa yexmaxü̃. Rü yema chacherdótegü ga baú ingetaü̃güxü̃ rü yexguma yema natü ga Yurdáũchiüwa nachoü̃gu, rü yema dexá ga dauxquena ne yaxü̃ rü ngürüãchi ínayachaxãchi. Rü guma dauxquenaxü̃chi yexmane ga ĩane ga Adáũ ga dauxü̃taechica ga Charetáü̃arü ngaicamána, rü ngürü nabainagü ga dexá ga yéma, nhama yapoxyepe̱xexü̃rüxü̃. Notürü yema íyachoü̃xü̃arü tawaama ga dexá rü niiya̱x nhu̱xmata már ya Ngearü Maxü̃ã́xü̃wa nangu. Rü yemaacü ga yema natü ga Yurdáũ rü taxregu niyauxye, rü yema Iraéutanüxü̃gü rü nichoü̃ ga ĩane ga Yericóarü to̱xma̱xtawa.
15 Nüü̃ nadau 3:14
16 Nüü̃ nadau 3:14
17 Rü yemaacü ga guxü̃ma ga yema duü̃xü̃gü rü paanexü̃wa nichoü̃ nawa ga yema natü ga Yurdáũ. Rü yexgumayane ga yema chacherdótegü ga yangegüxü̃ ga yema baú ga Cori ya Tupanaarü mugüchixü̃ rü natüarü ngãxü̃chiteewa namaxã nayachaxãchitanü ga paanexü̃wa.
