Josué 6:1-27
6 Rü taxucürüwama texé Yericóarü ĩanegu taxücu rüe̱xna ítaxũxũ, yerü ga norü poxeguxü̃arü ĩã̱xgü rü narüwãxtagü nax yemaacü taxuwama nachocuxü̃ca̱x ga Iraéutanüxü̃gü.
2 Notürü nüma ga Cori ya Tupana rü Yuchuéxü̃ nhanagürü: —Chama rü marü cuxna chanaxã ya Yericó i guxü̃ma i norü ãẽ̱xgacümaxã rü norü churaragümaxã.
3 Rü curü churaragü i Iraéutanüxü̃gü rü 6 i ngunexü̃ tá yima ĩanexü̃ ínayachoegu. Rü wüxi i üeguãchi tá naxügü i wüxichigü i ngunexü̃gu.
4 Rü ngẽma baú i chorü mugü nawa ngẽxmaxü̃pe̱xegu tá naxĩ i 7 i chacherdótegü i carnéruchatacu̱xremaxã icornétaã́xü̃. Rü ngẽxguma norü 7 i ngunexü̃wa nanguxgu, rü 7 e̱xpü̱xcüna tá yima ĩanexü̃ ínayachoegu i curü churaragü, rü ngẽxgumayane i ngẽma chacherdótegü rü tá norü cornétagügu nicuegü.
5 Rü ngẽxguma nüxü̃ pexĩnüegu nax poraãcü yacuegüãxü̃ ya cornétagü rü tá tagaãcü aita pexüe. Rü ngẽxguma i norü poxeguxü̃ ya yima ĩane rü tá nangĩãchi. Rü ngẽxgumayane rü wüxichigü i pemax rü tá nagu pechocu ya yima ĩane —nhanagürü ga Tupana.
6 Rü yexguma ga nüma ga Yuchué rü chacherdótegüca̱x naca rü nhanagürü nüxü̃: —¡Peyange i ngẽma baú i Cori ya Tupanaarü mugüchixü̃! Rü 7 i pemax rü ngẽma baúpe̱xegu tá pexĩ namaxã ya cornéta i carnéruchatacu̱xrenaxca̱x ixĩgüne —nhanagürü.
7 Rü yema duü̃xü̃güxü̃ rü ta nhanagürü ga Yuchué: —¡Ẽcü nüxü̃ ípeyachoegu ya daa ĩane! Rü pemax i churaragü rü tá baú i Cori ya Tupanaarü mugüchixü̃pe̱xegu tá pexĩ —nhanagürü.
8 Rü guxü̃ma ga duü̃xü̃gü rü yema Yuchué namaxã nüxü̃ ixuxü̃ãcü nanaxügü. Rü yema 7 ga chacherdótegü rü norü cornétagu yacuegüãcüma yema baú ga Cori ya Tupanaarü mugüchixü̃pe̱xegu naxĩ. Rü yema baú rü yema chacherdótegüwe namaxã nixĩxü̃tanü.
9 Rü yema churaragü rü chacherdótegüpe̱xegu naxĩ, rü yema togü ga churaragü ga baúarü daruxü̃ rü wixweama naxãgü. Rü nüma ga chacherdótegü rü norü cornétagu nicuegüecha rü taguma inarüchianegü.
10 Notürü guxü̃ma ga yema churaragü, rü Yuchué nüxna naxãga ga bexmamare inaxĩxü̃ca̱x nhu̱xmatáta nüma namuã nax guxü̃ma wüxigu poraãcü aita naxüexü̃ca̱x.
Iraéutanüxü̃gü nanapugü ga ĩane ga Yericó
11 Rü yema nüxíraxü̃ ga ngunexü̃gu rü nüma ga Yuchué rü nanamu ga chacherdótegü rü churaragü nax wüxicana guma ĩanexü̃ nax íyangeegutaü̃güãxü̃ ga yema baú ga Cori ya Tupanaarü mugüchixü̃. Rü yemawena ga yema duü̃xü̃gü rü nawoegu naxca̱x ga yema ínapegüxü̃wa. Rü yexma nüxü̃ nanangupetüxẽxẽ ga chütaxü̃.
12 Rü moxü̃ãcü ga nüma ga Yuchué rü pa̱xmamaxü̃chi ínarüda, rü nüma ga chacherdótegü rü nanayauxtaü̃gü ga yema baú ga Cori ya Tupanaarü mugüchixü̃.
13 Rü yema 7 ga chacherdótegü rü baú ga Cori ya Tupanaarü mugüchixü̃pe̱xegu naxĩ rü nagu yacuegüãcüma ga guma norü cornétagü. Rü yema churaragü rü wixpe̱xegu naxĩ, rü yema togü rü baúweama naxãgü. Rü ga cornétagü rü taguma inarüchianegü.
14 Rü moxü̃ãcü rü wena guma ĩanexü̃ ínayachoegu, rü nhu̱xmachi yema ínapegüxü̃ca̱x nawoegu. Rü 6 ga ngunexü̃ nixĩ ga yemaacü naxügüãxü̃.
15 Rü yexguma norü 7 ga ngunexü̃wa nanguxgu, rü ngunetüxü̃ ínarüdagü. Rü guma ĩanexü̃ ínichoeguãchitanücüxü yema nüxíra naxügüãxgurüxü̃, notürü yema ngunexü̃gu rü 7 e̱xpü̱xcüna nüxü̃ ínichoeguãchitanücüxü.
16 Rü yexguma ga yema chacherdótegü rü 7 e̱xpü̱xcüna norü cornétagu yacuegügu, rü Yuchué rü yema duü̃xü̃güxü̃ namu rü nhanagürü: —¡Aita pixüe! Rü nüma ya Cori ya Tupana rü marü pexna nanaxã ya daa ĩane.
17 Rü daa ĩane, rü guxü̃ma i ta̱xacü i nawa ngẽxmaxü̃maxã, rü tá peyanaxoxẽxẽ, erü ngẽmaãcü nixĩ i Cori ya Tupana i nüxü̃ yaxuxü̃. Rü ngẽma Raábiicatátama iyixĩ i taxũtáma ngĩxü̃ pima̱xcü namaxã i ngẽma duü̃xü̃gü i ngĩchiü̃wa ngẽxmagüxü̃. Erü ngĩma iyixĩ ga iyacu̱xgüãxü̃ ga yema taxre ga yatügü ga ngugütaewa yéma imugüxü̃.
18 ¡Rü nhu̱xmax i pemax rü pegüna pedaugü nax tama penayaxuxü̃ i ta̱xacü i norü ngẽmaxü̃ ya yima ĩanewa ngẽxmaxü̃! Erü nüma ya Cori ya Tupana rü namaxã nanaxuegu ya daa ĩane nax peyanaxoxẽẽxü̃ca̱x rü penadaiãcuxü̃ca̱x. Rü ngẽxguma taxũtáma ngẽmaãcü penaxü̱xgux, rü nüma ya Tupana rü tá chixexü̃ tamaxã naxuegu rü tá chixexü̃ taxca̱x ínanguxẽxẽ.
19 Notürü ngẽma úiru rü diẽrumü rü guxü̃ma i ngẽmaxü̃gü i brṍchenaxca̱x rü férunaxca̱x, rü Cori ya Tupanaca̱x tá nixĩ rü norü ngẽmaxü̃gütanügu tá penanu —nhanagürü ga Yuchué.
20 Rü yexguma ga nüma ga yema duü̃xü̃gü rü aita naxüe rü ga cornétagü rü naxãgatanü. Rü yexguma guma cornétagagüxü̃ naxĩnüegu ga nüma ga Iraéutanüxü̃gü rü inanaxügüe nax poraãcü aita naxüexü̃. Rü yexguma ga guma ĩanearü poxeguxü̃ rü napuxãchi. Rü yexguma ga nüma ga Iraéutanüxü̃gü rü yoxni tauxchaãcü yexma nachocu, rü noxrüxü̃ nayaxĩgüxẽxẽ.
21 Rü yemawena rü taramaxã tüxü̃ nadai ga yatüxe, rü ngexe, rü ngextü̱xügüxe, rü yaxguã̱xgü, rü wocagü, rü carnérugü, rü búrugü. Rü noxtacüma guxü̃ma nadai.
22 Rü nüma ga Yuchué rü yema taxre ga yatügü ga ngugütaewa ĩxü̃xü̃ nhanagürü: —¡Ẽcü ngĩpatawa pexĩ i ngẽma nge i Raábi rü guxü̃ma i ngĩtanüxü̃maxã nua ngĩxü̃ pega, yema ngĩmaxã ipexunetaxü̃rüxü̃! —nhanagürü.
23 Rü nümagü rü ngĩchiü̃gu nachocu. Rü Raábixü̃ ínagaxüchigü tümamaxã ya ngĩnatü, rü ngĩé, rü ngĩeneegü, rü guxü̃ma ga ngĩtanüxü̃maxã. Rü wüxi ga nachica ga mexü̃ ga Iraéutanüxü̃gü ípegüxü̃arü düxétüwaama yexmaxü̃gu ngĩxü̃ nayamugü.
24 --
25 --
26 --
27 Rü nüma ga Cori ya Tupana rü Yuchuéxü̃ narüngü̃xẽẽ, rü yemaca̱x guxü̃ma ga yema naanewa nangu ga nachiga.
