Josué 7:1-26
7 Rü wüxi ga Yudátanüxü̃ ga Acáü̃gu ãégaxü̃ ga Cármi nane ga Cháditaxa rü Chárataxa ixĩxü̃, rü nanade ga nhuxre ga yemaxü̃gü ga Tupana chu̱xuxü̃. Rü yemaca̱x ga guxü̃ma ga Iraéutanüxü̃gü rü naxüétüü̃gü ga Cori ya Tupanape̱xewa yerü ga Acáü̃ rü nanayaxu ga yema Tupana chu̱xuxü̃. Rü yemaca̱x ga Cori ya Tupana rü Iraéutanüxü̃gümaxã nanu.
Acáü̃arü chixexü̃gagu rü Iraéutanüxü̃güxü̃ narüporamaegü ga ĩane ga Áixarü duü̃xü̃gü
2 Rü nüma ga Yuchué rü Yericówa inanamuãchitanü ga nhuxre ga yatügü nax ĩane ga Áixwa yangugütaegüxü̃ca̱x, rü ngoxi nüxü̃́ natauxcha nax guma ĩane rü tá nagu nachocuxü̃ca̱x. Rü guma ĩane rü ĩane ga Betéuarü léstewaama nayexma ga chianexü̃ ga Betawéü̃arü ngaicamána. Rü nümagü rü yéma naxĩ rü nayangugütaegü.
3 Rü yexguma nawoegugu, rü Yuchuéxü̃ nhanagürügü: —Tama tanaxwa̱xe i guxü̃ i churaragümaxã naxca̱x ítayachõõchi ya yima ĩane ya Áix, erü 2,000 rüe̱xna 3,000 i churaragümaxã nixĩ i marü yanguxü̃ nax yapu̱xuxü̃ ya yima ĩane. ¡Rü taxũtáma guxü̃ i churaragü ngẽ́ma cumugü! Erü tama namu i ngẽma duü̃xü̃gü ya yima ĩanena daugüxü̃ —nhanagürügü.
4 Rü yemaacü 3,000 ga churaragü nixĩ ga Áixca̱x íyachõõchixü̃. Notürü nüma ga yema duü̃xü̃gü rü Iraéutanüxü̃güxü̃ narüporamaegü rü nayabuxmüxẽxẽ.
5 Rü 36 ga Iraéutanüxü̃güxü̃ nadai, rü guxema to̱xoguã̱x rü tümawe nangẽgü nhu̱xmata guma ĩanechipenüwa nangugü, rü ínatũãchianexü̃gu tüxü̃ nayadai. Rü yemaca̱x ga Iraéutanüxü̃gü rü narümaxãchitanü rü namuü̃e.
6 Rü nüma ga Yuchué rü yema Iraéutanüxü̃güarü ãẽ̱xgacügü rü norü ngechaü̃maxã nügüchirugu nagáugüe rü waixümüte̱xemaxã nügü nigügüeru. Rü nhu̱xmachi yema baú ga Tupanaarü mugüchixü̃pe̱xegu nanangücuchitanü nhu̱xmata nayáuane.
7 Rü nüma ga Yuchué rü nhanagürü: —Pa Corix ¿tü̱xcüü̃ cuyachoü̃xẽxẽ ga nhaa duü̃xü̃gü ga natü ga Yurdáũwa? ¿Ẽ̱xna Amuréutanüxü̃güme̱xẽgu toxü̃ cuyixẽẽxü̃ca̱x nixĩ i nua toxü̃ cugagüxü̃ nax ngẽmaãcü toxü̃ nadaixü̃ca̱x? Rü narümemae chi nixĩ ga natü ga Yurdáũarü tocutü chitama tarüchoxü̃.
8 Pa Corix. ¿Ta̱xacü tá chaxüxü̃ i nhu̱xmax? Erü nüma i Iraéutanüxü̃gü rü marü norü uanücha̱xwa nibuxmü.
9 Rü nüma i Canaã́tanüxü̃gü rü guxü̃ma i duü̃xü̃gü i nhaa naanegu pegüxü̃ rü tá nüxü̃ nacuáchigagü i ngẽma toxü̃ ngupetüxü̃. Rü nüma rü tá wüxigu toxca̱x ínayachõõchi nax toxü̃ nadaixü̃ca̱x, rü taxúetáma ítayaxü i totanüwa. ¿Rü texé tá cuxü̃ ticua̱xüxü̃ rü cuxü̃ tataxẽxẽ i ngẽxguma? —nhanagürü ga Yuchué.
10 Rü nüma ga Cori ya Tupana rü Yuchuéxü̃ nangãxü̃ga rü nhanagürü: —¡Inachi! ¿Ta̱xacü ngẽ́ma cuxü i nhaxtüanegu cunangücuchixü̃?
11 Rü nüma i Iraéutanüxü̃gü rü chixexü̃ naxügü. Erü nümagü rü tama nayanguxẽxẽ i ngẽma mugü ga namaxã nüxü̃ chixuxü̃. Rü nanayauxgüama i ngẽma ngẽmaxü̃gü i nüxna chachu̱xuxü̃. Rü meama nüxü̃ nacua̱xgüãcüma naxca̱x nangĩ̱xgü i ngẽma choxrü ixĩxü̃, rü norü ngẽmaxü̃gütanügu nayacu̱xgü.
12 Rü ngẽmaca̱x i pemax i Iraéutanüxü̃gü rü taxucürüwama nüxü̃ perüporamae i perü uanügü. Rü naxcha̱xwa tá pibuxmü rü pegagutama nixĩ i namexü̃ i noxtacüma peyuexü̃. Rü ngẽxguma i pema i nhu̱xmax rü tama paxa ípenaguxgu i ngẽma pexna chachu̱xuxü̃, rü marü taxũtáma petanüwa changexma.
13 ¡Rü nhu̱xmax rü inachi, rü nangutaque̱xexẽxẽ i duü̃xü̃gü! ¡Rü namaxã nüxü̃ ixu nax moxü̃ca̱x nügü yamexẽẽgüxü̃ nax ngẽmaãcü chape̱xewa ínangugüxü̃ca̱x! Erü chama i Cori ya perü Tupana rü nhacharügü: “Pemax, Pa Iraéutanüxü̃güx, rü marü penayaxu i ngẽma ngẽmaxü̃gü i pexna chachu̱xuxü̃. Rü ngẽxguma taxũtáma ípenaguxgu rü tama pegüwa nüxü̃ pexoxo̱xgux i ngẽma chixexü̃, rü taxucürüwatáma perü uanügüxü̃ perüporamae”, nhacharügü.
14 Rü moxü̃ pa̱xmama rü petücumümaxãchigü tá chape̱xewa pengugü i guxãma i pema i Iraéutanüxü̃gü. Rü chama i perü Tupana nax chixĩxü̃ rü tá nüxü̃ chaxuneta i ngẽma natücumü i nawa naxüxü̃ i ngẽma yatü i chixexü̃ üxü̃. Rü nhu̱xũchi ngẽma natücumüwa rü tá nügütanüxü̃ãcü chape̱xewa nangugü. Rü chama rü tá nüxü̃ chaxuneta i ngẽma nügütanüxü̃tücumü i nawa nangexmaxü̃ i ngẽma yatü. Rü ngẽmawena rü tá ngẽma nügütanüxü̃tücumüwa rü tá nüxü̃ chaxuneta ya yima ĩpata ya nawa nangexmane i ngẽma chixexü̃ üxü. Rü nhu̱xũchi yima ĩpatacüã̱xtanüwa rü tá nüxü̃ chaxuneta i ngẽma yatü i chixexü̃ üxü̃.
15 Rü yíxema tümaxü̃tagu nüxü̃ iyangaugüxe i ngẽma ngẽmaxü̃gü ga chachu̱xuxü̃, rü tá tüxü̃ nigugü namaxã i tümaxacügü rü guxü̃ma i tümaarü ngẽmaxü̃gü, erü tümagagu chixexü̃ naxca̱x ínangu i Iraéutanüxü̃gü, erü tama naga taxĩnü i chorü mu —nhanagürü ga Tupana.
Acáü̃arü poxcuchiga
16 Rü moxü̃ãcü ga Yuchué rü pa̱xmamaxü̃chi ínarüda rü duü̃xü̃güxü̃ namu nax natücumümaxãchigü Tupanape̱xewa nangugüxü̃. Rü nüma ga Cori ya Tupana rü Yudátücumüxü̃ naxuneta.
17 Rü yexguma ga Yuchué rü Yudátücumümaxã nüxü̃ nixu nax nügütanüxü̃tücumüãcü rü Tupanape̱xewa nax naxĩxü̃. Rü Tupana rü Cháratanüxü̃xü̃ naxuneta. Rü yema Cháratanüxü̃wa rü guma Chádipataxü̃ naxuneta.
18 Rü yema yatüxü̃gü ga Chádipatacüã̱xgü rü Tupanape̱xewa nangugü, rü Tupana nüxü̃ naxuneta ga Acáü̃ ga Cármi nane ga Cháditaxa ga Yudátanüxü̃ ixĩcü.
19 Rü yexguma ga Yuchué rü Acáü̃xü̃ nhanagürü: —Pa Chaunex, rü name nixĩ i cunataxẽxẽ rü nüxü̃ quicua̱xüxü̃ ya Cori ya tórü Tupana. ¡Rü chamaxã nüxü̃ ixu i ta̱xacü nax cuxüxü̃! ¡Rü tauxü̃́ icuyacúxü̃! —nhanagürü.
20 Rü Acáü̃ nanangãxü̃ga rü nhanagürü: —Aixcuma nüxü̃ chixu, rü chixexü̃ chaxü namaxã ya Cori ya tórü Tupana. Rü nhaa nixĩ i ngẽma chaxüxü̃.
21 Rü Yericówa nüxü̃ chadau ga wüxi ga mexechixü̃ ga naxchiru ga Babiróniaanecüã̱xgüarü ü rü 200 tachinü ga diẽru, rü wüximena̱xã ga úiru ga ngãxü̃ ga quíruarü yexera yaxü̃. Rü choxü̃́ nangúchaü̃ ga yema yemaxü̃gü, rü yemaca̱x chaugüxü̃́ chanade, rü chauchiü̃machiãgu chanata̱xgü. Rü ngẽma diẽrutachinügü rü aixepeguama chananu —nhanagürü.
22 Rü yexgumatama ga Yuchué rü Acáü̃chiü̃wa nanamugü ga nhuxre ga yatügü, rü yexma nüxü̃ nayangaugü ga yema yemaxü̃gü ga yexma icu̱xgüxü̃ namaxã ga yema diẽru ga natüü̃guama nuxü̃.
23 Rü nanade ga yema yemaxü̃gü rü Yuchuépe̱xewa nanana nape̱xewa ga guxü̃ma ga Iraéutanüxü̃gü. Rü nümagü ga Iraéutanüxü̃gü rü Tupanape̱xegu nayanu.
24 Rü yemawena rü Acúarü ngatexü̃wa Acáü̃xü̃ nagagü namaxã ga yema diẽru, rü yema naxchiru, rü yema úirumena̱xã, rü nanegümaxã, rü naxacügümaxã, rü norü wocagümaxã, rü norü búrugümaxã, rü norü carnérugümaxã, rü napatamaxã, rü guxü̃ma ga ta̱xacü nüxü̃́ yexmaxü̃maxã.
25 Rü Yuchué rü Acáü̃xü̃ nhanagürü: —¿Tü̱xcüü̃ chixexü̃ tatanüwa ícunguxẽxẽ? Rü nhu̱xmax ya Cori ya Tupana rü ngẽma chixexü̃ tátama nixĩ i cuxna nanguxẽẽxü̃ —nhanagürü. Rü yema nhaxgu ga Yuchué, rü guxü̃ma ga Iraéutanüxü̃gü rü nutamaxã Acáü̃xü̃ rü natanüxü̃güxü̃ nadai. Rü nhu̱xũchi natanüwa nanangĩxichi.
26 Rü yemawena rü nutagü naétüwa nanawogü. Rü gumá nutagü rü nhu̱xmax rü ta ngẽxma naxãũxchita. Rü ngẽmaca̱x i nhu̱xmax i ngẽma nachica rü Acúarü Ngatexü̃gu naxãéga. Rü yemaacü Iraéutanüxü̃gümaxã narüngüxmü ga Cori ya Tupana.
