Josué 9:1-27
9 Rü gumá Etéutanüxü̃güarü ãẽ̱xgacü, rü Amuréutanüxü̃güarü ãẽ̱xgacü, rü Canaã́tanüxü̃güarü ãẽ̱xgacü, rü Ferechéutanüxü̃güarü ãẽ̱xgacü, rü Ewéutanüxü̃güarü ãẽ̱xgacü, rü Yebuchéutanüxü̃güarü ãẽ̱xgacü, rü nüxü̃ nacuáchigagü ga yema Yericówa rü Áixwa ngupetüxü̃. (Rü yema ãẽ̱xgacügü rü natü ga Yurdáũarü oéstegu nixĩ ga naxãchiü̃güxü̃, rü nümaxü̃ rü ínamáxpü̱xanexü̃gu rü togü rü ínametachinüanexü̃gu, rü togü rü Már i Mediterániucutügu rü nhu̱xmata Líbanuarü naanewa nangu.)
2 Rü yexguma ga guxü̃ma ga yema ãẽ̱xgacügü rü nügümaxã nagu narüxĩnüe nax nügü nangü̃xẽẽgüxü̃ca̱x, rü Yuchuémaxã rü Iraéutanüxü̃gümaxã nügü nadaixü̃ca̱x.
3 Notürü nüma ga Ewéutanüxü̃gü ga ĩane ga Gabaóũgu ãchiü̃güxü̃ rü ta nüxü̃ nacuáchigagü ga yema Yuchué üxü̃ namaxã ga guma ĩanegü ga Yericó rü Áix.
4 9:4-5 Rü nagu narüxĩnüe nax nhuxãcü womüxẽẽãcüma nügü ínapoxü̃güxü̃. Rü yemaca̱x Yuchuéxü̃tawa naxĩ ga nhuxre ga norü duü̃xü̃gü ga ingauxchiruxü̃, rü ingauarü chapatuã́xü̃, rü norü tochicaxü̃ ga búrutawa rü ningau. Rü norü wíũchixü̃ rü marü nhuxgumaxü̃güxü̃ nixĩgü, rü norü poũ rü nichúe. Rü yemagu nügü nicu̱xgü nax nhama yáxü̃wa nax ne naxĩxü̃rüxü̃ yixĩgüxü̃ca̱x.
5 Nüü̃ nadau 9:4
6 Rü yexguma yema nachica ga Iraéutanüxü̃gü ípegüxü̃ ga Yigágu ãégaxü̃wa nangugügu, rü Yuchuéxü̃ rü Iraéutanüxü̃güxü̃ nhanagürügü: —Yáxü̃guxü̃ i naanewa ne taxĩ rü tanaxwa̱xe nax tomaxã ipexügagüxü̃ nax tama yigü idaixü̃ca̱x —nhanagürügü.
7 Rü nüma ga Iraéutanüxü̃gü rü Ewéutanüxü̃güxü̃ nangãxü̃gü rü nhanagürügü: —Bexmana i pemax rü torü ngaicamagutama pipegü rü nhuxãcü tá i pemaxã mexü̃ i ĩnüwa tangugüxü̃ —nhanagürügü.
8 Notürü ga nümagü rü Yuchuéxü̃ nangãxü̃gagü rü nhanagürügü: —Toma rü tá pexme̱xwa togü tangexmagüxẽxẽ nax pexü̃́ tapuracüexü̃ca̱x —nhanagürügü. Rü nüma ga Yuchué rü nüxna naca rü nhanagürü: —¿Texé pexĩgü i pemax? ¿Rü ngextá ne pexĩ? —nhanagürü.
9 9:9-10 Rü nümagü rü Yuchuéxü̃ nangãxü̃gagü rü nhanagürügü: —Rü yáxü̃wa ne taxĩ, erü nachigaxü̃ taxĩnüe ya Cori ya perü Tupana. Rü nüxü̃ tacuáchiga ga yema Eyítuanewa naxüxü̃, rü nhuxãcü natü i Yurdáũarü tocutüwa pexü̃ nangü̃xẽẽxü̃ nax penadaixü̃ca̱x ga yema taxre ga ãẽ̱xgacü ga Amuréutanüxü̃güarü ga Cheṹ ga Ebóü̃wa ãẽ̱xgacü ixĩcü, rü Óyi ga Bacháü̃wa ãẽ̱xgacü ixĩcü.
10 Nüü̃ nadau 9:9
11 Rü ngẽmaca̱x i torü ãẽ̱xgacügü rü tomücügü rü nhanagürügü toxü̃: “¡Pewemü tá ípinge i perü namawaxü̃ rü Iraéutanüxü̃gütanüwa ípeyadaugü, rü nhapegüxü̃ tá nüxü̃: ‘Rü pexme̱xwa togü tangexmagüxẽxẽ rü mexü̃ i ĩnüwa pemaxã tangugüchaü̃’, nhapegü ta!” nhanagürügü toxü̃.
12 Rü yexguma itaxĩãchigu nax pexca̱x tayadauxü̃ca̱x rü ga poũ rü nanai, notürü i nhu̱xmax rü marü nichu̱x rü nipamare.
13 Rü yexgumarüxü̃ ta i nhaa naxcha̱xmüxü̃ ga úwachiümaxã tanaxüãcu rü nimexechichire̱x ga noxri itaxĩãchigu, notürü i nhu̱xmax rü marü narügáugü. Rü ngẽxgumarüxü̃ ta namaxã nangupetü i toxchiru rü torü chapatugü, erü yáxü̃wama ne taxĩ —nhanagürügü.
14 Rü nüma ga Iraéutanüxü̃gü rü yema Gabaóũcüã̱xgüwemüxü̃ nangõ̱xnetagü, notürü tama Cori ya Tupanana nacagüexíra ga ta̱xacü tá namaxã naxüexü̃ ga yema duü̃xü̃gü.
15 Rü yexguma ga Yuchué rü yema Gabaóũcüã̱xmaxã mexü̃ ga ĩnüwa nangu, rü namaxã nüxü̃ nixu nax taxũtáma nadaiaxü̃. Rü yema togü ga Iraéutanüxü̃güarü ãẽ̱xgacügü rü Tupanaégagu Yuchuérüü̃tama mexü̃gu yema Gabaóũcüã̱xmaxã narüxĩnüe.
16 Rü tamaepü̱x ga ngunexü̃ ngupetü̱xguwena rü nüma ga Iraéutanüxü̃gü rü nüxü̃ nacua̱xgü nax norü ngaicamagutama naxãchiü̃güxü̃ ga yema Gabaóũcüã̱xgü.
17 Rü yexguma ga nhuxre ga Iraéutanüxü̃güarü churaragü rü inaxĩãchi nax yema Gabaóũcüã̱xgüarü ĩanegüca̱x yadaugüxü̃ca̱x. Rü tamaepü̱x ga ngunexü̃gu norü ĩanegüwa nangugü. Rü guma norü ĩanegü rü Gabaóũ nixĩ, rü Queafíra nixĩ, rü Berúchi nixĩ rü Quiriáchi-Yearíü̃ nixĩ.
18 Notürü nüma ga Iraéutanüxü̃gü rü tama yema Gabaóũcüã̱xgüxü̃ nadai yerü yema norü ãẽ̱xgacügü rü Cori ya Iraéutanüxü̃güarü Tupanaégagu nüxü̃ nixugüe nax taxũtáma nax nadaiaxü̃ca̱x. Rü yemaca̱x ga Iraéutanüxü̃gü ga duü̃xü̃gü rü tama norü ãẽ̱xgacügümaxã nataãxẽgü, rü nachigagu nidexagü.
19 Notürü nümagü ga yema ãẽ̱xgacügü rü nhanagürügü: —Toma rü Cori ya tórü Tupanaégagu namaxã nüxü̃ tixu nax taxũtáma tanadaixü̃. Rü ngẽmaca̱x i nhu̱xmax rü taxucürüwa tanadai.
20 Rü nüé namáxẽ, erü ngẽxguma chi taxũchima tayanguxẽẽgu i ngẽma Tupanamaxã nüxü̃ tixuxü̃ rü nüma ya Tupana rü tomaxã chi nanu —nhanagürügü.
21 Rü yemaacü ga yema ãẽ̱xgacügü ga Iraéutanüxü̃gü rü norü duü̃xü̃gümaxã nüxü̃ nixu nax tama nadaiaxü̃ca̱x ga yema Gabaóũcüã̱xgü. Notürü nüma ga Iraéutanüxü̃gü rü norü dexáarü tooxü̃wa rü üxüarü tooxü̃wa nanapuracüexẽxẽ. Rü yemaacü tama nanadai ga yema Gabaóũcüã̱xgü.
22 --
23 --
24 --
25 --
26 --
27 --
