Juã́ũ 1:1-51
1 Naxü̃pa ga guxü̃ma, rü marü najexma ga Tupana Nane. Rü Tupanamaã najexma rü woetama Tupana nixĩ ga nümax. Nüma rü Tupanaãrü Ore nixĩ i naẽ́ga erü tamaã nüxü̃ nixu i Tupanachiga.
2 Rü naxü̃pa ga guxü̃ma rü nüma ga Tupana Nane rü naxü̃tawatama najexma.
3 Rü guma Nanexü̃ nixĩ ga namuxü̃ ga Tupana na naxüãxü̃ca̱x ga guxü̃ma. Rü nataxuma i ṯacü i nhu̱xma ngẽxmaxü̃ i tama nüma naxüxü̃.
4 Rü Nanewa nixĩ ga najexmaxü̃ ga maxü̃. Rü jema maxü̃ rü guxü̃ ga duü̃xü̃güarü ngóonexẽẽruü̃ nixĩ.
5 Rü jima Nane rü woo chixexü̃ íporaxü̃wa rü duü̃xü̃güxü̃ nüxü̃ nacua̱xẽẽ i Tupanachiga. Rü ngẽma chixexü̃ rü taxucürüwama ngẽma mexü̃xü̃ narüjexera.
6 1:6-7 Rü najexma ga wüxi ga jatü ga Juã́ũ ga baiü̃xẽẽruü̃gu ãẽ́gacü. Rü guma nixĩ ga Tupana núma namucü na nüxü̃ jaxuxü̃ca̱x ga nachiga ga guma ngóonexẽẽruü̃ na jemaãcü guxãma nüxü̃́ jaxõgüxü̃ca̱x.
7 Nüü̃ nadau 1:6
8 Rü nüma ga Juã́ũ rü tama Tupana Nane ja duü̃xü̃güarü ngóonexẽẽruü̃ nixĩ. Notürü nüma nixĩ ga Tupana núma namuxü̃ na nüxü̃ jaxuxü̃ca̱x ga nachiga ga guma ngóonexẽẽruü̃.
9 Rü nhama ga naãnewa nangu ga guma aixcuma Tupana Nane ixĩcü i guxü̃ma i duü̃xü̃güxü̃ ngóonetanüxẽẽcü.
10 Rü nüma ga guma Nane ga Tupanaãrü Ore ixĩcü rü nhama ga naãnewa najexma. Rü woo nagagu nixĩ ga naxüãxü̃ ga guxü̃ma ga nhama ga naãne, notürü nhama ga naãnecü̱̃ã̱x ga duü̃xü̃gü rü tama nüxü̃ nacua̱xgü na texe jiĩxü̃.
11 Nuã norü naãnewatama nangu, notürü norü duü̃xü̃gü ga Judéugü rü tama nanajauxgü.
12 Notürü guxema najauxgüxe rü nüxü̃́ jaxõgüxe rü tüxü̃́ nanatauxchaxẽẽ na Tupanaxãcügü tixĩgüxü̃ca̱x.
13 Rü nhu̱xma rü Tupanaxãcügü tixĩgü ga guxema jaxõgüxe. Notürü tama noxri tabuexü̃gagu nixĩ i ngẽma rü tama tümanatügüarü ngúchaü̃gagu nixĩ. Notürü i nhu̱xma rü Tupanaxãcügü tixĩgü ga guxema jaxõgüxe jerü nümatama ga Tupana rü naxãcügüxü̃ tüxü̃ nixĩgüxẽẽ.
14 Rü nüma ga guma Nane ga Tupanaãrü ore ixĩcü rü narüduü̃. Rü totanüwa najexma rü poraãcü toxü̃ nangechaü̃ rü aixcuma nixĩ ga norü ore. Rü toma nüxü̃ tadaugü ga nhuxãcü na namexẽchixü̃ ga nümax. Rü Nanatüxü̃tawa nanajaxu ga jema jerü nügümaã nüxü̃́ nawüxica̱x.
15 Rü gumachigaxü̃ nixĩ ga jaxuxü̃ ga Juã́ũ ga jexguma nhaxgu: —Daa nixĩ ga guma pemaã nüxü̃ chixuchigacü ga jexguma nhachaxgu:
“Rü jima chaweama ne ũcü rü choxü̃ rüjexeracü nixĩ, jerü woetama marü najexma ga taũta chabuxgu ga chamax”, nhanagürü ga Juã́ũ.
16 Rü jima Tupana Nane rü namexẽchi rü naxme̱xwa nangẽxma i guxü̃ma. Rü naxü̃tawa rü guxü̃guma tanajauxgüecha ga muxũchixü̃ma ga ngü̃xẽẽgü ga mexü̃gü.
17 Rü Muĩséxü̃ nixĩ ga namuxü̃ ga Tupana na tüxü̃ nangúexẽẽxü̃ ga jema norü mugü. Notürü Ngechuchu ja Cristuxü̃ nixĩ ga namuxü̃ na tüxü̃ nangúexẽẽxü̃ na jigü ingechaü̃güxü̃ rü tüxü̃́ nangẽxmaxü̃ i ore i aixcuma ixĩxü̃.
18 Taguma texé nhuxgu nüxü̃ tadau ga Tupana. Notürü Nane ja nügümaã nüxü̃́ wüxicacü nixĩ ja tüxü̃ nüxü̃ cua̱xẽẽcü. Rü jima Nane rü Tupanaxü̃chi nixĩ, rü Nanatümaã wüxiwa nangẽxmagü.
Juã́ũ ga baiü̃xẽẽruü̃ rü nüxü̃ nixu ga Ngechuchu ja Cristuchiga
19 Rü jema Judéugüarü ãẽ̱xgacügü ga Jerucharéü̃cü̱̃ã̱x rü Juã́ũ ga baiü̃xẽẽruü̃xü̃tawa nanamugü ga paigü rü Lewítanüxü̃gü na nüxna jacagüexü̃ca̱x na texe jiĩxü̃.
20 Rü nüma ga Juã́ũ rü meãma nügü nixu, rü nhanagürü: —Tama nixĩ i Cristu chiĩxü̃ i chamax —nhanagürü.
21 Rü wenaxãrü nüxna nacagü rü nhanagürügü: —¿Texé e̱xna cuixĩ? ¿E̱xna cuma ga nuxcümaxü̃cü ga Tupanaãrü orearü uruü̃ ga Ería cuiĩxü̃? —nhanagürügü. Rü Juã́ũ nanangãxü̃ rü nhanagürü: —Tama Ería chixĩ —nhanagürü. Rü nümagü rü wenaxãrü nüxna nacagü rü nhanagürügü: —¿E̱xna cuma cuiĩxü̃ ja jima orearü uruü̃ ga Muĩsé nüxü̃ ixucü ga ínguxchaü̃cü? —nhanagürügü. Rü Juã́ũ nanangãxü̃ rü nhanagürü: —Tama jima chixĩ —nhanagürü.
22 Rü jexguma nhanagürügüama: —¿E̱xna texé cuiĩxü̃? Erü tanaxwa̱xe i ngẽma núma toxü̃ mugüxü̃xü̃tawa tanange i curü ngãxü̃ga. ¿Rü nhuxũ nhacuxü̃ i nhu̱xma na texé cuiĩxü̃? —nhanagürügü.
23 Rü Juã́ũ nanangãxü̃ rü nhanagürü nüxü̃: —Chama nixĩ i ngẽma duü̃xü̃ i dauxchitawa i ngextá taxúema íxãpataxü̃wa tagaãcü nhachaxü̃:
“¡Rü nüxü̃ perüxoe i pecüma i chixexü̃ rü ipejanawe̱xãchixẽẽ̱x i perü maxü̃ naxca̱x ja Cori ja Tupana!” nhachaxü̃, guma nuxcümaxü̃cü ga orearü uruü̃ ga Ichaía nüxü̃ ixuxü̃rüü̃ —nhanagürü.
24 1:24-25 Rü jexguma ga jema paigü rü Parichéugü jéma mugüxü̃ ga Juã́ũmaã na janadexagüxü̃ca̱x rü wenaxãrü nüxna nacagüe, rü nhanagürügü: —Rü ngẽxguma tama Cristu cuixĩgu, rü tama Ería cuixĩgu, rü tama jima orearü uruü̃ ja ínguxchaü̃cü cuixĩgu, ¿rü tü̱xcüü̃ i duü̃xü̃güxü̃ ícubaiü̃xẽẽxü̃ i nhu̱xmax? —nhanagürügü nüxü̃.
25 Nüü̃ nadau 1:24
26 1:26-27 Rü Juã́ũ nanangãxü̃ rü nhanagürü: —Chama rü dexáwamare íchanabaiü̃xẽẽ i duü̃xü̃gü. Notürü petanüwa nangẽxma ja jima tama nüxü̃ pecuácü ja chaweama ne ũcü. Rü chama rü nape̱xewa rü taxuwama chame, rü bai i norü chapatucunügüarü wẽgüwa chame —nhanagürü ga Juã́ũ.
27 Nüü̃ nadau 1:26
28 Rü jema nachica ga Betániãgu ãẽ́gaxü̃wa nixĩ ga Juã́ũ ga nüxü̃ jaxuxü̃ ga jema ore. Rü natü ga Judã́ũãrü tocutüwa nixĩ ga jema nachica ga ngextá Juã́ũ duü̃xü̃güxü̃ íbaiü̃xẽẽxü̃wa.
Ngechuchu nixĩ ga Tupana núma namucü na duü̃xü̃güarü pecaduca̱x najuxü̃ca̱x
29 Rü moxü̃ãcü ga Juã́ũ rü Ngechuchuxü̃ nadau ga naxca̱x na jaxũxü̃. Rü nhanagürü ga Juã́ũ: —¡Rü dücax! Daa nixĩ ja jima Tupana núma namucü na najuxü̃ca̱x na nhama i naãnecü̱̃ã̱x i duü̃xü̃güarü pecaduxü̃ ijanaxoxẽẽxü̃ca̱x.
30 —Rü chama rü daa Ngechuchuchigaxü̃ nixĩ ga chixuxü̃ ga jexguma nhachagu:
“Rü chaweama ne naxũ ja wüxi ja chorü jexeracü, jerü nüma rü woetama najexma ga taũta chabuxgu ga chamax”, nhachagu.
31 —Rü chamatama ga noxri rü tama nüxü̃ chacua̱x ga texe na jiĩxü̃ ga nümax. Notürü núma chaxũ na dexáwamare duü̃xü̃güxü̃ íchibaiü̃xẽẽtanüxü̃ca̱x na tatanüxü̃ i Judéugü nüxü̃ cua̱xgüxü̃ca̱x na texé jiĩxü̃ —nhanagürü.
32 Rü nhanagürü ta ga Juã́ũ: —Rü chamatama nüxü̃ chadau ga Tupanaãẽ ga Üünexü̃ ga jexguma wüxi ga muxtucurüü̃ dauxü̃wa ínaxexeegu rü Ngechuchuxü̃negu janawa̱xgux.
33 —Chama rü noxri tama nüxü̃ chacua̱x ga texe na jiĩxü̃ ga nümax. Notürü ga Tupana ga choxü̃ mucü na dexáwamare duü̃xü̃güxü̃ íchabaiü̃xẽẽxü̃ca̱x, rü nhanagürü choxü̃:
“Rü jima nüxü̃ cudaucü ja chauãẽ i Üünexü̃ naẽ́tügu írüxexeecü, rü jima tá nixĩ ja chauãẽ i Üünexü̃ duü̃xü̃güna nguxẽẽcü”, nhanagürü choxü̃.
34 —Chama rü marü jima Ngechuchuxü̃ chadau rü pemaã nüxü̃ chixu na nüma rü aixcuma Tupana Nane jiĩxü̃ —nhanagürü.
Nüxĩraü̃xü̃ ga norü ngúexü̃gü ga Ngechuchu
35 Moxü̃ãcü rü wenaxãrü Juã́ũmaã jema nachicawa tajexmagü ga toma ga taxre ga norü ngúexü̃gü.
36 Rü jexguma Ngechuchuxü̃ nada̱xgu ga jéma na naxüpetüxü̃, rü Juã́ũ rü nhanagürü toxü̃: —¡Dücax! Jima nixĩ ja Tupana núma namucü na pecaduca̱x najuxü̃ca̱x —nhanagürü.
37 Rü toma ga Juã́ũãrü ngúexü̃gü rü nüxü̃ taxĩnüẽ ga jexguma jema nhaxgu. Rü Ngechuchuwe tarüxĩ.
38 Rü nügü ínidau ga Ngechuchu, rü toxü̃ nadau ga nawe na tarüxĩxü̃. Rü toxna naca rü nhanagürü toxü̃: —¿Ṯacüca̱x pedau? —nhanagürü. Rü tomagü rü nhatarügügü: —Pa Ngúexẽẽruü̃x, ¿ngexta nixĩ i cupexü̃? —nhatarügügü.
39 Rü Ngechuchu toxü̃ nangãxü̃, rü nhanagürü toxü̃: —¡Nuã chawe perüxĩ rü ípejada̱x! —nhanagürü. Rü nawe tarüxĩ, rü nüxü̃ tadaugü ga na ngexta napexü̃. Rü jexguma jéma tangugügu, rü marü ãgümücüarü ngorawa nangu ga na najáuanexü̃. Rü jexma naxü̃tagu tarücho rü nhu̱xmata nachüta.
40 Rü chama chixĩ ga noxri Juã́ũ ga baiü̃xẽẽruü̃xü̃ chaxĩnüxü̃ ga jixcama Ngechuchuwe charüxũxü̃. Rü chamücü rü Ãdré nixĩ. Rü nüma rü Pedru ga Chimáũẽneẽ nixĩ.
41 Rü jexgumatama ga Ãdré, rü naẽneẽ ga Chimáũca̱x najadau. Rü nhanagürü nüxü̃: —Rü marü nüxü̃ itajangau ja jima Cristu ga nuxcüma Tupana nüxü̃ unetacü —nhanagürü.
42 Rü jemawena, rü Ngechuchu íjexmaxü̃wa Chimáũxü̃ naga ga Ãdré. Rü jexguma Ngechuchu Chimáũxü̃ da̱xgu, rü nhanagürü nüxü̃: —Cuma nixĩ i Chimáũ i Juã́ũ nane cuiĩxü̃. Notürü i nhu̱xmawena rü Nuta tá nixĩ i cuéga —nhanagürü. Rü ngẽma naẽ́ga rü Pedru nhaxü̃chiga nixĩ.
Ngechuchu rü naxca̱x naca ga Piripi rü Natanaẽ́ũ
43 Rü moxü̃ãcü ga Ngechuchu rü nügü namexẽẽ na Gariréaanewa naxũxü̃ca̱x. Rü Piripixü̃ inajangau rü nhanagürü nüxü̃: —¡Chawe rüxũ! —nhanagürü.
44 Rü nüma ga Piripi rü ĩãne ga Bechaídacü̱̃ã̱x nixĩ. Rü jémacü̱̃ã̱x ta nixĩ ga Ãdré rü Pedru.
45 Rü Piripi rü Natanaẽ́ũca̱x najadau, rü nhanagürü nüxü̃: —Marü nüxü̃ itajangau ja jima Cristu ga Muĩsé nachiga naxümatücü ga mugüarü poperawa, rü nuxcümaxü̃güxü̃ ga Tupanaãrü orearü uruü̃gü ta nachiga naxümatügücü. Jima nixĩ ja Juche nane ja Ngechuchu ja Nacharétucü̱̃ã̱x —nhanagürü.
46 Rü nhanagürü ga Natanaẽ́ũ: —¿Nhuxãcü i ṯacü rü mexü̃ i Nacharétuwa ne naxũxü̃? —nhanagürü. Rü Piripi nanangãxü̃, rü nhanagürü nüxü̃: —¡Dücax, ngĩxã rü ítajadau! —nhanagürü.
47 Rü jexguma Ngechuchu Natanaẽ́ũxü̃ da̱xgu ga naxca̱x na jaxũxü̃, rü nhanagürü: —¡Dücax! Jéa ne naxũ i wüxi i jatü i aixcuma Judéu ixĩxü̃ i aixcuma ngearü chixexü̃ã́xü̃ —nhanagürü.
48 Rü jexguma ga Natanaẽ́ũ rü Ngechuchuna naca, rü nhanagürü nüxü̃: —¿Nhuxãcü i choxü̃ cucuáxü̃? —nhanagürü. Rü Ngechuchu nanangãxü̃ rü nhanagürü nüxü̃: —Naxü̃pa ga Piripi cuxca̱x na jac̱axü̃, rü chama rü cuxü̃ chadau ga jexguma ori ga figueratüü̃gu curüxã̱ũ̱xgux —nhanagürü.
49 Rü Natanaẽ́ũ nanangãxü̃ rü nhanagürü nüxü̃: —Pa Ngúexẽẽruü̃x, cuma rü Tupana Nane cuixĩ. Rü cuma nixĩ i guxü̃ma i Judéugüarü Ãẽ̱xgacü cuiĩxü̃ —nhanagürü.
50 Rü Ngechuchu nanangãxü̃, rü nhanagürü nüxü̃: —Cuma rü choxü̃́ cujaxõ erü cumaã nüxü̃ chixu na figueratüü̃wa cuxü̃ na chadauxü̃. Rü ngẽmaca̱xicatama nixĩ i cujaxõxü̃. Notürü ngẽma nhu̱xma nüxü̃ cudauxü̃ãrü jexera tá nixĩ i nüxü̃ cudauxü̃ i jixcüra —nhanagürü.
51 Rü nhanagürü ta ga Ngechuchu: —Rü aixcuma pemaã nüxü̃ chixu rü tá nüxü̃ pedaugü na jawãxnaxü̃ i dauxü̃guxü̃ i naãne. Rü tá nüxü̃ pedaugü i Tupanaãrü orearü ngeruü̃gü i dauxü̃cü̱̃ã̱x i ngẽ́ma dauxü̃ ĩgüxü̃ rü írüxĩgüüxü̃ i naẽ́tüwa ja Tupana Nane ja duü̃xü̃xü̃ ixĩcü —nhanagürü.
