Juã́ũ 11:1-57
11 Najexma ga wüxi ga jatü ga iḏaawecü ga Lázarugu ãẽ́gacü. Rü nüma rü naẽja̱xgü ga María rü Marta rü ĩãne ga Betániãcü̱̃ã̱x nixĩgü.
2 Rü jema María ijixĩ ga Cori ga Ngechuchucutügu pumara bacü rü nhu̱xmachi ngĩjaemaã ínapicutücü. Rü guma Lázaru ga iḏaawecü nixĩ ga ngĩẽneẽ.
3 Rü poraãcü niḏaawe ga Lázaru. Rü jemaca̱x ga naẽja̱xgü, rü Ngechuchuxü̃tawa imugagü, rü ngĩgürügügü: “Pa Corix, cumücü ja Lázaru ja nüxü̃ cungechaü̃cü rü niḏaawe”, ngĩgürügügü.
4 Rü jexguma jema orexü̃ naxĩnügu ga Ngechuchu, rü nhanagürü: —Ngẽma ḏaawe rü tãũxü̃táma jumaã inajacua̱x. Notürü niḏaawe na duü̃xü̃gü nüxü̃ nadaugüxü̃ca̱x na nhuxãcü naporaxü̃ ja Tupana rü nhuxãcü chama i Nane rü ta na chaporaxü̃ —nhanagürü.
5 Rü Ngechuchu poraãcü María rü Marta rü Lázaruxü̃ nangechaü̃.
6 Notürü jexguma nüxü̃ naxĩnügu ga na jaḏaawexü̃ ga Lázaru, rü tama paxa ínajadau. Rü taxre ga ngunexü̃ãmatama jexma narüxã̱ũ̱x ga jema nachica ga nawa najexmaxü̃wa.
7 Rü jixcama ga jemawena rü toxü̃ nhanagürü: —¡Ngĩxã rü wena Judéaanewa taxĩ! —nhanagürü.
8 Rü toma ga norü ngúexü̃gü rü nhatarügügü nüxü̃: —Pa Ngúexẽẽruü̃x, jexwacatama nixĩ ga jémacü̱̃ã̱x ga Judéugüarü ãẽ̱xgacügü jexma nutamaã cuxü̃ ímuxũchigüchaü̃xü̃. ¿Rü tü̱xcüü̃ wena ngẽ́ma cuxũxchaü̃ i nhu̱xmax? —nhatarügügü.
9 Rü Ngechuchu rü tomaã nüxü̃ nixu ga wüxi ga ore na nüxü̃ tacua̱xgüxü̃ca̱x na taũta nawa nanguxü̃ na najuxü̃ ga nümax. Rü nhanagürü toxü̃: —¿Taux e̱xna i wüxi i ngunexü̃ rü 12 i ngora nawa ngẽxmaxü̃? Ngẽxguma texé ngunecü ixũxgu rü tama ṯacümaã itajarünha, erü tümaca̱x nangóone.
10 —Notürü ngẽxguma wüxie chütacü ixũxgu rü ngẽmáãcü ṯacümaã itajarünha, erü tümaca̱x naxẽãne —nhanagürü. Rü jemaãcü nanango̱xẽẽ na taũta nawa nanguxü̃ na najuxü̃ ga nümax.
11 Rü jemawena ga Ngechuchu rü nhanagürü toxü̃: —Tamücü ja Lázaru rü napemare. Notürü nhu̱xma rü tá chajaḇaixãchixẽẽ —nhanagürü.
12 Rü jexguma ga toma ga norü ngúexü̃gü rü nhatarügügü: —Pa Corix, ega napemaregu, rü ngẽmawa nüxü̃ tacua̱x na naxca̱x tá jataanexü̃ —nhatarügügü.
13 Notürü ga Ngechuchu rü nüxü̃ nixuxchaü̃chire̱x ga Lázaru ga marü na najuxü̃. Notürü ga toma nüxü̃ tacua̱xgügu rü na napemarexü̃chigaxü̃ jiĩxü̃ ga tomaã jaxuxü̃.
14 Rü jexguma ga Ngechuchu rü meãma tomaã nüxü̃ nixu rü nhanagürü: —Lázaru rü marü naju.
15 —Notürü chama rü chataãẽ na tama ngẽ́ma changẽxmaxü̃, erü ngẽmaãcü nixĩ i namemaẽxü̃ i pexca̱x na choxü̃́ pejaxõgüxü̃ca̱x. ¡Rü ngĩxã rü ítajadaugü! —nhanagürü.
16 Rü jéma najexma ga totanüxü̃ ga Tumé ga Wüxigu Buexü̃ ga Taxree̱xpǘxü̃maã, naxugüxü̃. Rü nüma ga Tumé rü nhanagürü toxü̃: —¡Ngĩxã i jixema rü ta ngẽ́ma taxĩ na wüxigu Ngechuchumaã ijuexü̃ca̱x! —nhanagürü.
Ngechuchu nixĩ i ínadagüxẽẽxü̃ i juexü̃gü rü wena namaxẽxẽẽxü̃
17 Rü jexguma Betániãwa tomaã nanguxgu ga Ngechuchu, rü marü ãgümücü ga ngunexü̃ nangupetü ga na ijata̱xgüãxü̃ ga Lázaru.
18 Rü guma Betániã rü Jerucharéü̃ãrü ngaicamana najexma. Rü maneca tamaẽ̱xpü̱x ga quirúmetru nixĩ ga norü jaxü̃.
19 Rü muxü̃ma ga Judéugü rü Lázarueja̱x ga Marta rü Maríaxü̃tawa naxĩ na ngĩxü̃ jataãẽxẽẽgüxü̃ca̱x, jerü naju ga ngĩẽneẽ.
20 Rü jexguma Marta nüxü̃ cua̱xgu ga marü na ínanguxü̃ ga Ngechuchu, rü nüxü̃ ijatüxãchi. Notürü ga María rü ĩxgutama irüxã̱ũ̱x.
21 Rü Marta rü ngĩgürügü nüxü̃ ga Ngechuchu: —Pa Corix, jexguma chi cuma cunuxmagu rü tau chima naju ga chaueneẽ.
22 —Notürü chama nüxü̃ chacua̱x na woo i nhu̱xma na najuxü̃, rü Tupana tá cuxna nanaxã i guxü̃ma i ṯacü i naxca̱x ícuc̱axü̃ —ngĩgürügü.
23 Rü Ngechuchu ngĩxü̃ nangãxü̃ rü nhanagürü: —Cueneẽ rü wena tá namaxü̃ —nhanagürü.
24 Rü Marta ngĩgürügü nüxü̃: —Ngẽmáãcü nüxü̃ chacua̱x rü wena tá namaxü̃ i ngẽxguma nagu̱xgu i naãne rü ngẽxguma wena namaxẽgu i guxü̃ma i juexü̃ —ngĩgürügü.
25 Rü jexguma ga Ngechuchu rü nhanagürü: —Chama nixĩ i íchanadagüxẽẽxü̃ i juexü̃gü, rü wena chanamaxẽxẽẽxü̃. Rü jíxema choxü̃́ jaxṍxẽ rü woo taju̱xgu rü tá wenaxãrü tamaxü̃.
26 —Rü guxãma ja texé ja maxü̃́xẽ rü choxü̃́ jaxṍxẽ, rü guxü̃gutáma tamaxü̃. ¿Cujaxõxü̃ jĩĩxü̃ i ngẽma? —nhanagürü ga Ngechuchu.
27 Rü ngĩma rü ngĩgürügü nüxü̃: —Ngü̃, Pa Corix, chama rü chajaxõ na cuma rü Tupana Nane ja Cristu ga ítanaṉg̱uxẽẽcü na cuiĩxü̃ —ngĩgürügü.
Lázaru itáxü̃wa naxaxu ga Ngechuchu
28 Rü jema nhaxguwena rü Marta rü ngĩẽja̱x ga Maríaca̱x ijaca. Rü bexma ngĩmaã nüxü̃ ijarüxu, rü ngĩgürügü: —Marü nuã nangu ja Ngúexẽẽruü̃ ja Ngechuchu, rü choxü̃ cuxca̱x najacaxẽẽ —ngĩgürügü.
29 Rü jexguma María nüxü̃ ĩnügu ga marü jéma na nanguxü̃ ga Ngechuchu, rü paxa ichi, rü Ngechuchuxü̃ íijadau.
30 Rü Ngechuchu rü taũta ĩãnewa nangu ga jexguma, rü jema nachica ga Marta nüxü̃ ídauxü̃watama nixĩ ga najexmaxü̃.
31 Rü Maríapatawa najexma ga nhuxre ga jémacü̱̃ã̱x ga Judéugüarü ãẽ̱xgacügü ga ngĩxü̃ jéma taãẽxẽẽgüxü̃. Rü jexguma ngĩxü̃ nadaugügu ga paxa na inachixü̃ rü na ínaxũxũxü̃, rü ngĩwe narüxĩ. Jerü nüma nüxü̃ nacua̱xgügu rü jéma Lázaru itáxü̃wa ixũ na jéma jaxaxuxü̃ca̱x.
32 Rü jexguma Ngechuchuxü̃tawa nanguxgu ga María, rü nape̱xegu ijacaxã́pü̱xü, rü ngĩgürügü: —Pa Corix, jexguma chi cuma cunuxmagu rü tau chima naju ga chaueneẽ ja Lázaru —ngĩgürügü.
33 Rü jexguma Ngechuchu ngĩxü̃ da̱xgu ga na naxaxuxü̃ rü na naxauxexü̃ ga jema Judéugüarü ãẽ̱xgacügü ga ngĩwe rüxĩxü̃, rü poraãcü ngechaü̃ nüxü̃́ nangu̱x.
34 Rü Ngechuchu nüxna naca rü nhanagürü: —¿Ngexta nixĩ i ipenatáxü̃? —nhanagürü. Rü nümagü nanangãxü̃ rü nhanagürügü: —Pa Corix, ¡dücax, nuã naxũ, rü íjadau! —nhanagürügü.
35 Rü naxaxu ga Ngechuchu.
36 Rü jema Judéugü rü nhanagürügü: —¡Dücax nhuxãcü poraãcü Lázaruxü̃ nangechaü̃! —nhanagürügü.
37 Notürü nhuxre ga jema ãẽ̱xgacügü ga Judéugüarü rü nhanagürügü: —Daa nixĩ ga guma jatü ga ngexetücüxü̃ rümexẽẽcü. ¿Rü tü̱xcüü̃ taxucürüwa ṯacü rü mexü̃ Lázaruca̱x naxü na tama najuxü̃ca̱x? —nhanagürügü.
Wenaxãrü namaxü̃ ga Lázaru
38 Rü Ngechuchu poraãcü ngechaü̃ nüxü̃́ nangu̱x rü Lázarumaxü̃ca̱x nixũ. Rü wüxi ga ma̱xpǘneãrü ãxmaxü̃ nixĩ ga jema naxmaxü̃. Rü najexma ga wüxi ga nuta ga norü ngũxtaü̃ruü̃.
39 Rü Ngechuchu rü nhanagürü: —¡Ípenangũxgachi̱x ja jima nuta ja namaã nangũxtaü̃cü! —nhanagürü. Notürü ga Marta ga Lázarueja̱x rü ngĩgürügü: —Pa Corix, cuxá marü najixane nixĩ, erü marü ãgümücü i ngunexü̃ naẽ́tü nixĩ ga na najuxü̃ —ngĩgürügü.
40 Notürü ga Ngechuchu rü nhanagürü ngĩxü̃: ¿Taux e̱xna i marü cumaã nüxü̃ chixuchiréxü̃ rü ngẽxguma cujaxõ̱xgu rü tá nüxü̃ cudau i wüxi i mexü̃ i taxü̃ i Tupana üxü̃? —nhanagürü.
41 Rü jexguma ínanangũxgachigü ga guma nuta. Rü Ngechuchu dauxü̃gu nadawenüãcüma nhanagürü: —Pa Chaunatü Pa Tupanax, moxẽ cuxna chaxã erü marü choxü̃ cuxĩnü.
42 —Chama nüxü̃ chacua̱x rü guxü̃guma choxü̃ cuxĩnü. Notürü moxẽ cuxna chaxã i nhu̱xma erü chanaxwa̱xe i nhaã duü̃xü̃gü na jaxõgüãxü̃ na cuma núma choxü̃ cumuxü̃ —nhanagürü.
43 Rü jexguma jema nhaxguwena, rü tagaãcü nhanagürü: —Pa Lázarux, ¡ínaxũxü̃ i ngẽ́ma! —nhanagürü.
44 Rü ínaxũxü̃ ga Lázaru naxchápenüü̃maã guxü̃wama rübuxpüxü̃cü. Rü Ngechuchu nhanagürü nüxü̃ ga duü̃xü̃gü: —¡Ípejawẽxpüxü̃ na íjaxũxü̃ca̱x! —nhanagürü.
Ãẽ̱xgacügü naxca̱x nadaugü na nhuxãcü Ngechuchuxü̃ jajauxgüxü̃
45 Rü jema Judéugüarü ãẽ̱xgacügü ga Maríawe rüxĩxü̃ rü nüxü̃ nadaugü ga jema Ngechuchu üxü̃, rü muxü̃ma Ngechuchuaxü̃́ najaxõgü ga jexguma nüxü̃ nadaugügu ga nhuxãcü wena Lázaruxü̃ na namaxẽẽxü̃.
46 Notürü nhuxre ga jema ãẽ̱xgacügü rü Parichéugümaã nüxü̃ najarüxugü ga jema Ngechuchu üxü̃.
47 Rü jexguma ga jema Parichéugü rü paigüarü ãẽ̱xgacügü rü nangutaque̱xegü namaã ga guxü̃ma ga jema ãẽ̱xgacügütücumüwa ügüxü̃. Rü nhanagürügü: —¿Ṯacü tá taxüe? Erü nhaã jatü i Ngechuchu rü nanaxü i muxü̃ma i mexü̃ i cua̱xruü̃gü.
48 —Ngẽxguma chi tama jajauxgügu, rü guxü̃táma i duü̃xü̃gü rü tá nüxü̃́ najaxõgü, rü Romacü̱̃ã̱xgüarü churaragü rü núma chi naxĩ rü nagu napogüe ja tórü tupauca ja taxü̃ne, rü düxwa tau chima tóxrü nixĩ i nhaã tachiü̃ãne —nhanagürügü.
49 Notürü guma taunecügu rü jema paigütanüwa rü Caipá nixĩ ga norü ãẽ̱xgacü. Rü nüma rü nhanagürü nüxü̃: —Pemagü rü taxuü̃ma pecua̱x.
50 —¿E̱xna tama nüxü̃ pecua̱x rü taxca̱x rü na namemaẽxü̃ na wüxitama i jatü guxü̃ i duü̃xü̃güca̱x na juxü̃, na tama najuexü̃ca̱x i guxü̃ma i tachiü̃ãnecü̱̃ã̱x i duü̃xü̃gü? —nhanagürü.
51 Notürü ga Caipá rü tama nüẽchama jema nhanagürü, jerü guma taunecügu rü nüma nixĩ ga paigüarü ãẽ̱xgacü jiĩxü̃. Rü jemaca̱x rü Tupana nixĩ ga Caipáwa idexacü ga jexguma nüxü̃ jaxuxgu na Ngechuchu rü guxü̃ma i Judéugüca̱x tá na najuxü̃.
52 Rü jema orewa rü nanango̱xẽẽ na tama Judéugüca̱xicatama tá na najuxü̃, notürü guxü̃ma i Tupanaãrü duü̃xü̃gü i guxü̃ i naãnewa ngẽxmagüxü̃ca̱x rü tá ta na najuxü̃, na ngẽmaãcü wüxigu nangutaque̱xexü̃ca̱x i guxü̃ma i ngẽma duü̃xü̃gü i Tupanaãrü ixĩgüxü̃.
53 Rü jexgumaü̃cüü nixĩ ga inaxügüeãxü̃ ga Judéugüarü ãẽ̱xgacügü ga nagu na naxĩnüẽxü̃ ga nhuxãcü tá na Ngechuchuxü̃ jama̱xgüxü̃.
54 Rü jemaca̱x ga Ngechuchu rü marü tama jema Judéugü ímuxü̃tanügu naxã. Rü tomaã ínaxũxũ ga Judéaanewa, rü wüxi ga ĩãnexãcü ga Efraĩ́gu ãẽ́ganewa naxũ. Rü jexma tomaã narüxã̱ũ̱x. Rü guma ĩãne rü wüxi ga nachica ga ngextá taxúema íxãpataxü̃ãrü ngaicamana najexma.
55 Rü marü ningaica ga jema Judéugüarü peta ga Üpetüchiga. Rü jemaca̱x muxü̃ma ga duü̃xü̃gü ga náĩ ga ĩãnecü̱̃ã̱x rü Jerucharéü̃wa naxĩ na Tupanaca̱x nügü jamexẽẽgüxü̃ca̱x naxü̃pa ga jema peta.
56 Rü Ngechuchuca̱x nadaugü ga duü̃xü̃gü. Rü tupauca ga taxü̃newa nügüna nicagüetanü, rü nhanagürügü: —¿Nhuxũ nhapegüxü̃ i pemax? ¿Nhama i petawa tá naxũxü̃ rü e̱xna tama? —nhanagürügü.
57 Rü jema Parichéugü rü paigüarü ãẽ̱xgacügü rü duü̃xü̃güna naxãgagü, rü nhanagürügü: —Ngẽxguma ngextá nüxü̃ pedaugügu i ngẽma Ngechuchu, ¡rü tomaã nüxü̃ pejarüxu na tajajauxgüxü̃ca̱x! —nhanagürügü.
