Juã́ũ 15:1-27
15 Rü nhanagürü ga Ngechuchu: —Chama nixĩ i nhama wüxi i uwanerüü̃ chiĩxü̃ erü chawa nangẽxma i pora na pexü̃ chaporaexẽẽxü̃ca̱x. Rü Chaunatü nixĩ ja nüxna daucü i ngẽma uwa.
2 —Rü chorü duü̃xü̃gü rü ngẽma uwachacüügürüü̃ nixĩgü. Rü ngẽma uwachacüü i tama oxü̃, rü norü daruü̃ rü najadae. Notürü ngẽma nachacüü i oxü̃, rü meã nanamexẽẽtanü na jexeraãcü poraãcü naxoxü̃ca̱x.
3 —Pema rü marü peme, jerü naga pexĩnüẽ ga jema ore ga pexü̃ changúexẽẽxü̃.
4 —Rü name nixĩ i guxü̃guma chawa pejaxũ̱xgü, ngẽma na chama rü pewa chajaxṹxü̃rüü̃. Erü wüxi i uwachacüü rü tama nüxĩca naxo, ega tama nanewa jaxũ̱xgux. Rü ngẽxgumarüü̃ ta i pema rü taxuacüma chauxca̱x pemaxẽ, ega tama chawa pejaxũ̱xgüechagu.
5 —Chama nixĩ i uwane, rü pema i nachacüügü. Rü jíxema chawa jaxṹẽchaxe rü chama i tümawa, rü aixcuma tá chauxca̱x tamaxü̃. Rü ngẽmaãcü wüxi i uwachacüü i oxü̃rüü̃ tá tixĩ. Notürü ngẽxguma tama chawa pejaxũ̱xgüechagu, rü taxucürüwama ṯacü pexüe.
6 —Rü texé ja tama chawa jaxṹẽchaxe rü tá ítata̱xüchi. Rü wüxi i uwachacüü i daexü̃ rü ipaxü̃ rü figuxü̃rüü̃ tá tixĩ, rü ngẽxma tá tajarüxo.
7 —Rü ngẽxguma chawa pejaxũ̱xgüechagu rü taguma nüxü̃ ipejarüngümaẽgu i ngẽma ore i pexü̃ changúexẽẽxü̃, rü marü name i naxca̱x ípeca i ṯacü i penaxwa̱xexü̃, rü chama rü tá pexna chanaxã.
8 —Rü ngẽxguma aixcuma meã chauxca̱x pemaxẽgu, rü Chaunatüxü̃ tá nicua̱xüü̃gü i duü̃xü̃gü. Rü ngẽmaãcü aixcuma chorü ngúexü̃gü tá peixĩgü.
9 —Chama rü pexü̃ changechaü̃ ngẽma na Chaunatü choxü̃ ngechaü̃xü̃rüü̃. Rü chanaxwa̱xe i aixcuma meã chauga pexĩnüẽẽcha, erü chama rü guxü̃guma pexü̃ changechaü̃.
10 —Chama rü naga chaxĩnü i Chaunatüarü mugü rü nüma rü guxü̃guma choxü̃ nangechaü̃. Rü ngẽxgumarüü̃ tá ta nixĩ ega naga pexĩnüẽgu i chorü mugü, rü guxü̃gutáma pexü̃ changechaü̃ẽcha.
11 —Chama rü ngẽmaãcü pemaã nüxü̃ chixu na wüxigu chamaã petaãẽgüxü̃ca̱x. Rü ngẽmaãcü tá aixcuma petaãẽgü.
12 —Rü chama pexü̃ chamu na pemücügüxü̃ pengechaü̃güxü̃ca̱x, ngẽma chama na pexü̃ changechaü̃xü̃rüü̃.
13 —Rü ngẽxguma wüxie aixcuma tümamücüxü̃ ngechaü̃gu, rü nüxü̃ tangechaü̃ãma rü nüẽ́tama ega woo tümamücüca̱x taju̱xgu. Rü nataxuma i to i ngechaü̃ i ngẽmaãrü jexera.
14 —Pema rü chamücügü peixĩgü i ngẽxguma chauga pexĩnüẽgu.
15 —Chama rü marü tama chorü duü̃xü̃gümareãcü pexü̃ chaxu. Erü wüxi i coriarü duü̃xü̃mare rü tama nüxü̃ nacua̱x i ngẽma norü cori üxü̃. Notürü nhu̱xma rü chamücügümaã pexü̃ chaxu, erü pexü̃ nüxü̃ chacua̱xẽẽ i guxü̃ma i ore ga Chaunatü chamaã nüxü̃ ixuxü̃.
16 —Pema rü tama pexira chauxca̱x pedaugü, notürü chaxira nixĩ ga pexca̱x chadauxü̃ rü pexü̃ chamuxü̃ na aixcuma chauxca̱x pemaxẽxü̃ca̱x rü chauxü̃tawa penagagüxü̃ca̱x i muxü̃ma i duü̃xü̃gü na guxü̃guma choxü̃́ jaxõgüãxü̃ca̱x. Rü Chaunatü ja Tupana tá pexna nanaxã i guxü̃ma i ṯacü i chauégagu nüxna naxca̱x pec̱axü̃.
17 —Rü ngẽma nixĩ i pexü̃ chamuxü̃ na pemücügüxü̃ pengechaü̃güxü̃ca̱x.
Nhama i naãnecü̱̃ã̱x i duü̃xü̃gü rü Ngechuchuchi rü norü ngúexü̃güchi naxaie
18 —Ngẽxguma nhama i naãnecü̱̃ã̱x i duü̃xü̃gü pechi aiegu, rü ¡nüxna pecua̱xãchie ga chaxira chauchi na naxaiexü̃!
19 —Rü ngẽxguma chi nhama i naãnecü̱̃ã̱x i duü̃xü̃gürüü̃ peixĩgügu, rü nhama i naãnecü̱̃ã̱x i duü̃xü̃gü rü chi pexü̃ nangechaü̃gü ngẽma natanüxü̃güxü̃ na nangechaü̃güxü̃rüü̃. Notürü chama nixĩ ga pexca̱x chadauxü̃ natanüwa ga nhama ga naãnecü̱̃ã̱x ga duü̃xü̃gü. Rü ngẽmaca̱x nixĩ i pechi naxaiexü̃, erü marü tama naxrüü̃ peixĩgü.
20 —¡Nüxna pecua̱xãchie ga pemaã nhachagu:
“Taxuü̃ma i wüxi i coriarü duü̃xü̃ rü norü corixü̃ narüjexera”, nhachagu! Rü jema na chauchi na naxaiexü̃, rü pechi rü tá ta naxaie. Rü jexguma chi chauga naxĩnüẽgu rü nhu̱xma rü chi ta pega naxĩnüẽ.
21 —Rü ngẽmaãcü ta chaugagu pechi naxaie i nhama i naãnecü̱̃ã̱x i duü̃xü̃gü erü tama nüxü̃ nacua̱xgü ja Chaunatü ga núma choxü̃ mucü.
22 —Rü ngẽxguma chi chama tama namaã chanango̱xẽẽgu na nhuxãcü chixri na namaxẽxü̃, rü tau chima nüxü̃ nacua̱xgü ga pecadu na naxügüxü̃. Notürü nhu̱xma namaã nüxü̃ na chixuxü̃ na nhuxãcü chixri namaxẽxü̃, rü ngẽmaca̱x i nhu̱xma rü taxuacüma nüxü̃ nixugü na jangearü pecaduã́xü̃.
23 —Rü guxü̃ma i duü̃xü̃gü i chauchi aiexü̃ rü Chaunatüchi rü ta naxaie.
24 —Rü ngẽma duü̃xü̃güpe̱xewa rü Tupanaãrü poramaã chanaxü i mexü̃gü i taxü̃ i taguma texé ja togue üxü̃. Rü ngẽxguma chi tama nape̱xewa chanaxü̱xgu i ngẽma mexü̃gü rü tau chima Tupana namaã nanaxuegu na nagagutama japecaduã̱xgüxü̃. Notürü na woo marü nüxü̃ nadaugüxü̃ i ngẽma mexü̃gü i taxü̃ i Tupanaãrü poramaã chaxüxü̃, rü ngẽxguma rü ta chauchi naxaieama rü Chaunatüchi rü ta naxaie.
25 —Notürü ngẽmaãcü nangupetü erü Tupana najanguxẽẽchaü̃ i norü ore i ümatüxü̃ i nhaxü̃:“Chauchi naxaie woo taxuü̃ma i chixexü̃ chaxü̱xgu”,
nhaxü̃.
26 —Notürü chama rü tá Chaunatüégagu pexca̱x núma chanamu i perü ngü̃xẽẽruü̃ i Tupanaãẽ i Üünexü̃ i tá pexü̃ nüxü̃ cua̱xẽẽxü̃ i ore i aixcuma ixĩxü̃. Rü nüma tá nixĩ i meãma pemaã nüxü̃ jaxuxü̃ i chauchiga.
27 —Rü pema rü tá ta chauchigaxü̃ peixugüe, jerü noxri ichanaxügügu ga duü̃xü̃gümaã nüxü̃ na chixuxü̃ ga chorü ore, rü woetama marü chauxü̃tawa pejexmagü —nhanagürü ga Ngechuchu.
