Juã́ũ 21:1-25
21 Rü jemawena ga Ngechuchu rü wenaxãrü toxca̱x nango̱x naxtaxa ga Gariréaanacüwa. Rü Tibéria nixĩ ga to ga naẽ́ga. Rü nhaãcü nixĩ ga toxca̱x nangóxü̃.
2 Rü wüxiwa tajexmagü ga chama rü Tiagu ga Zebedeu nanegü rü Chimáũ ga Pedru, rü Tumé ga Wüxigu Buexü̃maã taxugüxü̃, rü Natanaẽ́ũ ga Gariréaanegune ga ĩãne ga Canácü̱̃ã̱x, rü to ga taxre ga tomücügü ga Ngechuchuarü ngúexü̃gü.
3 Rü Chimáũ ga Pedru rü nhanagürü toxü̃: —Tá chajapüchae —nhanagürü. Rü jexguma ga toma rü tanangãxü̃gü, rü nhatarügügü nüxü̃: —Toma rü tá ta cuwe tarüxĩ —nhatarügügü. Rü jéma taxĩ, rü wüxi ga nguegu tichoü̃. Notürü jema chütaxü̃gu rü taxuü̃ma ga choxni tijauxgü.
4 Rü jexguma noxri jangóonegu rü Ngechuchu toxca̱x nango̱x ga naxtaxaanacüwa. Notürü ga toma rü tama nüxü̃ tacua̱xgü ga Ngechuchu na jiĩxü̃.
5 Rü jexguma ga Ngechuchu rü toxna naca, rü nhanagürü toxü̃: —Pa Ngextü̱xücügüx, ¿e̱xna taxuü̃ma i choxni pejauxgü? —nhanagürü. Rü toma rü tanangãxü̃gü rü nhatarügügü: —Taxuü̃ma —nhatarügügü.
6 Rü jexguma ga Ngechuchu rü nhanagürü toxü̃: —¡Peweü̃ãrü tügünecüwawaama penatáe i perü pücha! rü tá ípenajauxü̃ i choxni —nhanagürü. Rü jémaãma tanatáegü ga torü pücha, rü taxucürüwa ítanatúãchigü, jerü muxũchixü̃ ga choxni tijauxgü.
7 Rü jexguma ga chama rü Pedruxü̃ nhacharügü: —Jima nixĩ ja Cori ja Ngechuchu —nhacharügü. Rü jexguma jemaxü̃ naxĩnügu ga Pedru ga guma na jiĩxü̃ ga Cori, rü nicu̱xcuchi ga naxchiru jerü noxri rü ínacu̱xuchichire̱x. Rü natüchiüwa najuxu, rü naxãnacüwa naxca̱x nawẽxẽ.
8 Rü toma ga natanüxü̃ rü nguemaãtama naxãnacüwa taxãgü. Rü jéma tanatúgü ga jema pücha ga choxnimaã ããcuxü̃ jerü 100 metruxicatama nataxu ga na naxãnacüwa na tangugüxü̃.
9 Rü jexguma nguewa ítachoü̃gu rü jéma nüxü̃ tadau ga wüxi ga üxü, rü naxẽtügu naxü ga wüxi ga choxni. Rü jéma najexma ta ga wüxi ga põũ.
10 Rü Ngechuchu rü nhanagürü toxü̃: —¡Nuãta penge i nhuxre i ngẽma choxni i ípejauxü̃xü̃! —nhanagürü.
11 Rü Chimáũ ga Pedru rü nguegu nixüe. Rü jema püchamaã naxnücügu ínanatúãchametütaü̃ ga choxni ga ínajauxü̃xü̃. Rü 153 ga choxni ga itaxü̃ najexma nawa ga jema pücha. Rü woo ga na namuxũchixü̃, rü tama narügáu ga pücha.
12 Rü jexguma ga Ngechuchu rü nhanagürü toxü̃: —¡Nuã pexĩ rü pejachibüe! —nhanagürü. Rü taxúema ga toma rü nüxna tacaxchaü̃ na texé jiĩxü̃ ga nümax, jerü marü nüxü̃ tacua̱xgü ga guma na jiĩxü̃ ga Cori ga Ngechuchu.
13 Rü jexguma ga Ngechuchu rü jéma toxü̃tawa naxũ. Rü nanajaxu ga põũ rü wüxichigü toxna nanaxã. Rü jexgumarüü̃ ta ga choxni rü toxna nanaxã.
14 Rü jema nixĩ ga norü tamaẽ̱xpü̱xcüna ga toxca̱x na nangóxü̃ ga Ngechuchu ga juwa ínadaxguwena.
Ngechuchu rü Pedrumaã nidexa
15 Rü jexguma chibüewa tingugüguwena rü Ngechuchu rü Chimáũ ga Pedruna naca, rü nhanagürü: —Pa Chimáũ Pa Juã́ũ Nanex, ¿aixcuma choxü̃ cungechaü̃xü̃ i nhaã cumücügüxü̃ na cungechaü̃xü̃ãrü jexera? —nhanagürü. Rü Pedru nanangãxü̃, rü nhanagürü: —Ngü̃, Pa Corix, cuma nüxü̃ cucua̱x na cuxü̃ changechaü̃xü̃ —nhanagürü. Rü Ngechuchu rü nhanagürü nüxü̃: —¡Nachibüexẽẽ i chorü duü̃xü̃gü! —nhanagürü.
16 Rü wenaxãrü Pedruna naca, rü nhanagürü: —Pa Chimáũ Pa Juã́ũ Nanex, ¿aixcuma i choxü̃ cungechaü̃xü̃? —nhanagürü. Rü Pedru nanangãxü̃, rü nhanagürü: —Ngü̃, Pa Corix, cuma nüxü̃ cucua̱x na cuxü̃ changechaü̃xü̃ —nhanagürü. Rü Ngechuchu rü nhanagürü nüxü̃: —Ẽcü, ¡nüxna nadau i chorü duü̃xü̃gü! —nhanagürü.
17 Rü norü tamaẽ̱xpü̱xcüna wenama Pedruna naca, rü nhanagürü: —Pa Chimáũ Pa Juã́ũ Nanex, ¿aixcumaxü̃chi jiĩxü̃ i choxü̃ cungechaü̃xü̃? —nhanagürü. Rü jexguma ga Pedru rü düxwa nangechaü̃, jerü norü tamaẽ̱xpü̱xcüna Ngechuchu nüxna naca ngoxi aixcuma nüxü̃ nangechaü̃. Rü nhanagürü ga Pedru: —Pa Corix, cuma nüxü̃ cucua̱x i guxü̃ma. Rü cuma nüxü̃ cucua̱x na aixcumaxü̃chi cuxü̃ na changechaü̃xü̃ —nhanagürü. Rü Ngechuchu nhanagürü nüxü̃: —Ẽcü ¡nachibüexẽẽ i chorü duü̃xü̃gü!
18 —Rü aixcuma cumaã nüxü̃ chixu rü jexguma cungextü̱xügu rü cugü cuicu̱xcuchi ga na ngextá cuma ícunaxwa̱xexü̃wa cuxũxü̃ca̱x. Notürü ngẽxguma jaguã̱x cuixĩgu rü tá cuixuuchichacüü na togue cuxü̃ icu̱xcuchixü̃ca̱x. Rü ngẽma tama cuma ícunaxwa̱xexü̃wa tá cuxü̃ nagagü —nhanagürü.
19 Rü Ngechuchu rü jema nhanagürü na nüxü̃ nüxü̃ nacua̱xẽẽxü̃ca̱x ga nhuxãcü tá na najuxü̃ ga Pedru na jemaãcü Tupanaxü̃ nataxẽẽxü̃ca̱x. Rü jemawena ga Ngechuchu rü nhanagürü nüxü̃: —¡Chawe rüxũ! —nhanagürü.
Jema ngúexü̃ ga Ngechuchu poraãcü nüxü̃ ngechaü̃xü̃chiga
20 Rü jexguma nügüweama nada̱xgu ga Pedru rü choxü̃ nadau ga naweama na ne chaxũxü̃. Rü chamachire̱x nixĩ ga chibüwa Ngechuchuxü̃tawaxü̃chi charütoxü̃ rü nüxna chac̱axü̃ rü nhachaxü̃:
“Pa Corix, ¿texé tá tixĩ ja jíxema bexma cúãcü cuxü̃ íxuaxü̃xẽ?” nhachaxü̃.
21 Rü jexguma Pedru choxü̃ da̱xgu rü Ngechuchuna naca, rü nhanagürü: —Pa Corix, ¿nhaã Juã́ũ rü ṯacü tá nüxü̃ üpetüxü̃? —nhanagürü.
22 Rü Ngechuchu nanangãxü̃, rü nhanagürü nüxü̃: —Ngẽxguma chama chanaxwa̱xegu rü chanamaxẽẽ nhu̱xmatáta wena núma chaxũ, rü cuma rü taxuü̃ca̱xma nüxü̃ cucuáxchaü̃ i ngẽma. Rü ¡chawe rüxũ! —nhanagürü.
23 Rü jexguma guxema chautanüxü̃ ga ngúexü̃gü nüxü̃ ĩnüẽgu ga jema chauchiga, rü tügümaã naxca̱x tidexagü, rü nhatarügügü: —Rü tãũxü̃táma naju i Juã́ũ —nhatarügügü. Notürü Ngechuchu rü tama nüxü̃ nixu ga tãũxü̃táma na chajuxü̃. Notürü nhanagürümare:
“Ngẽxguma chama chanaxwa̱xegu rü chanamaxẽẽ nhu̱xmatáta wena núma chaxũ, rü cuma rü taxuü̃ca̱xma nüxü̃ cucuáxchaü̃ i ngẽma”, nhanagürümare.
24 Rü chamatama nixĩ ga nüxü̃ chadauxü̃ i guxü̃ma i nhaã pemaã nüxü̃ chixuxü̃, rü chamatama nixĩ i pexca̱x chanaxümatüxü̃ i nhaã ore. Rü guxãma i toma rü nüxü̃ tacua̱x na aixcuma na jiĩxü̃ i nhaã pemaã nüxü̃ chixuxü̃.
25 Rü najexma ga to ga muxũchixü̃ma ga ṯacü ga Ngechuchu üxü̃. Rü ngẽxguma chi naxümatügu i guxü̃ma ga jema naxüxü̃chiga, rü nagu charüxĩnügu rü tau chima nhama i naãnegu name i ngẽma poperagü i nachiga ümatüxü̃.
