Juã́ũ 3:1-36
3 Najexma ga wüxi ga Parichéu ga Nicudémugu ãẽ́gacü. Rü nüma rü wüxi ga ãẽ̱xgacü ga nüxü̃ nangechaü̃gücü nixĩ ga Judéugütanüwa.
2 Rü guma Nicudému rü Ngechuchuxü̃tagu nanaxũãne ga chütacü. Rü nhanagürü Ngechuchuxü̃: —Pa Ngúexẽẽruü̃x, toma nüxü̃ tacua̱x na aixcuma Tupana núma cuxü̃ muxü̃ na toxü̃ cungúexẽẽxü̃ca̱x. Erü taxucürüwa texé cuxrüü̃ tanaxü i ngẽma taxü̃ i mexü̃gü i Tupanaãrü poramaã üxü̃, ega tama Tupana tümaxü̃tawa ngẽxmagu —nhanagürü.
3 Rü Ngechuchu nanangãxü̃ rü nhanagürü nüxü̃: —Aixcuma cumaã nüxü̃ chixu, rü jíxema tama wenaxãrü buxe rü taxucürüwama Tupana ãẽ̱xgacü íixĩxü̃wa tangu —nhanagürü.
4 Rü Nicudému rü Ngechuchuna naca, rü nhanagürü nüxü̃: —¿Notürü nhuxãcü i wüxi i jatü i marü jaxü̃ i wena nabuxü̃? ¿E̱xna wena naẽãnügu naxücuxü̃ rü ngẽmaãcü wena nabuxü̃? —nhanagürü.
5 Rü Ngechuchu nanangãxü̃ rü nhanagürü: —Rü aixcuma cumaã nüxü̃ chixu rü jíxema tama nüxü̃ rüxoxe i tümaãrü pecadu rü tama Tupanaãẽ i Üünexü̃wa najaxúxe i maxü̃ i ngexwacaxü̃xü̃, rü taxucürüwama Tupana ãẽ̱xgacü íixĩxü̃wa tichocu.
6 —Jíxema duü̃xü̃wa buxe rü duü̃xü̃tama tixĩ. Notürü jíxema Naãẽ i Üünexü̃wa najaxúxe i maxü̃ i ngexwacaxü̃xü̃, rü Tupanaxãcü tixĩ.
7 —¡Tãũxü̃táma cuḇaixãchiãẽ na cumaã nüxü̃ chixuxü̃ na Tupana naxwa̱xexü̃ na guxü̃ma i duü̃xü̃gü rü wena nabuexü̃!
8 —Ja buanecü rü nüma ínanaxwa̱xexü̃wa nabu. Rü nüxü̃ cuxĩnü i naga, notürü tama nüxü̃ cucua̱x na ngextáama ne naxũxü̃ rü ngextáama na naxũxü̃. Rü ngẽxgumarüü̃ ta tixĩgü ja guxãma ja jíxema Naãẽ i Üünexü̃wa najaxúxe i maxü̃ i ngexwacaxü̃xü̃ —nhanagürü.
9 Rü Nicudému wenaxãrü Ngechuchuna naca, rü nhanagürü: —¿Notürü nhuxãcü nixĩ i ngẽma? —nhanagürü.
10 Rü Ngechuchu nanangãxü̃, rü nhanagürü nüxü̃: —Cuma rü Judéugüarü ngúexẽẽruü̃ i nüxü̃ cuáxü̃ cuixĩ. ¿Rü nhuxãcü chi i cuma i tama nüxü̃ cucuáxü̃ i ngẽma?
11 —Aixcuma cumaã nüxü̃ chixu rü toma rü namaã tidexagü i ngẽma nüxü̃ tacuáxü̃. Rü norü uruü̃ tixĩgü i ngẽma nüxü̃ tadaugüxü̃. Notürü pema rü tama toxü̃́ pejaxõgü i ngẽma pemaã nüxü̃ tixuxü̃.
12 —Rü nhu̱xma na tama choxü̃́ pejaxõgüxü̃ i ngẽma pemaã nüxü̃ chixuxü̃ i nhama i naãneãrü ngẽmaxü̃chiga, rü ¿nhuxãcü tá pejaxõgüxü̃ ega pemaã nüxü̃ chixuxgu i dauxü̃guxü̃ i naãneãrü ngẽmaxü̃chiga?
13 —Taguma texé dauxü̃guxü̃ i naãnewa taxũ. Notürü i chama i Tupana Nane na duü̃xü̃xü̃ chiĩxü̃, rü chaxicatama nixĩ i ngẽ́ma ne chaxũxü̃ rü ngẽ́ma tá chaxũxü̃.
14 3:14-15 —Pema nüxü̃ pecua̱x ga nhuxãcü nuxcümaxü̃chima jema nachica ga ngextá taxúema íxãpataxü̃wa, rü Muĩsé wüxi ga naĩgu nanaxünagü ga jema ãxtape ga dĩẽrumünaxca̱x. Rü ngẽxgumarüü̃ tá ta i chama i Tupana Nane i duü̃xü̃xü̃ chiĩxü̃, rü wüxi i naĩgu tá choxü̃ naxünagügü i duü̃xü̃gü na guxãma ja texé ja choxü̃́ jaxõgüxe rü tüxü̃́ nangẽxmaxü̃ca̱x i maxü̃ i taguma gúxü̃.
15 Nüü̃ nadau 3:14
Tupana rü poraãcü nüxü̃ nangechaü̃ i nhama i naãnecü̱̃ã̱x
16 —Rü Tupana rü poraãcü nüxü̃ nangechaü̃ i nhama i naãnecü̱̃ã̱x i duü̃xü̃gü. Rü jemaca̱x inanamu ga Nane ga nügümaã wüxicacü na guxãma ja texé ja nüxü̃́ jaxõgüxe rü tama itarütauxexü̃ca̱x rü tüxü̃́ nangẽxmaxü̃ca̱x i maxü̃ i taguma gúxü̃.
17 —Jerü ga Tupana rü tama nhama ga naãnewa nanamu ga Nane na duü̃xü̃gümaã naxueguãxü̃ca̱x na napocuexü̃. Notürü núma nanamu na namaxẽxẽẽãxü̃ca̱x i duü̃xü̃gü.
18 —Rü jíxema Tupana Naneãxü̃́ jaxṍxẽ, rü Tupana rü tama tümamaã nanaxuegu na tapocuxü̃. Notürü jíxema tama nüxü̃́ jaxṍxẽ, rü marü tümamaã nanaxuegu na tapocuxü̃, erü tama nüxü̃́ tajaxõ ja jima Tupana Nane ja nügümaã wüxicacü.
19 —Rü jíxema tama nüxü̃́ jaxõgüxe, rü Tupana rü marü tümamaã nanaxuegu na tapocuexü̃. Jerü jexguma nhama ga naãnewa nanguxgu ga Tupana Nane ja duü̃xü̃güarü ngóonexẽẽruü̃, rü tama nawe tarüxĩxchaü̃. Notürü jexera tümaãrü me nixĩ ga ẽãnexü̃waama na tajexmagüxü̃, jerü chixexü̃ taxügü.
20 —Guxãma ja jíxema chixexü̃ ügüxe rü nachi taxaie i ngóonexü̃. Rü tama nüxna tangaicamagüchaü̃ erü tama tanaxwa̱xe na nangóxü̃ i ngẽma chixexü̃ i ítaxügüxü̃.
21 —Notürü jíxema aixcuma Tupanaãrü ore nüxü̃ ixuxü̃ãcüma meã maxẽxẽ rü nüxna tangaicama i ngẽma ngóonexü̃. Rü ngẽmaãcü tanaxü na meã nangóxü̃ca̱x na Tupanaãrü ngúchaü̃ãcüma na jiĩxü̃ i guxü̃ma i ngẽma taxügüxü̃ —nhanagürü.
Juã́ũ ga baiü̃xẽẽruü̃ rü wenaxãrü nüxü̃ nixu ga Ngechuchuchiga
22 Rü jemawena rü tomaã Judéaanewa naxũ ga Ngechuchu. Rü nhuxre ga ngunexü̃ tomaã jéma najexma rü jéma duü̃xü̃güxü̃ ítabaiü̃xẽẽgü.
23 Rü Juã́ũ ga baiü̃xẽẽruü̃ rü Enóãrü ĩãnewa ga Charíarü ngaicamana rü ínanabaiü̃xẽẽ ta ga duü̃xü̃gü jerü jéma najexma ga taxü̃ ga dexá. Rü jema jéma íngugüetanüxü̃ ga duü̃xü̃gü, rü Juã́ũ ínajabaiü̃xẽẽtanü.
24 Rü jemaãcü nangupetü naxü̃pa ga na pocupataü̃gu jata̱xcuchixü̃ ga Juã́ũ.
25 Rü jexguma rü nhuxre ga norü ngúexü̃gü ga Juã́ũ, rü wüxi ga Judéumaã niporagatanücüü nachiga ga nacümagü na nhuxãcü namexü̃ na Tupanaca̱x nügü jamexẽẽgüxü̃ ga duü̃xü̃gü.
26 Rü Juã́ũmaã nüxü̃ najarüxugüe, rü nhanagürügü: —Pa Ngúexẽẽruü̃x, dücax guma jatü ga tomaã nüxü̃ cuixucü rü cumaã jexmacü ga natü i Judã́ũãrü tocutüwa, rü jima rü nhu̱xma rü duü̃xü̃güxü̃ ínabaiü̃xẽẽ, rü guxü̃ma i duü̃xü̃gü rü nawe narüxĩ —nhanagürügü.
27 Rü Juã́ũ nanangãxü̃ rü nhanagürü nüxü̃: —Taxúema ṯacü tüxü̃́ nangẽxma ega Tupana tama tüxna naxãxgu.
28 —Pematama rü marü choxü̃ pexĩnüẽ ga jexguma nhachagu:
“Chama rü tama Cristu chixĩ. Notürü chama chixĩ i Tupana jima Cristupe̱xegu choxü̃ imuxü̃ na nüxü̃ chixuxü̃ca̱x i nachiga”, nhachagu.
29 —Rü wüxi i ngĩgüwa rü jima jatü ja ingĩcü rü naxma̱xãrü jora nixĩ. Rü jima jatümücü i naxü̃tawa ngẽxmaxü̃ rü nüxü̃́ inarüxĩnü i norü ore. Rü nataãẽ i ngẽxguma nüxü̃ naxĩnügu i ngẽma na jadexaxü̃. Rü ngẽxgumarüü̃ i chama rü aixcuma Cristumaã chataãẽxü̃chi i nhu̱xmax.
30 —Nüma rü tá nixĩnagüchigü na ãẽ̱xgacü jiĩxü̃, notürü i chama rü tá ícharüxĩchigü.
Jima dauxü̃wa ne ũxcü
31 —Rü jima Cristu ja dauxü̃wa ne ũxcü rü guxãẽ́tüwa nangẽxma. Notürü i chama rü nhama i naãnewa changẽxma, rü nhama i naãnecü̱̃ã̱x chixĩ, rü ngẽma nhama i naãnewa ngẽxmaxü̃chigaxü̃ chixu. Notürü i nüma ja Cristu ja dauxü̃wa ne ũxcü, rü guxãẽ́tüwa nangẽxma.
32 —Rü nüma rü tamaã nüxü̃ nixuchiga ga jema nüxü̃ nadauxü̃ rü nüxü̃ naxĩnüxü̃. Notürü noxretama nüxü̃́ najaxõgü i ngẽma nüxü̃ jaxuxü̃.
33 —Notürü ngẽxguma texé nüxü̃́ jaxõxgu i norü ore, rü ngẽmaãcü tanango̱xẽẽ na aixcuma jiĩxü̃ i ngẽma Tupana nüxü̃ ixuxü̃.
34 —Rü jima Tupana núma namucü, rü Tupanaãrü orexü̃ nixu. Erü Tupana rü nüxna nanamu i Naãẽ i Üünexü̃ na guxü̃guma naxü̃tawa nangẽxmaxü̃ca̱x.
35 —Rü Tanatü ja Tupana rü Nanexü̃ nangechaü̃. Rü ngẽmaca̱x marü naxme̱xwa nanangẽxmaxẽẽ i guxü̃ma i ṯacü i ngẽxmaxü̃.
36 —Rü jíxema Tupana Naneãxü̃́ jaxṍxẽ rü tüxü̃́ nangẽxma i maxü̃ i taguma gúxü̃. Notürü jíxema tama nüxü̃́ jaxõxchaü̃xẽ ja Tupana Nane, rü tãũxü̃táma tüxü̃́ nangẽxma i ngẽma maxü̃ i taguma gúxü̃. Notürü tá tanajaxu i ngẽma ãũcümaxü̃ i pocu i Tupana tá namaã tüxü̃ pocuxü̃ —nhanagürü ga Juã́ũ ga baiü̃xẽẽruü̃.
