Juízes 13:1-25
13 Notürü nüma ga Iraéuanecüã̱xgü rü Cori ya Tupanape̱xewa wena chixexü̃ naxüe, rü yemaca̱x ga Cori ya Tupana rü Firitéutanüxü̃güme̱xẽgu nanayixẽxẽ ga 40 ga taunecü.
2 Rü Chóraarü ĩanewa nayexma ga wüxi ga yatü ga Dáü̃tanüxü̃ ixĩcü ga Manóagu ãégacü. Rü guxema naxma̱x rü taguma taxãxacü yerü woetama tangexacüecha.
3 Notürü Cori ya Tupanaarü orearü ngeruxü̃ i dauxü̃cüã̱x rü ngĩxca̱x nango̱x rü nhanagürü ngĩxü̃: —Cuma rü cungexacüecha, notürü i nhu̱xmax rü tá cuxãxacü rü tá cuyatüxacü.
4 ¡Notürü taxũtáma wíũ quixa̱xü rüe̱xna to i axchiü i ngúchixáxü̃, rü taxũtáma ta̱xacü i Tupanape̱xewa ãũãchixü̃ cungõ̱x!
5 Erü cuxü̃́ tá nangexma i wüxi i cune i tagutáma texé iyoeruxü̃, erü ngẽma õxchana i naxü̃pa nax nabuxü̃ rü woetátama Tupanaca̱x ínaxüxüchi. Erü yimá cune tá nixĩ i inaxügücü nax Iraéuanecüã̱xgüxü̃ ínanguxü̃xẽẽ̱xü̃ naxme̱xwa i ngẽma Firitéutanüxü̃gü —nhanagürü.
6 Rü ngĩma ga yema nge rü ngĩtemaxã nüxü̃ iyarüxu rü ngĩgürügü: —Wüxi i Tupanaarü orearü ngeruxü̃ cha̱u̱xca̱x nango̱x. Chama nagu charüxĩnügu rü Tupanaarü orearü ngeruxü̃ i dauxü̃cüã̱x nixĩ erü nanaTupanaarü orearü ngeruü̃raxü̃xü̃chi. Rü tama nüxna chaca nax ngextá ne naxũxü̃, rü woo i nüma rü tama chamaxã nüxü̃ nixu i ta̱xacü nax yixĩxü̃ i naéga.
7 Notürü nhanagürü choxü̃: “Cuxü̃́ tá nangexma i wüxi i cune. ¡Rü nhu̱xmacürüwa rü marü taxũtáma wíũ quixa̱xü rüe̱xna axchiü i ngúchixáxü̃, rü taxũtáma ta̱xacü i Tupanape̱xewa ãũãchixü̃ cungõ̱x! Erü ngẽma õxchana rü woetátama Tupanaca̱x íxüxüchixü̃ nixĩ i naxü̃pa nax nabuxü̃ rü nhu̱xmatáta nayu̱x”, nhanagürü choxü̃ —ngĩgürügü.
8 Rü yexguma ga Manóa rü nayumüxẽ rü Cori ya Tupanaxü̃ nhanagürü: —Cuxü̃ chaca̱a̱xü̃, Pa Corix, nax wena nua toxca̱x cunamuxü̃ca̱x i ngẽma curü orearü ngeruxü̃ i dauxü̃cüã̱x nax tomaxã nüxü̃ yaxuxü̃ca̱x i ta̱xacü tá namaxã taxü i ngẽma õxchana ixírachaü̃xü̃ —nhanagürü.
9 Rü nüma ga Tupana rü Manóaxü̃ nangãxü̃ga, rü wenaxarü naxma̱xca̱x nango̱x ga yema Tupanaarü orearü ngeruxü̃ i dauxü̃cüã̱x ga yexguma tümaanewa tayexmayane. Rü nüma ga Manóa rü nataxuma ga yéma.
10 Rü yemaca̱x ga tüma rü itanhaãchi, rü tümateca̱x tayadau rü nhatagürü nüxü̃: —Yema to ga ngunexü̃gu nüxü̃ chadauxü̃ ga Tupanaarü orearü ngeruxü̃ i dauxü̃cüã̱x rü wenaxarü cha̱u̱xca̱x nango̱x —nhatagürü.
11 Rü nüma ga Manóa rü inachi rü naxma̱xmaxã yema dauxü̃cüã̱x i Tupanaarü orearü ngeruxü̃ íyexmaxü̃wa nabuxmü. Rü nüxna naca rü nhanagürü: —¿Cuma quixĩxü̃ ga to ga ngunexü̃gu cho̱xmaca̱x cungóxü̃? —nhanagürü. Rü nüma ga yema dauxü̃cüã̱x rü nanangãxü̃ga rü nhanagürü: —Ngü̃, chama chixĩ —nhanagürü.
12 Rü yexguma ga Manóa rü nhanagürü: —Ngẽxguma yanguxgu i ngẽma tomaxã nüxü̃ quixuxü̃ ¿rü nhuxãcü tá itanayaxẽẽxü̃ i ngẽma buxü̃? ¿Rü ta̱xacü tá namaxã taxüxü̃? —nhanagürü.
13 Rü nüma ga Tupanaarü orearü ngeruxü̃ i dauxü̃cüã̱x rü Manóaxü̃ nangãxü̃ rü nhanagürü: —Ngẽma cuxma̱xmaxã nüxü̃ chixuxü̃ ¡rü naxü i guxü̃ma! —nhanagürü.
14 --
15 --
16 --
17 --
18 --
19 Rü nüma ga Manóa rü wüxi ga bóyixacü niyaxu rü nhuxre ga trígu nayaxu, rü nhu̱xũchi wüxi ga nutaétügu nananugü nax Tupanana ãmare naxãxü̃ca̱x. Rü yéma Cori ya Tupanaca̱x nayagu. Rü yexguma ga nüma ga Tupana rü Manóape̱xewa rü naxma̱xpe̱xewa nüxü̃ nüxü̃ nadauxẽxẽ ga wüxi ga cua̱xruxü̃ ga mexechixü̃.
20 Yerü yexguma yema naxü̃naarü guchicaxü̃wa napu̱xnagüemagu ga üxü, rü Manóa rü naxma̱xmaxã nüxü̃ nadaugü ga yema Tupanaarü orearü ngeruxü̃ i dauxü̃cüã̱x rü guma üxüemagu dauxü̃wa nax naxũxü̃. Rü yexguma yemaxü̃ nadaugügu, rü yexma nanangücuchitanü.
21 Rü yema nixĩ ga nawa iyacuáxü̃ ga nüxü̃ nax nadaugüxü̃. Rü yexgumatama ga nüma ga Manóa rü düxwa nüxü̃ nicua̱xãchi ga Tupanaarü orearü ngeruxü̃ i dauxü̃cüã̱x nax yixĩxü̃.
22 Rü nüma ga Manóa rü naxma̱xü̃ nhanagürü: —Nhu̱xmawaxi rü aixcuma tá tayue erü Tupanaxü̃ tadaugü —nhanagürü.
23 Notürü ga tüma rü tanangãxü̃ga rü nhatarügü: —Ngẽxguma chi Cori ya Tupana tüxü̃ daixchaü̃xgu rü taxũchima tüxü̃́ nanayaxu i ngẽma tórü ãmare i naxca̱x iguxü̃, rü taxũchima tüxü̃ nanawe̱x i ngẽma nüxü̃ idaugüxü̃, rü bai chi i tamaxã nüxü̃ yaxuxü̃ i ngẽma nhu̱xmax tamaxã naxunagüxü̃ —nhatarügü.
24 Rü yexguma nabuxgu ga yema buxü̃ rü Chacháũgu nanaxüéga. Rü yexguma yayaxchigügu, rü Tupana rü poraãcü nüxü̃ narüngü̃xẽẽ.
25 Rü wüxi ga ngunexü̃gu ga Chacháũ ga yexguma Dáü̃tanüxü̃arü churaragüarü pegüchicawa naxũxgu ga ĩanegü ga Chóra rü Etaúarü ngãxü̃wa, rü Tupanaãxẽ i Üünexü̃ inanaxügü nax Chacháũmaxã inacuáxü̃.
