Juízes 14:1-20
14 Rü wüxi ga ngunexü̃gu ga Chacháũ rü ĩane ga Tináxwa naxũ rü yéma ngĩxü̃ nadau ga wüxi ga nge ga Firitéutanüxü̃ ixĩcü.
2 Rü yexguma nachiü̃ca̱x natáegu̱xgux rü nanatümaxã rü naémaxã nüxü̃ nixu rü nhanagürü: —Wüxi i nge i Firitéutanüxü̃ ya ĩane ya Tináxwa ngĩxü̃ chada̱u̱xcümaxã chingĩxchaü̃, rü chanaxwa̱xe i ngĩnatümaxã penamexẽxẽ nax ngĩmaxã chaxãmaxü̃ca̱x —nhanagürü.
3 Notürü tüma ga nanatü rü naé rü nhatagürügü: —¿Tü̱xcüü̃ i cuxma̱x ngĩxne cuyadau natanügu i ngẽma Firitéutanüxü̃gü i tama Tupanaxü̃ cua̱xgüxü̃? ¿Ẽ̱xna itaxuma i nge i nua tatanüwa rü natanüwa i guxü̃ma i nhaa Iraéuanecüã̱xgü nax ngĩmaxã cuxãmaxü̃ca̱x? —nhatagürügü. Notürü ga nüma ga Chacháũ rü tüxü̃ nangãxü̃ga rü nhanagürü: —Notürü ngẽma pacü yixĩ i choxü̃́ ngúchaü̃cü rü changĩ́xwa̱xecü nax cha̱xma̱x yixĩxü̃ca̱x —nhanagürü.
4 Rü tüma ga nanatü rü naé rü tama nüxü̃ tacua̱xgü nax Cori ya Tupana rü woetama yemaacü naxueguãxü̃, yerü naxca̱x nadau ga nhuxãcü Firitéutanüxü̃güna guxchaxü̃ nax naxãxü̃. Rü yexguma nixĩ ga Iraéuanecüã̱xgü ga Firitéutanüxü̃güme̱xẽwa nayexmagüxü̃.
5 Rü yemaacü ga Chacháũ rü nanatü rü naé rü ĩane ga Tináxwa taxĩ. Rü yexguma Chacháũ guma ĩanearü úwanecüwa nanguxgu ga guma ĩanepechinüwa, rü wüxi ga ai ga yexwaca yaxü̃ rü yéma nüxna nayuxu.
6 Rü yexgumatama ga Cori ya Tupanaãxẽ rü Chacháũxü̃ naporaxẽxẽ. Rü nhama wüxi ga bóyixacüxü̃ yamáxü̃rüxü̃ rü ngexneãcüma yema aixü̃ nima̱x. Notürü ga yema nüxü̃ ngupetüxü̃ rü tama nanatümaxã rü naémaxã nüxü̃ nixu.
7 Rü nhu̱xmachi ga Chacháũ rü yema pacü ga nüxü̃́ ngúchaü̃cüxü̃tawa naxũ rü ngĩmaxã nayarüdexa.
8 Rü marü nhuxre ga ngunexü̃ ngupetü̱xguwena, rü yexguma ga Chacháũ rü wena natáegu nax ngĩmaxã yangĩxü̃ca̱x ga yema pacü, rü ínidau ga yema ai íyamáxü̃wa. Rü yexma nüxü̃ nayangau ga yema aixü̃ne ga berure nagu üxchiaü̃xü̃.
9 Rü nanayauxcuchixü ga guma berure, rü nayawechigü. Rü yexguma tüxü̃ iyangauxgu ga nanatü rü naé rü tümamaxã nangau rü tanawegü. Notürü tama tümamaxã nüxü̃ nixu ga yema ai ga yamáxü̃xü̃newa nax nayauxãxü̃.
10 Rü tüma ga nanatü ga Chacháũ rü ngĩxü̃ ítayadau ga yema pacü nax ngĩmaxã tayamexẽẽgüxü̃ca̱x ga ngĩrü ngĩchiga. Rü nüma ga Chacháũ rü nügü naxüchixü naxca̱x ga nhuxre ga ngextü̱xücü ga Firitéutanüxü̃gü yerü woetama yema nixĩ ga nacümagü.
11 Notürü nüma ga Firitéutanüxü̃gü rü Chacháũxü̃ namuü̃e rü yemaca̱x yéma nanagagü ga 30 ga namücügü.
12 Rü yexguma ga nüma ga Chacháũ rü yema 30 ga ngextü̱xücügüxü̃ nhanagürü: —Wüxi i dexa i ẽxü̃guxü̃ tá pexna chaxã nax pema chamaxã nüxü̃ pexuxü̃ca̱x nax ta̱xacüchiga yixĩxü̃. Rü 7 i ngunexü̃ tá natai i nhaa peta. Rü ngẽxguma nhaa 7 i ngunexü̃gu chamaxã nüxü̃ pexuxgu i ta̱xacüchiga yixĩxü̃ i ngẽma ore i ẽxü̃guxü̃, rü wüxichigü i pema rü tá pexna chanaxã i wüxi i naxchiru i mexü̃ i líũchinaxca̱x, rü naétü wüxi i perü petachiru i mexü̃.
13 Notürü ngẽxguma tama mea chamaxã nüxü̃ pexuxgu nax ta̱xacüchiga yixĩxü̃ i ngẽma dexa i ẽxü̃guxü̃ rü wüxíechigü i pema rü choxna tá penaxã i wüxi i naxchiru i mexü̃ i líũchinaxca̱x, rü naétü wüxi i petachiru i mexü̃ —nhanagürü. Rü nümagü rü Chacháũxü̃ nangãxü̃gagü rü nhanagürügü: —¡Ẽcü tomaxã nüxü̃ ixu i ngẽma dexa i ẽxü̃guxü̃! Rü toma rü tá mea itarüxĩnüe —nhanagürügü.
14 Rü Chacháũ rü nüxü̃ nixu ga yema dexa ga ẽxü̃guxü̃ rü nhanagürü: —Rü guxema chibüewa ínaxũxũ ga õna, rü yíxema poraxewa ínaxũxũ i maixcuraxü̃ —nhanagürü. Rü tamaepü̱x ga ngunexü̃guwena rü nümagü rü tama nüxü̃ nacua̱xgü ga ta̱xacüchiga nax yixĩxü̃ ga yema dexa ga ẽxü̃guxü̃.
15 Rü yemaacü ga norü ãgümücü ga ngunexü̃gu rü Chacháũma̱xü̃ nhanagürügü: —¡Pora naxü nax yimá cute toxü̃́ natauxchaxẽẽxü̃ca̱x i ngẽma dexa i ẽxü̃guxü̃ i tomaxã nüxü̃ yaxuxü̃! Rü ngẽxguma taxũtáma tomaxã nüxü̃ quixuxgu i ta̱xacüchiga nax yixĩxü̃, rü tá cuxü̃ tigu rü itanagu i cunatü rü guxü̃ma i cutanüxü̃gü. Pema rü perü petawa toxna pexu nax toxna penapuxü̃xü̃ca̱x i torü ngẽmaxü̃gü —nhanagürügü.
16 Rü yemaacü ga ngĩma rü Chacháũxü̃tawa ixũ rü auxãcüma ngĩgürügü nüxü̃: —Cuma rü tama cuchoxwa̱xe rü chauxchi cuxai. Rü chautanüxü̃na cunaxã i wüxi i dexa i ẽxü̃guxü̃, notürü tama chamaxã nüxü̃ quixu nax nhuxũ nhaxü̃ i ngẽma orearü ngãxü̃ga —ngĩgürügü. Rü nüma ga Chacháũ rü ngĩxü̃ nangãxü̃ga rü nhanagürü: —Woo chaunatümaxã rü chauémaxã rü tama nüxü̃ chixu, rü yexera i cumaxã rü taxũtáma nüxü̃ chixu —nhanagürü.
17 Notürü ga ngĩma rü yema 7 ga ngunexü̃ ga nagu napetaexü̃ rü naxü̃tawa ixauxecha, rü nüxü̃ ica̱a̱xü̃. Rü yexguma norü 7 ga ngunexü̃wa nanguxgu, rü düxwa ngĩmaxã nüxü̃ nixu ga yema dexa ga ẽxü̃guxü̃arü ngãxü̃ga. Rü yexguma ga ngĩma rü ngĩtanüxü̃maxã nüxü̃ iyarüxu.
18 Rü yema norü 7 ga ngunexü̃gu ga tauta yanaxücu̱xgu ga üa̱xcü, rü nüma ga Firitéutanüxü̃gü rü Chacháũmaxã nüxü̃ nayarüxugü, rü nhanagürügü: —Curü ore i ẽxü̃guxü̃ rü nhaxü̃chiga nixĩ, “Rü ngẽma maixcuraxü̃ rü berurechiga nixĩ. Rü ngẽma poraxü̃ rü aichiga nixĩ” —nhanagürügü. Rü nüma ga Chacháũ rü nanangãxü̃ rü nhanagürü: —Cha̱xma̱x pemaxã nüxü̃ iyaxu, rü ngẽmaca̱x nixĩ i nüxü̃ pecuáxü̃ i norü ngãxü̃ga —nhanagürü.
19 Rü yexgumatama ga Cori ya Tupanaãxẽ ya Üünecü rü Chacháũmaxã inacua̱x. Rü nüma ga Chacháũ rü ĩane ga Acarúü̃wa naxũ rü 30 ga yatü yexma nayadai. Rü yema napuxü̃xü̃ ga naxchirumaxã nüxü̃́ nanaxütanü ga yema yatügü ga ore ga ẽxü̃guxü̃arü ngãxü̃gaxü̃ cua̱xgüxü̃. Rü yemawena ga Chacháũ rü nuãcüma nanatüchiü̃ca̱x natáegu.
20 Rü yema naxma̱x ga ngĩmaxã iyangĩcü rü ngĩnatü rü wüxi ga Chacháũmücüna ngĩxü̃ namu.