Juízes 16:1-31
16 --
2 --
3 --
Chacháũ rü Daríra
4 Rü yemawena ga Chacháũ rü wüxi ga nge ga Daríragu ãégacüxü̃ nangẽ̱xẽ. Rü ngĩma rü Choréquearü tuãchigu ixãchiü̃.
5 Rü nümagü ga yema Firitéutanüxü̃güarü ãẽ̱xgacügü rü Daríraxü̃tawa naxĩ rü nhanagürügü ngĩxü̃: —¡Chacháũxü̃ nawomüxẽxẽ, rü nüxna naca nax ngextá ne naxũxü̃ i ngẽma norü pora, nax ngẽmaãcü nüxü̃ tarüporamaegüxü̃ca̱x, rü tayayauxgüxü̃ca̱x, rü tayana̱i̱xgüxü̃ca̱x! Rü wüxichigü i toma rü tá cuxna ngĩxü̃ taxã i 1100 tachinü i diẽru ega cunaxü̱xgux i ngẽma —nhanagürügü ngĩxü̃.
6 Rü yexguma ga ngĩma rü Chacháũxü̃ ngĩgürügü: —¡Chamaxã nüxü̃ ixu nax ngextá ne naxũxü̃ i ngẽma curü pora! ¿Rü nhuxãcü cuxü̃ ina̱i̱xgu nixĩ i taxuacü cugü íquiwẽ̱xü̃? —ngĩgürügü.
7 Rü Chacháũ ngĩxü̃ nangãxü̃ga rü nhanagürü: —Ngẽxguma chi 7 i würatü̱xü i naxcha̱xmüü̃naxca̱x i tauta mea ipagüxü̃maxã choxü̃ yana̱i̱xgügu, rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ.
8 Rü nümagü ga Firitéutanüxü̃güarü ãẽ̱xgacügü rü Daríraxü̃tawa nanana ga 7 ga würatü̱xü ga naxcha̱xmüü̃naxca̱x ga tauta ipagüxü̃, rü yemamaxã Chacháũxü̃ iyana̱i̱x ga Daríra ga yexguma ínapeyane.
9 Rü naxü̃pa ga nax yanáiãxü̃ rü wüxi ga ucapugu iyacu̱xgü ga nhuxre ga Firitéutanüxü̃gü. Rü nhu̱xmachi aita ixü rü ngĩgürügü: —¡Pa Chacháũx, Firitéutanüxü̃gü rü cuxca̱x ínayaxüãchi! —ngĩgürügü. Rü yexguma ga Chacháũ rü nanacaũgü ga yema würatü̱xü ga naxcha̱xmüü̃naxca̱x, nhama wüxi i napana̱xã i marü ixaxü̃rüxü̃. Rü yemaacü ga Firitéutanüxü̃gü rü tama nüxü̃ nacua̱xgü ga ngextá nax ne naxũxü̃ ga norü pora.
10 Rü ga Daríra rü Chacháũxü̃ ngĩgürügü: —Choxü̃ cuwomüxẽxẽ rü chamaxã quidora. ¡Notürü i nhu̱xmax rü aixcuma chamaxã nüxü̃ ixu rü nhuxãcü cuxü̃ ina̱i̱xgu nixĩ i taxuacü cugü íquiwẽ̱xü̃! —ngĩgürügü.
11 Rü Chacháũ ngĩxü̃ nangãxü̃ga rü nhanagürü: —Ngẽxguma chi ngexwaca̱xü̃xü̃chixü̃ i napana̱xãmaxã choxü̃ pina̱i̱xgügu, rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —nhanagürü.
12 Rü yexguma ga Daríra rü wüxi ga ngexwaca̱xü̃xü̃ ga napana̱xã iyaxu, rü yemamaxã Chacháũxü̃ iyana̱i̱x ga yexguma ínapeyane. Rü noxrirüü̃tama rü wüxi ga ucapugu nhuxre ga Firitéutanüxü̃güxü̃ iyacu̱xgü. Rü nhu̱xũchi ga ngĩma rü aita ixü rü ngĩgürügü: —Pa Chacháũx, Firitéutanüxü̃gü rü cuxca̱x ínayaxüãchi —ngĩgürügü. Rü yexguma ga Chacháũ rü nagu nacaũgü ga yema napana̱xã nhama tünüta ga i̱xnütaxü̃gu icaũgüxü̃rüxü̃.
13 Rü yexguma ga Daríra rü Chacháũxü̃ ngĩgürügü: —Nhu̱xmarüta wena choxü̃ cuwomüxẽxẽ rü wena chamaxã quidora. ¡Rü chamaxã nüxü̃ ixu rü ta̱xacü ixü̱xü̃ nax cuxü̃ ináixü̃ca̱x! —ngĩgürügü. Rü nüma ga Chacháũ rü ngĩxü̃ nangãxü̃ga, rü nhanagürü: —Ngẽma tá cuxüxü̃ nixĩ i 7 cütagu choxü̃ ícumuxü̃yaexü̃ rü ngẽma 7 cüta i chauyáe tá ngẽma naxchiruarü muruü̃wa meamatama cunawãxcu. Rü ngẽxguma i chama rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —nhanagürü. Rü yexguma ga Daríra rü Chacháũxü̃ ipexẽxẽ. Rü 7 cütagu ínamuxü̃ ga nayáe nawa ga yema naxchiruarü muruxü̃.
14 Rü yemawena rü meama inapu ga yema naxchiruarü muruxü̃. Rü nhu̱xmachi aita ixü rü ngĩgürügü: —Pa Chacháũx, Firitéutanüxü̃gü rü cuxca̱x ínayaxüãchi —ngĩgürügü. Rü yexguma nayuxnagü ga Chacháũ rü nanapu ga yema naxchiruarü muruxü̃ ga nayáe nawa nadachapa̱xaxü̃.
15 Rü yexguma ga ngĩma ga Daríra rü Chacháũxü̃ ngĩgürügü: —¡Idorata̱a̱xüchixü̃! ¿Rü nhuxãcü chamaxã nüxü̃ quixu nax cucha̱xwa̱xexü̃? Rü marü tamaepü̱xcüna nixĩ i choxü̃ cuwomüxẽẽxü̃ rü nhamarüta tama chamaxã nüxü̃ quixu nax ngextá ne naxũxü̃ i ngẽma curü pora.
16 Rü ngĩma ga Daríra rü wüxichigü ga ora nüxü̃ ica̱a̱xü̃echa rü yemaca̱x ga nüma ga Chacháũ rü nachixeãxẽ rü düxwa yu̱xgu nügümaxã narüxĩnü.
17 Rü düxwa Daríramaxã nüxü̃ nixu rü nhanagürü: —Chorü bucürüwa taxúema choxü̃ tiyoeru, yerü naxü̃pa ga nax chabuxü̃ rü Tupanaca̱xtama woe íchaxüxüchi. Notürü ngẽxguma chi choxü̃ yayoerugügu rü ngẽxguma i chama rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —nhanagürü.
18 Rü yexguma ga Daríra rü nüxü̃ nax nacuáxü̃ rü aixcumaxü̃ ngĩmaxã nax yaxuxü̃ ga Chacháũ rü Firitéutanüxü̃güarü ãẽ̱xgacüca̱x íyacaxẽxẽ, rü ngĩgürügü: —¡Nhu̱xmawaxi nua pexĩ! Erü Chacháũ rü marü chamaxã nüxü̃ nixu i ta̱xacüwa nax ne naxũxü̃ i norü pora —ngĩgürügü. Rü yexguma ga Firitéutanüxü̃güarü ãẽ̱xgacügü rü yéma naxĩ ngĩmaxã ga yema diẽru ga ngĩxna ngĩxü̃ naxuaxü̃gücü.
19 Rü yexguma ga Daríra rü Chacháũxü̃ ngĩgüperemawa inapexẽxẽ. Rü wüxi ga yatüca̱x ica nax yayoõxü̃ca̱x ga yema 7 cüta ga nayáe. Rü nhu̱xmachi ga ngĩma rü inaxügü ga nax nacua̱i̱xãxü̃.
20 Rü aita ixü rü ngĩgürügü: —Pa Chacháũx, Firitéutanüxü̃gü rü cuxca̱x ínayaxüãchi —ngĩgürügü. Rü nüma ga Chacháũ rü naba̱i̱xãchi rü nagu narüxĩnü ga yema togü ga ngunexü̃gurüxü̃ nügü nax ínapoxü̃xü̃, notürü tama nüxü̃ nacua̱x ga Cori ya Tupana rü marü nüxna nax yaxũgachixü̃.
21 Rü yexguma ga nümagü ga Firitéutanüxü̃gü rü nayayauxgü rü nanacaxü̃xetügü. Rü ĩane ga Gáchawa nanagagü ga ngextá curẽ́ti ga brṍchenaxca̱xmaxã ínangaxü̃güãxü̃wa. Rü poxcupataü̃arü caerúxü̃arü dixeguwa nanapuracüxẽẽgü.
22 Notürü ga yema nayáe ga Chacháũ rü paxama wena naya.
Chacháũarü yuxchiga
23 Rü nümagü ga Firitéutanüxü̃güarü ãẽ̱xgacügü rü nataãxẽgü rü nanaxüchixügü ga Chacháũxü̃ nax yayauxgüxü̃. Rü norü tupana ga Dagóũca̱x naxü̃na nadai rü nhu̱xũchi naxca̱x ínanagu. Rü nhaãcü nawiyaegü: —Tórü tupana rü taxme̱xgu nananguxẽxẽ i tórü uanü i Chacháũ —nhanagürügü.
24 Rü yexguma yema togü ga Firitéutanüxü̃gü nüxü̃ daugügu, rü nümagü rü ta nawiyaegü rü norü tupanaxü̃ nicua̱xüxü̃gü rü nhanagürügü: —Tórü tupana rü taxme̱xgu nananguxẽxẽ i tórü uanü i Chacháũ ga tórü naanegü chixexẽẽxü̃ rü tamücügü tüxü̃ daixü̃ —nhanagürügü.
25 Rü poraãcüxüchi nataãxẽgü, rü yemaca̱x Chacháũca̱x ínacagü nax nape̱xewa nagagüaxü̃ca̱x rü nagu nax yadauxcüraxü̃güxü̃ca̱x. Rü poxcupataü̃wa Chacháũxü̃ ínagaxüchigü rü norü tupanapatawa nanagagü. Rü taxre ga caxtaarü ngãxü̃machate̱xegu nanachixẽxẽgü. Rü yéma ĩnüca̱xü̃ nayaxĩxẽẽgü rü nagu nidauxcüraxü̃gü.
26 Rü yexguma ga nüma ga Chacháũ rü yema buxü̃ ga yapuchigüxü̃xü̃ nhanagürü: —¡Yima taxre ya caxtagü ya daa ngutaque̱xepataü̃arü ngãxü̃wa ngẽxmagünegu choxü̃ ingĩxẽxẽ nax yimagu changũxũxü̃ca̱x! —nhanagürü.
27 Rü guxü̃ma ga Firitéutanüxü̃güarü ãẽ̱xgacügü rü nawa nayexmagü ga guma ngutaque̱xepataxü̃ ga yatüxü̃gümaxã rü ngexü̃gümaxã ããcune. Rü dauxnawa nayexmagü ga 3,000 ga duü̃xü̃gü ga yéma nüxü̃ rüdaunüxü̃ ga yema Chacháũgu idauxcüraxü̃güxü̃ ga nhaxtüchiü̃wa.
28 Rü yexguma ga nüma ga Chacháũ rü Cori ya Tupanana naca rü nhanagürü: —¡Cuxü̃ chaca̱a̱xü̃, Pa Corix, rü nhu̱xmarica choxna nacua̱xãchi rü pora choxna naxã nax chaugü chaxütanüxü̃ca̱x naxca̱x ga guma taxre ga chauxetü ga Firitéugü choxü̃́ caxü̃ne! —nhanagürü.
29 Rü nhu̱xũchi naxme̱xmaxã naxca̱x nangógü ga guma taxre ga caxta ga ngãxü̃wa ügüne ga guma ngutaque̱xepataxü̃ nagu ütaxü̃ne, rü gumagu ningĩgü ga naxme̱xgü.
30 Rü aita naxü rü nhanagürü: —¡Chamaxã wüxigu nayue i Firitéutanüxü̃gü! —nhanagürü. Rü yexguma rü guxü̃ma ga norü poramaxã nüxü̃ nacu̱xneta ga guma taxre ga caxta. Rü guma ngutaque̱xepataxü̃ rü naétügu nangu ga yema Firitéutanüxü̃güarü ãẽ̱xgacügü, rü guxü̃ma ga duü̃xü̃gü ga yéma yexmagüxü̃. Rü yema namaxü̱̃xgu nadaixü̃arü yexera narümumae ga yema Firitéutanüxü̃gü ga Chacháũ daixü̃ ga yexguma nayu̱xgu.
31 Rü yemawena rü ínangugü ga naeneegü rü natanüxü̃gü ga Chacháũ. Rü nanayauxgü ga naxü̃ne. Rü nanatü ga Manóa ítáxü̃gu nayata̱xgü ga Chóra rü Etaúarü ngãxü̃wa. Rü 20 ga taunecü nixĩ ga Chacháũ ga Iraéuanecüã̱xgümaxã inacuáxü̃.
