Juízes 4:1-24
4 Rü yexguma Iraéuanecüã̱xgüarü ãẽ̱xgacü ga Eúyi yu̱xguwena, rü nüma ga Iraéuanecüã̱xgü rü wenaxarü Cori ya Tupanape̱xewa chixexü̃ naxügü.
2 Rü yemaca̱x ga nüma ga Cori ya Tupana rü Iraéuanecüã̱xgüxü̃ wüxi ga Canaã́tanüxü̃ ga ãẽ̱xgacü ga Yabíũgu ãégaxü̃me̱xẽwa nanayexmagüxẽxẽ. Rü nüma ga Yabíũ rü ĩane ga Achúarü ãẽ̱xgacü nixĩ. Rü yema norü churaragüarü ãẽ̱xgacü rü Chícheragu naxãéga. Rü nüma ga Chíchera rü Aroché-Goíü̃gu nixĩ ga naxãchiü̃xü̃.
3 Rü nüma ga Yabíũ rü nüxü̃́ nayexma ga 900 ga nawexü̃ ga férunaxca̱x ga daixwa mexü̃ne ga cowaru itúgüne. Rü 20 ga taunecü poraãcü Iraéuanecüã̱xgüchi naxai rü chixri namaxã inacua̱x. Rü yemaca̱x ga yema Iraéuanecüã̱xgü rü düxwa Cori ya Tupanaarü ngü̃xẽẽca̱x ínacagüe.
4 Rü yema ngunexü̃gügu rü wüxi i nge ga Déboragu ãégacü iyixĩ ga Iraéuanecüã̱xgümaxã icua̱xcü. Rü ngĩma rü Tupanaarü orearü uruxü̃ iyixĩ rü Lapidóx naxma̱x iyixĩ ga ngĩma.
5 Rü ngĩma ga Débora rü wüxi ga cucutüü̃wa irütooxü̃, rü yemaca̱x ga yema cucu rü Déboraarü cucu nixĩ ga naéga. Rü yema cucu rü Efraĩ́anearü ma̱xpǘneanewa nayexma ga Ramá rü Betéuarü ngãxü̃wa. Rü yéma nixĩ ga ngĩxca̱x naxĩĩĩxü̃ ga Iraéuanecüã̱xgü nax norü guxchaxü̃gü namexẽẽgüxü̃ca̱x.
6 Rü wüxi ga ngunexü̃ ga Débora rü naxca̱x ingema ga wüxi ga yatü ga Barágu ãégacü ga Abinuáü̃ nane ixĩcü. Rü nüma ga Bará rü naxãchiü̃ nagu ga wüxi ga ĩane ga Chedégu ãégane ga Nataríanewa yexmane. Rü ngĩgürügü nüxü̃: —Cori ya tórü Tupana rü cuxü̃ namu rü nhanagürü cuxü̃: “¡Rü Natarítanüxü̃wa rü Yeburóũtanüxü̃wa nade i 10,000 i yatügü, rü yima ma̱xpǘne ya Tabúgu nangutaque̱xexẽxẽ!
7 Rü chama rü tá nüxna chaxĩnü i Chíchera ya Yabíũarü churaragüarü ãẽ̱xgacü nax Chichóü̃arü ngatexü̃wa naxũxü̃ca̱x nax ngẽmaãcü norü churaragümaxã rü nawexü̃gü ya cowaru itúgünemaxã cuxca̱x nax íyaxüãchixü̃ca̱x. Notürü i chama ya Cori ya Tupana rü tá cuxü̃́ chanatauxchaxẽxẽ nax cunadaixü̃ca̱x”, nhanagürü cuxü̃ ya Tupana —ngĩgürügü.
8 Rü nüma ga Bará inanangãxü̃ga rü nhanagürü ngĩxü̃: —Ngẽ́ma tá chaxũ ega cuma rü ta ngẽ́ma cuxũxgu. Notürü ngẽxguma tama ngẽ́ma cuxũxgu i cumax, rü taxũtáma ngẽ́ma chaxũ —nhanagürü ngĩxü̃.
9 Rü yexguma ga ngĩma ga Débora rü inangãxü̃ga rü ngĩgürügü: —Marü name rü cuxü̃ tá íchixümücü. Notürü ngẽma nax Chícheraxü̃ nax quimáxü̃ rü taxũtáma cuma nixĩ erü ya Tupana rü wüxi i ngexü̃me̱xẽgu tá nixĩ nax naxüãxü̃ nax yamáaxü̃ca̱x —ngĩgürügü. Rü yexguma ga ngĩma ga Débora rü Baráxü̃ íyaxümücü ga ĩane ga Quedéwa.
10 Rü yexguma Quedéwa nangugügu, rü nüma ga Bará rü naxca̱x nangema ga Yeburóũtanüxü̃gü rü Natarítanüxü̃gü ga yatügü nax churarawa naxĩxü̃ca̱x. Rü yemaacü nanangutaque̱xexẽxẽ ga 10,000 ga yatügü. Rü Débora rü íiyaxümücü.
11 Rü Quedéarü ngaicamagu ga Chanaíü̃arü carabáyutüü̃gu naxãchiü̃ ga Ebéu ga wüxi ga Quenéutanüxü̃ ga natanüxü̃na ixũgachixü̃ rü nüxica tóxmagu ãchiü̃xü̃. Rü nüma ga Ebéu rü guma Moichéna̱xtü ga Obátanüxü̃ nixĩ.
12 4:12-13 Rü yexguma Chíchera nüxü̃ cua̱xgu ga Bará rü ma̱xpǘne ga Tabúwa nax naxũxü̃, rü nüma ga Chíchera rü nanangutaque̱xexẽxẽ ga guxü̃ma ga norü churaragü rü guma 900 ga nawexü̃ ga férunaxca̱x ga cowaru itúgüne. Rü yemagümaxã Aroché-Goíü̃wa inaxũãchi rü nhu̱xmata ngatexü̃ ga Chichóü̃wa nangugü. 14 Rü yexguma ga ngĩma ga Débora rü Baráxü̃ ngĩgürügü: —Nhu̱xmawaxi nixĩ namexü̃ nax Chícheraca̱x quixũxü̃, erü nüma ya Cori ya Tupana rü curü churaragüpe̱xegu tá nixũ, rü tá cuxü̃́ nanatauxchaxẽxẽ nax Chícheraxü̃ curüporamaexü̃ —ngĩgürügü. Rü nüma ga Bará rü guma ma̱xpǘne ga Tabúwa nayarüxüe namaxã ga yema 10,000 ga norü churaragü.
13 Nüü̃ nadau 4:12
14 --
15 Rü yexguma ga nüma ga Cori ya Tupana rü yema Chícheraarü churaragü ga ixĩmarexü̃gütanüwa, rü yema churaragü ga ixãwexü̃xü̃tanüwa, rü ínananguxẽxẽ ga muü̃ ga yexguma Barámaxã nügü nadaixgu. Rü nümatama ga Chíchera rü nawexü̃wa ínaxüe, rü yemaacü ninha.
16 Rü yexgumayane ga nüma ga Bará rü yema Chícheraarü churaragüwe rü yema churaragü ga ixãwexü̃xü̃we nangẽ nhu̱xmata Aroché-Goíü̃wa nangu. Rü yema ngunexü̃gu rü taxuxü̃ma ga Chícheraarü churaragü ínayaxü. Rü guxü̃ma nayue.
17 Rü yexgumayane ga nüma ga Chíchera rü Yaéu ga Ebéu naxma̱xchiü̃ca̱x ninha, yerü nüma ga Ebéu ga Quenéutanüxü̃ rü Achúarü ãẽ̱xgacü ga Yabíũmaxã namecüma rü nügü narüngü̃xẽẽgü.
18 Rü ngĩma ga Yaéu rü Chícheraca̱x iyagó, rü ngĩgürügü nüxü̃: —¡Nuxã chauchiü̃gu nangaxi, Pa Corix, rü taxuca̱xma cumuü̃! Erü tá cuxna tadaugü —ngĩgürügü. Rü nüma ga Chíchera rü ngĩchiü̃gu nangaxi. Rü yexma wüxi ga dü̱xruü̃maxã iyadüxü.
19 Rü nüma ga Chíchera rü nhanagürü ngĩxü̃: —¡Íxraxü̃ i dexá choxna naxã, erü chita̱xawaxüchi! —nhanagürü. Rü yexguma ga ngĩma ya Yaéu rü léchi nüxna ixã. Rü wenaxarü iyadüxü.
20 Rü nüma ga Chíchera rü nhanagürü ngĩxü̃: —¡Ĩã̱xgu rüxã̱ũ̱x! Rü ngẽxguma duü̃xü̃ ngẽ́ma ne ũxgu, rü cuxna nacaxgu rü: “¡Nataxuma nixĩ i ta̱xacü”, nhacuxü̃ tá nüxü̃! —nhanagürü.
21 Notürü nüma ga Chíchera rü poraãcü nipa rü yemaca̱x napexechi. Rü yexgumayane ga ngĩma ga Yaéu rü inayaxu ga wüxi ga poruxü̃ rü wüxi ga nai ga ãmaguxü̃ ga ngĩpatacuna nagu nga̱xü̃. Rü bexma Chíchera íyexmaxü̃wa ixũ. Rü naerugu inacaxü rü yema poruü̃maxã yéma iyapocuchi nhu̱xmata yatopetüxeru rü nhaxtüanewa nangu. Rü yemaacü nayu ga Chíchera.
22 Rü yexguma Bará yéma nguxgu ga Chícheraca̱x nax nadauxü̃, rü ngĩma ga Yaéu rü ngĩchiü̃wa iyagó ga Baráxü̃ nax nayaxuxü̃ca̱x. Rü ngĩgürügü nüxü̃: —¡Nua naxũ nax cuxü̃ chanawéxü̃ca̱x i ngẽma naxca̱x cudauxü̃! —ngĩgürügü. Rü nüma ga Bará rü ngĩchiü̃gu naxücu. Rü yexma Chícheraxü̃ nayangau ga yexma üxü̃ ga nhaxtüanewa ipotüeruxü̃ namaxã ga yema nai ga ãmaguxü̃.
23 Rü yemaacü ga yema ngunexü̃gu rü Cori ya Tupana nüxü̃ narüngü̃xẽẽ ga Iraéuanecüã̱xgü nax Canaã́tanüxü̃arü ãẽ̱xgacü ga Yabíũxü̃ naporamaegüxü̃ca̱x.
24 Rü yexgumacürüwa ga Iraéuanecüã̱xgü rü yexeraãcü ãẽ̱xgacü ga Yabíũxü̃ narüporamaetanü rü nhu̱xmata yama̱xgüã rü nadaiã ga guxü̃ma ga norü duü̃xü̃gü.