Malaquías 2:1-17
2 Rü Tupana ya guxãétüwa ngẽxmacü rü nhanagürü: “Nhu̱xmax, Pa Chacherdótegüx, rü nhaa nixĩ i chorü ucu̱xẽ i pexca̱x ixĩxü̃:
2 ‘Rü dücax, rü name nixĩ i chauga pexĩnüe rü chanaxwa̱xe i aixcuma choxü̃ pengechaü̃gü. Rü ngẽxguma taxũtáma chauga pexĩnüegu rü chama rü tá guxchaxü̃ pemaxã chaxuegu. Rü nhu̱xmax nax tama aixcuma choxü̃ pengechaü̃güxü̃ rü chama rü ngẽma perü natanü i peyauxgüxü̃ naxca̱x nax chacherdótegü pexĩgüxü̃ rü tá perü guxchaxü̃ruxü̃ chayanguxuchixẽxẽ’ ”, nhanagürü ya Cori ya Tupana ya guxãétüwa ngẽxmacü.
3 Rü nhanagürüama: “Chama rü tá pexna chanayaxu i ngẽma puracü ga pexna chaxãxü̃. Rü pechiwegu tá chanawogü ya yima naxü̃naü̃gü i ngẽma naxü̃nagü i cha̱u̱xca̱x pedaixü̃. Rü wüxigu yima naü̃gümaxã tá pexü̃ íchawogü i pemax.
4 Rü ngẽmaãcü düxwa tá nüxü̃ pecua̱x nax chamax yixĩxü̃ i pexna chaxãxü̃ i nhaa ucu̱xẽ nax naxca̱x pewoeguxü̃ca̱x i ngẽma chorü mugü ga perü o̱xi ga Lewímaxã nüxü̃ chixuxü̃. Rü chama ya Cori ya Tupana ya guxãétüwa ngẽxmaxe nixĩ i nüxü̃ chixuxü̃ i ngẽma.
5 Rü yema chorü uneta ga Lewímaxã chaxueguxü̃ rü nüxna chanaxã nax duü̃xü̃güaxü̃́ nangexmaxü̃ca̱x i maxü̃ rü taãxẽ. Rü Lebína chanaxã ga yema uneta yerü chanaxwa̱xe nax chauga naxĩnüxü̃ rü choxü̃ namuü̃xü̃. Rü nüma rü aixcuma chauga naxĩnü rü choxü̃ nangechaü̃.
6 Rü nüma ga Lewí rü mexü̃maxã nanangúexẽxẽ ga duü̃xü̃gü rü taguma chixexü̃maxã nayaxucu̱xẽ. Rü nüma rü aixcuma chamaxã naxãmücü rü togümaxã tataãxẽgü. Rü tamu ga guxema duẽxẽgü ga chixexü̃na tüxü̃ ínanguxü̃xẽxẽ.
7 Rü wüxi i chacherdótearü puracü nixĩ nax duü̃xẽgü tüxü̃ nangúexẽẽxü̃ nax choxü̃ tacua̱xgüxü̃ca̱x. Rü ngẽmaca̱x name nax guxü̃ma i duü̃xü̃gü naxü̃tawa ĩxü̃ nax tüxü̃ nangúexẽẽxü̃ca̱x, erü chama nax guxãétüwa changexmaxü̃ rü nüxü̃ chaxuneta nax chorü orearü uruü̃gü yixĩgüxü̃ca̱x.
8 Notürü i pemax, Pa Chacherdótegüx, rü nüxna pexĩgachi i ngẽma ore i mexü̃. Rü ngẽma perü ngu̱xẽẽtae i chixexü̃maxã muxema ya duü̃xẽgü chixexü̃gu tüxü̃ peyixẽxẽ. Rü ngẽmaãcü i pemax rü ípeyatõxẽxẽ ga yema uneta ga Lewímaxã nüxü̃ chixuxü̃.
9 Rü ngẽmaca̱x i chamax rü chixexü̃ pemaxã chaxuegu nax guxü̃ma i duü̃xü̃gü rü chixexü̃maxã pexü̃ nadaunüxü̃ca̱x rü pexü̃ naxoexü̃ca̱x. Erü ngẽxguma duü̃xü̃güxü̃ pexucu̱xẽgügu rü tama mea wüxigu pegü pexucu̱xẽgü. Rü ngẽma nhachagürü i chamax ya Cori ya Tupana ya guxãétüwa ngẽxmaxe.”
Tama Tupanamaxã nixaixcumagü ga Iraéutanüxü̃gü
10 ¿Ẽ̱xna tama i yimátama yixĩxü̃ ya Tanatü ya guxãxü̃ma ücü? ¿Rü tü̱xcüü̃ i nhu̱xmax yigü tawomüxẽxẽ ya wüxíechigü, rü ngẽmaãcü tama tayanguxẽxẽ i ngẽma mugü ga Tupana tórü o̱xigümaxã nüxü̃ ixuxü̃?
11 Rü ngẽma Yudáanecüã̱xgü rü tama Tupanaga naxĩnüe, rü taxü̃ i chixexü̃ naxügü i Yerucharéü̃wa rü Iraéuanewa. Rü ngẽma Yudáanecüã̱x rü nanaxãũãchixẽxẽ ya yima Tupanapata ya üünene ya nüma nüxü̃ nangechaxüne, erü ngẽma yatügü i Yudáanecüã̱x rü ngexü̃gü i tupananetaxü̃ icua̱xüü̃güxü̃maxã nixãxma̱xgü.
12 Rü nüma ya Cori ya Tupana rü chierüna iyanaxoxẽẽãgu i ngẽma duü̃xü̃gü i nua tachixü̃anewa ngẽma chixexü̃ ügüxü̃, rü nüétama ega woo ta̱xacürü duü̃xü̃ yixĩxgu rü woo ãmare ngẽ́ma Tupanapatawa nangexgu.
13 Rü pema nax ngexü̃gü i tupananetaxü̃ icua̱xüü̃güxü̃maxã ixãxma̱xgüxe, rü naétü pegüxü̃etümaxã peyawaixẽxẽ i Cori ya Tupanaarü ãmarearü guchicaxü̃ rü taxü̃ i perü ngechaü̃maxã pexauxe erü nüma ya Cori ya Tupana rü tama namaxã nataãxẽ i ngẽma perü ãmare.
14 Rü pemax rü ípecagüama rü nhaperügügü: “¿Tü̱xcüü̃ tüxna nixũgachi ya Tupana?” nhaperügügü. Rü pemaxã tá nüxü̃ chixu nax tü̱xcüü̃ nax yixĩxü̃, erü nüma ya Cori ya Tupana rü nüxü̃ nadau i ngẽma chixexü̃ i cuxüxü̃ namaxã ga yema uneta ga ngĩmaxã nüxü̃ quixuxü̃ ga yema nge ga ngĩmaxã quingĩcü ga yexguma cungextü̱xügu. Rü cumücü iyixĩ, rü nüxü̃ quixu nax ngĩmaxã tá quixaixcumaxü̃.
15 ¿Rü tama ẽ̱xna yimátama Tupana yixĩxü̃ ya naxücü i taxüne rü taãxẽ? ¿Rü ta̱xacü nixĩ i pexü̃́ nanaxwa̱xexü̃ ya Tupana? Rü ngẽma pexü̃́ nanaxwa̱xexü̃ nixĩ nax noxrü yixĩgüxü̃ i ngẽma pexacügü. ¡Rü mea nüxna peda̱u̱x i perü maxü̃! Rü tama name i nüxü̃ icuyarüngüma ga yema uneta ga cuxma̱xmaxã nüxü̃ quixuxü̃ ga yexguma cungextu̱xügu ngĩmaxã cuxãxma̱xgu.
16 Rü nüma ya Cori ya Iraéutanüxü̃güarü Tupana ya guxãétüwa ngẽxmacü rü nhanagürü: “¡Nüxna peda̱u̱x i perü maxü̃! Rü tama name nax pidoraexü̃. Rü chamax rü tama namaxã chataãxẽ i ngẽma yatü i naxma̱xü̃ ítáxü̃ rü ngẽmaãcü nachixexẽẽxü̃ i norü maxü̃”, nhanagürü.
Tupana rü tá nanapoxcue i ngẽma chixexü̃ ügüxü̃
17 Rü pema rü perü dexamaxã marü düxwa peyapaxẽxẽ ya Tupana. Rü ngẽmaétüwa i pemax rü ípecagüama rü nhaperügügü: “¿Rü nhuxũ nhatarügügü i tomax rü ngẽmaca̱x tayapaxẽẽxü̃ nax toxü̃ naxĩnüxü̃?” nhaperügügü. Rü dücax, pema rü nhaperügügü: “Nüma ya Cori ya Tupana rü namaxã nataãxẽ i ngẽma duü̃xü̃gü i chixexü̃ ügüxü̃ rü taxũtáma nanapoxcue”, nhaperügügü. ¿Tama ẽ̱xna peyaxõgü nax Tupana rü aixcumacü yixĩxü̃?
