Malaquías 4:1-6
4 Rü nüma ya Cori ya Tupana ya guxãétüwa ngẽxmacü rü nhanagürü: “Rü ningaica i ngẽma ngunexü̃ i ãũcümaxü̃ i nagu tá chanapoxcuexü̃ i ngẽma chixexü̃ ügüxü̃ nhama üxüemawa yaxaexü̃rüxü̃. Rü guxü̃ma i ngẽma duü̃xü̃gü i nügü írütagüxü̃ rü chixexü̃ ügüxü̃ rü nhama maxẽ i pacü i üxüxétüwa yata̱xcuchichapa̱xacürüxü̃ tá nixĩgü. Rü ngẽma ngunexü̃gu rü guxü̃táma nixae rü taxuxü̃táma ínayaxügü.
2 Notürü i pemax nax aixcuma choxü̃ pengechaü̃güxü̃ rü ngẽma chorü üüne rü nhama üa̱xcü i pexü̃ baxixü̃rüxü̃ tá maxü̃ pexna naxã, rü tá petaãxẽgü. Rü pemax rü taãxẽmaxã tá piyuxnagütanü nhama wocaxacügü naxpǘü̃wa iyayi̱xü̃rüxü̃.
3 Rü ngẽma ngunexü̃ i ãũcümaxü̃ i nagu chapoxcuexü̃ i ngẽma chixexü̃ ügüxü̃ rü pema rü nawa tá pengagü i ngẽma chixexü̃ ügüxü̃ nhama waixümüte̱xewa pengagüxü̃rüxü̃.
4 ¡Rü nüxna pecua̱xãchi ga yema mugü ga chorü duü̃ ga Moichéna chaxãxü̃ ga ma̱xpǘne ga Chinaíwa! Rü yema ucu̱xẽgü rü mugü rü guxü̃ma ga Iraéutanüxü̃güca̱x nixĩ nax nümagü naga naxĩnüexü̃ca̱x.
5 Rü dücax, nua tá pexca̱x chanamu ya chorü orearü uruxü̃ ya Ería naxü̃pa i ngẽma ngunexü̃ i ãũcümaxü̃ i nagu chapoxcuexü̃ i ngẽma chixexü̃ ügüxü̃.
6 Rü nüma ya Ería rü duü̃xü̃gümaxã tá nüxü̃ nixu i chorü ore nax papágü rü nanegümaxã nangüxmüexü̃ca̱x, rü nüma i nanegü rü nanatügümaxã nangüxmüexü̃ca̱x. Erü ngẽxguma tama nüxü̃ naxoegu i norü chixexü̃gü rü chama rü tá ngẽ́ma chaxũ rü noxtacüma tá chanapoxcue i ngẽma nachixü̃anecüã̱x i duü̃xü̃gü, rü noxtacüma tá chayanaxoxẽxẽ”, nhanagürü ya Cori ya Tupana.
