Números 22:1-41
22 Rü nüma ga Iraéutanüxü̃gü rü inaxĩ rü Moábianearü metachinüxü̃gu nayapegü ga natü ga Yurdáũarü léstegu ga ĩane ga Yericóarü to̱xma̱xtagu.
2 Rü nüma ga Moábianearü ãẽ̱xgacü ga Baráqui ga Yipúru nane rü nüxü̃ nacuáchiga ga nhuxãcü yema Iraéutanüxü̃gü rü Amuréutanüxü̃güxü̃ naporamaegüxü̃.
3 Rü yexgumarüxü̃ ta ga yema norü duü̃xü̃gü ga Moábianecüã̱xgü, rü namuü̃e ga yexguma yema Iraéutanüxü̃güxü̃ nadaugügu ga nax namuxũchixü̃.
4 22:4-5 Rü yemaca̱x ga yema Moábianecüã̱xgü rü Miyiã́ũanecüã̱xgüarü ãẽ̱xgacügümaxã nidexa rü nhanagürügü nüxü̃: —Guxü̃ma i nhaa duü̃xü̃gü i Iraéutanüxü̃gü rü tá nanapaxẽxẽ i tórü naane, nhama wüxi i woca i maxẽ nagu̱xẽẽxü̃rüxü̃ —nhanagürügü. Rü yemaca̱x ga nüma ga Moábianearü ãẽ̱xgacü ga Baráqui rü Tupanaarü orearü uruxü̃ ga Baraáũ ga Beú naneca̱x nangema. Rü nüma ga Baraáũ rü ĩane ga Pétucüã̱x nixĩ rü taxtü ga Eufrátearü ngaicamagu naxãchiü̃ ga Amáxü̃anewa. Rü nüma ga Baráqui rü norü duü̃xü̃güxü̃ namu nax Baraáũmaxã rü nhagüxü̃ca̱x: “Eyítuanewa ne naxĩ i duü̃xü̃gü i chauchixü̃ane yapaxẽẽgüxü̃. Rü nhu̱xmax rü marü chorü to̱xma̱xtagu napegü.
5 Nüü̃ nadau 22:4
6 ¡Rü paxa nua naxũ rü chaugagu chixexü̃ namaxã naxuegu i ngẽma duü̃xü̃gü! Erü tá toxü̃ narüporamaegü. Rü bexmana ngẽmaãcü tá choxü̃́ natauxcha nax nüxü̃ charüporamaexü̃ rü íchawoxü̃xü̃ i nua chauchixü̃anewa. Rü chama rü meama nüxü̃ chacua̱x rü ngẽxguma ta̱xacümaxã mexü̃ cuxuegu̱xgu rüe̱xna chixexü̃ namaxã cuxuegu̱xgu, rü guxü̃guma aixcuma ningu”, nhanagürü.
7 Rü yexguma ga yema orearü ngeruü̃gü ga Moábianecüã̱xgü rü Miyiã́ũanecüã̱xgü rü diẽrumaxã Baraáũxü̃tawa naxĩ nax naxütanügüaxü̃ca̱x ga chixexü̃ Iraéutanüxü̃gümaxã naxueguxü̃ca̱x. Rü yexguma Baraáũxü̃tawa nangugügu, rü namaxã nüxü̃ nixugügü ga Baráquiarü ore.
8 Rü nüma ga Baraáũ rü nanangãxü̃ rü nhanagürü nüxü̃: —¡Ẽcü nuxã pepegü i nhaa chütaxü̃! Rü moxü̃ pa̱xmama tá pexü̃ changãxü̃ i ngẽma Tupana chamaxã nüxü̃ ixuxü̃ãcüma —nhanagürü. Rü yemaacü ga yema Moábianearü ãẽ̱xgacüarü orearü ngeruü̃gü rü yexma napegü.
9 --
10 --
11 --
12 Rü nüma ga Tupana rü Baraáũmaxã nüxü̃ nixu rü nhanagürü: —Tama chanaxwa̱xe i nawe curüxũ rü chixexü̃ namaxã cuxuegu i ngẽma Iraéutanüxü̃gü, erü ngẽma duü̃xü̃gü rü chamatama marü mexü̃ namaxã chaxuegu —nhanagürü.
13 Rü moxü̃ãcü pa̱xmama ínadaxgu ga Baraáũ rü namaxã nüxü̃ nixu ga yema duü̃xü̃gü ga Baráqui yéma mugüxü̃ rü nhanagürü nüxü̃: —¡Ẽcü pewoegu pechixü̃aneca̱x! Rü Cori ya Tupana rü tama nanaxwa̱xe nax pewe charüxũxü̃ —nhanagürü.
14 Rü yema duü̃xü̃gü ga Moábianecüã̱xgü rü nawoegu ga Baráqui íyexmaxü̃wa, rü namaxã nüxü̃ nixugüe rü nhanagürügü: —Nüma i Baraáũ rü tama towe narüxũ —nhanagürügü.
15 Notürü nüma ga Baráqui rü tama inaxĩnü, rü wenaxarü togü ga norü duü̃xü̃gü yéma Baraáũxü̃tawa namugü. Notürü yemagü rü yema nüxíra yéma namugüxü̃xü̃ narümumae rü nhu̱xũchi yemaétüwa ügüxü̃ nixĩgü.
16 Rü nüma ga yema ãẽ̱xgacügü rü Baraáũxü̃tawa naxĩ rü nhanagürügü nüxü̃: —Nüma ya Baráqui ya Chipúru nane rü moxẽ cuxca̱x nua namu rü nhanagürü: “¡Tauxü̃́ i cuxoxü̃ nax chauxü̃tawa cuxũxü̃!
17 Rü chama rü poraãcü cumaxã chataãxẽ rü mea tá cuxü̃ chayaxu. Rü tá cuxna chanaxã i guxü̃ma i ta̱xacü i naxca̱x ícuca̱xaxü̃. ¡Ẽcü nua naxũ rü choxü̃ rüngü̃xẽxẽ nax chixexü̃ namaxã cuxueguxü̃ca̱x i nhaa Iraéutanüxü̃gü!” nhanagürü i nüma i Baráqui —nhanagürügü.
18 Notürü nüma ga Baraáũ rü nanangãxü̃ rü nhanagürü: —Woo chi Baráqui choxna naxãxgu i guxü̃ma i úiru rü diẽru i napatawa ngẽxmaxü̃ notürü i chama rü taxucürüwa ta̱xacü chaxü, rü woo taxü̃ rü woo íxraxü̃, ega tama Cori ya Tupanaarü mu yixĩgu.
19 Notürü name nixĩ i pema rü ta rü nuxã pepegü i nhaa chütaxü̃, erü nhaa chütaxü̃gu tá nüxü̃ chacua̱x rü ngoxi nhu̱xmagu rü ta̱xacüxü̃ tá chamaxã yaxu ya Cori ya Tupana —nhanagürü.
20 Rü yema chütaxü̃gu rü nüma ga Tupana rü Baraáũca̱x nango̱x rü nhanagürü nüxü̃: —Nhu̱xma nax cuxca̱x nua naxĩxü̃ i ngẽma yatügü rü ¡ẽcü, írüda rü nawe rüxũ! Notürü ngẽma chama cumaxã nüxü̃ chixuxü̃xica tátama nixĩ i cuxüxü̃ —nhanagürü.
Tupanaarü orearü ngeruxü̃ i dauxü̃cüã̱x rü Baraáũca̱x nango̱x
21 Rü moxü̃ãcü pa̱xmama rü ínarüda ga Baraáũ rü norü búru naxü̱xma̱xwe̱xe rü nawe narüxũ ga yema ãẽ̱xgacügü ga Moábianecüã̱xgü.
22 Rü nüma ga Baraáũ rü norü búruétügu nixũ, rü taxre ga norü duü̃xü̃gü ínayaxümücügü. Notürü ga Tupana rü nanu. Rü yemaca̱x nixĩ ga Tupanaarü orearü ngeruxü̃ i dauxü̃cüã̱x ga Baraáũarü búruxü̃ yachiyepe̱e̱xü̃ nax taxuacü naxüpetüxü̃ca̱x.
23 Rü yema búru rü nüxü̃ nadau ga yema Tupanaarü orearü ngeruxü̃ ga norü taramaxã namagu chixü̃. Rü yemacha̱xwa namana ínaxücu rü ínangemaanexü̃wa naxũmare. Notürü nüma ga Baraáũ rü tama nüxü̃ nadau ga yema Tupanaarü orearü ngeruxü̃ rü yemaca̱x nanacua̱xi ga norü búru nax namawa naxũxü̃ca̱x.
24 Rü yemaca̱x nüma ga Tupanaarü orearü ngeruxü̃ i dauxü̃cüã̱x rü yema nama íxãxtapü̱xanexü̃gu rü íyaxi̱xyemaxü̃gu nayachi ga úwanecü íyixĩxü̃wa.
25 Rü yema búru rü wenaxarü nüxü̃ nadau ga yema Tupanaarü orearü ngeruxü̃ i dauxü̃cüã̱x rü yemaca̱x naxtapü̱xwaama naxĩ̱xpetü rü Baraáũxü̃ yéma nayaxũxtüpara. Rü nüma ga Baraáũ rü wenaxarü nanacua̱xi.
26 Notürü nüma ga Tupanaarü orearü ngeruxü̃ i dauxü̃cüã̱x rü nüxíra nape̱xewaama naxũ rü yema poraãcü íyaxi̱xyemaxü̃gu nayachi ga ngextá taxuwama ínaxüpetüxü̃wa.
27 Rü yema búru rü wenaxarü nüxü̃ nadau ga yema Tupanaarü orearü ngeruxü̃ i dauxü̃cüã̱x, rü yemaca̱x narünhuãchi yerü taxuwama naxüpetüéga. Rü yexguma ga Baraáũ rü nanu, rü poraãcü nanacua̱xi.
28 Rü yemaca̱x ga Tupana rü nayadexaxẽxẽ ga yema búru nax Baraáũmaxã yadexaxü̃ca̱x, rü nhanagürü: —¿Ta̱xacü cumaxã chaxü? Rü nhaamaxã rü marü tamaepü̱xcüna nixĩ nax choxü̃ cucua̱xixü̃ —nhanagürü.
29 Rü nüma ga Baraáũ nanangãxü̃ ga norü búru rü nhanagürü nüxü̃: —¿Tü̱xcüü̃ i chagu quidauxcüraxü̃xü̃? Rü ngẽxguma chi chaxãarü cüxchiã̱xgux rü nhu̱xmax chitama nixĩ i nuxã cuxü̃ chimáxü̃ —nhanagürü.
30 Notürü ga yema búru rü nhanagürü nüxü̃: —Chama nixĩ i curü búru i guxü̃guma chautagu cuxaunagüaxü̃ ega ngextá cuxũũ̱xgu. Cuma rü meama nüxü̃ cucua̱x rü taguma nhuxgu nhu̱xmarüxü̃ cumaxã chixĩ —nhanagürü. Rü nüma ga Baraáũ rü nanangãxü̃ rü: —Aixcuma nixĩ i ngẽma —nhanagürü.
31 Rü yemaca̱x ga Cori ya Tupana rü Baraáũxü̃ nüxü̃ nadauxẽxẽ ga yema norü orearü ngeruxü̃ i dauxü̃cüã̱x ga namaarü ngãxü̃gu chixü̃ norü taramaxã. Rü yemaxü̃ nada̱xgux ga Baraáũ rü nhaxtüanegu nanangücuchi.
32 Notürü ga Tupanaarü orearü ngeruxü̃ i dauxü̃cüã̱x rü Baraáũxü̃ nhanagürü: —¿Tü̱xcüü̃ tamaepü̱xcüna cuyama̱x i ngẽma curü búru? Rü chama nixĩ i cuxü̃ chichiyepe̱e̱xü̃, erü ngẽma ngẽ́ma nax cuxũxü̃ rü tama chorü me nixĩ.
33 Rü ngẽma curü búru rü choxü̃ nadau rü ngẽmaca̱x tamaepü̱xcüna choxü̃ ínaxüeguãchi. Rü ngẽxguma chi taxũchima choxü̃ ínaxüeguãchigu, rü marü chi cuxü̃ chima̱x notürü ngẽma curü búru rü chi chanamaxẽxẽ —nhanagürü.
34 Rü nüma ga Baraáũ rü Tupanaarü orearü ngeruü̃xü̃ nangãxü̃ rü nhanagürü: —Chixexü̃ chaxü erü tama nüxü̃ chacua̱x nax cuma yixĩxü̃ i choxü̃ quichiyepe̱e̱xü̃. Rü ngẽxguma cuxca̱x nachi̱xegu nax ngẽ́ma chaxũxü̃ rü tá chatáegu —nhanagürü.
35 Notürü ga Tupanaarü orearü ngeruxü̃ i dauxü̃cüã̱x rü nanangãxü̃ rü nhanagürü: —Marü name i nawe curüxũ i ngẽma yatügü, notürü ngẽma cumaxã nüxü̃ chixuxü̃xica tátama nixĩ i nüxü̃ quixuxü̃ —nhanagürü. Rü yemaca̱x ga Baraáũ rü nawe narüxũ ga yema ãẽ̱xgacügü ga Baráqui yéma mugüxü̃.
Baráqui rü Baraáũxü̃ mea nayaxu
36 Rü yexguma Baráqui nüxü̃ cuáchigagu ga Baraáũ nax yangaicaxü̃, rü inaxũãchi rü wüxi ga ĩane ga Moábianecüã̱xgüarügu nüxü̃ nayangau. Rü guma ĩane rü natü ga Anóü̃cutüwa nayexma ga Moábichixü̃anearü üyeanewa.
37 Rü nhanagürü nüxü̃: —Mue̱xpü̱xcüna chanamu nax cuxca̱x yacagüxü̃ca̱x. ¿Rü ta̱xacüca̱x i tama nua cuxũxchaü̃xü̃? ¿Ẽ̱xna nagu curüxĩnü rü taxũchima mea cuxü̃ chayaxu? —nhanagürü.
38 Rü nüma ga Baraáũ rü nanangãxü̃ rü nhanagürü: —Dücax, marü nua chaxũ nax cuxü̃ íchayadauxü̃ca̱x. Notürü i chama rü choxü̃́ nataxu i pora nax chauechamatama ta̱xacürü orexü̃ chixuxü̃ca̱x. Erü chama rü ngẽma Tupana chamaxã nüxü̃ ixuxü̃xicatama tá nixĩ i nüxü̃ chixuxü̃ —nhanagürü.
39 Rü Tupanaarü orearü uruxü̃ ga Baraáũ rü ãẽ̱xgacü ga Baráquiwe narüxũ nhu̱xmata Quiriáchi-Uchuáchiwa nangugü.
40 Rü yéma ga Baráqui rü norü duü̃xü̃güxü̃ namu nax wocagü rü carnérugü nadaixü̃ca̱x. Rü nhu̱xũchi Baraáũxü̃tawa rü yema togü ga ãẽ̱xgacügü ga íyaxümücügüxü̃tawa nanamugü ga nhuxre ga namachi nax nüxna naxãgüãxü̃ca̱x.
41 Rü moxü̃ãcü rü nüma ga Baráqui rü Baraáũxü̃ ínayadau. Rü ma̱xpǘne ga Bamó-Chibaágu nanaxĩnagüxẽxẽ nax yéma nüxü̃ nadauxü̃ca̱x ga Iraéutanüxü̃gü ipegüxü̃wa.
