Números 23:1-30
23 Rü yexguma ga nüma ga Baraáũ rü nhanagürü nüxü̃: —¡Ẽcü 7 i ãmarearü guchicaxü̃ nuxã naxü, rü ínayauxü̃ i 7 i wocaxacügü rü 7 i carnérugü nax cha̱u̱xca̱x ínamemarexü̃ca̱x! —nhanagürü.
2 Rü nüma ga Baráqui rü nanaxü ga yema Baraáũ namaxã nüxü̃ ixuxü̃. Rü wüxigu nügümaxã rü nayama̱xgü rü nayagugü ga wüxi ga wocaxacü rü wüxi ga carnéru ga wüxichigü ga naxü̃naarü guchicaxü̃wa.
Baraáũ rü mexü̃ Iraéutanüxü̃gümaxã naxuegu
3 23:3-4 Rü nhu̱xũchi Baraáũ rü nhanagürü Baráquixü̃: —¡Ẽcü nuxã naxü̃naarü guchicagüxü̃tagu rüxã̱ũ̱x! Rü chama rü tá cuxna chixũgachi nax íchayadauxü̃ca̱x ngoxi ngẽ́ma cha̱u̱xca̱x naxũ ya Cori nax ngẽxma choxü̃ nanga̱u̱xü̃ca̱x. Rü nhu̱xũchi tá cumaxã nüxü̃ chixu i ngẽma chamaxã nüxü̃ yaxuxü̃ —nhanagürü. Rü nüma ga Baraáũ rü wüxi ga ma̱xpǘne ga chianenewa naxũ, rü yéma nixĩ ga Tupana naxca̱x ngóxü̃. Rü nüma ga Baraáũ rü nhanagürü Tupanaxü̃: —Marü chanaxü i 7 i ãmarearü guchicaxü̃, rü wüxichigü i ngẽma guchicaxü̃wa rü chayagu i wüxi i wocaxacü rü wüxi i carnéru —nhanagürü.
4 Nüü̃ nadau 23:3
5 Rü yexguma ga Cori ya Tupana rü Baraáũmaxã nüxü̃ nixu ga wüxi ga ore ga Baráquica̱x ixĩxü̃, rü nhu̱xũchi nhanagürü nüxü̃: —¡Ẽcü natáegu i naxü̃tawa i Baráqui rü namaxã nüxü̃ ixu i ngẽma ore i cumaxã nüxü̃ chixuxü̃! —nhanagürü.
6 Rü nüma ga Baraáũ rü natáegu rü Baráquixü̃ inayangau ga yexma naxü̃naarü guchicagüxü̃tagu chigüxü̃ namaxã ga guxü̃ma ga ãẽ̱xgacügü ga Moábianecüã̱xgü.
7 Rü nüma ga Baraáũ rü nüxü̃ nixu ga nhaa ore rü nhanagürü: —Yéama yáxü̃wa ínama̱xpǘneanexü̃wa i Aráũwa choxü̃ ne naxũxẽxẽ ya Baráqui ya Moábianecüã̱xgüarü ãẽ̱xgacü. Rü nhanagürü choxü̃: “¡Rü nua naxũ rü chixexü̃ namaxã naxuegu i ngẽma Iraéutanüxü̃gü nax ngẽmaãcü chixexü̃ namaxã ngupetüxü̃ca̱x!” nhanagürü choxü̃.
8 ¿Notürü nhuxãcü tá chixexü̃ namaxã chaxuegu i ngẽma duü̃xü̃gü i Tupana tama chixexü̃ namaxã ueguxü̃? ¿Rü nhuxãcü tá chixexü̃gu namaxã charüxĩnü i ngẽma duü̃xü̃gü i Cori ya Tupana tama chixexü̃gu namaxã rüxĩnüxü̃?
9 Rü nua daa ma̱xpǘnechitaeruwa rü meama nüxü̃ chadau i ngẽma Iraéutanüxü̃gü. Rü daa ma̱xpǘnetape̱xewa rü meama nüxü̃ chadawenü. Rü chanangugü rü duü̃xü̃gü i nügütanüxü̃güxicatama ixãchiü̃güxü̃ nixĩgü. Rü tama togü i duü̃xü̃gümaxã nawüxigu erü tama togü i duü̃xü̃gümaxã nügü narüxücu.
10 Rü nhama ta̱xacü i ãte̱xexü̃rüxü̃ namuxũchi ¿rü texé tá tayaxugü? ¿Rü texé tá nüxü̃ cuáxü̃ i norü mu? Chierü ngẽma duü̃xü̃gü i mexü̃rüxü̃ chixĩxgu nhu̱xmatáta chayu̱x, rü ngẽmawena rü Tupana ngẽma duü̃xü̃güxü̃ nadauxü̃rüxü̃, choxü̃ nada̱u̱x nax chamexü̃ —nhanagürü.
11 Rü yexguma ga Baráqui rü Baraáũxü̃ namuama yerü ga Baraáũ rü tama nanaxü ga yema nüxna naxca̱x naca̱xaxü̃, rü nhanagürü: —¿Ta̱xacü nixĩ icuxüxü̃? Rü chama rü cuxca̱x nua changema nax chixexü̃ namaxã cuxueguxü̃ca̱x i nhaa chorü uanügü, notürü i cuma rü mexü̃ namaxã cuxuegu —nhanagürü.
12 Rü nüma ga Baraáũ rü nanangãxü̃ rü nhanagürü: —¿Tama ẽ̱xna nüxü̃ cucua̱x nax cumaxã nüxü̃ chixuxü̃ rü ngẽma Tupana chamaxã nüxü̃ ixuxü̃xicatama tá yixĩxü̃ i ngẽma nüxü̃ chixuxü̃? —nhanagürü.
13 Notürü nüma ga Baráqui rü Baraáũxü̃ nica̱xaxü̃chigüama rü nhanagürü: —¡Ẽcü nua toxnamana chawe rüxũ, rü ngẽ́ma tá nixĩ i naxpechinüguxica tátama cudauxü̃ ya yima norü ĩane i ngẽma duü̃xü̃gü, notürü taxũtáma guxü̃gu cudauane i norü ĩanewa! Rü chanaxwa̱xe nax ngẽ́ma chixexü̃ namaxã cuxueguxü̃ —nhanagürü.
14 Rü nüma ga Baráqui rü wüxi ga naane ga dauxü̃taechica ga Yófĩ́gu ãégaxü̃wa nanaga ga ma̱xpǘne ga Pígatape̱xewa. Rü yexma nanaxü ga 7 ga ãmarearü guchicaxü̃. Rü wüxichigüwa nayagu ga wüxi ga wocaxacü rü wüxi ga carnéru.
15 Rü yema nachicawa rü nüma ga Baraáũ rü nhanagürü Baráquixü̃: —¡Ẽcü nua nhaa naxü̃na íguxü̃xü̃tagu rüxã̱ũ̱x! rü chama rü tá yoxni Tupanamaxã charüdexa —nhanagürü.
16 Rü nüma ga Cori ya Tupana rü yexma Baraáũxü̃ nayangau, rü namaxã nüxü̃ nixu ga yema ore ga Baráquimaxã tá nüxü̃ yaxuxü̃. Rü nhanagürü ta nüxü̃: —¡Ẽcü natáegu naxü̃tawa i Baráqui rü namaxã nüxü̃ ixu i ngẽma cumaxã nüxü̃ chixuxü̃! —nhanagürü.
17 Rü nüma ga Baraáũ rü natáegu. Rü Baráquixü̃ inayangau ga naxü̃na íguxü̃xü̃tagu chixü̃ namaxã ga ãẽ̱xgacügü ga Moábianecüã̱xgü. Rü nüma ga Baráqui rü Baraáũna naca rü nhanagürü: —¿Rü nhuxũ nhaxü̃ cuxü̃ ya Cori ya Tupana? —nhanagürü.
18 Rü yexguma ga nüma ga Baraáũ rü nüxü̃ nixu ga nhaa ore, rü nhanagürü: —Pa Baráqui ya Chipúru Nane Ixĩcüx ¡dücax, mea choxü̃́ irüxĩnü!
19 Rü Tupana rü tama duü̃xü̃gü nagu rüxĩnüxü̃gu narüxĩnü, rü taguma nidora rü taguma nanaxüchicüxü i norü ĩnü. Rü ngẽxguma ta̱xacüü̃ yaxuxgu rü aixcumama nanaxü. Rü ngẽxguma ta̱xacüca̱x inaxunetagu rü aixcumama nayanguxẽxẽ.
20 Rü chama rü choxü̃ namu ya Tupana nax mexü̃ namaxã chaxueguxü̃ca̱x i ngẽma duü̃xü̃gü i Iraéutanüxü̃gü erü nümatama ya Tupana rü mexü̃ namaxã naxuegu rü ngẽmaca̱x i chama rü taxucürüwa chixexü̃ namaxã chaxuegu.
21 Rü taguma texéxü̃ nawomüxẽẽgü i ngẽma duü̃xü̃gü rü taguma texémaxã chixexü̃ naxügü i ngẽma Iraéutanüxü̃gü i Yacúarü duü̃xü̃gü ixĩgüxü̃. Rü Cori ya norü Tupana rü natanüwa nangexma, rü nümagü rü norü ãẽ̱xgacüãcü nüxü̃ nacua̱xgü —nhanagürü ga Baraáũ.
22 --
23 --
24 --
25 Rü yexguma ga Baráqui rü nhanagürü Baraáũxü̃: —Nhu̱xma nax tama cuxü̃́ natauxchaxü̃ nax chixexü̃ namaxã cuxueguxü̃ i ngẽma Iraéutanüxü̃gü, rü ngexrüma noxtacüma nax mexü̃ namaxã cuxueguxü̃ —nhanagürü.
26 Rü nüma ga Baraáũ rü nanangãxü̃ rü nhanagürü: —¿Tama ẽ̱xna nagu curüxĩnü nax marü cumaxã nüxü̃ chixuxü̃ rü ngẽma Tupana chamaxã nüxü̃ ixuxü̃xicatama tá yixĩxü̃ i ngẽma nüxü̃ chixuxü̃? —nhanagürü.
27 Rü yexguma ga Baráqui rü nhanagürü nüxü̃: —¡Ẽcü, nua toxnamana chawe rüxũ! Rü bexmana ega ngẽma nachicawa chixexü̃ namaxã cuxuegu̱xgu i ngẽma Iraéutanüxü̃gü rü taxũtáma nanu ya Tupana —nhanagürü.
28 Rü yemaacü ga Baráqui rü ma̱xpǘne ga Peúgu ãéganewa Baraáũxü̃ naga. Rü yéma nixĩ ga meama naétü idauxü̃ ga guxü̃ma ga yema chianexü̃.
29 Rü yexguma ga nüma ga Baraáũ rü nhanagürü nüxü̃: —¡Ẽcü 7 i ãmarearü guchicaxü̃ nuxã naxü, rü ínayauxü̃ i 7 i wocaxacügü rü 7 i carnérugü nax cha̱u̱xca̱x ínamemarexü̃ca̱x! —nhanagürü.
30 Rü nüma ga Baráqui rü nanaxü ga yema Baraáũ namaxã nüxü̃ ixuxü̃. Rü nayama̱x rü nayagu ga wüxi ga wocaxacü rü wüxi ga carnéru ga wüxichigü ga yema naxü̃naarü guchicaxü̃wa.
