Oséias 1:1-11
1 Rü nhaa nixĩ ga ore ga Cori ya Tupana nüxü̃ ixuxü̃ namaxã ga Ochéa ga Béri nane ga yexguma Yudáanewa ãẽ̱xgacügü yixĩgügu ga Uchía rü Yotáũ rü Acáa rü Echequía. Rü yexguma nixĩ ga Yerubuã́ũ ga Yoá nane ga ãẽ̱xgacü yixĩxü̃ ga Iraéuanewa.
2 Rü nhaa nixĩ ga yema nüxíraxü̃xü̃ ga ore ga Cori ya Tupana Ochéamaxã nüxü̃ ixuxü̃. Rü nhanagürü nüxü̃: —Ngẽma Iraéuanecüã̱xgü rü nhama wüxi i ngexü̃ i natena ngeãxẽxü̃rüxü̃ choxna nixĩgachi. Rü cumax, Pa Ochéax, rü wüxi i cua̱xruxü̃ tá quixĩ naxca̱x i ngẽma duü̃xü̃gü. ¡Rü ngẽmaca̱x i nhu̱xmax rü wüxi i nge i chixri maxü̃cümaxã naxãxma̱x rü ngĩwa naxãxacü! Rü ngẽmaãcü i ngẽma cuxacügü rü wüxi i nge i ngeãxẽcüxacügü tá nixĩgü —nhanagürü.
3 Rü yemawena ga Ochéa rü ngĩmaxã naxãxma̱x ga Gomé ga Dibrã́ĩacü. Rü ngĩma rü nüxü̃́ ixãxacü rü nayatü.
4 Rü nhu̱xũchi ga nüma ga Cori ya Tupana rü nhanagürü Ochéaxü̃: —Yimá cune rü Yechereé tá nixĩ i naéga. Erü paxaxüchitáma chanapoxcue i ngẽma nataagü ya yimá ãẽ̱xgacü ya Yeú naxca̱x ga yema taxü̃ ga máeta ga naxüxü̃ nawa ga guma ĩane ga Yechereé. Rü ngẽxma tá chayacua̱xẽxẽ nax nümagütama i Iraéuanecüã̱xgü nügümaxã inacua̱xgüxü̃.
5 Erü ngẽma ngunexü̃gu rü yima ĩane ya Yechereéarü ngatexü̃ i metachinüanexü̃gu tá chanadai i ngẽma norü churaragü i Iraéuanecüã̱xgü rü ngẽxma tá nagu̱x i norü pora —nhanagürü.
6 Rü yexguma ga ngĩma ga Gomé rü wena ixãxacü, rü nange ga ngĩxacü. Rü nüma ga Cori ya Tupana rü Ochéaxü̃ nhanagürü: —Ngẽma ngĩéga i ngẽma cuxacü rü Duruáma tá nixĩ. (Rü ngẽma naéga rü: “tama choxü̃́ nangechaü̃tümüxü̃gü”, nhaxü̃chiga nixĩ.) Erü nhu̱xmawena rü marü taxũtáma choxü̃́ nangechaü̃tümüxü̃gü i Iraéuanecüã̱xgü. Rü marü taxũtáma nüxü̃́ nüxü̃ icharüngüma i ngẽma norü chixexü̃gü.
7 Notürü ngẽma Yudáanecüã̱xgü rü tá choxü̃́ nangechaü̃tümüxü̃gü rü chamatama i norü Tupana nax chixĩxü̃ rü tá norü uanügüna íchanapoxü̃. Notürü taxũtáma ta̱xacürü churaragümaxã rüe̱xna naxnegümaxã rüe̱xna ngẽma churaragü i cowaruã́xü̃maxã —nhanagürü ga Tupana.
8 Rü yexguma Gomé marü Duruáma ngĩxü̃ yamaieguwena, rü wena ixãxacü, rü nayatü.
9 Rü yexguma ga nüma ga Cori ya Tupana rü Ochéaxü̃ nhanagürü: —Ngẽma cuneéga rü Duamí tá nixĩ. (Rü ngẽma naéga rü “tama chorü duü̃xü̃gü pexĩgü”, nhaxü̃chiga nixĩ.) Erü pema i Iraéuanecüã̱xgü rü marü tama chorü duü̃xü̃gü pexĩgü rü chama rü marü tama perü Tupana chixĩ —nhanagürü.
10 --
11 --
