Oséias 3:1-5
3 Rü yexguma ga Cori ya Tupana rü nhanagürü choxü̃: —¡Ngẽ́ma naxũ rü wenaxarü ngĩxca̱x yadau i cuxma̱x rü cugüxü̃tawa ngĩxü̃ naga rü ngĩxü̃ nangechaxü̃, rü woo i ngĩma rü ngĩrü me nixĩ i nai i yatümaxã nax namaxü̱̃xü̃! Erü chama ya Cori ya Tupana rü ngẽxgumarüxü̃ ngẽma Iraéuanecüã̱xgüxü̃ changechaü̃ama rü woo i nümagü rü choxna nixĩgachi rü naxca̱x narümemae nax ngẽma tupananetachicüna̱xãgüwe naxĩxü̃ rü nangõ̱xgüaxü̃ i ngẽma maixcuraxü̃gü i namaxã nüxü̃ yacua̱xüü̃güxü̃ —nhanagürü ga Tupana.
2 Rü yexguma ngĩxü̃ ichayangauxgu rü yema ngĩrü yoraxü̃tawa wenaxarü ngĩxca̱x chataxe. Rü 15 tachinü ga diẽru rü 330 lítrugü ga chewádagu nixĩ ga naxãtanüxü̃.
3 Rü nhachagürü ngĩxü̃: —Mucütáma ya taunecü choxrü quixĩ. Rü tama name nax cungeãẽxü̃ rü nai i yatüna cugü nax cuxãxü̃. Rü chama rü tá ta cumaxã chixaixcuma nax mea chamaxü̃xü̃ —nhachagürü.
4 Rü ngẽmaãcü ya Tupana rü ngẽma Iraéuanecüã̱xgüxü̃ nüxü̃ nacua̱xẽxẽ rü mucü ya taunecü rü to i nachixü̃anegügu tá nawoone rü to i nachixü̃anearü ãẽ̱xgacü rü tá namaxã inacua̱x. Rü ngẽmaca̱x i ngẽma Iraéuanecüã̱xgü rü tá nüxü̃́ nataxuma i noxrütama ãẽ̱xgacü, rü bai i ãẽ̱xgacü nane, rü bai i norü chacherdótegü, rü bai i norü chacherdótegüchiru, rü bai i norü ãmarechicagü, rü bai i norü tupananetachicüna̱xãgü.
5 Notürü ngẽmawena i nüma i Iraéuanecüã̱xgü rü nachixü̃aneca̱x tá nawoegu rü tá Cori ya Tupanaca̱x nadaugü. Rü tá Dawítaaca̱x nadaugü nax norü ãẽ̱xgacü yixĩxü̃ca̱x. Rü ngẽma ngunexü̃gü i nawa iyacua̱xgüxü̃gu rü Cori ya Tupanaca̱x tá naxĩ, rü nüxü̃ tá nicua̱xüxü̃gü naxca̱x i guxü̃ma i norü ngü̃xẽẽgü.