Piripucü̃ãꞌ 1:1-30
1 Pa Toeneẽgü ja Piripuwa Ngẽxmagüxex, chama i Pauru rü namaã i taeneẽ i Timúteu nixĩ i pexca̱x tanaxümatüxü̃ i nhaã popera. Rü toma rü Ngechuchu ja Cristuarü puracütanüxü̃ tixĩgü. Rü pexca̱x tanaxümatü i pema i jaxõgüxü̃ãrü ãẽ̱xgacügü na peixĩgüxü̃, rü pema i tupaucawa ngü̃xẽẽtaeruü̃gü na peixĩgüxü̃, rü guxãma i pema i Ngechuchu ja Cristuaxü̃́ jaxõgüxe.
2 Rü chanaxwa̱xe i Tanatü ja Tupana rü tórü Cori ja Ngechuchu ja Cristu poraãcü pexü̃ narüngü̃xẽẽ rü pexü̃ nataãẽxẽẽ.
Pauru rü jema jaxõgüxü̃ca̱x najumuxẽ
3 Rü guxü̃guma i ngẽxguma pexna chacua̱xãchixü̃gu rü Tupanana moxẽ chaxã i pexca̱x.
4 Rü ngẽxguma chajumuxẽgux, rü guxü̃guma chataãẽãcüma pexca̱x chajumuxẽ i guxãma i pemax.
5 Erü pema rü noxritama Tupanaãrü orexü̃ pexĩnüẽgumama rü poraãcü choxü̃ perüngü̃xẽẽ na nüxü̃ chixuxü̃ca̱x i norü ore i mexü̃. Rü nhu̱xma rü ta choxü̃ perüngü̃xẽẽgüecha.
6 Rü Tupana rü marü inanaxügü i wüxi i mexü̃ i puracü i perü maxü̃wa. Rü nüxü̃ chacua̱x rü nüma rü guxü̃gutáma nanaxüecha i ngẽma puracü nhu̱xmatáta janguxẽẽã i ngẽxguma ínanguxgu ja Ngechuchu ja Cristu.
7 Rü aixcuma name na ngẽmaãcü pemaã nagu charüxĩnüxü̃, erü poraãcü pexü̃ changechaü̃ rü aixcuma Tupana wüxigu tüxü̃ narüngü̃xẽẽ i guxãma i jixema. Rü woo nhu̱xma na chapocuxü̃ rü e̱xna ega ãẽ̱xgacügüpe̱xewa choxü̃ nagagügu, rü Tupana choxü̃ narüngü̃xẽẽ i ngẽxguma norü ore i mexü̃ẽ́tüwa chidexagu rü namaã nüxü̃ chixuxgu i ãẽ̱xgacügü na aixcuma jiĩxü̃ i ngẽma orewa nüxü̃ ijarüṉg̱auxü̃ i tórü maxü̃ i taguma gúxü̃. Rü nüxü̃ chacua̱x rü ngẽma Tupana choxü̃ nangü̃xẽẽxü̃ãcüma rü pexü̃ rü ta narüngü̃xẽẽ.
8 Rü Tupana nüxü̃ nacua̱x na nhuxãcü poraãcü pexü̃ chadauxchaü̃xü̃ rü pexü̃ na changechaü̃xü̃ i guxãma i pemax, ngẽma Ngechuchu ja Cristu pexü̃ na ngechaü̃xü̃rüü̃.
9 Rü chorü jumuxẽwa naxca̱x íchaca na jexeraãcü pegü pengechaü̃güxü̃ca̱x rü Tupanaxü̃ pengechaü̃güxü̃ca̱x. Rü naxca̱x íchaca na jexeraãcü nüxü̃ pecuáxü̃ca̱x i guxü̃ma i Tupanachiga rü jexeraãcü nüxü̃ pecuáxü̃ca̱x na nhuxãcü nanaxwa̱xexü̃ na naxca̱x pemaxẽxü̃.
10 Rü ngẽmaãcü pexca̱x chajumuxẽ erü chanaxwa̱xe na meã penangugüxü̃ i ṯacü nixĩ i aixcuma mexü̃ i Tupanape̱xewa na penaxüxü̃ca̱x i ngẽma. Rü chanaxwa̱xe na aixcuma namexü̃ i perü maxü̃ na taxuü̃ca̱xma ṯacüca̱x Tupana pexna c̱axü̃ca̱x i ngẽxguma ínanguxgu ja Cristu.
11 Rü naxca̱x íchaca na Ngechuchu ja Cristu pexü̃ narüngü̃xẽẽxü̃ na aixcuma namexü̃ca̱x i perü maxü̃ rü aixcuma penaxüxü̃ca̱x i ngẽma Tupanape̱xewa mexü̃ na ngẽmaãcü meã pemaxẽãcüma Tupanaxü̃ peicua̱xüü̃güxü̃ca̱x.
Chauxca̱x rü Cristuarü ngúchaü̃ na chaxüxü̃ca̱x nixĩ i chamaxü̃xü̃
12 Pa Chaueneẽgüx, rü chanaxwa̱xe i nüxü̃ pecua̱x rü guxü̃ma i ngẽma choxü̃ üpetüxü̃, rü aixcuma ngẽmaãcü choxü̃ naxüpetü na jexeraãcü natachigaxü̃ca̱x i Tupanaãrü ore i mexü̃.
13 Rü nhu̱xma i núma rü guxü̃ma i churaragü i ãẽ̱xgacüpataarü daruü̃gü rü guxü̃ma i togü rü ta nüxü̃ nacua̱xgü na chapocuxü̃ naxca̱x na Cristuarü duü̃xü̃ chiĩxü̃.
14 Rü nhu̱xma na chapocuxü̃ rü muxü̃ma i taeneẽgü i jaxõgüxü̃ rü tama namuü̃ẽãcüma nüxü̃́ nangúchaü̃ na nüxü̃ jaxugüexü̃ i Tupanaãrü ore i mexü̃. Rü jexeraãcü tórü Coriaxü̃́ najaxõgü.
15 Rü aixcuma nixĩ i nhuxre i duü̃xü̃gü rü togüxü̃ na jaxauxãchixẽẽxü̃ca̱xmare nüxü̃ nixugüexü̃ i Cristuchiga, erü togüxü̃ narüjexerachaü̃. Notürü nangẽxma i togü i duü̃xü̃gü i aixcuma mexü̃gu naxĩnüẽãcüma meã nüxü̃ ixugüexü̃ i ngẽma ore.
16 Rü nhuxre i duü̃xü̃gü rü Cristuchigaxü̃ nixugüe erü choxü̃ nangechaü̃gü rü nüxü̃ nacua̱xgü na Tupana nuxma choxü̃ muxü̃ na íchanapoxü̃xü̃ca̱x i norü ore i mexü̃.
17 Notürü nangẽxma i togü i noxrütama ngúchaü̃ca̱x daugüxü̃ rü ngẽmaca̱x nüxü̃ ixugüexü̃ i ngẽma ore. Rü nümagü rü tama mexü̃gu narüxĩnüẽ, notürü naxca̱x nadaugü na jexeraãcü choxü̃́ naguxchaxẽẽgüãxü̃ i nhu̱xma na chapocuxü̃.
18 1:18-19 Notürü nüẽ́tama nixĩ ega woo ngẽmaãcü jixĩgu. Erü woo mexü̃ i norü ngúchaü̃maã jixĩgu rü e̱xna tama, notürü Cristuchigaxü̃ nixugüe. Rü ngẽma rü wüxi i taãẽ nixĩ i chauxca̱x. Rü guxü̃gutáma chataãẽẽcha erü nüxü̃ chacua̱x rü guxü̃ma i ngẽma rü chorü mexü̃ca̱x tá nixĩ erü chauxca̱x pejumuxẽgü rü choxü̃ narüngü̃xẽẽ i Tupanaãẽ i Üünexü̃ i Ngechuchu ja Cristuxü̃ rüngü̃xẽẽxü̃.
19 Nüü̃ nadau 1:18
20 Rü ngẽma poraãcü chanaxwa̱xexü̃ nixĩ na taguma ṯacü rü chixexü̃ na chaxüxü̃ na taxuü̃ca̱xma chaugüca̱x chaxãnexü̃ca̱x. Rü chanaxwa̱xe i guxü̃guma íchamemare na guxãpe̱xewa tama chamuü̃ãcüma Cristuchigaxü̃ chixuxü̃. Rü nhu̱xma na chamaxü̃xü̃ rü chanaxwa̱xe i guxü̃guma aixrügumarüü̃tama Cristuxü̃ chicua̱xüü̃ rü chanataxẽẽ. Notürü ngẽxguma woo chaju̱xgux, rü chanaxwa̱xe i ngẽmaãcü rü ta chanataxẽẽ.
21 Erü chauxca̱x rü Cristuarü ngúchaü̃ na chaxüxü̃ca̱x nixĩ i na chamaxü̃xü̃. Notürü ngẽxguma chaju̱xgux rü ngẽma rü ta name, erü Cristuxü̃tawa tá changẽxma i ngẽxguma.
22 Notürü tama nüxü̃ chacua̱x i ṯacü nixĩ i rümemaẽxü̃ i chauxca̱x, ngẽma na chajuxü̃ rü e̱xna tama. Erü nhu̱xma na chamaxü̃xü̃ rü choxü̃́ natauxcha na chanaxüxü̃ i tórü Coriarü puracü.
23 Rü ngẽmaca̱x tama nüxü̃ chacua̱x na ṯacü jiĩxü̃ i chauxca̱x rümemaẽxü̃ i ngẽma taxrewa. Erü nhuxguacü rü chanaxwa̱xe na chajuxü̃ na Cristuxü̃tawa changẽxmaxü̃ca̱x. Rü ngẽma nixĩ i aixcuma jexera rümemaẽxü̃ i chauxca̱x.
24 Notürü i pexca̱x rü nagu charüxĩnü rü narümemaẽ nixĩ na nhama i chaxunemaãtama na chamaxü̃xü̃ na ngẽmaãcü pexü̃ charüngü̃xẽẽxü̃ca̱x.
25 Rü nhu̱xma na aixcuma meã nüxü̃ chacuáxü̃ na pechaxwa̱xexü̃, rü ngẽmawa nüxü̃ chacua̱x na tãũxü̃táma paxa chajuxü̃. Rü ngẽmaãcü tá chamaxãma na pexü̃ charüngü̃xẽẽxü̃ca̱x na jexeraãcü Cristuca̱x pemaxẽxü̃ca̱x rü jexeraãcü taãẽãcüma nüxü̃́ pejaxõgüxü̃ca̱x.
26 Rü ngẽmaãcü wena táxarü petanüwa changẽxma. Rü ngẽxguma wena choxü̃ pedaugügu rü aixcuma tá petaãẽgü erü tá pexü̃́ nangẽxma na ṯacüca̱x Ngechuchu ja Cristuxü̃ peicua̱xüü̃güxü̃.
27 Rü ngẽma guxü̃ãrü jexera rümemaẽxü̃ nixĩ na naxca̱x pedauxü̃ na meã pemaxẽxü̃, ngẽma Cristuarü ore pemaã nüxü̃ ixuxü̃rüü̃. Rü ngẽxguma petanüwa chaxũxgu rü e̱xna woo tama ngẽ́ma chaxũxgu, notürü nüxü̃ chaxĩnüchaü̃ na guxãma wüxigu pegü peporaexẽẽxü̃ na taguma nüxü̃ perüc̱ẖauxü̃ca̱x na aixcuma pejaxõgüxü̃, rü ngẽmaãcü Tupanaãxü̃́ pepuracüexü̃ na jexeraãcü jaxũchigüxü̃ca̱x i norü ore i mexü̃.
28 Rü ngẽmaca̱x penaxwa̱xe i tama texéxü̃ pemuü̃ẽãcüma nüxü̃ peixugüama i ngẽma ore. Rü ngẽma na tama nüxü̃ pemuü̃ẽxü̃ rü ngẽma rü wüxi i cua̱xruü̃ tá nixĩ nüxü̃́ i perü uwanügü. Rü ngẽmawa tá nüxü̃ nacua̱xgü na pocuwa tá naxĩxü̃ i nümagü notürü pema rü tá maxü̃wa na pexĩxü̃. Rü Tupana tá nixĩ ja pexü̃ rüngü̃xẽẽcü na tama nüxü̃ pemuü̃ẽxü̃ca̱x i ngẽma perü uwanügü.
29 Rü Tupanaga nixĩ na Cristuaxü̃́ pejaxõgüxü̃. Rü ngẽxgumarüü̃ ta naga nixĩ na Cristuca̱x ngúxü̃ peingegüxü̃. Rü ngẽma rü wüxi i ngü̃xẽẽ nixĩ i pexna naxãxü̃ ja Tupana.
30 Pema rü chama rü wüxigu Tupanaãrü puracüwa tangẽxmagü, rü tanaxüama i ngẽma puracü ega woo texé tüxü̃́ naguxchaxẽẽgux. Rü ü̃pa rü marü choxü̃ pedau na nhuxãcü meã chanaxüxü̃ i ngẽma puracü, rü nhu̱xma rü ta nüxü̃ pecuáchiga na nhuxãcü chanaxüamaxü̃ woo namu i chorü guxchaxü̃gü.
