Piripucü̃ãꞌ 2:1-30
2 Rü dücax, Pa Chaueneẽgüx, rü nhu̱xma na Cristuarü duü̃xü̃gü peixĩgüxü̃, ¿rü aixcuma jiĩxü̃ i nüma pexü̃ nataãẽxẽẽxü̃? ¿Rü aixcuma jiĩxü̃ i petaãẽgüxü̃ erü nüma pexü̃ nangechaü̃? ¿Rü aixcuma jiĩxü̃ i Tupanaãẽ i Üünexü̃ pexü̃tawa ngẽxmaxü̃? ¿Rü aixcuma jiĩxü̃ i pegü pengechaü̃güxü̃ rü pegüxü̃́ pengechaü̃tümüü̃güxü̃?
2 Rü ngẽxguma chi ngẽmaãcü jixĩgu, rü chanaxwa̱xe i guxãma wüxigu perüxĩnüẽ, rü aixcuma guxãma pegü pengechaü̃gü, rü aixcuma guxãma nhama wüxitama peixĩxü̃rüü̃ na jiĩxü̃ i peãẽ, rü guxãma wüxitama i ngúchaü̃ca̱x pedau. Rü ngẽxguma ngẽmaãcü pemaxẽgu rü wüxi i chorü taãẽ tá nixĩ.
3 Rü tama name i ṯacü pexü na pegü íperütagüxü̃ca̱x rü ngẽmaãcü togüarü jexera na peixĩgüxü̃ca̱x. Notürü name nixĩ na pegü íperüxíragüxü̃ rü pegügu perüxĩnüẽxü̃ na taxuü̃ma peixĩgüxü̃ rü togü rü perü jexera na jixĩgüxü̃.
4 ¡Rü tama pegüguxicatama perüxĩnüẽ, notürü pegü peporaexẽẽxü̃ na togüxü̃ perüngü̃xẽẽgüxü̃ca̱x!
5 Rü name nixĩ ga jema Ngechuchu ja Cristu nagu rüxĩnüxü̃gu na perüxĩnüẽxü̃ i pemax.
6 Jerü nüma rü woo ga Tupanaxü̃chi na jiĩxü̃, notürü tama nügüna nanachu̱xu na ínanguxuchixü̃ nawa ga jema.
7 2:7-8 Rü jemaca̱x jéma nanata̱x ga norü mexü̃gü ga dauxü̃guxü̃ ga naãnewa. Rü wüxi i duü̃xü̃ i togüaxü̃́ puracüxü̃rüü̃ nügü nixĩxẽẽ. Rü nhama wüxi i duü̃xü̃rüü̃ nhama ga naãnegu nabu. Rü jexguma marü duü̃xü̃ jixĩgu ga nümax, rü nhama taxuü̃ma jiĩxü̃rüü̃ nügü nixĩxẽẽ. Rü Tupanaga naxĩnü, rü jemaca̱x curuchagu naju woo ga wüxi ga ãnexü̃chi na jiĩxü̃ ga jema.
8 Nüü̃ nadau 2:7
9 Rü jemaca̱x ga Tupana rü guxü̃ãrü ãẽ̱xgacüxü̃ najaxĩxẽẽ, rü najangucuchixẽẽ na guxü̃ma i ãẽ̱xgacügüétüwa nangẽxmaxü̃ca̱x.
10 Rü jemaãcü nanaxü ga Tupana na Ngechuchupe̱xegu tacaxã́pü̱xügüxü̃ca̱x rü nüxü̃ ticua̱xüü̃güxü̃ca̱x ja guxãma ja texé ja dauxü̃guxü̃ i naãnewa ngẽxmagüxe, rü guxãma i nhama i naãnewa ngẽxmagüxe, rü guxãma ja texé ja juexü̃chicawa ngẽxmagüxe.
11 Rü jemaãcü Tupana ãẽ̱xgacüxü̃ najaxĩxẽẽ na guxãma nüxü̃ ixuxü̃ca̱x na tórü Cori jiĩxü̃ ja Ngechuchu ja Cristu rü ngẽmaãcü nüxü̃ icua̱xüü̃güxü̃ca̱x ja Tanatü ja Tupana.
Cristuarü duü̃xü̃gü rü nhama omügürüü̃ nixĩgü i natanüwa i ngẽma duü̃xü̃gü i tama jaxõgüxü̃
12 Rü nhu̱xma na nüxü̃ pecuáxü̃ na nhuxãcü Nanatüga naxĩnüxü̃ ga Cristu, rü chanaxwa̱xe i chauga pexĩnüẽ, Pa Chaueneẽgü ja Pexü̃ Changechaü̃güxe. Rü jéma petanüwa chajexmagu chauga na pexĩnüẽxü̃ãrü jexera chanaxwa̱xe i chauga pexĩnüẽ i nhu̱xma na tama petanüwa changẽxmaxü̃. Rü chanaxwa̱xe i Tupanaxü̃ pemuü̃ẽãcüma naxca̱x pedaugüama i perü maxü̃ i taguma gúxü̃.
13 Erü Tupana nixĩ ja perü maxü̃wa puracücü na pexü̃́ nangẽxmaxü̃ca̱x i perü ngúchaü̃ i mexü̃. Rü nüma nixĩ i pexü̃ nangü̃xẽẽxü̃ na naga pexĩnüẽxü̃ca̱x rü penaxüxü̃ca̱x i ngẽma nüma pexü̃́ nanaxwa̱xexü̃.
14 ¡Rü meã penaxü̱x i guxü̃ma i ngẽma pexüxü̃, rü tama naxca̱x peidexagü rü tama pegü naxca̱x pechoxü̃gagü!
15 2:15-16 Rü penaxwa̱xe i ngẽmaãcü meã pemaxẽ na taxúema ṯacü rü chixexü̃xü̃ pewa ijaṉg̱auxü̃ca̱x. Rü penaxwa̱xe i mexü̃ i Tupanaxãcügü peixĩgü i natanüwa i ngẽma duü̃xü̃gü i chixexü̃ rü chixeãẽgümarexü̃. Rü ngẽxguma ngẽma duü̃xü̃gümaã nüxü̃ peixugüjane i ngẽma ore i mexü̃ i tüxü̃ maxẽxẽẽxü̃, rü joxni natanüwa rü nhama woramacurigü ja ẽãnexü̃wa ibáixgücürüü̃ tá peixĩgü. Rü ngẽmaãcü i ngẽxguma wena núma naxũxgu ja Cristu rü poraãcü tá pemaã chataãẽ erü tá nüxü̃ chadau na tama notüca̱xmamare jiĩxü̃ ga jema puracü ga petanüwa chaxüxü̃.
16 Nüü̃ nadau 2:15
17 Rü ngẽma nhu̱xma na meã pejaxõgüxü̃, rü ngẽma nixĩ i perü ãmare i Tupanana pexãxü̃. Rü ngẽma na meã janguxü̃ca̱x i ngẽma perü ãmare i Tupanape̱xewa, rü chama rü íchamemare na Tupanaca̱x ichanaxãxü̃ i chorü maxü̃ rü chajuxü̃. Rü ngẽmaca̱x woo chaju̱xgu rü wüxi i taãẽ tá nixĩ i chauxca̱x. Rü chanaxwa̱xe i pemagü rü ta ngẽmaca̱x wüxigu chamaã petaãẽgü.
18 Rü ngẽmaca̱x ega ngẽma ore i mexü̃ca̱x chaju̱xgux, rü tama name na pengechaü̃güxü̃ notürü penaxwa̱xe na wüxigu chamaã petaãẽgüxü̃.
Timúteu rü Epafrodítuchiga
19 Rü ngẽxguma tórü Cori ja Ngechuchu naxwa̱xegu rü paxa petanüwa chanamuẽ́ga ja taeneẽ ja Timúteu na pexü̃ na íjadauxü̃ca̱x rü chataãẽxü̃ca̱x i ngẽxguma núma nangeãgu i pechiga.
20 Rü aixcuma nataxuma i to i chorü ngü̃xẽẽruü̃ i chama nagu charüxĩnüxü̃rüü̃ nagu rüxĩnüxü̃, rü Timúteuxicatama nixĩ. Rü nataxuma i to i naxrüü̃ aixcuma pegu rüxĩnüxü̃ rü pexü̃ rüngü̃xẽẽchaü̃xü̃.
21 Erü guxü̃ma i togü rü naxca̱x nadaugü i noxrütama ngúchaü̃gü, rü tama aixcuma nagu narüxĩnüẽ i ngẽma Ngechuchu ja Cristuarü ngúchaü̃.
22 Notürü i pema rü marü nüxü̃ pecua̱x na nhuxãcü meã namaxü̃xü̃ i Timúteu, rü nhuxãcü choxü̃ nangü̃xẽẽxü̃ i Tupanaãrü orearü uchigawa, nhama wüxi i buxü̃ i nanatüxü̃ rüngü̃xẽẽxü̃rüü̃.
23 Rü ngẽmaca̱x i ngẽxguma nüxü̃ chacua̱xgu na nhuxãcü tá choxü̃ na naxüpetüxü̃ i núma, rü nhu̱xmachi ngẽ́ma petanüwa chanamuxchaü̃ i Timúteu na pexü̃ íjadauxü̃ca̱x.
24 Rü ngẽxgumarüü̃ ta nagu charüxĩnü rü tórü Cori rü aixcuma tá choxü̃ narüngü̃xẽẽ na chamatama ngẽ́ma petanüwa íchajadauxü̃ca̱x.
25 Rü ngẽxgumarüü̃ ta rü chauxca̱x name nixĩ i ngẽ́ma petanüwa chanamuxü̃ i taeneẽ i Epafrodítu. Rü nüma nixĩ ga pematama chauxca̱x núma penamuxü̃ na choxü̃ nangü̃xẽẽxü̃ca̱x. Rü nüma rü chamücü nixĩ i Tupanaãrü puracüwa, rü poraãcü choxü̃ narüngü̃xẽẽ i Tupanaãrü orearü uwa.
26 Rü poraãcü nüxü̃́ nangúchaü̃ na pexü̃ íjadauxü̃ i guxãma i pemax. Rü poraãcü naxoegaãẽ, jerü pema rü nüxü̃ pecuáchiga ga na jaḏaawexü̃ ga nümax.
27 Rü aixcuma nixĩ ga na jaḏaawexü̃, rü wixguxü̃chi taa̱x naju. Notürü Tupanaãxü̃́ nangechaü̃tümüü̃ rü chama rü ta nüxü̃́ changechaü̃tümüü̃, rü jemaca̱x naxca̱x najataanexẽẽ na tama jexeraãcü changechaü̃xü̃ca̱x.
28 Rü ngẽmaca̱x rü jexeraãcü chanaxwa̱xe na paxa petanüwa chanamuxü̃ i Epafrodítu, na pema rü petaãẽgüxü̃ca̱x i ngẽxguma wena nüxü̃ pedaugügu. Rü ngẽxguma i chama rü tá ta chataãẽ i ngẽxguma nüxü̃ chacua̱xgu na petanüwa nangẽxmaxü̃ na pexü̃ nangü̃xẽẽxü̃ca̱x.
29 Rü chanaxwa̱xe i tórü Coriégagu petaãẽgüãcüma meã penajaxu erü peeneẽ nixĩ. Rü name nixĩ i nüxü̃ pengechaü̃gü i guxü̃ma i ngẽma duü̃xü̃gü i Epafrodíturüü̃ ixĩgüxü̃.
30 Jerü nüma ga Epafrodítu rü jema na poraãcü nawa napuracüxü̃ ga Cristuarü puracü, rü jemaca̱x wixguxü̃chi taa̱x naju. Rü ãũcümaxü̃wa nügü najexmaxẽẽ na pechicüü choxü̃ nangü̃xẽẽxü̃ca̱x.
