Piripucü̃ãꞌ 3:1-21
3 Rü nhu̱xma Pa Chaueneẽgüx, rü chanaxwa̱xe i petaãẽgü erü tórü Coriarü duü̃xü̃gü peixĩgü. Rü jema ore ga noxri pexca̱x chaxümatüxü̃ rü tama choxü̃́ nawa̱xtümüü̃ na wena pexca̱x chanaxümatüxü̃ erü aixcuma pexü̃́ name i ngẽma ore.
2 ¡Rü pegüna peda̱x nüxna i ngẽma duü̃xü̃gü i chixri maxẽxü̃ rü chixexü̃maã pexü̃ ixucu̱xẽgüxü̃! Rü nümagü nixĩ i nüxü̃ jaxugüexü̃ rü ngẽxguma tama jigü íiwiecha̱xmüpe̱xechiraü̃gu, rü taxucürüwama Tupanape̱xewa time.
3 Notürü jíxema aixcuma Tupanape̱xewa imexẽ, rü jixema tixĩgü. Rü Tupanaxü̃ ticua̱xüü̃gü i Naãẽ i Üünexü̃ãrü ngü̃xẽẽmaã. Rü tataãẽgü erü Ngechuchu ja Cristuarü duü̃xü̃gü tixĩgü. Rü tama tajaxõgü na ngẽma jigü íiwiecha̱xmüpe̱xechiraü̃xü̃ca̱x Tupanape̱xewa imexü̃.
4 Notürü chama chi waxi nixĩ i guxü̃ i togüarü jexera chajaxõxü̃ i ngẽma wiecha̱xmüpe̱xechiraü̃chiga. Rü tataxu chima ja togue ja texé chauxrüü̃ jaxṍxẽ i ngẽmachiga.
5 Jerü jexguma 8 ga ngunexü̃ chauétü jixĩgu ga na chabuxü̃, rü choxü̃ ínawiecha̱xmüpe̱xechiraü̃gü, erü Judéu chixĩ. Rü Bejamítanüxü̃ chixĩ. Rü chaunatü rü chaué rü Judéugü tixĩgü, rü ngẽmaca̱x i chama rü Judéuxü̃chi chixĩ. Rü chama rü Parichéuchire̱x chixĩ, rü pema nüxü̃ pecua̱x rü ngẽma Parichéugü rü meãma nanaxaure i Tupanaãrü mugü ga Muĩsé ümatüxü̃.
6 Rü jema na meã chajanguxẽẽchaü̃xü̃ca̱x ga jema mugü ga Muĩsé ümatüxü̃, rü jemaca̱x nawe chingẽchigü ga jema duü̃xü̃gü ga Ngechuchuaxü̃́ jaxõgüxü̃. Rü jema na aixcuma meã chanaxaurexü̃ca̱x ga jema mugü ga Muĩsé ümatüxü̃, rü jemaca̱x rü taxucürüwama texé chauchigaxü̃ tixu ga tama na chaxaurexü̃.
7 Notürü guxü̃ma ga jema ü̃pa chauxca̱x mexü̃, rü nhu̱xma rü taxuwama choxü̃́ name rü marü íchanata̱x na Cristuaxü̃́xĩcatama chajaxõxü̃ca̱x.
8 Rü nhu̱xma na Ngechuchu ja Cristu ja chorü Corixü̃ na chacuáxü̃, rü chauxca̱x rü guxü̃ma ga jema ü̃pa nagu chixũxü̃ rü taxuwama name, erü ngẽma na Cristuxü̃ na chacuáxü̃ rü guxü̃ãrü jexera narümemaẽ. Rü guxü̃ma ga jema noxri nagu chixũxü̃ rü marü nüxü̃ charüxo na Cristuwe charüxũxü̃ca̱x rü noxrü duü̃xü̃ na chiĩxü̃ca̱x. Rü chauxca̱x rü nhama guxchirerüü̃ nixĩ ga jema ü̃pa nagu chixũxü̃ ega Cristumaã nügü chananguxgu.
9 Rü jemaãcü nüxü̃ charüxo ga guxü̃ma ga jema na Cristuarü duü̃xü̃ na chiĩxü̃ca̱x. Rü nhu̱xma rü Tupanape̱xewa chame erü Cristuaxü̃́ chajaxõ. Rü tama ngẽma na chamecümaxü̃ca̱x rü e̱xna mugü chaxaurexü̃ca̱x nixĩ na chamexü̃ i nape̱xewa. Notürü ngẽma na Cristuaxü̃́ chajaxõxü̃ca̱x nixĩ i nügüca̱x choxü̃ namexẽẽxü̃ ja Tupana.
10 3:10-11 Rü ngẽma nhu̱xma chanaxwa̱xexü̃ nixĩ na aixcuma Cristuxü̃ chacuáxü̃ rü chawa na nangẽxmaxü̃ i ngẽma pora ga wena Cristuxü̃ írüdaxẽẽxü̃ i nhu̱xma nüxü̃́ ngẽxmaxü̃. Rü jema ngúxü̃ na jangexü̃ ga nüma rü na najuxü̃ rü ngẽxgumarüü̃tama chanaxwa̱xe i íchamemare na naxca̱x ngúxü̃ chingexü̃ rü naxca̱x chajuxü̃ na jixcama chama rü ta juwa ícharüdaxü̃ca̱x.
11 Nüü̃ nadau 3:10
Pauru naxca̱x nadau na Cristuca̱x namaxü̃xü̃ nhu̱xmatáta Tupanaxü̃tawa nangu
12 Rü nhu̱xma na ngẽma nhachaxü̃ pemaã rü tama chanaxwa̱xe i nagu perüxĩnüẽ na guxü̃xü̃ chacuáxü̃ i Cristuchiga, rü e̱xna guxü̃wama na chamexü̃. Notürü guxü̃ i ngunexü̃gu rü naxca̱x chadauama na Ngechuchu ja Cristuarü ngúchaü̃ na chaxüxü̃ca̱x, jerü jemaca̱x nixĩ ga nüma ga chauxca̱x nadauxü̃ ga noxrix.
13 Pa Chaueneẽgüx, pemaã nüxü̃ chixu rü chamatama meãma nüxü̃ chacua̱x rü nhu̱xma rü ta tautama nawa changu i ngẽma naxca̱x chadauxü̃. Notürü i nhu̱xma rü marü nüxü̃ icharüngüma i guxü̃ma ga jema noxri nagu chixũxü̃. Rü nhu̱xma rü chaugü chaporaxẽẽ na aixcuma Cristuca̱x na chamaxü̃xü̃ na nawa changuxü̃ca̱x i ngẽma maxü̃ i chape̱xewaama ngẽxmaxü̃.
14 Rü ngẽmaca̱x i nhu̱xma rü naxca̱x chadau na aixcuma Cristuca̱x chamaxü̃xü̃ nhu̱xmatáta Tupanaxü̃tawa changu. Erü chanajauxchaü̃ i ngẽma ãmare i nüma dauxü̃guxü̃ i naãnewa naxca̱x taxca̱x nangemaxü̃ i jixema na Ngechuchu ja Cristuarü duü̃xü̃gü ixĩgüxü̃.
15 Rü guxãma i jixema na aixcuma Cristuaxü̃́ jaxõgüxü̃, rü name nixĩ i ngẽmaãcü nagu tarüxĩnüẽ. Notürü ngẽxguma chi texé i petanüwa toguama tarüxĩnügu, rü Tupana tá tüxü̃ nüxü̃ nacua̱xẽẽ i ngẽma nüma nanaxwa̱xexü̃ na nüxü̃ tacuáxü̃.
16 Rü ngẽma inaxwa̱xexü̃ nixĩ na aixcuma naga ixĩnüẽẽchaxü̃ rü meãma nagu ixĩxü̃ i ngẽma ore i marü nüxü̃ icuáxü̃.
17 Pa Chaueneẽgüx, chanaxwa̱xe i chauxrüü̃ nagu pexĩ i ngẽma pexü̃ nüxü̃ chadauxẽẽxü̃ na namexü̃. ¡Rü penangugü na nhuxãcü meã namaxẽxü̃ i ngẽma togü i duü̃xü̃gü i toma tamaxẽxü̃ãcüma maxẽxü̃!
18 Rü marü muẽ̱xpü̱xcüna pemaã nüxü̃ chixu, rü nhu̱xma rü changechaü̃ãcüma rü chaxauxãcüma wena pemaã nüxü̃ chixu rü nangẽxma i muxü̃ma i duü̃xü̃gü i Cristuarü uwanürüü̃ãcüma maxẽxü̃. Rü nümagü rü tama nüxü̃ nacua̱xgüchaü̃ na Cristu curuchagu naxca̱x juxü̃.
19 Notürü ngẽma duü̃xü̃gü rü tá düxwa inajarüxo. Rü ngẽma naxü̃neãrü ngúchaü̃ nixĩ i norü tupana ixĩxü̃. Rü woo nüxü̃ nacua̱xchire̱x na wüxi i ãne na jiĩxü̃ i ngẽma chixexü̃ notürü namaã nataãẽgüama. Rü nhama i naãneãrü ngẽmaxü̃guxicatama narüxĩnüẽ.
20 Notürü i jixema rü dauxü̃guxü̃ i naãnewa tüxü̃́ nangẽxma i tachica. Rü ítanaṉg̱uxẽẽ na dauxü̃guxü̃ i naãnewa taxca̱x ne naxũxü̃ ja tórü Cori ja Ngechuchu ja Cristu ja tórü Maxẽxẽẽruü̃.
21 Rü nhaã taxüne i juxwa̱xexü̃ rü nüma ja Cristu tá nanaxüchicüü na naxü̃ne i mexẽchixü̃rüü̃ jiĩxü̃ca̱x. Rü ngẽma norü pora i namaã guxü̃ẽ́tüwa nangẽxmaxü̃, rü ngẽmamaãtama tá nanaxüchicüü i taxüne na noxrürüü̃ jiĩxü̃ca̱x.
