Piripucü̃ãꞌ 4:1-23
4 Rü nhu̱xma Pa Chaueneẽgü ja Pexü̃ Changechaü̃güxe rü Poraãcü Pexü̃ Chadauxchaü̃güxe, rü ngẽma marü pemaã nüxü̃ chixuxü̃rüü̃ chanaxwa̱xe i meã tórü Corica̱x pemaxẽ erü pema nixĩ i chorü taãẽ rü chorü ãmare i Tupana choxna ãxü̃ peixĩgüxü̃.
2 Rü nüxü̃ chaca̱a̱xü̃ i taeja̱xgü i Eudía rü Chĩ́tique na nügümaã nangüxmüẽxü̃ca̱x, erü nümagü rü tórü Corixacügü nixĩgü.
3 Rü cumax, Pa Chamücü ja Mecü i Wüxigu Tupanaãrü Puracüwa Chamaã Puracücüx, rü cuxna naxca̱x chaca na nüxü̃ curüngü̃xẽẽxü̃ca̱x i ngẽma taxre i taeja̱xgü, erü nümagü rü wüxigu chamaã rü Crementemaã rü ngẽma togü i chamücügü i Tupanaãrü poperawa marü ngo̱xégagüxü̃maã napuracüe i Tupanaãrü orearü uwa.
4 Rü nhu̱xma na tórü Coriarü peixĩgüxü̃, Pa Chaueneẽgüx, rü name nixĩ i guxü̃guma namaã petaãẽgü. Rü wena pemaã nüxü̃ chixu, rü ¡petaãẽgü!
5 Rü chanaxwa̱xe i meã pemaxẽ na guxü̃ma i duü̃xü̃gü pexü̃ nacua̱xgüxü̃ca̱x na aixcuma mexü̃ i duü̃xü̃gü na peixĩgüxü̃. ¡Rü nüxna pecua̱xãchie na tórü Cori rü paxa tá nataeguxü̃ na núma naxũxü̃!
6 ¡Rü taxuü̃ca̱xma penaxi̱xãchiãẽgü! Notürü ngẽxguma woo ṯacü pexü̃ üpetügu rü guxü̃guma name nixĩ na Tupanamaã nüxü̃ peixuxü̃ i perü jumuxẽwa. ¡Rü naxca̱x ípeca i norü ngü̃xẽẽ i ngẽxguma ṯacü pexü̃́ guxchaxgu, rü moxẽ nüxna pexãgü! ¡Rü ngẽmaãcü Tupanamaã nüxü̃ peixu i guxü̃ma i ngẽma nüxna naxca̱x pecagüchaü̃xü̃!
7 Rü ngẽmaãcü i nüma ja Tupana rü tá pexü̃ nataãẽxẽẽ namaã i wüxi i taãẽ i mexẽchixü̃ i guxü̃ma i taãẽ i nüxü̃ icuáxü̃ãrü jexera mexẽchixü̃. Rü nhu̱xma na Ngechuchu ja Cristuarü duü̃xü̃gü peixĩgüxü̃, rü ngẽma taãẽ i Tupana pexna ãxü̃ rü tá nüxna pexü̃ ínapoxü̃ i ngẽma chixexü̃ i nagu perüxĩnüẽchaxü̃.
Name nixĩ i nagu tarüxĩnüẽ i guxü̃ma i ṯacü i aixcuma mexü̃ ixĩxü̃
8 Rü nhu̱xma Pa Chaueneẽgüx, rü name nixĩ i nagu perüxĩnüẽ i guxü̃ma i ngẽma ore i aixcuma ixĩxü̃, rü guxü̃ma i ngẽma nacüma i taxucürüwama texé chixri nachiga idexaxü̃. Rü ngẽmaãcü rü name nixĩ i nagu perüxĩnüẽ i guxü̃ma i ngẽma ore i aixcuma meã iwéxü̃ rü guxü̃ma i ngẽma Tupanape̱xewa mexü̃, rü guxü̃ma i ngẽma mexü̃ i duü̃xü̃gü namaã taãẽxü̃, rü guxü̃ma i ngẽma aixcuma duü̃xü̃güpe̱xewa mexü̃. Rü name nixĩ i ngẽmagu perüxĩnüẽ.
9 Rü chanaxwa̱xe i aixcuma penaxü i ngẽma pexü̃ changúexẽẽxü̃, rü ngẽma pexü̃ namaã chixucu̱xẽgüxü̃, rü ngẽma chauxü̃tawa nüxü̃ pexĩnüẽxü̃, rü ngẽma chauxü̃tawa nüxü̃ pedauxü̃ na chanaxüxü̃. Rü ngẽxguma ngẽmaãcü pemaxẽgu rü pemaã tá inarüxã̱ũ̱x ja Tupana ja tamaã irüngüxmücü rü tüxü̃ taãẽxẽẽcü.
Jema Piripucü̱̃ã̱x ga jaxõgüxü̃ rü dĩẽrumaã Pauruxü̃ narüngü̃xẽẽgü
10 Rü nhu̱xma na chorü Coriarü chiĩxü̃, rü poraãcü chataãẽ erü wenaxãrü choxna pecua̱xãchie rü choxü̃ perüngü̃xẽẽ. Rü chama nüxü̃ chacua̱x rü pema rü guxü̃guma choxü̃ perüngü̃xẽẽchaü̃, notürü taguma pexü̃́ natauxcha ga na penaxüxü̃ ga jema.
11 Rü tama ngẽma na ṯacü choxü̃́ taxuxü̃ca̱x nixĩ i pemaã nüxü̃ chixuxü̃ i ngẽmachiga. Erü chama rü marü chamaã nixü na namaã chataãẽxü̃ i ngẽma choxü̃́ ngẽxmaxü̃.
12 Rü nüxü̃ chacua̱x na nhuxãcü na jiĩxü̃ ega guxü̃ choxü̃́ tau̱xgux, rü nüxü̃ chacua̱x na nhuxãcü na jiĩxü̃ ega choxü̃́ namuxũchixgu. Rü marü chamaã nixü na namaã chataãẽxü̃ i ngẽma choxü̃́ ngẽxmaxü̃ woo changaxpütüwegu, rü e̱xna woo chataijaxgu, rü e̱xna woo choxü̃́ namuxũchixgu rü e̱xna woo choxü̃́ natau̱xguma.
13 Rü Cristu nixĩ ja choxü̃ poraxẽẽcü, rü ngẽmaca̱x chamaã nanguxü̃ na chanaxüxü̃ i guxü̃ma i ngẽma Tupana naxwa̱xexü̃ na chanaxüxü̃.
14 Notürü ga pema rü wüxi ga mexü̃ choxü̃́ pexügü ga jexguma choxü̃́ natauxjane choxü̃ perüngü̃xẽẽgügu.
15 Rü pema, Pa Jaxõgüxü̃ i Piripucü̱̃ã̱x, rü meãma nüxü̃ pecua̱x rü jexguma noxri Machedóniããnewa nüxü̃ chixuxgu ga Tupanaãrü ore, rü jexguma jéma íchaxũxü̃gu, rü pexicatama nixĩ ga ãmare choxna pexãxü̃ naxca̱x ga jema ngü̃xẽẽ ga chauxü̃tawa pejaxuxü̃.
16 Rü jexguma Techarónicaarü ĩãnewa chajexmajane, rü pema rü jéma chauxca̱x penamugü ga perü ãmare na choxü̃ perüngü̃xẽẽgüxü̃ca̱x. Rü tama wüxicanaxĩcatama nixĩ ga jemaãcü choxü̃ na perüngü̃xẽẽgüxü̃.
17 Rü woo perü ãmaremaã chataãẽ, notürü jexeraãcü chataãẽ erü ngẽma choxü̃ na perüngü̃xẽẽgüxü̃ca̱x rü Tupana tá ãmare pexna naxã.
18 Rü nhu̱xma rü marü choxü̃́ nangẽxma i guxü̃ma i ṯacü i chanaxwa̱xexü̃, rü aixcuma ngẽmaãrü jexera choxü̃́ nangẽxma. Rü nhu̱xma na Epafrodítu núma nangexü̃ i perü ãmare, rü taxuü̃ma choxü̃́ nataxu. Rü ngẽma perü ãmare i chauxca̱x núma pemuxü̃, rü Tupanape̱xewa rü namexẽchi, rü nüma rü poraãcü namaã nataãẽ.
19 Rü ngẽmaca̱x ja chorü Tupana rü norü ngẽmaxü̃gü i mexẽchixü̃wa tá pexna nanaxã i guxü̃ma i ṯacü i pexü̃́ taxuxü̃. Rü ngẽmaãcü tá nanaxü erü Ngechuchu ja Cristuarü duü̃xü̃gü peixĩgü.
20 Rü name nixĩ i guxü̃guma nüxü̃ ticua̱xüü̃gü ja Tanatü ja Tupana. Rü ngẽmaãcü jiĩxü̃.
Pauru nanagu̱xẽẽ ga norü popera rü wenaxãrü jema duü̃xü̃güxü̃ narümoxẽ
21 Rü chanaxwa̱xe i chauégagu nüxü̃ perümoxẽgü i guxü̃ma i taeneẽgü i Ngechuchu ja Cristuaxü̃́ jaxõgüxü̃. Rü ngẽxgumarüü̃ ta pexü̃ narümoxẽgü i ngẽma taeneẽgü i chauxü̃tawa ngẽxmagüxü̃.
22 Rü ngẽxgumarüü̃ ta pexü̃ narümoxẽgü i guxü̃ma i taeneẽgü i núma Romawa ngẽxmagüxü̃. Rü ngẽma jexera pexü̃ rümoxẽgüxü̃ rü ngẽma nixĩ i taeneẽgü i Romaãrü ãẽ̱xgacü ja tacüxü̃tawa puracüexü̃.
23 Rü chanaxwa̱xe i tórü Cori ja Ngechuchu ja Cristu pexü̃ narüngü̃xẽẽ i guxãma i pemax. Rü ngẽmaãcü jiĩxü̃.
Rü nuãma pexna,
Pauru
