Puracügü 1:1-26
1 1:1-2 Pa Mecü Pa Teóquirux, nüxĩra chaxümatüxü̃ ga poperawa cumaã nüxü̃ chixu ga guxü̃ma ga Ngechuchu üxü̃ rü duü̃xü̃güxü̃ namaã nangúexẽẽxü̃ ga noxritama inaxügüãgu ga norü puracü nhu̱xmata jema ngunexü̃ ga Tupana dauxü̃guxü̃ ga naãnewa nagaxgu. Rü jexguma taũta dauxü̃guxü̃ ga naãnewa naxũxgu ga Ngechuchu rü najadexechi ga norü ngúexü̃gü ga jamugüchaü̃xü̃ na Tupanaãrü puracü naxügüxü̃ca̱x. Rü Tupanaãẽ i Üünexü̃ãrü poramaã nanangúexẽẽ ga jema duü̃xü̃gü, rü namaã nüxü̃ nixu ga ṯacü tá na naxüexü̃.
2 Nüü̃ nadau 1:1
3 Rü jixcama marü norü juwena rü 40 ga ngunexü̃gu rü jema duü̃xü̃güca̱x nügü nango̱xẽẽxü̃ na nüxü̃ nacua̱xgüxü̃ca̱x na wenaxãrü namaxü̃xü̃. Rü namaã nüxü̃ nixu na nhuxãcü aixcuma ãẽ̱xgacü na jiĩxü̃ ja Tupana.
4 Rü jexguma jema ngúexü̃gü ga jamugüxü̃tanüwa najexmagu ga Ngechuchu, rü namaã nüxü̃ nixu ga tama nüxna na ngextá naxĩxü̃ca̱x ga Jerucharéü̃. Rü nhanagürü nüxü̃: —¡Ípenaṉg̱uxẽẽx i ngẽma Tupanaãẽ i Üünexü̃ ga Chaunatü pemaã ixunetaxü̃ ga pemaã nüxü̃ chixuchigaxü̃!
5 Aixcuma nixĩ ga Juã́ũ rü dexáwa duü̃xü̃güxü̃ ínabaiü̃xẽẽxü̃, notürü i pema rü tãũxü̃táma muxü̃ i ngunexü̃ nangupetü na Tupanaãẽ i Üünexü̃ tá pexna nguxü̃ —nhanagürü.
Dauxü̃guxü̃ ga naãnewa naxũ ga Ngechuchu
6 Rü jexguma nangutaque̱xegügu ga jema norü duü̃xü̃gü, rü Ngechuchuna nacagü, rü nhanagürügü: —Pa Corix, ¿e̱xna nhama tá nixĩ i ngunexü̃ i marü ícunawoxü̃ i nuã Judéugüchiü̃ãnewa i torü uwanügüarü churaragü na wenaxãrü tomatama namaã itacuáxü̃ca̱x i nhaã tochiü̃ãne? —nhanagürügü.
7 Rü Ngechuchu nanangãxü̃, rü nhanagürü: —Pema rü taxuü̃ca̱xma nüxü̃ pecuáxchaü̃ i nhuxgu tá nixĩ i ngẽma ngunexü̃, erü Chaunatüxicatama nüxü̃́ nangẽxma i pora na nüxü̃ naxunetaxü̃ i ngẽma ngunexü̃ i choxna naxca̱x pec̱axü̃.
8 Notürü ngẽxguma pexna nanguxgu i Tupanaãẽ i Üünexü̃, rü tá pexü̃ naporaexẽẽ. Rü tá ípechoxü̃ na nüxü̃ pejarüxugüexü̃ca̱x i chauchiga i Jerucharéü̃wa, rü guxü̃ma i Judéaanewa, rü Chamáriaanewa, rü nhu̱xmatáta guxü̃ i naãnewa nangu —nhanagürü.
9 Rü jexguma jema nhaxguwena rü nüxü̃ ínadaunüjane ga norü ngúexü̃gü, rü Tupana rü dauxü̃guxü̃ ga naãnewa Ngechuchuxü̃ naga. Rü wüxi ga caixanexü̃gu najaxücu, rü jemaãcü tama wenaxãrü nüxü̃ nadaugü.
10 Rü jexguma Ngechuchuxü̃ ínadaunüjane ga dauxü̃wa na naxũxü̃, rü ngürüãchi natanüwa nango̱x ga taxre ga jatü ga icómüchiruxü̃.
11 Rü nhanagürügü nüxü̃: —Pa Jatügü i Gariréaanecü̱̃ã̱x, ¿tü̱xcüü̃ dauxü̃gu íperüdaunü? Erü daatama Ngechuchu ga petanüwa jexmacü rü nhu̱xma Tupana dauxü̃wa nagacü, rü ngẽma nhu̱xma nüxü̃ na pedauxü̃ na nhuxãcü dauxü̃wa naxũxü̃, rü ngẽmaãcü tátama nixĩ i wena núma naxũxü̃ —nhanagürügü.
Judachicüü nanajauxgü ga Matía
12 Rü jema ngúexü̃gü ga Ngechuchu imugüxü̃ na Tupanaãrü puracü naxügüxü̃ca̱x, rü nüxna ínixĩ ga guma ma̱xpǘne ga Oriwéranecügu ãẽ́gane. Rü Jerucharéü̃ca̱x nawoegu. Rü guma ma̱xpǘneãrü jaxü̃ rü maneca wüxi ga quirúmetru nixĩ na Jerucharéü̃wa inguxü̃.
13 Rü jexguma Jerucharéü̃ãrü ĩãnewa nangugügu, rü nagu nachocu ga guma ĩ ga nagu napegüne. Rü dauxna naxĩgü naxca̱x ga jema ucapu ga taxü̃ ga nagu napegüxü̃. Rü nümagü nixĩ ga Pedru, rü Juã́ũ, rü Tiagu, rü Ãdré, rü Piripi, rü Tumé, rü Baturuméũ, rü Mateu, rü Tiagu ga Arupéu nane, rü Chimáũ ga Iporaãẽcüücü, rü Juda ga Tiagu naẽneẽ.
14 Rü guxü̃ma ga nümagü rü guxü̃guma nangutaque̱xegüxü̃ na wüxigu naxĩnüẽãcüma najumuxẽgüxü̃ca̱x namaã ga Ngechuchueneẽgü, rü ngĩmaã ga María ga Ngechuchu naẽ, rü nhuxre ga togü ga ngexü̃gümaã.
15 Rü guxü̃ma ga jema ngunexü̃gügu rü nangutaque̱xegüxü̃ ga jema jaxõgüxü̃. Rü maneca 120 nixĩ. Rü wüxi ga ngunexü̃gu ga Pedru rü inachi ga norü ngãxü̃tanüwa, rü nhanagürü:
16 —Pa Chamücügüx, marü ningu ga jema Tupanaãẽ i Üünexü̃ nuxcüma Dawíxü̃ muxü̃ na naxümatüãxü̃ca̱x nachiga ga Juda ga namaãrü cua̱xruü̃ ixĩxü̃ naxca̱x ga jema duü̃xü̃gü ga Ngechuchuxü̃ ijauxgüxü̃.
17 —Rü tatanüxü̃chire̱x nixĩ ga Juda, rü nüma rü ta taxrüü̃ nhaã Tupanaãrü puracüwa napuracü ga noxrix.
18 —Notürü nüma ga Juda rü bexma Ngechuchuxü̃ ínaxuaxü̃. Rü jemaca̱x ga ãẽ̱xgacügü rü nüxü̃́ nanaxütanü. Notürü jixcama ga Juda rü naxca̱x ínicua̱x ga jema chixexü̃ ga naxüxü̃, rü jemaca̱x nanataeguxẽẽ ga jema dĩẽru. Rü jemawena rü nügü nawẽxnaxã rü naĩtanüwa nügü narütáe. Rü jexguma duü̃xü̃gü nadaexü̃gügu rü inanago, rü niwã́ĩxpütüwe rü ínajixü̃ ga naü̃nüta. Rü jema dĩẽru ga nataeguxẽẽxü̃maã ga ãẽ̱xgacügü rü naxca̱x nataxe ga wüxi ga naãne.
19 —Rü nüxü̃ nacuáchigagü ga guxü̃ma ga Jerucharéü̃cü̱̃ã̱x, rü jemaca̱x Achedámagu nanaxüéga ga jema naãne. Rü ngẽma nixĩ i “Nagüchitaü̃” nhaxü̃chiga.
20 —Rü Wijaegüarü poperawa jemachiga nanaxümatü ga Dawí, rü nhanagürü:“Jixrüma rü ngẽ́ma natá ja napata, rü taxúema nagu pe”,
nhanagürü. Rü toxnamana i ngẽma poperawa rü nhanagürü ta:“Rü name nixĩ na togue naxüxü̃ i ngẽma norü puracü”,
nhanagürü.
21 1:21-22 —Rü nuã tatanüwa nangẽxmagü i nhuxre i jatügü ga guxü̃guma tüxü̃ ümücügüxü̃ ga jexguma tatanüwa nanuxmagu ga Cori ga Ngechuchu. Rü nümagü rü tawe narüxĩ ga noxritama Juã́ũ Ngechuchuxü̃ íbaiexẽẽgu rü nhu̱xmata jema ngunexü̃ ga dauxü̃guxü̃ ga naãnewa naxũxgu. Rü name nixĩ i ngẽmatanüwa na najaxuxü̃ i wüxi i Judachicüüxü̃ na tamücü jiĩxü̃ca̱x rü tarüü̃ nüxü̃ jaxuxü̃ca̱x i nhuxãcü wena na namaxü̃xü̃ ja Ngechuchu.
22 Nüü̃ nadau 1:21
23 Rü jemawena rü nüxü̃ naxunetagü ga taxre ga jatügü. Rü wüxi nixĩ ga Juche ga Juchugu ãẽ́gaxü̃ ga Bachabámaã naxugüxü̃. Rü Matía nixĩ ga to.
24 1:24-25 Rü nhaãcü najumuxẽgü: —Pa Corix, cuma nüxü̃ cucua̱x i guxü̃ma i duü̃xü̃güarü ngúchaü̃. ¡Rü nhu̱xma rü toxü̃ nawe̱x i ngẽxü̃rüüxü̃ i cuxca̱x mexü̃ i nhaã taxrewa na cunamuxü̃ca̱x rü nüma na naxüãxü̃ca̱x i nhaã puracü ga Juda ítáxü̃ ga jexguma norü pocuwa naxũxgu! —nhanagürügü.
25 Nüü̃ nadau 1:24
26 Rü wüxi ga dĩẽru ga cua̱xruü̃ ngĩxü̃ nanhanagügü na jemawa nüxü̃ nacua̱xgüxü̃ca̱x ga ngẽxü̃rüüxü̃ ga jema taxre tá na ixücuxü̃. Rü Matíagu nangu na jangucuchixü̃ca̱x. Rü jexgumatama rü jema 11 ga duü̃xü̃gü ga Ngechuchu imugüxü̃tanügu naxã ga Matía.
