Puracügü 10:1-48
10 Rü ĩãne ga Checharéawa najexma ga wüxi ga jatü ga Cornériu ga naẽ́ga. Rü 100 ga Itáriaanecü̱̃ã̱x ga churaragüarü capitã́ũ nixĩ.
2 Rü nüma nixĩ ga wüxi ga jatü ga meãma Tupanaãxü̃́ jaxõcü. Rü wüxigu nama̱xmaã rü naxãcügümaã Tupanaxü̃ nangechaü̃gü. Rü mucüma ga norü dĩẽrumaã nüxü̃ narüngü̃xẽẽ ga duü̃xü̃gü ga Judéugü ga ṯacü nüxü̃́ taxuxü̃. Rü guxü̃guma najumuxẽ rü Tupanamaã nidexa.
3 Rü wüxi ga ngunexü̃ ga jexguma tamaẽ̱xpü̱xarü ngorawa nanguxchaü̃gu ga jáuanecü, rü nango̱xetü. Rü meãma nüxü̃ nadau ga wüxi ga Tupanaãrü orearü ngeruü̃ ga dauxü̃cü̱̃ã̱x ga jema ucapu ga nawa najexmaxü̃gu ücuxü̃. Rü nhanagürü nüxü̃: —Pa Cornériux —nhanagürü.
4 Notürü nüma ga Cornériu rü meãma nüxü̃ nadawenü, rü poraãcü namuü̃ãcüma nüxna naca, rü nhanagürü: —¿Ṯacü cunaxwa̱xe, Pa Corix? —nhanagürü. Rü nanangãxü̃ ga jema orearü ngeruü̃ ga dauxü̃cü̱̃ã̱x, rü nhanagürü: —Curü jumuxẽgü rü Tupana marü cuxü̃́ nüxü̃ naxĩnü, rü cumaã nataãẽ na nhuxãcü nüxü̃ curüngü̃xẽẽxü̃ i duü̃xü̃gü i ṯacü nüxü̃́ taxuxü̃.
5 —¡Rü chanaxwa̱xe i Jopewa cunamugü i nhuxre i jatügü na naxca̱x jacagüxü̃ca̱x i wüxi i jatü i Chimáũ i Pedrugu ãẽ́gaxü̃!
6 —Rü to i Chimáũ i naxcha̱xmüãrü paxẽẽwa puracüxü̃patawa nangẽxma rü ngẽxma nape. Rü jima napata rü taxtü i taxü̃pechinüwa nangẽxma —nhanagürü.
7 Rü jexguma nüxna ijanatau̱xgu ga jema orearü ngeruü̃ ga namaã jéma idexaxü̃, rü Cornériu rü naxca̱x naca ga taxre ga norü puracütanüxü̃ rü wüxi ga churara ga meã naga ĩnüxü̃ ga meã Tupanaãxü̃́ jaxõxü̃.
8 Rü namaã nüxü̃ nixu ga guxü̃ma ga jema nüxü̃ nadauxü̃, rü nhu̱xmachi Jopewa nanamugü.
9 Rü moxü̃ãcü ga jexguma namagu naxĩjane rü marü Jopexü̃ jangaicagügu ga jema duü̃xü̃gü ga Cornériu jéma mugüxü̃, rü Pedru rü dauxü̃ naxĩ ga ĩpataétüwa na jéma najumuxẽxü̃ca̱x. Rü tocuchiarü ngoragu nixĩ ga jexguma.
10 Rü nataija, rü nüxü̃́ nachi̱xéga ga na nachibüxü̃. Rü jexguma norü õna ínaxügüjane, rü nango̱xetü ga Pedru.
11 Rü nüxü̃ nadau ga na jango̱xnaxü̃ ga naãnetüwe, rü jéma ínarüxĩ ga wüxi ga naxchiru ga nhama wüxi ga taxü̃ ga naxchápenüü̃rüü̃ ixĩxü̃. Rü norü ãgümücüpe̱xewa naxãcunü rü jemaãcü ínarüc̱ẖüxüe nhu̱xmata nhaxtüanewa nangu.
12 Rü jemagu ínarüc̱ẖüxüewetaxü̃ ga nagúxü̃raü̃xü̃ ga naẽxü̃gü, rü ãxtapegü, rü werigü. Rü jema naxchápenüü̃wa najexma ta ga ṯacü ga tama nangõ̱xgüxü̃ ga Judéugü.
13 Rü Pedru nüxü̃ naxĩnü ga Tupanaga ga nüxü̃ nhaxü̃: —Pa Pedrux ¡Inachi, rü ta ima̱x, rü nangõ̱x! —nhaxü̃.
14 Rü Pedru nanangãxü̃ rü nhanagürü: —Taxucürüwa nixĩ, Pa Corix, erü taguma chanangõ̱x i ṯacü i toxca̱x ãũãchixü̃ —nhanagürü.
15 Rü jexguma ga jema Tupanaga, rü wenaxãrü nhanagürü: —Ngẽma chama chamexẽẽxü̃ rü tama name i ãũãchi nüxü̃ cuwogü —nhanagürü.
16 Rü tamaẽ̱xpü̱xcüna jemaãcü nangupetü. Rü jexguma wenaxãrü dauxü̃ nac̱ẖüxnagü ga jema naxchápenüü̃ namaã ga guxü̃ma ga nawa jexmagüxü̃.
17 Rü poraãcü nagu narüxĩnü ga Pedru ga ṯacüchiga na jiĩxü̃ ga jema nüxü̃ nadauxü̃ ga jexguma nango̱xetügu. Rü jemagu ínaxĩnüjane, rü guma ĩpataa̱xwa nangugü ga jema jatügü ga Cornériu jéma mugüxü̃ ga naxca̱x ínicaetanüxü̃ ga guma Chimáũpata.
18 Rü jéma naxca̱x ínacagü rü aixcuma jexma nape ga wüxi ga jatü ga Chimáũ ga Pedrugu ãẽ́gaxü̃.
19 Rü Pedru nagu írüxĩnüjane ga jema nüxü̃ nadauxü̃ ga jexguma nango̱xetügu, rü Tupanaãẽ i Üünexü̃ rü nhanagürü nüxü̃: —Ngẽãgü nixĩ i tamaẽ̱xpü̱x i jatügü i cuxca̱x daugüxü̃.
20 —¡Inachi, rü írüxĩ, rü tama cuxoegaãẽãcüma nawe rüxũ! Erü chama nixĩ i núma chanamugüxü̃ —nhanagürü.
21 Rü jexguma naxca̱x ínarüxĩ ga Pedru, rü nhanagürü nüxü̃ ga jema jatügü: —Chama nixĩ i chauxca̱x pedaugüxü̃. ¿Rü ṯacüwa nuã pexĩ? —nhanagürü.
22 Rü nümagü nanangãxü̃gü, rü nhanagürügü: —Capitã́ũ ja Cornériuxü̃tawa ne taxĩ rü nüma nixĩ i nuã toxü̃ namugüxü̃. Rü wüxi ja jatü ja mecü nixĩ, rü Tupanaxü̃ nangechaü̃. Rü guxü̃ma i Judéugü nüxü̃ nangechaü̃ i nümax. Rü wüxi ga Tupanaãrü orearü ngeruü̃ ga dauxü̃cü̱̃ã̱x nanamu na cuxca̱x toxü̃ jacaxẽẽxü̃ca̱x ga Cornériu rü napatawa cuxũxü̃ca̱x rü nüxü̃ na naxĩnüxü̃ca̱x i curü ore —nhanagürügü.
23 Rü jexguma nanachocuxẽẽ ga Pedru, rü jexma nanapegüxẽẽ ga jema chütaxü̃gu. Rü moxü̃ãcü inaxĩãchi rü nawe narüxũ ga Pedru. Rü ínajaxümücügü ga nhuxre ga Jopecü̱̃ã̱x ga jaxõgüxü̃.
24 Rü moxü̃ãcü Checharéawa nangugü ga ngextá Cornériu ínaṉg̱uxẽẽxü̃wa namaã ga guxü̃ma ga natanüxü̃gü rü namücügü ga nüxü̃ nangechaü̃güxü̃ ga nüxna naxuxü̃.
25 Rü jexguma Cornériupatawa nanguxgu ga Pedru, rü ĩã̱xtüwa naxca̱x naxũ ga Cornériu, rü Pedrupe̱xegu najacaxã́pü̱xü, rü nüxü̃ nicua̱xüü̃.
26 Notürü ga Pedru rü inanachixẽẽ rü nhanagürü: —¡Inachi! Rü chama rü ta cuxrüü̃ duü̃xü̃mare chixĩ rü tama Tupana chixĩ —nhanagürü.
27 Rü nügümaã jadexagüãcüma wüxigu nichocu. Rü Pedru jéma namaã inajarüxũ ga muxü̃ma ga duü̃xü̃gü ga jexma ngutaque̱xegüxü̃.
28 Rü jexguma ga Pedru rü nhanagürü nüxü̃ ga jema duü̃xü̃gü ga jexma ngutaque̱xegüxü̃: —Pema nüxü̃ pecua̱x i toma i Judéugüca̱x rü nangẽxma i torü mugü i toxna nachu̱xuxü̃ na pemaã tangutaque̱xegüxü̃, rü pepatagu na tachocuxü̃. Notürü Tupana choxü̃ nango̱xetüxẽẽ rü choxü̃ nüxü̃ nadauxẽẽ na tama namexü̃ na ngẽmaãcü nagu na charüxĩnüxü̃ pemaã.
29 Rü ngẽmaca̱x tama chaxoõcüma núma chaxũ i ngẽxguma chauxca̱x pengemagu. Rü nhu̱xma rü chanaxwa̱xe i chamaã nüxü̃ peixu na ṯacüca̱x chauxca̱x pengemaxü̃ —nhanagürü.
30 Rü Cornériu nanangãxü̃, rü nhanagürü: —Marü ãgümücü i ngunexü̃ nangupetü ga nhúxgumaãcü ga tamaẽ̱xpü̱xarü ngoragu ga jáuanecü, rü nuã chapatawa chajumuxẽ erü guxü̃guma ngẽmaãcü chanaxü. Rü jexguma chajumuxẽgu rü chango̱xetü, rü chauxca̱x nango̱x ga wüxi ga jatü ga ij̱aurachirucüüxü̃.
31 —Rü nhanagürü choxü̃:
“Pa Cornériux, Tupana marü nüxü̃ naxĩnü i curü jumuxẽ rü cumaã nataãẽ na nhuxãcü nüxü̃ curüngü̃xẽẽxü̃ i duü̃xü̃gü i ṯacü nüxü̃́ taxuxü̃.
32 —¡Rü Jopewa namugü i nhuxre i jatügü na naxca̱x jacagüxü̃ca̱x i Chimáũ i Pedrugu ãẽ́gaxü̃! Rü to i Chimáũ i naxcha̱xmüãrü paxẽẽwa puracüxü̃patagu pexü̃. Rü jima napata rü taxtü i taxü̃pechinüwa nangẽxma”, nhanagürü choxü̃.
33 Rü jemaca̱x rü jexgumatama paxa cuxca̱x jéma chanamugü, rü cuma rü mexü̃ toxca̱x cuxü erü núma cuxũ. Rü nhu̱xma i guxãma i toma rü Tupanape̱xewa tangẽxmagü. Rü nüxü̃ taxĩnüẽchaü̃ i guxü̃ma i ngẽma ore i Cori namaã núma cuxü̃ muxü̃ na tomaã nüxü̃ cuixuxü̃ca̱x —nhanagürü ga Cornériu.
Pedru rü Cornériupatawa nüxü̃ nixu ga Ngechuchuchiga
34 Rü jexguma inanaxügü ga Pedru ga na jadexaxü̃, rü nhanagürü: —Nhu̱xma waxi nixĩ i nüxü̃ chacuáxü̃ na Tupanaca̱x nawüxiguxü̃ i guxü̃ma i duü̃xü̃gü erü nüma rü aixcuma guxãxü̃ma nangechaü̃.
35 —Rü nüma rü wüxichigü i nachiü̃ãnewa nanade i ngẽma duü̃xü̃gü i nüxü̃ ngechaü̃güxü̃ rü mexü̃ ügüxü̃.
36 —Rü nüma ga Tupana rü Judéugütanüwaxíra nanamu ga norü ore rü marü nüxü̃ nixu na tüxü̃́ nüxü̃ nangechaü̃xü̃ i tórü pecadugü i ngẽxguma Cristu ja guxããrü Cori ixĩcüaxü̃́ jaxõgügu.
37 —Pema rü meãma nüxü̃ pecua̱x na ṯacü ngupetüxü̃ ga guxü̃wama ga Judéugüarü naãnewa. Rü noxri ga Juã́ũ rü nüxü̃ nixu na Tupana naxwa̱xexü̃ na ínabaiü̃xü̃ ga duü̃xü̃gü. Rü jemawena ga Ngechuchu rü Gariréaanewa inanaxügü ga duü̃xü̃gümaã nüxü̃ na jaxuxü̃ ga ore i mexü̃.
38 —Rü pema nüxü̃ pecua̱x ga nhuxãcü Tupana na naporaxẽẽxü̃ ga Ngechuchu ja Nacharétucü̱̃ã̱x jerü nüxna nanaxã ga Naãẽ i Üünexü̃. Rü nüma ga Ngechuchu rü mexü̃ naxü ga jema íjaxũgüxü̃wa, rü nanameẽxẽẽ ga guxü̃ma ga jema duü̃xü̃gü ga ṉg̱oxoã̱xgüxü̃. Rü jemaãcü nanaxü jerü Tupana nüxü̃ narüngü̃xẽẽ.
39 —Rü toma nixĩ ga nüxü̃ tadaugüxü̃ rü nüxü̃ tixuchigaxü̃ i guxü̃ma ga naxüxü̃ ga Ngechuchu ga Judéaanewa rü Jerucharéü̃ãrü ĩãnewa. Rü jemawena rü najama̱xgü rü curuchawa najapotagü.
40 —Notürü ga Tupana rü tamaẽ̱xpü̱x ga ngunexü̃ ngupetügu rü wena nanamaxẽẽ rü toxca̱x nanango̱xẽẽ.
41 —Notürü tama guxü̃ ga duü̃xü̃güca̱x nango̱x. Rü toxca̱xicatama nango̱x ga toma ga ü̃pamama Tupana toxü̃ idexechixe na nüxü̃ tixuxü̃ca̱x i Ngechuchuchiga. Rü jexguma marü juwa ínadaxguwena rü namaã tachibüe rü namaã taxaxegü.
42 —Rü nümatama ga Ngechuchu toxü̃ nimugü na duü̃xü̃gümaã nüxü̃ tixuxü̃ca̱x na Tupana marü ãẽ̱xgacüxü̃ jangucuchixẽẽxü̃ na guxü̃ i duü̃xü̃güarü ngugüruü̃ na jiĩxü̃ca̱x. Rü nüma ja Ngechuchu nixĩ i tórü maxü̃xü̃ nangugüxü̃, rü nüma tá nixĩ i guxü̃ i duü̃xü̃gü i maxẽxü̃ rü juexü̃xü̃ jacagüxü̃ naxca̱x i norü maxü̃chiga.
43 —Rü ü̃pamamatama guxü̃ma ga Tupanaãrü orearü uruü̃gü rü Ngechuchuchiga nidexagü, rü nhanagürügü:“Rü nüma tá nüxü̃́ nüxü̃ nangechaü̃ i norü pecadugü i guxü̃ma i duü̃xü̃gü i nüxü̃́ jaxõgüxü̃”,
nhanagürügü.
Tupanaãẽ i Üünexü̃ rü jema duü̃xü̃gü ga tama Judéugü ixĩgüxü̃tanüwa nangu
44 Rü jexguma íjadexajane ga Pedru, rü Tupanaãẽ i Üünexü̃ nüxna nangu ga guxü̃ma ga jema jéma irüxĩnüẽxü̃ ga jema ore.
45 Rü jema jaxõgüxü̃ ga Judéugü ga Pedrumaã jéma ĩxü̃, rü poraãcü naḇaixãchiãẽgü jerü Tupanaãẽ i Üünexü̃ rü nüxna rü ta nangu ga jema duü̃xü̃gü ga tama Judéugü ixĩgüxü̃.
46 Rü nüxü̃ naxĩnüẽ ga to ga nagawachigü na jadexagüxü̃, rü Tupanaxü̃ na jacua̱xüü̃güxü̃.
47 Rü jexguma ga Pedru rü nhanagürü: —¿E̱xna nangẽxmaxü̃ i texé na nüxna nachu̱xuxü̃ i na ínabaiü̃xü̃ i nhaã duü̃xü̃gü i marü taxrüü̃ Tupanaãẽ i Üünexü̃ nüxna nguxü̃? —nhanagürü.
48 Rü nanamu na Ngechuchu ja Cristuégagu na ínabaiü̃xü̃ ga jema duü̃xü̃gü ga jexwaca jaxõgüxü̃. Rü jexguma Pedruxü̃ naca̱a̱xü̃gü na jexma naxã́ũxü̃ca̱x ga nhuxre ga ngunexü̃.
