Puracügü 11:1-30
11 Rü jema ngúexü̃gü ga Ngechuchu imugüxü̃ rü jema jaxõgüxü̃ ga Judéagugüxü̃, rü nüxü̃ nacuáchigagü na jema tama Judéugü ixĩgüxü̃ rü ta najauxgüãxü̃ ga Tupanaãrü ore.
2 Notürü jexguma Jerucharéü̃wa nanguxgu ga Pedru, rü nhuxre ga Judéugü ga jaxõgüxü̃ rü Pedruxü̃ nixugüe.
3 Rü nhanagürügü: —¿Rü tü̱xcüü̃ natanüwa cuxũ i ngẽma tama Judéugü ixĩgüxü̃, rü namaã cuchibü? —nhanagürügü.
4 Rü Pedru meãma namaã nüxü̃ nixu ga guxü̃ma ga ṯacü na ngupetüxü̃, rü nhanagürü nüxü̃:
5 —Chama rü Jopearü ĩãnewa chajexma, rü jexguma íchajumuxẽjane, rü chango̱xetü. Rü nüxü̃ chadau ga wüxi ga naxchápenüü̃rüü̃ ixĩxü̃ ga norü ãgümücüpe̱xewa ãcunüxü̃ ga írüc̱ẖüxüexü̃ nhu̱xmata chauxü̃tawa nguxü̃.
6 —Rü meãma nüxü̃ chadawenü na nüxü̃ chadauxü̃ca̱x na ṯacü jexmaxü̃ ga aixepewa. Rü nüxü̃ chadau ga naxü̃nagü ga ixãgümücüparaxü̃ rü naẽxü̃gü ga idüraexü̃, rü ãxtapegü rü werigü. Rü jema naxchápenüü̃wa najexma ta ga ṯacü ga tama ingṍxü̃, erü taxca̱x i jixema i Judéugü rü naxãũãchi.
7 —Rü nüxü̃ chaxĩnü ta ga Tupanaga ga choxü̃ nhaxü̃:
“¡Inachi! Pa Pedrux. ¡Rü ta ima̱x, rü nangõ̱x!” nhaxü̃.
8 —Notürü chama chanangãxü̃, rü nhacharügü:
“Taxucürüwa nixĩ, Pa Corix, erü taguma chanangõ̱x i ṯacü i toxca̱x ãũãchixü̃”, nhacharügü.
9 —Rü jexguma wenaxãrü nhanagürü choxü̃ ga jema Tupanaga ga dauxü̃wa inaxũxü̃:
“Ngẽma chama i Tupana chamexẽẽxü̃, rü tama name i ãũãchi nüxü̃ cuwogü”, nhanagürü.
10 —Rü tamaẽ̱xpü̱xcüna jemaãcü nangupetü, rü jexguma wenaxãrü dauxü̃ nac̱ẖüxnagü ga jema naxchápenüü̃ namaã ga guxü̃ma ga nawa jexmagüxü̃.
11 —Rü jexgumatama guma ĩ ga nawa chajexmanewa nangugü ga tamaẽ̱xpü̱x ga jatügü ga Checharéawa ne mugüxü̃ ga chauxca̱x daugüxü̃.
12 —Rü Tupanaãẽ i Üünexü̃ choxü̃ namu na tama chaxoegaãẽãcüma nawe charüxũxü̃ca̱x. Rü chamaã ta jéma naxĩ ga nhaã 6 ga jaxõgüxü̃. Rü napatawa tangugü ga guma jatü ga Cornériu, rü jexma tachocu.
13 —Rü tomaã nüxü̃ nixu ga nhuxãcü na napatawa nüxü̃ nadauxü̃ ga Tupanaãrü orearü ngeruü̃ ga dauxü̃cü̱̃ã̱x ga jexma chixü̃ ga nhaxü̃ nüxü̃:
“¡Jopewa namugü i jatügü na naxca̱x jacagüxü̃ca̱x i Chimáũ i Pedrugu ãẽ́gaxü̃!
14 —Rü nüma tá cumaã nüxü̃ nixu na nhuxãcü tá cuma rü guxü̃ i cupatagugüxü̃maã penajaxuxü̃ i perü maxü̃ i taguma gúxü̃”, nhanagürü nüxü̃.
15 —Rü jexguma ichanaxügügu ga na chidexaxü̃, rü nüxna nangu ga Tupanaãẽ i Üünexü̃, jexgumarüü̃ ga noxri tüxna nanguxgurüü̃.
16 —Rü jexguma ga chama rü nüxna chacua̱xãchi ga Cori ja Ngechuchuarü ore ga jexguma nhaxgu:
“Rü aixcuma nixĩ ga Juã́ũ ga dexáwamare ínabaiü̃xẽẽãxü̃, notürü i pema rü Tupanaãẽ i Üünexü̃ tá pexna nangu”, nhaxgu.
17 —Rü pema nüxü̃ pecua̱x na nhuxãcü Tupana tüxna nanguxẽẽxü̃ ga Naãẽ i Üünexü̃ i jixema na Cori ja Ngechuchu ja Cristuaxü̃́ jaxõgüxü̃. Rü nhu̱xma na taxrüü̃ Tupana jema duü̃xü̃güna nanguxẽẽxü̃ ga Naãẽ i Üünexü̃, ¿rü nhuxũcürüwa i chama i nüxü̃ chaxoxü̃ na naga chaxĩnüxü̃ ja Tupana? —nhanagürü ga Pedru.
18 Rü jexguma jema orexü̃ naxĩnüẽgu ga jema jaxõgüxü̃ ga Jerucharéü̃cü̱̃ã̱x, rü nachianegümare. Rü Tupanaxü̃ nicua̱xüü̃gü. Rü nhanagürügü: —Rü ngẽmawa nüxü̃ tacua̱x na Tupana tüxü̃ dexü̃ ja jíxema woo tama Judéugü ixĩgüxe. Rü ngẽxguma nüxü̃ tarüxoegu i tümaãrü chixexü̃ rü Tupanaca̱x tadaugügu, rü nüma tüxna nanaxã i maxü̃ i taguma gúxü̃ —nhanagürügü.
Jaxõgüxü̃ ga Ãtioquíawa jexmagüxü̃chiga
19 Rü jexguma Estéwãũxü̃ jama̱xgüguwena, rü norü uwanügü poraãcü nawe ningẽxü̃tanü ga jema jaxõgüxü̃. Rü jemaca̱x nügü nawoone. Rü Peníchiawa, rü Chiprewa rü Ãtioquíawa nabuxmü. Rü jéma nüxü̃ nixugüe ga ore ga mexü̃ ga Ngechuchuchiga. Notürü Judéugümaãxĩcatama nüxü̃ nixugüe ga jema ore rü tama ga togümaã.
20 Notürü jéma Ãtioquíawa nangugü ta ga nhuxre ga togü ga jaxõgüxü̃ ga Chíperecü̱̃ã̱x, rü Chirenecü̱̃ã̱x. Rü nümagü rü jema tama Judéugü ixĩgüxü̃maã rü ta nüxü̃ nixugüe ga ore i mexü̃ i Cori ja Ngechuchuchiga.
21 Rü Tupana nüxü̃ narüngü̃xẽẽ, rü nanaporaexẽẽ. Rü jemaca̱x muxü̃ma ga jema duü̃xü̃gü rü nüxü̃ narüxoe ga nuxcümaxü̃xü̃ ga nacümagü, rü Cori ja Ngechuchuaxü̃́ najaxõgü.
22 Rü jexguma jemaxü̃ nacuáchigagügu ga jema jaxõgüxü̃ ga Jerucharéü̃wa jexmagüxü̃, rü Ãtioquíawa nanamugü ga Barnabé.
23 Rü jexguma jéma nanguxgu ga Barnabé, rü nüxü̃ nadau ga nhuxãcü Tupana nüxü̃ na rüngü̃xẽẽxü̃ ga jema jaxõgüxü̃ ga Ãtioquíacü̱̃ã̱x, rü poraãcü namaã nataãẽ. Rü najaxucu̱xẽgü ga guxü̃ma na meãma Cori ja Ngechuchuwe naxĩãmaxü̃ca̱x, rü taguma nüxü̃ naxoexü̃ca̱x.
24 Jerü nüma ga Barnabé rü wüxi ga jatü ga mecü nixĩ. Rü aixcuma Tupanaãẽ i Üünexü̃ rü nawa najexma, rü napora ga norü õwa. Rü jemaca̱x muxũchixü̃ma ga duü̃xü̃gü rü Cori ja Ngechuchuca̱x naxĩ rü nüxü̃́ najaxõgü.
25 Rü jemawena ga Barnabé rü Tarsuwa naxũ na Chauruca̱x jadauxü̃ca̱x.
26 Rü jexguma nüxü̃ ijangaxgu, rü Ãtioquíawa nanaga. Rü wüxi ga taunecü wüxiwa jéma najexmagü namaã ga jema jaxõgüxü̃. Rü nanangúexẽẽ ga muxũchixü̃ma ga duü̃xü̃gü. Rü Ãtioquíawa nixĩ ga inaxügüxü̃ ga duü̃xü̃gü na Cristutanüxü̃maã na naxugüãxü̃ ga jema jaxõgüxü̃.
27 Rü jexgumaü̃cüü Jerucharéü̃wa ne naxĩ ga nhuxre ga Tupanaãrü orearü uruü̃gü rü Ãtioquíawa naxĩ.
28 Rü natanüwa najexma ga wüxi ga orearü uruü̃ ga Ágabu ga naẽ́ga. Rü nanangutaque̱xexẽẽ ga jema jaxõgüxü̃ ga Ãtioquíawa jexmagüxü̃. Rü jema ngutaque̱xewa rü inachi ga Agabu rü Tupanaãẽ i Üünexü̃ nanamu ga na jadexaxü̃, rü nhanagürü: —Wüxi i taija i taxü̃ tá ínangu i guxü̃ i nhaã nachiü̃ãnewa —nhanagürü. Rü aixcuma ínangu ga jema taija ga jexguma Cráudiu ãẽ̱xgacü ixĩxgu.
29 Rü jexguma ga jema jaxõgüxü̃ ga Ãtioquíawa jexmagüxü̃, rü marü wüxigu nagu narüxĩnüẽ na jéma ngĩxü̃ namugüxü̃ca̱x ga dĩẽru na nüxü̃ nangü̃xẽẽgüxü̃ca̱x ga jema jaxõgüxü̃ ga Judéaanegu ãchiü̃güxü̃. Rü wüxichigü ngĩxü̃ inaxã ga dĩẽru jexgumarüü̃ ga nhuxre ga nüxü̃́ jexmacü.
30 Rü jemaãcü nanaxügü, rü Barnabé rü Chaurumaã jéma ngĩxü̃ namugü ga jema dĩẽru naxca̱x ga jema jaxõgüxü̃ãrü ãẽ̱xgacügü ga Judéaanewa jexmagüxü̃.
