Puracügü 12:1-25
12 Rü jexgumaü̃cüü inanaxügü ga ãẽ̱xgacü ga Erudi ga na ínajauxü̃ãxü̃ ga nhuxre ga jaxõgüxü̃ ga Jerucharéü̃cü̱̃ã̱x na napocuexü̃ca̱x.
2 Rü norü churaragüxü̃ namu na taramaã Tiagu ga Juã́ũẽneẽxü̃ jama̱xgüxü̃ca̱x.
3 Rü jexguma nüxü̃ nada̱xgu ga Erudi ga norü me na jiĩxü̃ ga Judéugü ga jema na naxüxü̃, rü norü churaragüxü̃ namu na Pedruxü̃ rü ta jajauxgüxü̃ca̱x. Rü jema nangupetü ga Judéugüarü peta ga Üpetüchigagu ga jexguma põũ ga ngearü puxẽẽruü̃ã́xü̃ nangõ̱xgügu.
4 Rü jexguma Pedruxü̃ jajauxgügu, rü pocupataü̃gu najata̱xcuchi. Rü nhu̱xmachi ga Erudi rü nanamu ga ãgümücütücumü ga norü churaragü na nüxna nadaugüxü̃ca̱x. Rü wüxitücumüwachigü rü najexma ga ãgümücü ga churaragü. Rü jemaãcü nanaxü ga Erudi, jerü nagu narüxĩnü ga jema petawena guxü̃ ga duü̃xü̃güpe̱xewa na nagaãxü̃ca̱x na jama̱xgüãxü̃ca̱x.
5 Rü jemaãcü ga Pedru rü pocupataü̃wa najexma rü churaragü rü meãma nüxna nadaugü. Notürü ga jema jaxõgüxü̃ ga Jerucharéü̃cü̱̃ã̱x rü poraãcü najumuxẽgü, rü Tupanana naxca̱x nacagü.
Tupana rü Pedruxü̃ ínanguxuchixẽẽ ga pocupataü̃wa
6 Rü jematama ga chütaxü̃gu naxü̃pa ga jema ngunexü̃ ga Erudi duü̃xü̃güpe̱xewa nagaxchaü̃xü̃, rü taxre ga churaragüarü ngãxü̃wa nape ga Pedru. Rü taxre ga curẽtimaã nina̱ĩ̱xgüchacüü. Rü togü ga churaragü ga dauxü̃taexü̃ nüxna nadaugü ga pocupataü̃ãrü ĩã̱x.
7 Rü ngürüãchi jema pocupataü̃wa nango̱x ga wüxi ga orearü ngeruü̃ ga dauxü̃cü̱̃ã̱x ga Coriarü. Rü poraãcü nangóone ga guma pocupataü̃wa. Rü jema orearü ngeruü̃ Pedruxü̃ nacu̱xagü, rü nanaḇaixãchixẽẽ. Rü nhanagürü: —¡Paxama írüda! —nhanagürü. Rü jexgumatama íniwẽgü ga guma curẽti ga Pedru namaã ina̱ĩ̱xgüchacüücü.
8 Rü Pedruxü̃ nhanagürü ga jema orearü ngeruü̃: —¡Rü icu̱xcuchichiru rü nacuaixcu i curü chapatu! —nhanagürü. Rü jemaãcü nanaxü ga Pedru. Rü nhanagürü ta: —¡Rü icu̱xcuchi i curü dejuxü̃chiru, rü chawe rüxũ! —nhanagürü.
9 Rü nawe narüxũ ga Pedru. Rü tama nüxü̃ nacua̱x ga aixcuma na jiĩxü̃ ga jema orearü ngeruü̃ namaã üxü̃. Rü naxca̱x rü nango̱xetümare.
10 Rü nüxü̃ nachopetü ga nüxĩraü̃xü̃ ga dauxü̃taexü̃, rü nhu̱xmachi ga jema to ga dauxü̃taexü̃. Rü jexguma nawa nangugügu ga jema ĩã̱x ga feromena̱xãnaxca̱x ga ĩãnemaü̃waama üxü̃, rü nüẽchama niwãxna. Rü ínachoxü̃. Rü jexguma marü wüxi ga ĩãnemaü̃ inaxĩxgu, rü nüxna inajarütaxu ga jema orearü ngeruü̃.
11 Rü jexguma nüxü̃ nicua̱xãchi ga Pedru, rü nügümaã nhanagürü: —Nhu̱xma waxi i nüxü̃ chacuáxü̃ na aixcuma Cori ja Tupana núma namuxü̃ i norü orearü ngeruü̃ na Erudime̱xẽwa choxü̃ napuxü̃, rü nawa choxü̃ ínanguxuchixẽẽxü̃ i guxü̃ma i ngẽma chamaã naxügüchaü̃xü̃ i ngẽma Judéugü i tama jaxõgüxü̃ —nhanagürü.
12 Rü jexguma jemaxü̃ jacua̱xãchigu ga Pedru, rü ngĩpatawa naxũ ga wüxi ga ngecü ga Maríagu ãẽ́gacü. Rü ngĩma ijixĩ ga Juã́ũ Marcu naẽ. Rü jéma nangutaque̱xegü ga muxü̃ma ga duü̃xü̃gü ga jéma jumuxẽgüxü̃.
13 Rü ĩã̱xtüarü poxeguxü̃ãrü ĩã̱xwa, rü: —Tu tu tu —nhanagürü ga Pedru. Rü wüxi ga pacü ga Rode ga ngĩẽ́ga íijadau.
14 Rü jexguma nagawa nüxü̃ nacua̱xgu ga na Pedru jiĩxü̃, rü ngĩrü taãẽmaã rü íijanhamare na nüxü̃ janaxuxü̃ ga na Pedru jiĩxü̃ ga ĩã̱xtüarü ĩã̱xgu chicü. Rü tama ijawãxna ga ĩã̱x.
15 Rü jema jexmagüxü̃ rü: —Cungẽãẽmare —nhanagürügü ngĩxü̃. Notürü ngĩma rü: —Aixcuma nixĩ —ngĩgürügü. Rü jexguma nhanagürügü: —Maneca tama nüma nixĩ. Rü norü daruü̃ i dauxü̃cü̱̃ã̱xmare nixĩ —nhanagürügü.
16 Notürü ga Pedru rü joxni ĩã̱xwa: —Tu tu tu —nhanagürüama. Rü jexguma naxca̱x jawãxnaãgu rü nüxü̃ nadaugügu ga Pedru na jiĩxü̃, rü naḇaixãchiãẽgü.
17 Notürü nüma naxunagüme̱xẽ, rü naxme̱xmaã najanachianexẽẽgü. Rü namaã nüxü̃ nixu na nhuxãcü Cori ínanguxuchixẽẽxü̃ ga pocupataü̃wa. Rü nhanagürü ta: —¡Tiagumaã rü ngẽma togü i jaxõgüxü̃maã nüxü̃ peixu i ngẽma ore! —nhanagürü. Rü jexguma inaxũãchi, rü toxnamana naxũ.
18 Rü jexguma jangunegu, rü jema churaragü ga pocupataü̃wa dauxü̃taegüxü̃ rü poraãcü nanaxi̱xãchiãẽgü jerü tama nüxü̃ nacua̱xgü ga ṯacü na ngupetüxü̃ namaã ga Pedru.
19 Rü jemaca̱x ga Erudi rü jema churaragüxü̃ namu na Pedruca̱x jadaugüxü̃ca̱x. Rü jexguma taxuxü̃ü̃ma ijangaugügu, rü Erudi rü jema churaragügutama nananguxẽẽ na najuexü̃ca̱x. Rü jemawena ga Erudi rü ínaxũxũ ga Judéaanewa, rü Checharéagu najaxãchiü̃.
Naju ga Erudi
20 Rü Erudi rü namaã nanu ga Tirucü̱̃ã̱xgü rü Sidã́ũcü̱̃ã̱xgü. Notürü ga jema Tirucü̱̃ã̱xgü rü Sidã́ũcü̱̃ã̱xgü rü naxca̱x nadaugü na nhuxãcü Erudixü̃ nangüxmüxẽẽgüxü̃, jerü Erudichiü̃ãnewa nixĩ ga najauxgüãxü̃ ga nabü. Rü jemaca̱x wüxi ga Erudiarü duü̃xü̃ ga ãẽ̱xgacü ga Bratumaã naxãmücügü na nüxü̃ nangü̃xẽẽxü̃ca̱x na Erudimaã jadexagüxü̃ca̱x.
21 Rü Erudi rü namaã inaxuneta ga wüxi ga ngunexü̃ na namaã jadexaxü̃ca̱x. Rü jexguma jema ngunexü̃ ga nagu inaxunetaxü̃wa nanguxgu, rü jema Tirucü̱̃ã̱x rü Sidã́ũcü̱̃ã̱x rü Erudixü̃tawa nangugü. Rü nicu̱xcuchi ga Erudi ga norü ãẽ̱xgacüchiru, rü norü tochicaxü̃wa narüto, rü duü̃xü̃gümaã nüxü̃ nixu ga norü ore.
22 Rü jexguma ga guxü̃ma ga jema duü̃xü̃gü rü tagaãcü nhanagürügü: —Nhaã ãẽ̱xgacü rü tama duü̃xü̃ãrü dexarüü̃ nixĩ i norü dexa, notürü nhama Tupanaãrü dexarüü̃ nixĩ —nhanagürügü.
23 Rü Erudi rü jema duü̃xü̃güarü oremaã nataãẽ, rü tama Tupanaxü̃ nicua̱xüü̃chaü̃ ga nhuxãcü Tupana nüxü̃ narüngü̃xẽẽxü̃. Rü jemaca̱x wüxi ga Tupanaãrü orearü ngeruü̃ ga dauxü̃cü̱̃ã̱x rü jexgumatama Erudixü̃ niḏaawexẽẽ. Rü õxmigü nanangõ̱x, rü jemamaã naju.
24 Notürü jema jaxõgüxü̃ rü jexeraãcü guxü̃wama nüxü̃ nixugüe ga Cori ga Tupanaãrü ore. Rü muxũchixü̃ ga duü̃xü̃gü nüxü̃́ najaxõgü.
25 Rü jexguma marü janguxẽẽãgu ga norü puracü ga Chauru rü Barnabé, rü ínachoxü̃ ga Jerucharéü̃wa, rü wenaxãrü Ãtioquíaca̱x nawoegu. Rü najagagü ga Juã́ũ ga Marcugu ãégaxü̃.
