Puracügü 13:1-52
13 Rü jema jaxõgüxü̃ ga Ãtioquíawa jexmagüxü̃tanüwa rü najexma ga nhuxre ga jatügü ga Tupanaãrü orearü uruü̃gü, rü nhuxre ga jatügü ga Tupanaãrü orewa ngu̱xẽẽtaegüxü̃. Rü jematanüwa najexma ga Barnabé, rü Chimáũ ga Waxwegu ãẽ́gaxü̃, rü Rúchiu ga Chirenecü̱̃ã̱x, rü Manaẽ́ ga wüxigu ãẽ̱xgacü ga Erudimaã jaexü̃, rü Chauru.
2 Rü wüxi ga ngunexü̃ ga jexguma Corica̱x ínangutaque̱xegügu rü tama nachibüeãcüma ínajumuxẽgügujane, rü Tupanaãẽ i Üünexü̃ rü nhanagürü nüxü̃: —¡Choxna penamugü i Chauru rü Barnabé na naxügüãxü̃ca̱x i ngẽma puracü i chama nawa chanamugüchaü̃xü̃! —nhanagürü.
3 Rü jexguma nüxü̃ nachauegu ga tama nachibüeãcüma na najumuxẽgüxü̃, rü Chauru rü Barnabéétügu naxüme̱xgü ga jema jaxõgüxü̃, rü nhu̱xmachi inanamuãchitanü na naxügüãxü̃ca̱x ga Tupanaãrü puracü.
Chiprewa naxĩ ga Barnabé rü Chauru
4 13:4-5 Rü Tupanaãẽ i Üünexü̃ rü inanamuãchitanü ga Barnabé rü Chauru. Rü ĩãne ga Cheúchiawa naxĩ, rü gumaãrü türewa inaxĩãchi, rü Chipre ga capaxũwa naxĩ. Rü Juã́ũ Marcu nawe narüxũ na nüxü̃ nangü̃xẽẽxü̃ca̱x. Rü jexguma Charamína ga ĩãneãrü türewa nangugügu, rü inanaxügüe ga nüxü̃ na jaxugüxü̃ ga Tupanaãrü ore ga Judéugüarü ngutaque̱xepataü̃güwa.
5 Nüü̃ nadau 13:4
6 Rü guxü̃gu nixĩãgütanü ga jema capaxũwa nhu̱xmata Pafu ga ĩãnewa nangugü. Rü jéma namaã inajarüxĩ ga wüxi ga Judéu ga juüxü̃ ga Barechúgu ãẽ́gaxü̃. Rü nüma rü wüxi ga idorata̱xáxü̃ nixĩ jerü nügü jaxuxgu rü aixcuma Tupanaãrü orearü uruü̃ nixĩ.
7 Rü najexma ga jema capaxũãrü ãẽ̱xgacü ga Chérquiu ga Paurugu ãẽ́gaxü̃. Rü nüma nixĩ ga wüxi ga jatü ga meã naãẽxü̃ cuácü. Rü jema juüxü̃ rü guma ãẽ̱xgacüarü ngü̃xẽẽruü̃ nixĩ. Rü nüma ga ãẽ̱xgacü rü norü duü̃xü̃güxü̃ namu na Chauru rü Barnabéca̱x jacagüxü̃ca̱x, jerü nüxü̃ naxĩnüchaü̃ ga Tupanaãrü ore.
8 Notürü jema juüxü̃ ga Gregugawa Erimíniũgu ãẽ́gaxü̃, rü Chauru rü Barnabéna najanuxü̃ na Tupanaãrü orexü̃ jaxugüxü̃. Jerü tama nanaxwa̱xe na jaxõõxü̃ ga guma ãẽ̱xgacü.
9 13:9-10 Notürü ga Chauru ga Paurugu ta ãẽ́gaxü̃, rü aixcuma Tupanaãẽ i Üünexü̃ nawa najexma. Rü nüma ga Pauru rü meãma nüxü̃ nadawenü ga jema juüxü̃, rü nhanagürü nüxü̃: —Pa Idorata̱xáxü̃ Pa Ṉg̱oxo Nanex, cuma rü chixexü̃xicatama cuxüxchaü̃, rü nachi cuxai i guxü̃ma i mexü̃. ¿Nhuxgura tá ta i nüxü̃ curüxoxü̃ na ícujatóxẽẽxü̃ i Cori ja Tupanaãrü ore i aixcuma ixĩxü̃?
10 Nüü̃ nadau 13:9
11 —Nhu̱xmatátama cuxü̃ napocu ja Cori ja Tupana. Rü tá cungexetü, rü nhuxre i ngunexü̃gu rü tãũxü̃táma nüxü̃ cudau ja üa̱xcü —nhanagürü. Rü jexgumatama naxca̱x naxẽãnexü̃chi ga jema juüxü̃, rü naxme̱xmaã nadaugü na texé naxme̱xgu jajauxãchixü̃ca̱x rü namaã ítixũxü̃ca̱x.
12 Rü jexguma jemaxü̃ nada̱xgu ga jema capaxũãrü ãẽ̱xgacü rü najaxõ ga Tupanaãrü ore, jerü namaã naḇaixãchiãẽ ga jema Pauru rü Barnabé nüxü̃ ngu̱xẽẽxü̃ ga Cori ja Tupanachiga.
Pauru rü Barnabé rü Pichíriaanewa jexmane ga ĩãne ga Ãtioquíawa nangugü
13 Rü Pafuwa inaxĩãchi ga Pauru namücügümaã rü nixãü̃ ga taxtü ga taxü̃wa. Rü Perpe ga ĩãnewa nangugü ga Pãfíriaanewa. Notürü jéma nüxna naxo ga Juã́ũ Marcu, rü Jerucharéü̃ca̱x nataegu.
14 Rü Perpewa inaxĩãchi ga Pauru rü Barnabé rü ĩãne ga Ãtioquíawa nangugü ga Pichíriaanewa. Rü jéma rü ngü̃xchigaarü ngunexü̃gu rü Judéugüarü ngutaque̱xepataü̃gu nachocu, rü jéma narütogü natanüwa ga jema íngutaque̱xegüxü̃.
15 Rü jema ngutaque̱xewa rü nüxü̃ nadaumatügü ga Tupanaãrü mugü ga Muĩsé ümatüxü̃ rü jema ore ga Tupanaãrü orearü uruü̃gü ümatüxü̃. Rü jemawena, rü guma ngutaque̱xepataü̃ãrü ãẽ̱xgacügü, rü Barnabé rü Pauruna nacagü, rü nhanagürügü: —Pa Toeneẽgüx, ngẽxguma pexü̃́ nangẽxmagu i perü ore i taãẽxẽẽruü̃ i toxca̱x rü marü name i nhu̱xma tomaã nüxü̃ peixu —nhanagürügü.
16 Rü jexguma inachi ga Pauru, rü naxunagüme̱xẽ na ijanachianexü̃ca̱x ga duü̃xü̃gü. Rü jexguma duü̃xü̃gümaã nidexa, rü nhanagürü: —Pa Duü̃xü̃gü Pa Chautanüxü̃güx rü Guxãma i Pema i To i Nachiü̃ãnecü̱̃ã̱x Ixĩgüxex ja Tupanaxü̃ Ngechaü̃güxe, rü ¡iperüxĩnüẽ!
17 —Jima tórü Tupana i jixema i Judéugü, rü tüxü̃ nidexechi ga nuxcümaxü̃güxe ga tórü o̱xigü na tüxü̃ nangü̃xẽẽxü̃ca̱x. Rü poraãcü tüxü̃ nimuxẽẽ ga jexguma woo to ga nachiü̃ãne ga Ejituanewa tajexmagügu. Rü jemaãcü wüxi ga taxü̃ ga nachiü̃ãne tüxü̃ nixĩgüxẽẽ. Rü nhu̱xmachi jemawena, rü norü poramaã tüxü̃ ínagaxü̃ ga jema naãnewa.
18 —Rü dauxchitawa ga ngextá taxúema íxãpataxü̃wa tüxü̃ nagagü. Rü jéma 40 ga taunecü Tupana jaxna tümamaã naxĩnü ga guxema tórü o̱xigü.
19 —Rü Tupana nanadai ga jema 7 ga ãẽ̱xgacügü ga Canaã́ãnecü̱̃ã̱xgü guxü̃ma ga norü duü̃xü̃gümaãchigü. Rü jemaãcü nanaxü na tórü o̱xigüna naxããxü̃ca̱x ga jema naãne na tümaãrügüxü̃chi jiĩxü̃ca̱x.
20 —Rü 450 ga taunecü rü jemaãcü tüxü̃ narüngü̃xẽẽ. Rü jemawena rü tüxna nanamu ga togü ga ãẽ̱xgacügü ga daruü̃gü nhu̱xmata Tupanaãrü orearü uruü̃ ga Chamuẽ́ũ ingucuchi̱x.
21 —Rü jexguma ga duü̃xü̃gü rü Tupanana naxca̱x nacagü ga wüxi ga ãẽ̱xgacü ga rei na namaã inacuáxü̃ca̱x. Rü Tupana rü nüxna nanamu ga Chaú ga Chiche nane ga Bejamítaa ixĩcü. Rü nüma nüxna nadau ga duü̃xü̃gü ga 40 ga taunecügu.
22 Rü jemawena ga Tupana rü ínanata̱xüchi ga Chaú, rü Dawíxü̃ naxuneta na guma norü rei jiĩxü̃ca̱x. Rü Dawíxü̃ nixuchiga ga Tupana, rü nhanagürü:“Nüxü̃ chadau rü Dawí ja Jesí nane rü wüxi ja jatü ja poraãcü choxü̃́ ngúchaü̃cü nixĩ. Rü nüma tá nanaxü i guxü̃ma i ngẽma chama chanaxwa̱xexü̃”,
nhanagürü ga Tupana.
23 Rü nuxcüma ga Tupana rü marü inaxuneta rü wüxi i Dawítaa tá nixĩ i Cristu ixĩxü̃, rü tá nanamaxẽxẽẽ i Judéugü. Rü Ngechuchu nixĩ ga guma maxẽxẽẽruü̃ ga tórü o̱xigümaã nüxü̃ jaxucü ga Tupana.
24 Notürü naxü̃pa ga Ngechuchu na ínguxü̃, rü Juã́ũ ga baiü̃xẽẽruü̃ rü guxü̃ma ga Judéugümaã nüxü̃ nixuchiga ga ore i mexü̃ rü nhanagürü:
“Rü name nixĩ i nüxü̃ perüxoe i pecüma i chixexü̃, rü Tupanaca̱x pedaugü, rü ípebaiü̃”, nhanagürü.
25 Rü jexguma marü jangaicaxgu ga tá na najuxü̃ ga Juã́ũ, rü nhanagürü:
“Rü tama chama nixĩ i ngẽma pema nagu perüxĩnüẽxü̃ i Cristu chiĩxü̃. Notürü chaweama ne naxũ i nüma ja aixcuma Cristu ixĩcü. Rü chama rü nape̱xewa taxuwama chame, rü bai i norü chapatucunüãrü wẽgüwaxüra chame erü nüma rü wüxi i ãẽ̱xgacü i tacüxü̃chima nixĩ”, nhanagürü ga Juã́ũ.
26 Rü nhanagürü ga Pauru, —Pa Chautanüxü̃gü i Abrã́ũtaagüx, rü Guxãma i Pema i To i Nachiü̃ãnecü̱̃ã̱x i Tupanaxü̃ Ngechaü̃güxex, rü pexca̱x nixĩ i nhaã ore i tüxü̃ maxẽxẽẽxü̃.
27 —Rü aixcuma jema Jerucharéü̃cü̱̃ã̱xgü ga duü̃xü̃gü rü jema norü ãẽ̱xgacügü rü tama nüxü̃ nacua̱xgü ga Tupana Nane na jiĩxü̃ ga Ngechuchu. Rü tama meã nüxü̃ nacua̱xgü ga ṯacüchiga na jiĩxü̃ ga jema ore ga nuxcümaxü̃güxü̃ ga Tupanaãrü orearü uruü̃gü ümatüxü̃ i nhu̱xma perü ngutaque̱xepataü̃wa nüxü̃ pedaumatügüxü̃ i wüxichigü i ngü̃xchigaarü ngunexü̃gu. Rü jemaãcü nümagütama ga jema duü̃xü̃gü ga Ngechuchuxü̃ ima̱xgüxü̃ rü jexguma jama̱xgüãgu rü najanguxẽẽ ga jema ore ga nuxcüma ümatüxü̃.
28 —Rü woo taxuü̃ma ga ṯacü ga chixexü̃ nawa inajangaugü na najuxẽẽãxü̃ca̱x, notürü Piratuna naxca̱x nacagü na jamáãxü̃ca̱x.
29 —Rü ningu ga guxü̃ma ga jema ore ga Tupanaãrü orearü uruü̃gü ümatüxü̃ ga Ngechuchuchiga ga nhuxãcü tá na najuxü̃. Rü jemawena rü nanajauxgü ga naxü̃ne ga curuchawa, rü wüxi ga naxmaxü̃gu najanaxücuchigü.
30 —Notürü ga Tupana rü wena nanamaxẽẽ ga woo marü na najuxü̃.
31 —Rü nüma ga Ngechuchu rü muxü̃ma ga ngunexü̃ naxca̱x nango̱x ga jema duü̃xü̃gü ga nawe rüxĩxü̃ ga jexguma Gariréaanewa ne naxũxgu rü Jerucharéü̃wa naxũxgu. Rü ngẽma duü̃xü̃gü nixĩ i nhu̱xma i guxü̃ i duü̃xü̃gümaã nüxü̃ ixugüxü̃ i nachiga.
32 13:32-33 Rü ngẽmaãcü i toma rü núma tangugü na pemaã nüxü̃ tixuxü̃ca̱x i ngẽma ore i aixcuma mexü̃. Rü dücax, rü jema uneta ga nuxcümaxü̃güxü̃ ga tórü o̱xigümaã nüxü̃ jaxuxü̃ ga Tupana, rü taxca̱x najanguxẽẽ ga jexguma Ngechuchuxü̃ wena namaxẽẽgu. Rü wijaegüpanewa i norü taxre i capíturuwa rü ngẽmachiga nüxü̃ nixu i ngẽxguma:“Cuma nixĩ i Chaune, rü chama nixĩ i Cunatü chiĩxü̃”, nhaxgu.
33 Nüü̃ nadau 13:32
34 —Rü Tupana rü nuxcüma rü marü nüxü̃ nixu ga wena tá na namaxẽẽãxü̃ ga Ngechuchu na tama jajixixü̃ca̱x ga naxü̃ne. Rü norü orewa rü nhanagürü:“Rü chama tá pexca̱x chajanguxẽẽ ga jema unetagü i üünegüxü̃ i aixcuma ixĩgüxü̃ ga nuxcüma Dawímaã nüxü̃ chixuxü̃”,
nhanagürü.
35 —Rü ngẽmaca̱x toxnamana i Tupanaãrü orewa rü nhanagürü ta:“Tama cunaxwa̱xe na jajixixü̃ i naxü̃ne ja Cune ja üünecü,”
nhanagürü.
36 —Rü jexguma namaxü̃gu ga Dawí, rü nüxü̃ narüngü̃xẽẽ ga norü duü̃xü̃gü, jexgumarüü̃ ga nhuxãcü Tupana namuxü̃. Notürü nhu̱xmachi naju, rü nanatü rü naẽxü̃tagu nata̱x ga naxü̃ne, rü nijixi.
37 —Notürü guma Tupana wena namaxẽẽcü ga Ngechuchu rü tama nijixi ga naxü̃ne.
38 —Rü nhu̱xmax, Pa Chaueneẽgüx, rü chanaxwa̱xe i nüxü̃ pecua̱x rü jimatama Ngechuchugagu Tupana tüxü̃́ nüxü̃ nangechaü̃ i tórü pecadugü ngẽxgumarüü̃ i pemaã nüxü̃ tixuxü̃rüü̃.
39 —Rü nhu̱xma ja guxãma ja jíxema nüxü̃́ jaxõgüxe, rü Ngechuchugagu Tupana tüxü̃́ nüxü̃ nangechaü̃ i guxü̃ma ga jema pecadugü ga noxri taxucürüwa tüxü̃́ nüxü̃ nangechaü̃xü̃ ga jexguma nagu taxĩxgu ga jema mugü ga Muĩsé ümatüxü̃.
40 —Rü pexuãẽgü na tama pegu nanguxü̃ca̱x i ngẽma pocu i Tupanaãrü orearü uruü̃gü nüxü̃ ixuchigaxü̃ ga jexguma nhagügu:
41 “Rü dücax, Pa Duü̃xü̃gü i Tupanaãrü Orexü̃ Cugüexü̃x, rü tá peḇaixãchie rü tá pejue erü pema pemaxẽjane rü tá chanaxü i ṯacü i taxü̃. Rü pema rü tãũxü̃táma pejaxõgü i woo texé pemaã nüxü̃ ixuxgu”,
nhanagürü. Rü jexma najacua̱xẽẽ ga Pauru ga norü ore.
42 Rü jexguma guma ngutaque̱xepataü̃wa ínachoxü̃gu ga Pauru rü namücügü, rü jema duü̃xü̃gü ga tama Judéugü ixĩgüxü̃ rü nüxü̃ naca̱a̱xü̃gü na to ga ngü̃xchigaarü ngunexü̃gu rü wenaxãrü jematama orexü̃ namaã jaxuxü̃ca̱x.
43 Rü jexguma marü nüxü̃ nachauegu ga na nangutaque̱xegüxü̃, rü Pauru rü Barnabéwe narüxĩ ga muxü̃ma ga Judéugü rü müxü̃ma ga togü ga duü̃xü̃gü ga tama Judéugü ixĩgüxü̃ notürü Judéugürüü̃ jaxõgüxü̃. Rü Pauru rü Barnabé rü namaã nidexagü rü najaxucu̱xẽgü na guxü̃guma nagu naxĩnüẽẽchaxü̃ca̱x ga nhuxãcü Tupana nüxü̃ ngechaü̃ãcüma na nadexü̃.
44 Rü jema to ga ngü̃xchigaarü ngunexü̃gu, rü wixgutaa̱x guxü̃ma ga jema ĩãnecü̱̃ã̱x nangutaque̱xegü na inaxĩnüẽxü̃ca̱x ga Tupanaãrü ore.
45 Notürü najexma ga nhuxre ga Judéugü ga tama ngutaque̱xegu chocuxü̃. Rü jexguma nüxü̃ nadaugügu ga na namuxũchixü̃ ga duü̃xü̃gü ga Pauruca̱x ngutaque̱xegüxü̃ rü poraãcü nixãũxãchie. Rü inanaxügüe ga na Pauruxü̃ nachoxü̃gagüxü̃ rü namaã naguxchigagüxü̃.
46 Notürü ga Pauru rü Barnabé rü tama namuü̃ẽãcüma jema Judéugüxü̃ nangãxü̃gü, rü nhanagürügü: —Tupana nanaxwa̱xe na pemaãxĩra nüxü̃ tixuxü̃ i norü ore. Notürü nhu̱xma na nüxü̃ pexoexü̃ i ngẽma ore rü tama na penajauxgüchaü̃xü̃ i maxü̃ i taguma gúxü̃, rü ngẽmaca̱x i nhu̱xmax i toma rü tá ngẽma tama Judéugü ixĩgüxü̃tanüwa taxĩ.
47 —Jerü jemaãcü toxü̃ namu ga Cori, rü nhanagürü:“Duü̃xü̃gü i tama Judéugü ixĩgüxü̃ãrü ngóonexẽẽruü̃ marü cuxü̃ chixĩxẽẽ, na guxü̃wama i nhama i naãnewa cunangexü̃ca̱x i chorü ore i maxẽxẽẽruü̃”,
nhanagürü.
48 Rü jexguma jema orexü̃ naxĩnüẽgu ga jema duü̃xü̃gü ga tama Judéugü ixĩgüxü̃, rü nataãẽgü rü nhanagürügü: —Rü namexẽchi nixĩ i nhaã Cori ja Tupanaãrü ore —nhanagürügü. Rü najaxõgü ga guxü̃ma ga jema duü̃xü̃gü ga Tupana marü nüxü̃ unetaxü̃ na najauxgüãxü̃ca̱x i maxü̃ i taguma gúxü̃.
49 Rü jemaãcü guxü̃wama ga jema naãnewa nanguchigü ga Cori ja Tupanaãrü ore.
50 Notürü jema Judéugü ga tama Ngechuchuaxü̃́ jaxõgüchaü̃xü̃, rü chixexü̃maã najaxuxcu̱xẽgü ga nhuxre ga ngexü̃gü ga mexü̃gü ga Tupanaxü̃ ngechaü̃güxü̃ rü guma ĩãneãrü ãẽ̱xgacügü na Pauru rü Barnabéxü̃ ínawoxü̃xü̃ca̱x. Rü jemaca̱x ínanawoxü̃ ga jema naãnewa.
51 Rü jexguma ga Pauru rü Barnabé rü inapagücutü ga norü üxaxü̃cutü na jemawa nüxü̃ jacua̱xãchitanüxü̃ca̱x ga norü chixexü̃ ga jema ĩãnecü̱̃ã̱xgü ga duü̃xü̃gü. Rü nhu̱xmachi ga Pauru rü Barnabé rü ĩãne ga Icúniũwa naxĩ.
52 Notürü jema jaxõgüxü̃ ga guma ĩãne ga nawa ínachoxü̃newa jexmagüxü̃ rü poraãcü Tupanamaã nataãẽgü, rü Naãẽ i Üünexü̃ rü aixcuma nawa najexma.
