Puracügü 14:1-28
14 Rü Icúniũwa rü wüxigu Judéugüarü ngutaque̱xepataü̃gu nachocu ga Pauru rü Barnabé. Rü meãma nüxü̃ nixuchiga ga Tupanaãrü ore rü jemaãcü najaxõgü ga muxü̃ma ga duü̃xü̃gü ga Judéugü rü jema tama Judéugü ixĩgüxü̃ rü ta.
2 Notürü jema Judéugü ga tama Ngechuchuaxü̃́ jaxõgüxü̃, rü chixexü̃maã najaxucu̱xẽgü ga jema tama Judéugü ixĩgüxü̃ na jema jaxõgüxü̃chi naxaiexü̃ca̱x.
3 Rü jemaca̱x muxü̃ma ga ngunexü̃ jexma narücho ga Pauru rü Barnabé, rü tama namuü̃ẽãcüma nüxü̃ nixuchiga ga Cori ja Tupanaãrü ore. Rü jema duü̃xü̃gümaã nüxü̃ nixu na nhuxãcü Tupana poraãcü tüxü̃ nangechaü̃xü̃. Rü nüma ga Cori rü jema duü̃xü̃güxü̃ nüxü̃ nadauxẽẽ na namaã nataãẽxü̃ ga jema ore. Rü jemaca̱x Pauru rü Barnabéxü̃ narüngü̃xẽẽ na inawe̱xgüãxü̃ca̱x ga cua̱xruü̃gü rü na naxügüãxü̃ca̱x ga mexü̃gü ga Tupanaãrü poramaã naxügüxü̃.
4 Notürü ga guma ĩãnecü̱̃ã̱x ga duü̃xü̃gü rü nitoje. Rü nümaxü̃ rü jema Judéugüwaama naxügü rü togü rü Pauru rü Barnabéwaama naxügü.
5 Rü jexguma ga jema Judéugü, rü jema duü̃xü̃gü ga tama Judéugü ixĩgüxü̃, rü guma ĩãneãrü ãẽ̱xgacügümaã wüxigu nagu narüxĩnüẽ na Pauruxü̃ rü Barnabéxü̃ jajauxgüxü̃ na nutamaã ínamuxũchigüãxü̃ca̱x.
6 14:6-7 Notürü jexguma nüxü̃ nacuáchigagügu ga Pauru rü Barnabé, rü nibuxmü. Rü Ricóniũãnewa jexmane ga ĩãnegü ga Rista rü Derbewa naxĩ. Rü guma ĩãnegüwa rü guxü̃ma ga jema naãnewa ipeagüxü̃ ga duü̃xü̃gümaã rü ta nüxü̃ nixuchigagü ga ore i mexü̃.
7 Nüü̃ nadau 14:6
Ristawa rü Pauruxü̃ ínamuxũchigü nutamaã
8 14:8-9 Rü jéma Ristawa najexma ga wüxi ga jatü ga ínapogücutüxü̃ norü bucümatama. Rü jéma narüto rü inarüxĩnü ga jema Pauru nüxü̃ ixuxü̃ ga ore. Rü Pauru rü meãma nüxü̃ nadawenü, rü nüxü̃ nadau ga na nüxü̃́ najexmaxü̃ ga norü õ na naxca̱x jataanexü̃ca̱x.
9 Nüü̃ nadau 14:8
10 Rü jexguma ga Pauru rü tagaãcü nhanagürü nüxü̃: —¡Inachi, rü meãma ínangacutü! —nhanagürü. Rü jexguma inajuxnagü ga guma jatü, rü inanaxügü ga na ijaxũxü̃.
11 Rü jexguma jema muxü̃ma ga duü̃xü̃gü nüxü̃ daugügu ga jema na naxüxü̃ ga Pauru, rü tagaãcü jema Ricóniũgawa nidexagü, rü nhanagürügü: —Tupanagü i naduü̃xü̃güraü̃xü̃ ínarüxĩgü, rü tatanüwa nangugü —nhanagürügü.
12 Rü Barnabé rü tupana ga Júpiteumaã nanaxüégagü. Rü Pauru rü Mercúrimaã nanaxüégagü jerü nüma nixĩ ga jadexaxü̃.
13 Rü guma ĩãne íixücuxü̃wa najexma ga tupana ga Júpiteuarü tupauca ga taxü̃ne. Rü guma tupaucaarü pai rü jéma nanagagü ga wocagü ga ijatüxü̃ ga putüramaã nga̱xãẽgüxü̃. Rü nüma ga pai rü ga duü̃xü̃gü rü nanadaixchaü̃ ga jema wocagü naxca̱x ga Pauru rü Barnabé na jemamaã nüxü̃ jacua̱xüü̃güxü̃ca̱x.
14 Notürü jexguma nüxü̃ jacua̱xãchitanügu ga Barnabé rü Pauru, rü norü dejuxü̃chirugu nagáugüe na jema duü̃xü̃gü nüxü̃ cua̱xgüxü̃ca̱x na tama namexü̃ ga jema naxca̱x naxüechaü̃xü̃. Rü jema muxü̃ma ga duü̃xü̃gütanüwa nabuxmü, rü nhaxü̃maã aita naxüe:
15 —Pa Jatügüx, ¿tü̱xcüü̃ toxca̱x penaxü i ngẽma? Toma rü pexrüü̃ duü̃xü̃gümare tixĩgü. Rü nuã taxĩ na pemaã nüxü̃ tajarüxuxü̃ca̱x na nüxü̃ perüxoexü̃ca̱x i ngẽma chixexü̃gü i taxuwama mexü̃ rü naxca̱x pedaugüxü̃ca̱x ja Tupana ja maxü̃cü ga naxücü ga dauxü̃guxü̃ i naãne, rü nhama i naãne, rü taxtü i taxü̃, rü guxü̃ma i nawa ngẽxmaxü̃.
16 —Rü nuxcümajerü nixĩ ga Tupana ga jaxna namaã naxĩnüxü̃ ga duü̃xü̃gü ga woo nümagü nanaxwa̱xegüxü̃ naxügügu.
17 —Notürü nüma ga Tupana rü taguma nüxü̃ narüchau na duü̃xü̃güxü̃ nangü̃xẽẽxü̃. Rü jemaãcü tüxü̃ nüxü̃ nacua̱xẽẽ na Tupana jiĩxü̃ i nümax. Rü nümatama nixĩ i núma namuãxü̃ ja pucü rü meã pexü̃́ najaexẽxẽãxü̃ i penetügü. Rü nüma nixĩ i pexna naxããxü̃ i pewemü na ngẽmaãcü petaãẽgüxü̃ca̱x —nhanagürügü ga Pauru rü Barnabé.
18 Notürü woo jema orexü̃ namaã na jaxugüxü̃ rü poraãcü nüxü̃́ naguxcha ga Pauru rü Barnabé ga nüxna na nachogüxü̃ ga duü̃xü̃gü ga tama naxca̱x na nadaiãxü̃ca̱x ga jema wocagü na jemamaã nüxü̃ jacua̱xüü̃güxü̃ca̱x. Rü düxwa jemaca̱x tama naxca̱x nanadai.
19 Notürü jexgumajane rü ínangugü ga nhuxre ga Judéugü ga Ãtioquíawa rü Icúniũwa ne ĩxü̃. Rü chixexü̃maã najaxucu̱xẽgü ga jema muxü̃ma ga duü̃xü̃gü na tama Pauru rü Barnabéga naxĩnüẽxü̃ca̱x, rü namaã nanuẽxü̃ca̱x. Rü jemaca̱x ga jema duü̃xü̃gü rü nutamaã Pauruxü̃ ínamuxũchigü, rü ĩãnepechinüwa nanatúchigügü, jerü nüma nüxü̃ nacua̱xgügu rü marü naju.
20 Notürü jexguma jema jaxõgüxü̃ naxü̃tawa ngutaque̱xegu, rü inachi ga Pauru, rü wenaxãrü nagu naxücu ga guma ĩãne. Rü moxü̃ãcü inaxũãchi ga jéma, rü Barnabémaã Derbewa naxũ.
21 Rü guma ĩãnewa nüxü̃ nixugüe ga ore ga mexü̃. Rü nanangúexẽẽ ga duü̃xü̃gü, rü muxü̃ma Tupanaãxü̃́ najaxõgü. Rü jemawena rü wenaxãrü naxca̱x nawoegu ga Rista, rü Icúniũ, rü Ãtioquía.
22 Rü guma ĩãnegüwa rü jema jaxõgüxü̃xü̃ nixucu̱xẽgü, rü nüxü̃́ nanangúchaü̃xẽẽgü na guxü̃guma meã na jaxõgüãxü̃ca̱x. Rü namaã nüxü̃ nixugüe, rü nhanagürügü: —Ngẽma Tupana ãẽ̱xgacü íxĩxü̃wa na ixücuxü̃ca̱x, rü tanaxwa̱xe na muẽ̱xpü̱xcüna guxchaxü̃gümaã jaxna ixĩnüẽxü̃ i nhama i naãnewa —nhanagürügü.
23 Rü Pauru rü Barnabé rü wüxichigü ga ĩãnewa rü nüxü̃ nixunetatanü ga nhuxre ga jatügü na jaxõgüxü̃ãrü ãẽ̱xgacügü jixĩgüxü̃ca̱x. Rü tama nachibüeãcüma naxca̱x najumuxẽgü. Rü jemawena rü jima Cori ja Tupana ga nüxü̃́ jaxõgüãcüna nanaxuaxü̃gü na guxü̃guma namaã inaxã́ũxü̃ca̱x rü meã nüxna nadauxü̃ca̱x ga jema jaxõgüxü̃ãrü ãẽ̱xgacügü.
Pauru rü Barnabé rü naxca̱x nawoegu ga Ãtioquía ga Síriaanewa jexmane
24 Rü Pichíriaanewa nichopetü, rü Pãfíriaanewa nangugü.
25 Rü Perpe ga ĩãnewa nüxü̃ nixugüe ga Tupanaãrü ore, rü nhu̱xmachi Atária ga ĩãnewa naxĩ.
26 Rü jéma rü wüxi ga wapurugu nichoü̃ na Ãtioquíaca̱x nawoeguxü̃ca̱x. Rü guma ĩãne ga Ãtioquíawa nixĩ ga noxri duü̃xü̃gü Tupanana namugüxü̃ ga Pauru rü Barnabé na naxügüãxü̃ca̱x ga jema puracü ga nhu̱xma marü janguxẽẽgüxü̃.
27 Rü jexguma ínangugügu ga Pauru rü Barnabé, rü nanangutaque̱xexẽẽ ga guxü̃ma ga jema duü̃xü̃gü ga jaxõgüxü̃. Rü namaã nüxü̃ nixugügü ga guxü̃ma ga nhuxãcü Tupana poraãcü nüxü̃ na rüngü̃xẽẽxü̃. Rü jexgumarüü̃ ta rü namaã nüxü̃ nixugügü ga nhuxãcü na jaxõgüãxü̃ ga jema duü̃xü̃gü ga tama Judéugü ixĩgüxü̃, jerü Tupana nüxü̃́ nanatauxchaxẽẽ na jaxõgüãxü̃ca̱x.
28 Rü muxü̃ma ga ngunexü̃gu jema jaxõgüxü̃tanüwa najexmagü ga Pauru rü Barnabé.
