Puracügü 15:1-41
15 Rü jexgumaü̃cüü rü najexma ga nhuxre ga duü̃xü̃gü ga Judéaanewa ne ĩxü̃ ga Ãtioquíawa ngugüxü̃. Rü nümagü inanaxügüe ga tüxü̃ na nangúexẽẽxü̃ ga guxema jaxõgüxe ga Ãtioquíacü̱̃ã̱x, rü nhanagürügü: —Ngẽxguma tama pegü ípewiü̃cha̱xmüpe̱xechiraü̃gu jema Muĩsé tüxü̃ muxü̃rüü̃ rü taxuacütáma pexü̃́ nangẽxma i maxü̃ i taguma gúxü̃ —nhanagürügü.
2 Notürü ga Pauru rü Barnabé rü tama norü me nixĩ ga jema, rü jemaca̱x poraãcü nügü namaã nachoxü̃gagü ga jema duü̃xü̃gü ga Judéaanewa ne ĩxü̃. Rü düxwa Pauru rü Barnabé rü nhuxre ga togü ga Ãtioquíacü̱̃ã̱x ga jaxõgüxü̃xü̃ naxunetagü na Jerucharéü̃wa naxĩxü̃ca̱x na jema ngúexü̃gü ga Ngechuchu imugüxü̃ rü jema jaxõgüxü̃ãrü ãẽ̱xgacügümaã jamexẽẽgüãxü̃ca̱x ga jemachiga.
3 Rü jemaãcü ga jema jaxõgüxü̃ ga Ãtioquíacü̱̃ã̱x rü Jerucharéü̃wa nanamugü ga jema jatügü na naxca̱x íjacagüxü̃ca̱x rü jamexẽẽgüãxü̃ca̱x ga jema ore. Rü Peníchiaanewa rü Chamáriaanewa nachopetü ga Pauru rü Barnabé. Rü jéma rü duü̃xü̃gümaã nüxü̃ nixugüe ga nhuxãcü jema tama Judéugü ixĩgüxü̃ rü nüxü̃ na naxoexü̃ ga nuxcümaxü̃xü̃ ga nacümagü na Tupanawe naxĩxü̃ca̱x. Rü jema oremaã poraãcü nanataãẽxẽẽgü ga guxü̃ma ga jema jaxõgüxü̃.
4 Rü Jerucharéü̃wa nangugü ga Pauru rü Barnabé. Rü guxü̃ma ga jema jaxõgüxü̃ rü jema ngúexü̃gü ga Ngechuchu imugüxü̃ rü jema jaxõgüxü̃ãrü ãẽ̱xgacügü rü meãma nanajauxgü. Rü Pauru rü Barnabé namaã nüxü̃ nixugügü ga guxü̃ma ga nhuxãcü Tupana poraãcü nüxü̃ na rüngü̃xẽẽxü̃ na duü̃xü̃gümaã nüxü̃ jaxugüxü̃ca̱x ga ore i mexü̃.
5 Notürü nhuxre ga Parichéugü ga Ngechuchuaxü̃́ jaxõgüxü̃, rü inachigü, rü nhanagürügü: —Name nixĩ na nügü ínawiü̃cha̱xmüpe̱xechiraü̃güxü̃ i ngẽma tama Judéugü ixĩgüxü̃ i ngexwaca jaxõgüxü̃. Rü name nixĩ na naga naxĩnüẽxü̃ i ngẽma mugü ga Muĩsé ümatüxü̃ —nhanagürügü.
6 Rü jexguma nangutaque̱xegü ga jema ngúexü̃gü ga Ngechuchu imugüxü̃ rü jema jaxõgüxü̃ãrü ãẽ̱xgacügü na namexẽẽgüãxü̃ca̱x ga jema ore.
7 Rü jixcama marü nhuxgumama nügümaã jéma japoragatanücüügu, rü inachi ga Pedru, rü nhanagürü nüxü̃: —Pa Chaueneẽgüx, pema nüxü̃ pecua̱x ga na ü̃pamama Tupana choxü̃ jaxuxü̃ ga petanüwa na jema duü̃xü̃gü i tama Judéugü ixĩgüxü̃maã nüxü̃ chixuxü̃ca̱x i norü ore i mexü̃ i maxẽxẽẽruü̃, na nümagü rü ta Ngechuchuaxü̃́ jaxõgüãxü̃ca̱x.
8 —Rü jima Tupana ja guxããẽxü̃ cuácü rü tüxü̃ nüxü̃ nadauxẽẽ na nadeãxü̃ i ngẽma duü̃xü̃gü i tama Judéugü ixĩgüxü̃, jerü nüxna nanamu ga Naãẽ i Üünexü̃ jema tüxna namuãxü̃rüü̃.
9 —Rü Tupanape̱xewa rü jixema i Judéugü rü namaã tawüxigu i ngẽma duü̃xü̃gü i tama Judéugü ixĩgüxü̃. Jerü nümagü rü ta Tupana nüxü̃́ nüxü̃ nangechaü̃ ga norü pecadugü ga jexguma nüxü̃́ jaxõgüãgu.
10 —¿Rü tü̱xcüü̃ tama namaã petaãẽ i nhu̱xma i ngẽma Tupana üxü̃? ¿Rü tü̱xcüü̃ ngẽma ngexwacax jaxõgüxü̃xü̃ penaxüxẽẽchaü̃ i ngẽma Muĩséarü mugü i guxchaxü̃ ga tórü o̱xigü rü taxuacüma naga taxĩnüẽxü̃ rü woo jixemagü rü ta taxuacüma inguxẽẽxü̃?
11 —Rü tama ngẽma mugü nixĩ i tüxü̃ maxẽxẽẽxü̃. Notürü jixema rü tajaxõgü na tórü Cori ja Ngechuchu tamaã mecümaxü̃gagu jiĩxü̃ na tüxna naxãmareãxü̃ i maxü̃ i taguma gúxü̃. Rü ngẽxgumarüü̃ ta nixĩ i naxca̱x i nümagü i tama Judéugü ixĩgüxü̃ —nhanagürü ga Pedru.
12 Rü inanaxügü ga Barnabé rü Pauru na jadexagüxü̃. Rü guxü̃ma ga jema duü̃xü̃gü rü inarüchianegü rü inarüxĩnüẽmare. Rü Barnabé rü Pauru rü namaã nüxü̃ nixugüe ga nhuxãcü Tupana na nüxü̃ rüngü̃xẽẽgüxü̃ na naxügüãxü̃ca̱x ga mexü̃ ga taxü̃gü ga Tupanaãrü poramaã naxügüxü̃ natanüwa ga jema duü̃xü̃gü ga tama Judéugü ixĩgüxü̃.
13 Rü jexguma Barnabé rü Pauru igúegagügu, rü nüxĩxãrü nidexa ga Tiagu, rü nhanagürü: —Pa Chaueneẽgüx, ¡choxü̃́ iperüxĩnüẽ!
14 —Pedru i Chimáũ rü tamaã nüxü̃ nixu na nhuxãcü Tupana inaxügüxü̃ ga nüxü̃ na nangü̃xẽẽxü̃ ga jema duü̃xü̃gü i tama Judéugü ixĩgüxü̃. Rü tamaã nüxü̃ nixu ta na nhuxãcü Tupana jema duü̃xü̃gütanüwa nadeãxü̃ ga nhuxre ga duü̃xü̃gü na noxrü jixĩgüxü̃ca̱x.
15 —Rü ngẽma Pedru nüxü̃ ixuxü̃ rü nawüxigu namaã ga jema ore ga nuxcümaxü̃güxü̃ ga orearü uruü̃gü ümatüxü̃ ga nhaxü̃:
16 “Rü ngẽmawena rü tá chataegu, rü tá nüxü̃ charüngü̃xẽẽ i Dawítaagü i Judéugü. Rü woo nawoonemare i nhu̱xmax, notürü wena táxarü wüxiwa chanaxĩxẽẽ, rü tá íchanadagüxẽẽ na noxrirüü̃ naporaexü̃ca̱x.
17 Rü ngẽmaãcü tá nüxü̃ charüngü̃xẽẽ na ngẽma duü̃xü̃gü i tama Judéugü ixĩgüxü̃ rü chauxca̱x nadaugüxü̃ca̱x, wüxigu namaã i guxü̃ma i chorü duü̃xü̃gü i Judéugü i chama chidexechixü̃.
18 Rü jemaãcü nüxü̃ nixu ga nüma ga Cori ja Tupana ga nuxcümama tüxü̃ nüxü̃ cua̱xẽẽcü ga jema”,
nhanagürü ga jema ore ga nuxcüma ümatüxü̃.
19 Rü nhanagürü ga Tiagu: —Rü ngẽmaca̱x, Pa Chaueneẽgüx, rü chauxca̱x rü tama name na guxü̃ i Muĩsé ümatüxü̃ i mugümaã nüxü̃ ichixewexü̃ i ngẽma duü̃xü̃gü i tama Judéugü ixĩgüxü̃ i nüxü̃ rüxoexü̃ i nuxcümaxü̃xü̃ i nacümagü na Tupanawe naxĩxü̃ca̱x.
20 —Rü narümemaẽ nixĩ i naxca̱x tanaxümatü i popera, rü ngẽmawa namaã nüxü̃ tixu:(1) Rü tama name na nangõ̱xgüãxü̃ i ngẽma naxü̃nagümachi i togü norü tupananetachicüna̱xãgüca̱x ḏaixü̃.(2) Rü tama name na naĩ i ngemaã rü e̱xna naĩ ja jatümaã inapexü̃.(3) Rü tama name na nangõ̱xgüãxü̃ i namachi i ngẽma naẽxü̃ rü e̱xna naxü̃na i wẽxnaãxü̃ rü e̱xna natügu nguxü̃.(4) Rü tama name na nangõ̱xgüãxü̃ ja nagü.
Rü ngẽxĩcatama nixĩ i inaxwa̱xexü̃ na naxca̱x naxümatüxü̃.
21 —Erü guxü̃ne ja ĩãnewa nangẽxma ja Judéugüarü ngutaque̱xepataü̃ i ngextá nuxcümama guxü̃ i ngü̃xchigaarü ngunexü̃gu nawa ínangúe rü nüxü̃ nixuchigagü i guxü̃ma i ngẽma mugü ga Muĩsé ümatüxü̃ —nhanagürü ga Tiagu.
Popera ga jema duü̃xü̃gü ga tama Judéugü ixĩgüxü̃ca̱x ümatüxü̃
22 Rü jema ore rü norü me nixĩ ga jema ngúexü̃gü ga Ngechuchu imugüxü̃, rü jema jaxõgüxü̃ãrü ãẽ̱xgacügü, rü guxü̃ma ga jema jaxõgüxü̃. Rü nügümaã nhanagürügü: —¡Ngĩxã tatanüwa tanade ja taxre ja jatügü na Ãtioquíawa namugüxü̃ca̱x namaã ja Pauru rü Barnabé! —nhanagürügü. Rü nüxü̃ naxunetagü ga Juda ga Barsabágu ãẽ́gaxü̃ rü Chira. Rü nümagü ga Juda rü Chira rü ãẽ̱xgacügü nixĩ ga natanüwa ga jema jaxõgüxü̃ ga Jerucharéü̃wa jexmagüxü̃.
23 Rü namaã jéma nanamugü ga popera, rü nhaã nixĩ ga jema ore ga nagu naxümatügüxü̃:
“Pa Toeneẽgü i Tama Judéugü Ixĩgüxe i Ãtioquíagu rü Síriaanegu rü Chiríchiaanegu Ãchiü̃güxe, rü toma i peeneẽgü i Ngechuchu toxü̃ imugüxe rü toma i jaxõgüxü̃ãrü ãẽ̱xgacügü ixĩgüxex, rü pexü̃ tarümoxẽgü.
24 Rü nüxü̃ tacuáchigagü rü nhuxre ga duü̃xü̃gü ga núma ne ĩxü̃ rü woo tama toma jéma tanamugü notürü nümagü rü jéma naxĩ rü Muĩséarü mugümaã pexü̃ nachixewegü rü jemaãcü pexü̃ ínatüexẽẽ.
25 Rü jemaca̱x guxãma ga toma rü wüxigu nagu tarüxĩnüẽ na totanüwa nüxü̃ taxunetaxü̃ ga taxre ga taeneẽgü na pexca̱x ngẽ́ma tanamugüxü̃ca̱x namaã i taeneẽgü i nüxü̃ ingechaü̃güxü̃ i Barnabé rü Pauru.
26 Rü nümagü i Barnabé rü Pauru nixĩ ga poraãcü ãũcümaxü̃wa najexmagüxü̃ naxca̱x ga tórü Cori ja Ngechuchu ja Cristu.
27 Rü nhu̱xma rü pexca̱x ngẽ́ma tanamugü i Juda rü Chira na nümagüxü̃chi pemaã nüxü̃ jaxugüxü̃ca̱x rü pemaã nango̱xẽẽgüãxü̃ca̱x i guxü̃ma i torü ore.
28 15:28-29 Erü Tupanaãẽ i Üünexü̃ca̱x name, rü toxca̱x rü ta name na tama muxü̃ma i mugü pexna taxãgüxü̃. Rü nhaã ãgümücü i mugüxicatama nixĩ i pexü̃ tamuxü̃:(1) Rü tama name na penangṍxü̃ i naxü̃nagümachi i togü norü tupananetachicüna̱xãgüca̱x ḏaixü̃.(2) Rü tama name na penangṍxü̃ i namachi i ngẽma naxü̃nagü i wẽxnaãxü̃.(3) Rü tama name na penangṍxü̃ ja nagü.(4) Rü tama name na naĩ i ngemaã rü e̱xna naĩ ja jatümaã ipepexü̃.Rü mexü̃ tá pexügü ega penaxauregu i ngẽma mugü. Rü nuãma pexna”, nhanagürü ga jema ore ga naxümatügüxü̃.
29 Nüü̃ nadau 15:28
30 Rü natanüxü̃xü̃ namoxẽgüguwena, rü inaxĩãchi ga jema jéma mugüxü̃, rü Ãtioquíawa naxĩ. Rü jexguma jéma nangugügu rü nanangutaque̱xexẽẽ ga guxü̃ma ga jema jaxõgüxü̃ ga duü̃xü̃gü, rü nüxna nanaxãgü ga jema popera.
31 Rü jexguma nüxü̃ nadaumatügügu, rü poraãcü nataãẽgü namaã ga jema ucu̱xẽgü ga nüxna naxãgüxü̃.
32 Rü Juda rü Chira ga Tupanaãrü orearü uruü̃gü na jixĩgüxü̃, rü muxü̃ma ga oremaã najaxucu̱xẽgü ga jema jaxõgüxü̃, rü nüxü̃ narüngü̃xẽẽ na jexeraãcü jaxõgüãxü̃ca̱x.
33 Rü marü nhuxre ga ngunexü̃ jéma najexmagüguwena, rü ínixĩ. Rü jema jaxõgüxü̃ ga Ãtioquíacü̱̃ã̱x, rü taãẽãcüma Juda rü Chiraxü̃ narümoxẽgü rü meãma ínajamugü na naxca̱x nawoeguxü̃ca̱x ga jema Jerucharéü̃cü̱̃ã̱x ga noxri natanüwa namugüxü̃.
34 Notürü ga Chira rü nagu narüxĩnü na jexma Ãtioquíagu naxã́ũxü̃, rü jemaca̱x Judaxicatama Jerucharéü̃ca̱x nataegu.
35 Rü Pauru rü Barnabé rü ta jexma narücho. Rü wüxigu namaã ga muxü̃ma ga togü, rü nanangúexẽẽ ga duü̃xü̃gü, rü namaã nüxü̃ nixugügü ga Cori ja Tupanaãrü ore i mexü̃.
Pauru rü wenaxãrü inaxũãchi ga to ga nachiü̃ãnegüwa na nangeaxü̃ ga Tupanaãrü ore
36 Rü jexguma marü nhuxre ga ngunexü̃ ngupetügu, rü nhanagürü ga Pauru Barnabéxü̃: —¡Ngĩxã wenaxãrü natanügu tanaxĩãne i ngẽma jaxõgüxü̃ i guxü̃ne ja ĩãne ga ngextá nüxü̃ íixuchigaxü̃wa ga Cori ja Tupanaãrü ore na nüxü̃ idauxü̃ca̱x na nhuxãcü nüxü̃ ínangupetügüxü̃! —nhanagürü.
37 Rü Barnabé rü najagaxchaü̃ ta ga Juã́ũ Marcu.
38 Notürü ga Pauru rü tama nanaxwa̱xe ga na jagaãxü̃, jerü Pãfíriawa nüxna naxo ga noxri, rü tama ínajaxümücü ga jema puracüwa.
39 Rü poraãcü nügümaã niporagatanücüü naxca̱x ga jema, rü düxwa nügüna nixĩgachi. Rü Barnabé najaga ga Marcu, rü Chiprearü capaxũwa naxũ.
40 Rü joxni ga Pauru rü Chiraxü̃ niga. Rü jema Ãtioquíacü̱̃ã̱x ga jaxõgüxü̃ rü naxca̱x najumuxẽgü na Tupana nüxü̃ rüngü̃xẽẽgüxü̃ca̱x. Rü jexguma inaxĩãchi.
41 Rü Síriaanewa rü Chiríchiaanewa nachopetü, rü jéma Tupanaãrü oremaã nanataãẽxẽẽgü ga jema jaxõgüxü̃.
