Puracügü 16:1-40
16 Rü Derbe rü Ristawa nangugü ga Pauru rü Chira. Rü jéma najexma ga wüxi ga jaxõcü ga Timúteu ga naẽ́ga. Rü naẽ rü wüxi ga Judéu ga jaxõ̱xcü ijixĩ. Rü nanatü rü wüxi ga Gregu tixĩ.
2 Rü meãma Timúteuchigagu nidexagü ga guxü̃ma ga jema jaxõgüxü̃ ga Ristacü̱̃ã̱xgü rü Icúniũcü̱̃ã̱xgü.
3 Rü nanaxwa̱xe ga Pauru ga na nüxü̃ íjaxümücüxü̃ ga Timúteu. Notürü naxü̃pa ga na jagaãxü̃ rü ínanawiecha̱xmüpe̱xechiraü̃, jerü jemaãcü nanaxwa̱xegü ga jema Judéugü ga jema naãnewa jexmagüxü̃. Jerü guxü̃ma nüxü̃ nacua̱xgü ga na Gregu tiĩxü̃ ga nanatü.
4 Rü guxü̃nema ga guma ĩãnegü ga nawa nachopetünewa, rü duü̃xü̃gümaã nüxü̃ nixugüetanü ga jema ucu̱xẽ ga jema Jerucharéü̃cü̱̃ã̱x ga ngúexü̃gü ga Ngechuchu imugüxü̃ rü jema jaxõgüxü̃ãrü ãẽ̱xgacügü nüxü̃ ixugüxü̃.
5 Rü jemaãcü jexeraãcü meã najaxõgü ga guxü̃ma ga jema jaxõgüxü̃, rü guxü̃ ga ngunexü̃ rü jexeraãcü nimuẽtanü ga jema jexwacax jaxõgüxü̃.
Pauru nango̱xetü rü wüxi ga jatü ga Machedóniãcü̱̃ã̱xü̃ nadau
6 Rü Áchiaanewa naxĩxchaü̃ na jéma nüxü̃ jaxugüxü̃ca̱x ga ore i mexü̃. Notürü Tupanaãẽ i Üünexü̃ rü nüxna nanachu̱xu ga jema. Rü jemaca̱x Fríjiaanewa rü Gárataanewaama nachopetü.
7 Rü Mísiaarü naãnewa nangugü, rü jéma nagu narüxĩnüẽ ga na Bitíniããrü naãnewa naxĩxü̃. Notürü jéma rü ta Tupanaãẽ i Üünexü̃ nüxna nanachu̱xu ga na jéma naxĩxü̃.
8 Rü jemaca̱x Mísiaanewa nachopetümare rü ĩãne ga Truádewa nangugü.
9 Rü jema chütaxü̃gu rü Pauru nango̱xetü rü nüxü̃ nadau ga wüxi ga jatü ga Machedóniãcü̱̃ã̱x ga nape̱xegu chicü. Rü nüxü̃ naca̱a̱xü̃, nhaxü̃maã: —¡Machedóniãwa naxũ, rü toxü̃ rüngü̃xẽẽ! —nhaxü̃maã.
10 Rü jexguma jemaxü̃ nada̱xgu ga Pauru, rü jexgumatama togü tamexẽẽgü na Machedóniãwa taxĩxü̃ca̱x. Jerü nüxü̃ tacua̱xgü rü aixcumaxü̃chi nixĩ ga Tupana toxca̱x c̱axü̃ na jema duü̃xü̃gümaã nüxü̃ tixuxü̃ca̱x ga ore i mexü̃.
Piripuwa najexmagü ga Pauru ru Chira
11 Rü Truádearü türewa itaxĩãchi, rü capaxũ ga Chamotáchiuca̱x we̱xgu taxĩ. Rü moxü̃ãcü Neã́poriwa tangugü.
12 Rü jéma rü dauxchitagu taxĩ rü Piripuwa tangugü. Rü guma nixĩ ja Romacü̱̃ã̱xgüarü ĩãne ga Machedóniããnegu naxügüne. Rü guma nixĩ ja guxü̃ne ja ĩãneãrü tamaẽne ga jéma. Rü jéma tajexmagü ga nhuxre ga ngunexü̃gü.
13 Rü ngü̃xchigaarü ngunexü̃gu, rü guma ĩãne ijacuáxü̃wa taxĩ ga natüpechinüwa, jerü nagu tarüxĩnüẽgu rü jéma najexma ga Judéugüarü jumuxẽchica. Rü jéma tarütogü, rü namaã tidexagü ga nhuxre ga ngexü̃gü ga jéma ngutaque̱xegüxü̃, rü namaã nüxü̃ tixugü ga Tupanaãrü ore.
14 Rü jéma ijexma ga wüxi ga ngecü ga Díria ga ngĩẽ́ga ga Tupanaxü̃ icua̱xüü̃xcü. Rü Tiatíra ga ĩãnecü̱̃ã̱x ijixĩ. Rü dauxracharaxü̃ ga naxchirumaã itaxe jerü jema nixĩ ga ngĩrü puracü. Rü ngĩma rü meãma jéma irüxĩnü, jerü nüma ga Cori ja Tupana rü ngĩxü̃́ nanangúchaü̃xẽẽ na meã inaxĩnüxü̃ca̱x ga jema ore ga Pauru nüxü̃ ixuxü̃.
15 Rü jemawena rü nhu̱xmachi íibaie wüxigu namaã ga guxü̃ma ga ngĩtanüxü̃gü. Rü jixcama rü toxü̃ ica̱a̱xü̃ nhaxü̃maã: —Ngẽxguma pema choxü̃ peda̱xgu na aixcuma nüxü̃́ chajaxõxü̃ ja Cori ja Tupana, rü marü name ega chapatagu pejapegügu —ngĩgürügü. Rü jéma toxü̃ ixĩxẽẽ.
16 Rü wüxi ga ngunexü̃gu ga jexguma jumuxẽwa taxĩxgu ga tomax, rü jexma ngĩxü̃ tajangau ga wüxi ga pacü ga corigüxü̃taxü̃ ixĩcü ga ṉg̱oxoã̱xcü. Rü jema pacü rü wüxi ga ṯacüxü̃ cua̱xcü ijixĩ, rü duü̃xü̃gümaã nüxü̃ ijaxu ga ṯacü tá jixcüra na ngupetüxü̃. Rü jemaca̱x ga duü̃xü̃gü rü dĩẽrumaã ngĩxü̃́ nanaxütanü na nüxü̃ jaxuxü̃ca̱x na ṯacü tá na ngupetüxü̃. Rü jemaãcü poraãcü dĩẽruxü̃ itú naxca̱x ga ngĩrü corigü.
17 Rü ngĩma towe ingẽ ga toma rü Pauru, rü tagaãcü ngĩgürügü: —Nhaã jatügü rü Tupana ja tacüxü̃chimaãrü duü̃xü̃gü nixĩ, rü pemaã nüxü̃ nixu na nhuxãcü tá penajaxuxü̃ i maxü̃ i taguma gúxü̃ —ngĩgürügü.
18 Rü jemaãcü ijixĩ ga muxü̃ma ga ngunexü̃gu. Rü düxwa nüxü̃́ nawa̱xtümüxü̃ ga Pauru, rü ngĩxca̱x nadauegu, rü nhanagürü nüxü̃ ga jema ṉg̱oxo ga ngĩwa jexmaxü̃: —Ngechuchu ja Cristuégagu cuxü̃ chamu, na ngĩwa ícuxũxũxü̃ca̱x —nhanagürü. Rü jexgumatama ngĩwa ínaxũxũ ga jema ṉg̱oxo.
19 Rü jexguma nüxü̃ nadaugügu ga ngĩrü corigü ga marü tama ngĩgagu dĩẽru ngĩxü̃ na najauxgüxü̃, rü Pauru rü Chiraxü̃ ínajauxü̃, rü ãẽ̱xgacügüarü ngutaque̱xechicawa nanagagü.
20 Rü ãẽ̱xgacügüna nanaxuaxü̃ ga jema ngĩrü corigü, rü nhanagürügü: —Nhaã Judéugü rü tórü ĩãnewa nanachixeãẽxẽẽgü i duü̃xü̃gü.
21 —Rü tüxü̃ nangúexẽẽ na naxaurexü̃ca̱x i nacümagü i tüxna chu̱xuxü̃ i jixema i Romacü̱̃ã̱xgü —nhanagürügü.
22 Rü jexguma ga guxü̃ma ga jema ĩãnecü̱̃ã̱x, rü Pauru rü Chirana najuxgü. Rü jema ãẽ̱xgacügü nanamu na ínacu̱xü̃ãxü̃ca̱x rü ngexchiruxü̃ma naĩxmena̱xãmaã jac̱uaixgüãxü̃ca̱x.
23 Rü jexguma marü poraãcü jac̱uaixgüãguwena, rü pocupataü̃gu nanawocu. Rü nüxna naxãga ga jema pocupataü̃ãrü daruü̃ na meãma nüxna nadauxü̃ca̱x.
24 Rü jexguma jemaxü̃ naxĩnügu ga jema daruü̃, rü pocupataü̃ãrü aixepeguxü̃chixü̃ ga ucapugu nanawocu, rü meãma najachotaparagü.
25 Notürü ngãxü̃cüügu rü najumuxẽgü ga Pauru rü Chira, rü nawijaegü, rü Tupanaxü̃ nicua̱xüü̃gü. Rü jema togü ga pocuexü̃ rü nüxü̃ naxĩnüẽ.
26 Rü ngürüãchi poraãcü naxĩã̱xãchiane, rü ínajangogütanüãchi ga guma pocupataü̃ãrü caxtagü. Rü jexgumatama niwãxnagü ga guxü̃ma ga ĩã̱xgü ga guma pocupataü̃. Rü guxü̃ma ga jema pocuexü̃ãrü curẽtiparagü rü niwẽgü.
27 Rü pewa naḇaixãchi ga jema pocupataü̃ãrü daruü̃. Rü jexguma nüxü̃ nada̱xgu ga na jawãxnagüxü̃ ga ĩã̱xgü ga guma pocupataü̃ rü nanajaxu ga norü tara na nügü jamáxü̃ca̱x, jerü nüma nüxü̃ nacua̱xgu rü marü nibuxmü ga jema pocuexü̃.
28 Notürü tagaãcü aixta naxü ga Pauru, rü nhanagürü nüxü̃: —¡Tãṹ i cugü cuimáxü̃! Rü guxãma i toma rü tanuxmagü —nhanagürü.
29 Rü jexguma ga jema pocupataü̃ãrü daruü̃ rü naxca̱x ínaca ga wüxi ga omü, rü inanhaãchiãcüma jema duü̃xü̃gü ípocuexü̃gu najangaxi, rü jadu̱ru̱xãcüma Pauru rü Chirape̱xegu najacaxã́pü̱xü.
30 Rü jexguma ĩã̱xtüwa Pauru rü Chiraxü̃ nagagü, rü nhanagürü nüxü̃: —Pa Corigüx, ¿Ṯacü tá chaxüxü̃ i chama na choxü̃́ nangẽxmaxü̃ca̱x i maxü̃ i taguma gúxü̃? —nhanagürü.
31 Rü nümagü rü nanangãxü̃gü rü nhanagürügü nüxü̃: —¡Nüxü̃́ jaxõ ja Cori ja Ngechuchu, rü tá cuxü̃́ nangẽxma i maxü̃ i taguma gúxü̃ i cuma rü guxü̃ i cupatacü̱̃ã̱x! —nhanagürügü.
32 Rü namaã rü guxü̃ma ga jema napatacü̱̃ã̱xgümaã rü ta nüxü̃ nixugüe ga Cori ja Tupanaãrü ore.
33 Rü jematama ngoragu ga chütacü, rü jema pocupataü̃ãrü daruü̃ najajauxgü ga norü o̱xrigü ga Pauru rü Chira. Rü jexgumatama ga Pauru rü Chira rü ínanabaiexẽẽ ga jema pocupataü̃ãrü daruü̃ wüxigu namaã ga guxü̃ma ga napatacü̱̃ã̱xgü.
34 Rü nhu̱xmachi napatawa nanagagü, rü õna nüxna naxã, rü nataãẽ ga nüma rü guxü̃ma ga napatacü̱̃ã̱xgü ta, jerü Tupanaãxü̃́ najaxõgü.
35 Rü moxü̃ãcü pa̱xmama rü jema ĩãneãrü ãẽ̱xgacügü rü jema pocupataü̃ãrü daruü̃xü̃tawa nanamugü ga purichíagü na namaã nüxü̃ janaxugüxü̃ca̱x na Pauru rü Chiraxü̃ ínamuxü̃xü̃.
36 Rü jexguma ga jema pocupataü̃ãrü daruü̃ rü nhanagürü Pauruxü̃: —Rü ngẽma ãẽ̱xgacügü rü nuã nanamugü i ore na pexü̃ íchamuxü̃xü̃ca̱x. ¡Rü ẽcü ípechoxü̃, rü meã ípeixĩ! —nhanagürü.
37 Notürü ga Pauru rü nhanagürü nüxü̃ ga jema purichíagü: —Marü chixri tomaã nachopetü i toma i Romacü̱̃ã̱xü̃chigü na tixĩgüxü̃, rü tama toxna nacaxiraãcüma toxü̃ nic̱uaixgü ga nape̱xewa ga guxü̃ma ga duü̃xü̃gü, rü nhu̱xmachi pocupataü̃gu toxü̃ nawocu. Rü nhu̱xma rü cúãcüma toxü̃ ínamuxü̃chaü̃. Rü tãũxü̃táma ngẽmaãcü nixĩ. ¡Rü ẽcü nümatama núma naxĩ i ãẽ̱xgacügü na nümatama toxü̃ íjamuxü̃xü̃ca̱x! —nhanagürü ga Pauru.
38 Rü jexguma ga jema purichíagü rü ãẽ̱xgacügümaã nüxü̃ najarüxugüe ga jema ore. Rü poraãcü naḇaixãchiãẽgü ga jema ãẽ̱xgacügü ga jexguma nüxü̃ naxĩnüẽgu ga na Romacü̱̃ã̱xü̃chi jixĩgüxü̃.
39 Rü jéma naxĩ, rü Pauru rü Chirana najacagü na nüxü̃́ nüxü̃ nangechaü̃güxü̃ca̱x naxca̱x ga jema namaã naxügüxü̃. Rü ínanamuxü̃, rü nüxü̃ naca̱a̱xü̃gü na nawa ínachoxü̃xü̃ca̱x ga guma ĩãne.
40 Rü jexguma pocupataü̃wa ínachoxü̃gu ga Pauru rü Chira, rü Díriapatawa naxĩ. Rü jema jaxõgüxü̃maã nangutaque̱xegü, rü najaxucu̱xẽgü, rü Tupanaãrü oremaã nanataãẽxẽẽgü. Rü nhu̱xmachi jemawena rü inaxĩãchi.
