Puracügü 17:1-34
17 Rü ĩãnegü ga Ãpípori rü Aporóniãwa nachopetü ga Pauru rü Chira, rü ĩãne ga Techarónicawa nangugü. Rü jéma najexma ga Judéugüarü ngutaque̱xepataü̃.
2 Rü nawa naxũ ga Pauru, jerü woetama jema nixĩ ga nacüma. Rü tamaẽ̱xpü̱x ga ngü̃xchigaarü ngunexü̃gu namaã jéma nidexa nachiga ga Tupanaãrü ore ga ümatüxü̃.
3 Rü meãma namaã inananguxü̃xẽẽ ga jema ore, rü namaã nüxü̃ nixu ga tü̱xcüü̃ ngúxü̃ na jangexü̃ ga Cristu rü tü̱xcüü̃ wena na namaxü̃xü̃. Rü nhanagürü: —Rü jima Cristu rü Ngechuchu nixĩ, rü nachiga nixĩ i pemaã nüxü̃ chixuxü̃ —nhanagürü ga Pauru.
4 Rü nhuxre ga jéma jexmagüxü̃ ga Judéugü rü najaxõgü, rü Pauru rü Chiratanügu naxãgü. Rü jexgumarüü̃ ta Ngechuchuaxü̃́ najaxõgü ga muxü̃ma ga Gregugü ga noxri Judéugürüü̃ jaxõgüxü̃. Rü muxü̃ma ga ngexü̃gü ga dĩẽruã̱xgüxü̃ rü ta najaxõgü.
5 Rü jemaca̱x ga jema Judéugü ga tama jaxõgüxü̃, rü nanuẽ rü nixãũxãchigü jerü muxü̃ma ga duü̃xü̃gü nüxü̃́ najaxõgü ga Pauru rü Chiraarü ore. Rü norü numaã nanaxĩtaque̱xexẽẽ ga nhuxre ga jatügü ga chixexü̃gü ga taxuwama mexü̃. Rü jemaxü̃ namugü na nanuẽxẽẽãxü̃ ga jema ĩãnecü̱̃ã̱x ga duü̃xü̃gü. Rü Jachã́ũpatawa nabuxmü ga jema chixexü̃ ga duü̃xü̃gü na Pauru rü Chiraca̱x nadaugüxü̃ca̱x, jerü jema muxü̃ma ga duü̃xü̃güpe̱xewa nanagagüchaü̃.
6 Notürü jexguma tama jexma nüxü̃ jangaugügu, rü Jachã́ũxü̃ nijauxgü, rü nhuxre ga jaxõgüxü̃xü̃ rü ta ínajauxü̃. Rü najagauxü̃tanü, rü guma ĩãneãrü ãẽ̱xgacügüpe̱xewa nanagagü. Rü tagaãcü nhanagürügü: —Ngẽma Pauru rü Chira i guxü̃ i naãnewa duü̃xü̃güxü̃ chixexẽẽgüxü̃, rü núma rü ta nangugü.
7 —Rü Jachã́ũ nixĩ ga najaxuxü̃ ga napatawa. Rü guxü̃ma i nümagü i ngẽma jatügü rü tama naga naxĩnüẽchaü̃ i tórü ãẽ̱xgacü ja Romacü̱̃ã̱xãrü mugü, erü nüxü̃ nixugüe rü nangẽxma i to i ãẽ̱xgacü i Ngechuchu —nhanagürügü ga jema chixexü̃ ga duü̃xü̃gü.
8 Rü jexguma nüxü̃ naxĩnüẽgu ga jema oregü, rü poraãcü nanuẽ ga jema muxü̃ma ga duü̃xü̃gü rü jema ĩãneãrü ãẽ̱xgacügü ta.
9 Notürü ga Jachã́ũ rü namücügü rü dĩẽrumaã nügü naxütanügü, rü jemaca̱x najange̱xgü.
Pauru rü Chira rü Beréawa najexmagü
10 Rü jematama ga chütaxü̃gu rü jema jaxõgüxü̃ ga Techarónicacü̱̃ã̱x rü ĩãne ga Beréawa nanamugü ga Pauru rü Chira. Rü jexguma jéma nangugügu, rü Judéugüarü ngutaque̱xepataü̃wa naxĩ.
11 Rü jema Judéugü ga Beréacü̱̃ã̱x, rü jema togü ga Judéugü ga Techarónicawa jexmagüxü̃ãrü jexera narümemaẽgü. Rü norü ngúchaü̃maã meãma nanajauxgü ga jema ore. Rü guxü̃ ga ngunexü̃gu rü Tupanaãrü ore ga ümatüxü̃wa nangúe na meã nüxü̃ nacua̱xgüxü̃ca̱x ngoxi aixcuma jiĩxü̃ ga jema ore ga Pauru rü Chira namaã nüxü̃ ixuxü̃.
12 Rü muxü̃ma ga jema Beréacü̱̃ã̱x ga Judéugü rü Ngechuchuaxü̃́ najaxõgü. Rü jexgumarüü̃ ta ga muxü̃ma ga Gregugü ga Jatüxü̃gü rü ngexü̃gü ga ãẽ̱xgacügü nama̱x ixĩgüxü̃, rü najaxõgü.
13 Notürü jexguma jema Judéugü ga Techarónicacü̱̃ã̱x nüxü̃ cuáchigagügu ga na Beréawa rü ta nüxü̃ na jaxuxü̃ ga Tupanaãrü ore ga Pauru, rü jéma naxĩ, rü nananuẽxẽẽ ga jema ĩãnecü̱̃ã̱x ga duü̃xü̃gü na Paurumaã chixri nachopetüxü̃ca̱x.
14 Notürü jexguma jemaxü̃ nacuáchigagügu ga jema jaxõgüxü̃, rü paxama Pauruxü̃ ínaxũxũxẽẽgü ga guma ĩãnewa. Rü nhuxre ga jema jaxõgüxü̃ rü Pauruxü̃ ínixümücügü. Rü dauxchitagu naxĩ rü nhu̱xmata taxtüpechinüwa nangugü. Notürü ga Chira rü Timúteu rü Beréagu narüchooma.
15 Rü jema duü̃xü̃gü ga Pauruxü̃ íixümücügüxü̃, rü wapurugu ínajaxümücügü nhu̱xmata ĩãne ga Atenawa nangugü, rü nhu̱xmachi Beréaca̱x nawoegu. Rü Pauru rü jema duü̃xü̃güxü̃ jéma namuga na paxa naxü̃tawa naxĩxü̃ca̱x ga Chira rü Timúteu.
Atenawa najexma ga Pauru
16 Rü jexguma Pauru rü Atenawa Chira rü Timúteuxü̃ naṉg̱uxẽẽgu, rü tama nataãẽcüraxü̃ jerü nüxü̃ nadau ga guma ĩãnewa ga na poraãcü naxchicüna̱xãmaãmare na natupanaã̱xgüxü̃.
17 Rü jemaca̱x ga Pauru rü Judéugüarü ngutaque̱xepataü̃wa namaã niporagacüü ga jema Judéugü rü jema togü ga tama Judéugü ixĩgüxü̃ ga Tupanaxü̃ icua̱xüü̃güxü̃. Rü guxü̃ ga ngunexü̃gu ga ĩãneãrü ngãxü̃wa üxü̃ ga ũãnechicawa rü ta namaã niporagacüü ga jema jéma ngutaque̱xegüxü̃.
18 Rü najexmagü ta ga nhuxre ga jatügü ga Epicúriugüarü ngu̱xẽẽtaewa ngúexü̃, rü togü ga Estóicugüarü ngu̱xẽẽtaewa ngúexü̃. Rü nümagü rü inanaxügüe ga Paurumaã na japoragatanücüüxü̃. Rü nhuxre ga nümagü rü nhanagürügü: —¿Rü ṯacü nixĩ i nüxü̃ jaxuxü̃ i nhaã jatü i idexaechamarexü̃? —nhanagürügü. Rü togü nanangãxü̃gü, rü nhanagürügü: —Maneca wüxi i to i nachiü̃ãnecü̱̃ã̱xãrü tupanagüarü orearü uruü̃ nixĩ —nhanagürügü. Rü jemaãcü nidexagü ga jema duü̃xü̃gü, jerü Pauru rü nüxü̃ nixu ga ore ga mexü̃ ga Ngechuchuchiga ga nuxãcü wena na namaxü̃xü̃.
19 Rü düxwa norü ãẽ̱xgacügüarü ngutaque̱xechica ga Areópagu ãẽ́gaxü̃wa nanagagü. Rü jéma nüxna nacagü, rü nhanagürügü nüxü̃: —Toma nüxü̃ tacuáxchaü̃ na ṯacü rü ngu̱xẽẽtae i ngexwacaxü̃xü̃ jiĩxü̃ i ngẽma namaã cungu̱xẽẽtaexü̃.
20 Erü toxca̱x rü wüxi i taguma nüxü̃ taxĩnüẽxü̃ nixĩ i ngẽma ore, rü nüxü̃ tacuáxchaü̃ na ṯacüchiga jiĩxü̃ i ngẽma nüxü̃ cuixuxü̃ —nhanagürügü.
21 Rü jemaãcü nidexagü, jerü guxü̃ma ga Atenacü̱̃ã̱xgü rü jema to ga nachiü̃ãnecü̱̃ã̱xgü ga jexma ãchiü̃güxü̃, rü woetama jexicagu narüxĩnüẽ ga na nüxü̃ jaxuxü̃ca̱x rü nüxü̃ naxĩnüẽxü̃ca̱x ga jexwacaxü̃xü̃ ga oregü.
22 Rü jemaca̱x ga Pauru rü inachi norü ngãxü̃tanüwa ga jema duü̃xü̃gü ga jema Areópaguwa ngutaque̱xegüxü̃, rü nhanagürü: —Pa Atenacü̱̃ã̱xgüx, nüxü̃ chadau na poraãcü perü tupanagügu perüxĩnüẽxü̃.
23 —Erü ngẽxguma perü ngutaque̱xechicagüwa chixüpetüchigügu, rü nüxü̃ chadau i naxchicüna̱xãgü i nüxü̃ peicua̱xüü̃güxü̃. Rü wüxi i nachicawa namaã chajarüxũ i wüxi i jumuxẽchica, rü ngẽxma naxümatü i naẽ́ga i nhaxü̃: “Tupana ja tama nüxü̃ icuácü”, nhaxü̃. Rü jima Tupana ja tama nüxü̃ pecuáãcüma nüxü̃ peicua̱xüü̃gücü nixĩ ja chama pemaã nüxü̃ chixuchigacü.
24 —Rü guma Tupana ga naxücü ga guxü̃ma ga naãnegü rü guxü̃ma i nawa ngẽxmaxü̃, rü nüma nixĩ i norü jora jiĩxü̃ i dauxü̃guxü̃ i naãne rü nhama i naãne. Rü ngẽmaca̱x nüma rü tama duü̃xü̃gü üxü̃ne ja tupaucagügu naxãchiü̃.
25 —Rü nümatama ja Tupana rü taxuü̃ca̱xma nanaxwa̱xe i duü̃xü̃güarü ngü̃xẽẽ na namaxü̃xü̃ca̱x i nümax, erü taxuü̃ma nüxü̃́ nataxu. Rü nümatama guxãna nanaxã i maxü̃, rü tüxna nanaxã ja buanecü ja namaã ingü̃ãtanücüücü. Rü nümatama tüxna nanaxã i guxü̃ma.
26 —Nüma rü wüxi ga duü̃xü̃watama nanaxü ga guxü̃ma ga duü̃xü̃gü na guxü̃ i naãnewa nangẽxmagüxü̃ca̱x. Rü nüma inaxuneta i nhuxgu tá na nabuxü̃ i duü̃xü̃gü rü ngexta tá naxãchiü̃xü̃ i wüxichigü.
27 17:27-28 —Rü jemaãcü nanaxü na naxca̱x nadaugüxü̃ca̱x ga duü̃xü̃gü rü nhama ẽãnexü̃wa ṯacüca̱x idaugüxü̃rüü̃ nüxü̃ ijangaugüxü̃ca̱x. Notürü nüma ja Tupana rü woetama guxü̃guma tüxna nangaicamachire̱x, erü nagagu nixĩ i imaxẽxü̃ rü ixĩã̱xtanücüüxü̃ rü ingẽxmaxü̃, ngẽxgumarüü̃ i nhuxre i perü poperaarü ümatüxü̃gü naxümatüxü̃rüü̃, rü nhanagürügü:“Rü Tupanaxãcü tixĩgü”, nhanagürügü.
28 Nüü̃ nadau 17:27
29 —Rü nhu̱xma na Tupanaxãcügü ixĩgüxü̃, rü tama name i nagu tarüxĩnüẽ rü Tupana rü wüxi i naxchicüna̱xã i uirumüwa rü e̱xna dĩẽrumüwa rü e̱xna nutawa ixüxü̃rüü̃ nixĩ. Erü guxü̃ma i ngẽma naxchicüna̱xãgü rü nümatama i duü̃xü̃gü nagu naxĩnüẽxü̃ãcüma nanaxügü.
30 —Rü nuxcüma ga duü̃xü̃gü rü naẽchitamare ínatüe, notürü nüma ga Tupana rü namaã jaxna naxĩnü. Notürü i nhu̱xma ja Tupana rü nanamu i duü̃xü̃gü i guxü̃wama na naxca̱x nadaugüxü̃ rü nüxü̃ naxoexü̃ i nacüma i chixexü̃gü.
31 Jerü nüma ga Tupana rü marü nüxü̃ naxuneta i wüxi i ngunexü̃ i nagu tá aixcuma guxü̃ i nhama i naãnecü̱̃ã̱x i duü̃xü̃güna nac̱axü̃ i norü maxü̃chiga. Rü marü nüxü̃ naxuneta ja wüxi ja jatü ja Ngechuchu, rü jima tá nixĩ ja duü̃xü̃güna c̱acü. Rü Tupana rü guxãxü̃ma nüxü̃ nacua̱xẽẽ ga jema ga jexguma Ngechuchuxü̃ wena namaxẽẽgu —nhanagürü ga Pauru.
32 Rü jexguma jema wena na namaxẽxü̃chigaxü̃ naxĩnüẽgu ga duü̃xü̃gü, rü nhuxre ga nümagü rü Pauruxü̃ nacugüe. Notürü ga togü rü nhanagürügü: —Rü wenagu táxarü cuxü̃́ itarüxĩnüẽ i ngẽmachiga —nhanagürügü.
33 Rü jexguma ga Pauru rü ínaxũxũ ga natanüwa.
34 Notürü nhuxre ga duü̃xü̃gü rü Pauruwe narüxĩ, rü Ngechuchuaxü̃́ najaxõgü. Rü natanüwa najexma ga Diuníchiu ga wüxi ga Areópagutanüxü̃, rü wüxi ga ngecü ga Dámari ga ngĩẽ́ga. Rü nhuxre ga togü rü ta najaxõgü.
