Puracügü 18:1-28
18 Rü jemawena rü inaxũãchi ga Pauru ga Atenawa, rü ĩãne ga Corĩ́tiuwa naxũ.
2 Rü jéma namaã inajarüxũ ga wüxi ga jatü ga Aquiru ga Põtuanecü̱̃ã̱x ga jexwacax Romawa ga Itáriaanewa ne ũxü̃ nama̱x ga Prichiramaãx. Rü jéma Corĩ́tiuwa najexma jerü Romacü̱̃ã̱xgüarü ãẽ̱xgacü ga Cráudiu nanamu ga na ínachoxü̃xü̃ca̱x ga guxü̃ma ga Judéugü ga Romawa. Rü Pauru rü naxü̃tagu nanaxũãne.
3 Rü jexma nape rü naxchirunaxca̱x ga düxenüãrü üwa nügümaã napuracüe jerü woetama jema nixĩ ga norü puracü ga Pauru rü Aquiru rü Prichira.
4 Rü guxü̃ ga ngü̃xchigaarü ngunexü̃gu rü Judéugüarü ngutaque̱xepataü̃wa naxũũxü̃ ga Pauru, rü duü̃xü̃gümaã nidexaxü̃, rü najaxucu̱xẽgüxü̃. Rü jexgumarüü̃ ta najaxucu̱xẽgüxü̃ ga jema duü̃xü̃gü ga tama Judéugü ixĩgüxü̃.
5 Rü jixcamaxü̃ra ínangugü ga Chira rü Timúteu ga Machedóniãwa ne ĩxü̃. Rü jexguma inanaxügü ga Pauru ga aixcuma poraãcü nüxü̃ na jaxuxü̃ ga Tupanaãrü ore. Rü meãma Judéugüxü̃ nangúexẽẽ na Ngechuchu rü Tupana Nane ja Cristu na jiĩxü̃.
6 Notürü nümagü ga jema Judéugü rü inanaxügüe ga Paurumaã na nanuẽxü̃, rü namaã naguxchigagüxü̃. Rü jexguma inapamüchiru ga Pauru, jerü jema nixĩ ga wüxi ga cua̱xruü̃ naxca̱x ga jema duü̃xü̃gü na jemawa nüxü̃ jacua̱xãchitanüxü̃ca̱x ga norü chixexü̃. Rü nhanagürü nüxü̃: —Pegagu tátama nixĩ i na ipejarütauxexü̃, rü marü tama chaugagu tá nixĩ. Rü nhamaü̃cüü i chama rü tá ngẽma tama Judéugü ixĩgüxü̃tanüwa chaxũ —nhanagürü ga Pauru.
7 Rü ínaxũxũ ga guma ngutaque̱xepataü̃wa. Rü jéma najexma ga wüxi ga jatü ga Tíchiu ga Juchugu ãẽ́gaxü̃. Rü nüma rü Tupanaxü̃ nangechaü̃ rü jexma ngutaque̱xepataü̃cüwagu naxãpata. Rü jemaxü̃tawa naxũ ga Pauru, rü jexma nape.
8 Rü Crispu ga ngutaque̱xepataü̃ãrü ãẽ̱xgacü rü nama̱x rü guxü̃ma ga naxãcügü rü Cori ja Ngechuchuaxü̃́ najaxõgü. Rü jexgumarüü̃ ta rü muxü̃ma ga Corĩ́tiucü̱̃ã̱xgü rü najaxõgü ga jexguma nüxü̃ naxĩnüẽgu ga jema ore, rü nhu̱xmachi Pauru ínanabaiü̃xẽẽ.
9 Rü wüxi ga chütaxü̃ rü nango̱xetü ga Pauru. Rü Cori ja Tupana namaã nidexa, rü nhanagürü: —¡Rü tãṹ i cumuü̃xü̃! ¡Rü nüxü̃ ixuama i chorü ore! ¡Rü tãṹ i curüchianexü̃!
10 —Erü chama rü chacuxü̃tagu, rü taxúetáma chixexü̃ cumaã taxü. Erü daa ĩãnewa rü choxü̃́ nangẽxma i muxü̃ma i chorü duü̃xü̃gü —nhanagürü ga Tupana.
11 Rü wüxi ga taunecüarü ngãxü̃ Corĩ́tiuwa najexma ga Pauru. Rü jéma jema duü̃xü̃gütanüwa namaã nangúexẽẽtae ga Tupanaãrü ore.
12 Notürü jexguma Acajaaneãrü ãẽ̱xgacü jixĩgu ga Gáriu, rü jema Judéugü rü wüxigu Pauruxü̃ nijauxgü, rü ãẽ̱xgacüpe̱xewa nanagagü.
13 Rü nhanagürügü nüxü̃ ga guma ãẽ̱xgacü: —Nhaã jatü rü duü̃xü̃güxü̃ naxucu̱xẽ na Tupanaxü̃ jacua̱xüü̃güxü̃ca̱x rü tama naga na naxĩnüẽxü̃ca̱x i tachiü̃ãneãrü mugü —nhanagürügü.
14 Rü Pauru marü nachonagüchaü̃, notürü nüma ga ãẽ̱xgacü ga Gáriu rü jema Judéugüxü̃ nangãxü̃, rü nhanagürü: —Rü ngẽxguma chi wüxi i taxü̃ i chixexü̃ naxü̱xgu, rü e̱xna namáẽtagu, rü ngẽxguma chi nixĩ i chama i pexü̃́ ichaxĩnüxü̃, Pa Judéugüx.
15 —Notürü ngẽma pecümachiga rü perü mugüchiga rü perü ngu̱xẽẽtaechiga na jiĩxü̃, rü chama rü tama nüxü̃ chacuáxchaü̃ i ngẽma. ¡Rü pematama penamexẽẽ̱x! Rü chama rü tama ngẽmachigaarü ãẽ̱xgacü chixĩxchaü̃ —nhanagürü.
16 Rü jexguma ínanawoxü̃ ga jéma.
17 Rü jexguma guxü̃ma ga jema duü̃xü̃gü rü Judéugüarü ngutaque̱xepataü̃ãrü ãẽ̱xgacü ga Chótenegu ãẽ́gaxü̃xü̃ jexma nijauxgü. Rü jexmatama ãẽ̱xgacü ga Gáriupe̱xegu nanac̱uaixgü. Notürü nüma ga Gáriu rü taxu nhanagürüama.
Pauru rü Ãtioquíaca̱x nataegu, rü nhu̱xmachi wenaxãrü inaxũãchi na norü tamaẽ̱xpü̱xcüna to ga nachiü̃ãnegüwa nangeaxü̃ ga Tupanaãrü ore
18 Rü jemawena rü muxü̃ma ga ngunexü̃ jéma Corĩ́tiuwa najexma ga Pauru. Rü jixcama nüxü̃ narümoxẽ ga jema jaxõgüxü̃ rü nüxna inaxũãchi. Rü ĩãne ga Chẽcréawa naxũ namaã ga Prichira rü Aquiru. Rü Chẽcréawa nügü nidüpü̱xüeru ga Pauru jerü marü najanguxẽẽ ga wüxi ga uneta ga Tupanamaã nüxü̃ jaxuxü̃. [Rü woetama jema nixĩ ga nacümagü ga Judéugü ga jexguma janguxẽẽgüã̱xgu ga wüxi ga uneta ga Tupanamaã nüxü̃ jaxuxü̃.] Rü nhu̱xmachi Chẽcréaarü türewa rü wüxi ga wapurugu nichoü̃ na Síriaanewa naxĩxü̃ca̱x.
19 Rü jexguma Epéchiuwa nangugügu, rü Pauru nüxna nixũgachi ga Prichira rü Aquiru, rü Judéugüarü ngutaque̱xepataü̃wa naxũ. Rü jéma namaã nidexa ga jema Judéugü ga guma ngutaque̱xepataü̃wa ngutaque̱xegüxü̃xü̃.
20 Rü jema Judéugü, rü muxü̃ma ga ngunexü̃gü nüxü̃ naca̱a̱xü̃gü ga jexma na naxã́ũxü̃ca̱x, notürü ga nüma rü tama nanaxwa̱xe.
21 Rü jemaca̱x nüxü̃ narümoxẽãma, rü nhanagürü nüxü̃: —Rü ngẽxguma Tupana naxwa̱xegu, rü wena táxarü pexca̱x chataegu —nhanagürü. Rü jemawena rü Epéchiuarü türewa najarüxüe, rü inaxũãchi.
22 Rü Checharéaarü türewa nangu, rü jéma ínaxüe. Rü nhu̱xmachi Jerucharéü̃wa naxũ na nüxü̃ janamoxẽxü̃ca̱x ga guxü̃ma ga jema jaxõgüxü̃. Rü nhu̱xmachi Ãtioquíawa naxũ.
23 Rü jexguma marü nhuxre ga ngunexü̃ jéma Ãtioquíawa najexmagu, rü wenaxãrü inaxũãchi ga Pauru na wüxichigü ga ĩãne ga Gárataanewa rü Fríjiaanewa jexmagünewa íjadauxü̃ca̱x rü jataãẽxẽẽgüãxü̃ca̱x ga guxü̃ma ga jema jaxõgüxü̃ ga guma ĩãnegüwa jexmagüxü̃.
Aporu rü Epéchiuwa nüxü̃ nixu ga Tupanaãrü ore
24 Rü jexgumaü̃cüü rü Epéchiuwa nangu ga wüxi ga Judéu ga Aporugu ãẽ́gaxü̃. Rü nüma rü ĩãne ga Arejã́driacü̱̃ã̱x nixĩ, rü nüxü̃́ natauxcha ga duü̃xü̃güpe̱xewa na jadexaxü̃. Rü meãma nüxü̃ nacua̱x ga Tupanaãrü ore i ümatüxü̃.
25 Rü nüma meã nüxü̃ nacua̱x ga Juã́ũ ga baiü̃xẽẽruü̃ãrü ngu̱xẽẽtae ga Cori ga Ngechuchuchiga, rü nüxü̃ nacua̱x na nhuxãcü Juã́ũ duü̃xü̃güxü̃ íbaiü̃xẽẽxü̃. Notürü jexicaxü̃tama nacua̱x ga Ngechuchuchiga. Notürü poraãcü nataãẽãcüma nidexa rü aixcuma nanangúexẽẽ ga duü̃xü̃gü.
26 Rü nüma ga Aporu rü tama namuü̃ãcüma inanaxügü ga na jadexaxü̃ ga Judéugüarü ngutaque̱xepataü̃wa. Notürü jexguma Aporuxü̃ naxĩnüẽgu ga Prichira rü Aquiru, rü napatawa nanagagü na jexeraãcü namaã inanguxü̃xẽẽãxü̃ca̱x ga Ngechuchuchiga.
27 Rü jexguma Acajaanewa naxũxchaü̃gu ga Aporu, rü jema jaxõgüxü̃ ga Epéchiucü̱̃ã̱x nüxü̃ narüngü̃xẽẽgü. Rü popera jéma namugü naxca̱x ga jema jaxõgüxü̃ ga Acajacü̱̃ã̱x na meã Aporuxü̃ najauxgüxü̃ca̱x. Rü jexguma Acajawa nanguxgu ga Aporu rü poraãcü nüxü̃ narüngü̃xẽẽ ga jema duü̃xü̃gü ga Tupanaãrü ngechaü̃gagu Ngechuchuaxü̃́ jaxõgüxü̃.
28 Rü guxü̃ ga duü̃xü̃güpe̱xewa nüxü̃ nüxü̃ nacua̱xẽẽ ga poraãcü na ínatüexü̃ ga jema Judéugü ga tama Ngechuchuxü̃ cuáxchaü̃güxü̃. Rü nümagü ga Judéugü rü taxucürüwama nhuxũ nhanagürügü, jerü ga Aporu rü Tupanaãrü ore ga ümatüxü̃wa meãma nüxü̃ nanawe̱x ga na Ngechuchu rü aixcuma Tupana Nane ja Cristu na jiĩxü̃.
