Puracügü 19:1-41
19 Rü jexguma Corĩ́tiuwa najexmajane ga Aporu, rü Pauru rü naxpü̱xanegu idaxü̃ ga namawa nixüpetü, rü Epéchiuwa nangu. Rü jexma nüxü̃ najangau ga nhuxre ga jaxõgüxü̃.
2 Rü nüxna naca, rü nhanagürü nüxü̃: —¿Marü penajaxuxü̃ i Tupanaãẽ i Üünexü̃ ga jexguma pejaxõgügu? —nhanagürü. Rü nümagü nanangãxü̃, rü nhanagürügü: —Tama. Taguma nüxü̃ taxĩnüẽchiga na ṯacü jiĩxü̃ i Tupanaãẽ i Üünexü̃ —nhanagürügü.
3 Rü jexguma ga Pauru rü nüxna naca rü nhanagürü nüxü̃: —¿Texéaxü̃́ pejaxõgüxü̃ ga jexguma ípebaiü̃gu? —nhanagürü. Rü nümagü nanangãxü̃, rü nhanagürügü: —Toma nüxü̃́ tajaxõ ga jema Juã́ũ ga baiü̃xẽẽruü̃ãrü ngu̱xẽẽtae —nhanagürügü.
4 Rü jexguma ga Pauru rü nhanagürü nüxü̃: —Juã́ũ ínanabaiü̃xẽẽ ga jema duü̃xü̃gü ga nüxü̃ rüxoexü̃ ga nacüma ga chixexü̃ rü Tupanaca̱x daugüxü̃. Notürü jema duü̃xü̃gümaã nüxü̃ nixu ta na nüxü̃́ jaxõgüãxü̃ca̱x ga Ngechuchu ga naweama ãcü —nhanagürü ga Pauru.
5 Rü jexguma jemaxü̃ naxĩnüẽgu ga jema duü̃xü̃gü rü ínabaiü̃ naẽ́gagu ga Cori ja Ngechuchu.
6 Rü jexguma Pauru rü jema jaxõgüxü̃ẽ́tügu naxüme̱xgu, rü nüxna nangu ga Tupanaãẽ i Üünexü̃, rü to ga nagawachigü nidexagü, rü nüxü̃ nixugüe ga Tupanaãrü ore.
7 Rü maneca 12 ga jatü nixĩgü ga jema duü̃xü̃gü.
8 Rü tamaẽ̱xpü̱x ga tawemacü jéma najexma ga Pauru. Rü Judéugüarü ngutaque̱xepataü̃wa naxũũxü̃ rü tama namuü̃ãcüma nüxü̃ nixuuxü̃ ga Tupanaãrü ore. Rü nanangúexẽẽ na nhuxãcü ãẽ̱xgacü na jiĩxü̃ ja Tupana, rü nüxü̃́ nanangúchaü̃xẽẽ na Ngechuchuaxü̃́ jaxõgüãxü̃ca̱x.
9 Notürü najexma ga nhuxre ga duü̃xü̃gü ga tama nüxü̃ cua̱xgüchaü̃xü̃ rü tama jaxõgüchaü̃xü̃. Rü nümagü inanaxügüe ga na jema muxü̃ma ga duü̃xü̃güpe̱xewa chixexü̃ jaxugüexü̃ nachigagu ga Cori ga Ngechuchu. Rü jemaca̱x nüxna nixũgachi ga Pauru, rü toxnamana nanagagü ga jema jaxõgüxü̃. Rü guxü̃ ga ngunexü̃gu namaã nüxü̃ nixuchiga ga ore nawa ga wüxi ga ngutaque̱xepataü̃ ga Tiranuãrü ngúepataü̃ ga naẽ́ga.
10 Rü jemaãcü nanaxü ga taxre ga taunecü, rü jemaãcü guxü̃ma ga Áchiaanecü̱̃ã̱xgü ga Judéugü rü Gregugü rü nüxü̃ naxĩnüẽ ga Cori ja Tupanaãrü ore.
11 Rü Tupana Pauruxü̃ narüngü̃xẽẽ ga na naxüãxü̃ ga taxü̃gü ga mexü̃gü ga Tupanaãrü poramaã naxüxü̃.
12 Rü a̱i̱xrüxü̃ ga norü dechugü ga Pauru rü naxchirugü rü duü̃xü̃gü rü jema iḏaaweexü̃xü̃tawa nanangegü. Rü jexguma jema iḏaaweexü̃ nüxü̃ ingõgügügu ga jema naxchiru rü e̱xna dechu, rü naxca̱x nitaanegü. Rü jema duü̃xü̃gü ga ṉg̱oxoã̱xgüxü̃ rü ta naxca̱x nitaanegü.
13 Notürü najexma ga nhuxre ga Judéugü ga ĩãnegüwachigü ixĩẽtanüxü̃ rü ṉg̱oxogüarü woxü̃wa puracüexü̃. Rü nüxü̃ naxügü na Cori ja Ngechuchuégagu na ínawoxü̃ãxü̃ ga ṉg̱oxogü nawa ga jema duü̃xü̃gü ga ṉg̱oxoã̱xgüxü̃. Rü nhanagürügü: —Ngechuchu ja Pauru nüxü̃ ixuchigacüégagu pexü̃ tamu na ípechoxü̃xü̃ca̱x —nhanagürügü ga jema Judéugü.
14 Rü jema 7 ga jema ügüxü̃, rü wüxi ga Judéugüarü paigüarü ãẽ̱xgacü ga Chewagu ãẽ́gaxü̃ nanegü nixĩgü.
15 Notürü wüxi ga ngunexü̃gu ga jexguma wüxi ga ṉg̱oxoxü̃ ínata̱xüchigüchaü̃gu, rü jema ṉg̱oxo nanangãxü̃, rü nhanagürü: —Nüxü̃ chacua̱x ja Ngechuchu, rü nüxü̃ chacua̱x ja Pauru na texé jiĩxü̃. ¿Notürü i pema rü texégü peixĩgü? —nhanagürü.
16 Rü jexguma ga jema jatü ga ṉg̱oxoã́xü̃ rü jema duü̃xü̃gü ga ínata̱xüchigüchaü̃xü̃na najuxu, rü nüxü̃ narüporamaẽ ga guxü̃ma, rü ínanagáuü̃xü̃ne. Rü jemaãcü ngexchiruxü̃ma rü napíexü̃ma nibuxmü ga guma ĩwa.
17 Rü guxü̃ma ga Judéugü rü Gregugü ga Epéchiuwa jexmagüxü̃ rü nüxü̃ nacuáchiga ga jema. Rü poraãcü namuü̃ẽ ga guxü̃ma. Rü jemaãcü jexeraãcü natachiga ga Cori ga Ngechuchu ga jéma.
18 Rü muxü̃ma ga jema jaxõgüxü̃ rü jéma ningugüetanü, rü guxü̃ ga duü̃xü̃güpe̱xewa nüxü̃ nixugüechigü ga nüma rü ta na najuüechiréxü̃, notürü tá nüxü̃ na naxoexü̃ ga jema.
19 Rü muxü̃ma ga jema ijuüechiréxü̃, rü jéma nanana ga norü poperagü ga juüpane ga nawa nangúexü̃, rü guxãpe̱xewa ínanagu. Rü jexguma nangugügüãgu ga natanü ga jema poperagü, rü maneca 50,000 tachinü ga dĩẽru ga tatanüxü̃wa nangu.
20 Rü jemaãcü ga Cori ja Tupanaãrü ore, rü jexeraãcü nixũchigü, rü jexeraãcü duü̃xü̃gü nüxü̃ nadau na nhuxãcü naporaxü̃ ga jema ore.
21 Rü jemawena ga Pauru, rü nagu narüxĩnü ga Machedóniããnewa rü Acajaanewaxíra na naxũxü̃, rü jéma nhu̱xmachi Jerucharéü̃wa na naxũxü̃. Jerü jema nhanagürü: —Rü ngẽ́ma Jerucharéü̃wa tá chaxũ, rü jixcama rü Romawa rü tá ta chaxũ —nhanagürü.
22 Rü jemaca̱x nügüpe̱xegu Machedóniããnewa nanamugü ga taxre ga norü ngü̃xẽẽruü̃ ga Timúteu rü Erastu. Notürü nüma ga Pauru rü nhuxre ga ngunexü̃ Áchiaanegu narüxã̱ũ̱x.
Nanuẽ ga duü̃xü̃gü ga Epéchiuwa
23 Rü jexgumaü̃cüü rü Epéchiuwa rü nanaxi̱xãchitanüãẽ ga duü̃xü̃gü, rü poraãcü nanuẽ nachigagu ga Cori ja Tupanaãrü ore.
24 Rü jemaãcü naxüpetü nagagu ga wüxi ga jatü ga dĩẽrumüwa puracüxü̃ ga Demétriugu ãẽ́gaxü̃. Rü nüma rü ínanaxüxü̃ ga norü tupana ga Diánaãrü tupaucachicüna̱xãgü ga dĩẽrumünaxca̱x. Rü najexma ga muxü̃ma ga norü puracütanüxü̃ ga jemawa puracüexü̃. Rü guxü̃ma poraãcü meã nüxü̃́ naxãtanü ga jema puracü.
25 Rü nüma ga Demétriu rü nanangutaque̱xexẽẽ ga guxü̃ma ga puracütanüxü̃ ga jemawa puracüexü̃, rü nhanagürü nüxü̃: —Pa Chamücügüx, meã nüxü̃ pecua̱xgü na nhaã tórü dĩẽrumüãrü puracügu na ngĩxü̃ ijaxuxü̃ i tórü dĩẽru.
26 Rü marü nüxü̃ pedaugü i ngẽma Pauru rü nüxü̃ pexĩnüẽ na nhuxãcü jaxucu̱xẽgüãxü̃ i duü̃xü̃gü, rü nhuxãcü namaã nüxü̃ jaxuxü̃ na tama aixcuma tupanagü jiĩxü̃ i ngẽma tupanagü i jixema ixügüxü̃. Rü ngẽmaãcü muxü̃ma i duü̃xü̃güxü̃ nüxü̃ narüxoexẽẽ na tama tórü tupanagüaxü̃́ jaxõgüãxü̃ca̱x. Rü tama núma Epéchiuwaxicatama ngẽxü̃ nawagü notürü wixguxü̃chi taa̱x guxü̃ i Áchiaanewa ngẽmaãcü chixri najaxucu̱xẽgü i duü̃xü̃gü.
27 Rü pema nüxü̃ pecua̱x rü tórü puracüca̱x rü naxãũcüma i ngẽma. Rü wüxi i chixexü̃ ta nixĩ i naxca̱x i tórü tupana i Diánaãrü tupauca ja taxü̃ne. Rü nhu̱xma rü muxü̃ma i duü̃xü̃gü rü ngĩxü̃ nangechaü̃ i Diána i guxü̃ i Áchiaanewa rü guxü̃ i naãnewa. Notürü ngẽma Pauruarü ucu̱xẽgagu rü düxwa tãũxü̃táma ngĩxü̃ nangechaü̃ i duü̃xü̃gü, rü ngẽmaãcü düxwa inaãrüxo tá ta i tórü puracü —nhanagürü ga Demétriu.
28 Rü jexguma jemaxü̃ naxĩnüẽgu, rü poraãcü nanuẽ, rü tagaãcü nhanagürügü: —¡Namaxü̃ i Epéchiucü̱̃ã̱xgüarü tupana i Diána! —nhanagürügü.
29 Rü guxü̃ma ga jema ĩãnecü̱̃ã̱xgü rü poraãcü jexma ínatüeãẽ. Rü ínanajauxü̃ ga Gaju rü Aristácu ga Machedóniããnecü̱̃ã̱xgü ga Paurumücügü, rü guma ĩ ga ĩãneãrü ngutaque̱xepataü̃wa nanagauxü̃tanü.
30 Rü Pauru rü ta jexma naxücuchaü̃ na jema duü̃xü̃gümaã jadexaxü̃ca̱x, notürü jema jaxõgüxü̃ nüxna nanachu̱xu ga jexma na naxücuxü̃.
31 Rü jema Áchiaaneãrü ãẽ̱xgacügütanüwa rü najexma ga nhuxre ga Paurumücügü ixĩgüxü̃. Rü nümagü rü ta Pauruxü̃tawa namugagü na tama jema ngutaque̱xechicagu naxücuxü̃ca̱x.
32 Rü joxni ga duü̃xü̃gü ga jema ínangutaque̱xegüxü̃wa, rü nümaxü̃ rü wüxi ga oremaã aita naxüe, rü togü ga to ga oremaã aita naxüe. Jerü poraãcü nanaxi̱xãchiãẽgü ga guxü̃ma ga jema duü̃xü̃gü ga jéma ngutaque̱xegüxü̃. Rü muxü̃ma rü tama nüxü̃ nacua̱xgü ga ṯacüca̱x na nangutaque̱xegüxü̃.
33 Notürü jéma najexma ga wüxi ga Judéu ga Arejã́dregu ãẽ́gaxü̃. Rü jema togü ga Judéugü rü namaã nüxü̃ nixu ga ṯacüca̱x na nangutaque̱xexü̃. Rü duü̃xü̃güpe̱xewa nanamugü na jadexaxü̃ca̱x rü naẽ́tüwa nachogüxü̃ca̱x ga jema Judéugü ga jéma jexmagüxü̃. Rü nüma ga Arejã́dre rü naxunagüme̱xẽ na ijanachianegüxü̃ca̱x ga duü̃xü̃gü, na namaã jadexaxü̃ca̱x.
34 Notürü jexguma nüxü̃ jacua̱xãchitanügu ga Arejã́dre rü Judéu na jiĩxü̃, rü guxü̃ma ga jema duü̃xü̃gü rü wüxigu tagaãcü aita naxüe. Rü taxre ga ngora ninge ga na tagaãcü nhagüxü̃: —¡Namaxü̃ i Epéchiucü̱̃ã̱xgüarü tupana i Diána! —nhagüxü̃.
35 Rü düxwa jema ĩãneãrü ãẽ̱xgacü nanachiãchixẽẽ ga jema muxü̃ma ga duü̃xü̃gü, rü nhanagürü nüxü̃: —Pa Epéchiucü̱̃ã̱xgüx, guxü̃ma i duü̃xü̃gü nüxü̃ nacua̱x na Diánaãrü tupauca ja taxü̃neãrü daruü̃ na ixĩgüxü̃. Rü guxü̃ma nüxü̃ nacua̱x na núma tüxü̃́ nangẽxmaxü̃ i Diánachicüna̱xã i dauxü̃wa rünguxü̃.
36 —Rü nhu̱xma na guxü̃ma nüxü̃ na cuáxü̃ na aixcuma jiĩxü̃ i ngẽma, rü name nixĩ na pechiãchixü̃, rü taxuü̃ma i chixexü̃ pexüexü̃.
37 —Erü nhaã jatügü i nuã pegagüxü̃, rü taxuü̃ma i chixexü̃ ngĩmaã naxügü i tórü tupana, rü tama chixexü̃ nixugüe ngĩchigagu.
38 —Rü ngẽxguma chi Demétriu rü ngẽma namücügü i namaã napuracüexü̃ rü nüxü̃́ nangẽxmagu i ṯacü i tama norü me ixĩxü̃, rü nangẽxma i ngutaque̱xechicagü i ngextá ãẽ̱xgacügü duü̃xü̃güxü̃ íicagüxü̃wa. Rü name nixĩ na ngẽ́ma ãẽ̱xgacügüpe̱xewa namexẽẽãxü̃ i ṯacü i tama norü me ixĩxü̃.
39 —Rü ngẽxguma nangẽxmagu i ṯacü i to i perü guxchaxü̃gü, rü name nixĩ i ĩãneãrü ãẽ̱xgacügüarü ngutaque̱xewa penamexẽẽ i ngẽma.
40 —Erü nhu̱xma rü taxãũcümaxü̃gugü rü ngürüãchi ãẽ̱xgacü ja tacü ja Romawa ngẽxmacü rü tüxna tá naxca̱x naca i ngẽma nhu̱xma ngupetüxü̃. Erü aixcuma taxumaãma tanangãxü̃ẽ́ga i ãẽ̱xgacü, ega tüxna nacaxgu naxca̱x i nhaã ngutaque̱xe i nawa pexãũgatanüxü̃ —nhanagürü.
41 Rü jexguma marü jema nhaxguwena, rü ínajamugü ga jema duü̃xü̃gü.
