Puracügü 2:1-47
2 Rü nawa nangu ga jema Judéugüarü peta ga Pẽtecóstegu ãẽ́gaxü̃. Rü jema ngunexü̃gu rü guxü̃ma ga jema jaxõgüxü̃ rü wüxi ga nachicawa nangutaque̱xegü.
2 Rü ngürüãchi dauxü̃wa ne naxũ ga wüxi ga naga nhama wüxi ja buanecü ja taxüchicü icuxcugurüü̃, rü guxü̃ne ga guma ĩ ga nawa najexmagünegu najaxũga.
3 Rü naxca̱x nango̱x ga nhuxre ga üxüema. Rü nügüna nixĩgüema ga jema üxüema, rü wüxichigü ga jema jaxõgüxü̃güétüwa ninguchigü.
4 Rü Tupanaãẽ i Üünexü̃ rü guxü̃nama nangu rü namaã inacua̱x. Rü jema Naãẽ i Üünexü̃ jadexagüxẽẽxü̃ãcüma inanaxügüe ga to ga nagawachigü na jadexagüxü̃.
5 Rü jema ngunexü̃gügu rü jema petaca̱x Jerucharéü̃wa najexmagü ga muxü̃ma ga toxnamana ne ĩxü̃ ga Judéugü ga Tupanaga ĩnüẽxü̃ ga guxü̃ ga togü ga nachiü̃ãnewa ne ĩxü̃.
6 Rü jexguma nüxü̃ naxĩnüẽgu ga nhuxãcü na jadexagüxü̃ ga jema jaxõgüxü̃, rü nangutaque̱xegü ga muxü̃ma ga jema duü̃xü̃gü ga toxnamana ne ĩxü̃. Rü naḇaixãchiãẽgü jerü jema jaxõgüxü̃ rü wüxichigü ga jema togü ga duü̃xü̃gügawachigü nidexagü.
7 Rü jema na poraãcü naḇaixãchiãẽgüxü̃ca̱x, rü nügümaã rü nhanagürügü: —¿Tama e̱xna Gariréaanecü̱̃ã̱x jixĩgüxü̃ i guxü̃ i nhaã duü̃xü̃gü i tagawa idexagüxü̃?
8 —¿Rü nhuxãcü e̱xna i nüxü̃ ixĩnüẽxü̃ i wüxichigü i jixema i taga i nawa ijaexü̃wa na jadexagüxü̃?
9 2:9-11 —Jixema tixĩgü i Pártiaanecü̱̃ã̱x, rü Médiaanecü̱̃ã̱x, rü Eráü̃ãnecü̱̃ã̱x, rü Mechopotámiããnecü̱̃ã̱x, rü Judéaanecü̱̃ã̱x, rü Capadóchiaanecü̱̃ã̱x, rü Põtuanecü̱̃ã̱x, rü Áchiaarü naãnecü̱̃ã̱x, rü Fríjiaanecü̱̃ã̱x, rü Pãfíriaanecü̱̃ã̱x, rü Ejituanecü̱̃ã̱x, rü Ríbiaarü naãnecü̱̃ã̱x i Chirenecü̱̃ã̱x. Rü tatanüwa nangẽxma ta i duü̃xü̃gü i Cretaanewa rü Arábiaarü naãnewa ne ĩxü̃. Rü nhuxre i jixema rü Romacü̱̃ã̱x i Judéugü tixĩgü. Rü nuã tatanüwa nangẽxma ta i Romacü̱̃ã̱x i tama Judéugü ixĩgüxü̃ notürü tacümagu ĩxü̃. Rü guxãma rü nüxü̃ taxĩnüẽ na wüxichigü i tagawachigü na jadexagüxü̃ i nhaã ngúexü̃gü. Rü tagawa tamaã nüxü̃ nixugüe i nhuxãcü na namexẽchixü̃ ja Tupana —nhanagürügü.
10 Nüü̃ nadau 2:9
11 Nüü̃ nadau 2:9
12 Rü guxü̃ma poraãcü naḇaixãchiãẽgü, rü tama nüxü̃ nacua̱xgü ga nhuxãcü na jiĩxü̃ ga jema. Rü nügüna nacagüe, rü nhanagürügü: —¿Ṯacüchiga nixĩ i guxü̃ma i nhaã? —nhanagürügü.
13 Notürü ga togü rü nüxü̃ nacugüecüraxü̃, rü nhanagürügü: —Nangãxẽmare rü ngẽmaca̱x nixĩ i ngẽmaãcü jadexagüxü̃ —nhanagürügü.
Pedruarü dexa
14 Rü jexguma inachi ga Pedru namaã ga jema 11 ga namücügü, rü tagaãcüma nhanagürü: —Pa Judéugü i nuxma Jerucharéü̃gu naxĩãnexü̃ rü Pa Nuãcü̱̃ã̱xgüx, ¡rü dücax, meã iperüxĩnüẽ i nhaã tá pemaã nüxü̃ chixuxü̃!
15 —Rü nhaã chamücügü rü tama nangãxẽ i pema nagu perüxĩnüẽxü̃rüü̃, erü pa̱xmamatama nixĩ rü ngexwacax 9 arü ngorawa nangu.
16 —Notürü nhaã nhu̱xma nüxü̃ pedauxü̃ nixĩ ga jema Tupanaãrü orearü uruü̃ ga Joé marü nüxü̃ ixuchigaxü̃ ga jexguma nhaxgux:
17 “Rü nhanagürü ja Tupana: ‘Ngẽma nawa ijacuáxü̃ i ngunexü̃gügu rü guxü̃ i duü̃xü̃gütanüwa tá chanamu i Chauãẽ i Üünexü̃, rü penegü rü pexacügü rü tá chauchigagu nidexagü. Rü chama rü tá chajango̱xetüxẽẽ i perü ngextü̱xüxü̃gü rü tá nüxü̃ nadaugü i ngẽma tá nüxü̃ chawéxü̃. Rü perü jaguã̱xgümaã tá chidexa i nanegüwa.
18 Rü chorü duü̃xü̃gütanüwa tá chanamu i Chauãẽ i Üünexü̃ i ngẽma ngunexü̃gügu, rü tá chauchigagu nidexagü.
19 Rü naãnetüwewa tá ichanawe̱x i mexü̃gü i taguma nüxü̃ idauxü̃. Rü nhama i naãnewa tá ichanawe̱x i cua̱xruü̃gü i nagü, rü üxüema, rü taemaxü̃.
20 Rü üa̱xcü rü tá nixoema rü tawemacü rü tá nagürüü̃ naduema naxü̃pa na wenaxãrü núma naxũxü̃ ja Cori. Rü ngẽma ngunexü̃ i nagu núma naxũxü̃, rü wüxi i ngunexü̃ i mexẽchixü̃ tá nixĩ.
21 Rü guxãma ja jíxema Corina c̱axe na tüxü̃ nangü̃xẽẽxü̃ca̱x, rü tá tamaxẽ’ ”,
nhanagürü ga jema orewa.
22 Rü nhanagürü ga Pedru: —Pa Duü̃xü̃gü Pa Judéugüx, ¡iperüxĩnüẽ i nhaã ore! Rü pema rü meãma nüxü̃ pecua̱x rü Ngechuchu ga Nacharétucü̱̃ã̱x rü guma nixĩ ga wüxi ga jatü ga Tupana pepe̱xewa nüxü̃ jaxucü na Nanexü̃chi jiĩxü̃. Rü jemaca̱x ga Tupana rü norü poramaã nüxü̃ nanaxüxẽẽ ga muxü̃ma ga mexü̃gü rü cua̱xruü̃gü ga noxri taguma nüxü̃ idauxü̃.
23 —Rü Tupana pexna nanamu ga guma Ngechuchu na pecaduca̱x najuxü̃ca̱x jerü jemaãcü nanaxüxchaü̃ ga Tupana, rü jemaãcü nagu narüxĩnü ga noxri taũta naxü̱xgux ga naãne. Rü pema penamu ga jatügü ga tama jaxõgüxü̃ na jajauxgüãxü̃ca̱x rü curuchawa na japotagüãxü̃ca̱x. Rü jemaãcü penajuxẽẽ.
24 —Rü woo najuchire̱x notürü tama jexma najacua̱x, jerü Tupana wena nanamaxẽẽ rü ínanadaxẽẽ. Rü jemaãcü ga jema ju rü taxuacüma marü nüxü̃ narüporamaẽẽcha.
25 —Jerü ga ãẽ̱xgacü ga Dawí rü Ngechuchuchigagu nidexa, rü nhanagürü:“Guxü̃guma nachauxü̃tagu ja Cori ja Tupana rü choxü̃ narüngü̃xẽẽ na taxuü̃ca̱xma chaxoegaãẽxü̃ca̱x.
26 Rü jemaca̱x marü chataãẽ rü taãẽxü̃ ga oremaã chidexa. Rü chama nüxü̃ chacua̱x na mexü̃ tá choxü̃ üpetüxü̃ i ngẽxguma chaju̱xgux.
27 Erü cuma tãũxü̃táma juexü̃chicawa choxü̃ cuta̱x, rü tãũxü̃táma cunaxwa̱xe na jajixixü̃ i chaxune i chama ja Cune ja Üünecü na chiĩxü̃.
28 Marü choxü̃ nüxü̃ cucua̱xẽẽ i nhuxãcü tá chanajaxu i maxü̃ i taguma gúxü̃, rü tá poraãcü choxü̃ cutaãẽxẽẽ, erü chamaã tá icurüxã̱ũ̱x”,
nhanagürü ga Dawí.
29 Rü nhanagürü ga Pedru: —Pa Chaueneẽgüx, rü aixcuma pemaã nüxü̃ chixu na najuxü̃ ga nuxcümaxü̃cü ga tórü ãẽ̱xgacü ga Dawí, rü marü inata̱x, rü nhu̱xma rü ta tatanüwa nangẽxma i naxmaxü̃.
30 —Notürü nüma ga Dawí rü wüxi ga Tupanaãrü orearü uruü̃ nixĩ. Rü jemaca̱x nüxü̃ nacua̱x rü wüxi ga nataa tá nixĩ i ãẽ̱xgacü ja Cristuxü̃ ingucuchicü, jerü ga Tupana rü jemaãcü namaã inaxuneta.
31 —Rü jemaca̱x nuxcümaxü̃chima ga Dawí rü nhama marü nüxü̃ nadauxuchixü̃rüü̃ nüxü̃ nixu rü Cristu rü tá juwa ínarüda rü tãũxü̃táma naxmaxü̃wa nangẽxmaẽcha rü tãũxü̃táma nijixi i naxü̃ne.
32 —Rü nhu̱xma ja Tupana rü marü wena nanamaxẽẽ ga guma Ngechuchu, rü guxãma ga toma rü nüxü̃ tadaugü na wena namaxü̃xü̃, rü ngẽmaca̱x pemaã nüxü̃ tixuchiga.
33 —Rü Tupana rü dauxü̃guxü̃ ga naãnewa nanaga na norü tügünecüwawa janatoxü̃ca̱x. Rü Tanatü ja Tupana rü marü nüxna nanamu ga Naãẽ i Üünexü̃ ga nuxcüma nüxü̃ jaxuxü̃ rü tá nuã na namuãxü̃. Rü nhu̱xma ja jima Ngechuchu rü núma totanüwa nanamu i ngẽma Naãẽ i Üünexü̃. Rü ngẽma Naãẽ nuã üxü̃ nixĩ i nhu̱xma nüxü̃ pedauxü̃ rü nüxü̃ pexĩnüẽxü̃.
34 2:34-35 —Rü taguma dauxü̃wa naxũ ga Dawí, notürü nümatama rü nhanagürü:“Tupana rü chorü Cori ja Cristumaã nüxü̃ nixu rü nhanagürü: ‘¡Rü chorü tügünecüwawa rüto nhu̱xmatáta cuxme̱xwa chanangẽxmagüxẽẽ i curü uwanügü!’ ”nhanagürü.
35 Nüü̃ nadau 2:34
36 Rü nhanagürü ga Pedru: —Name nixĩ i guxãma i pema i Judéugü na nüxü̃ pecua̱xgüxü̃ rü guma Ngechuchu ga curuchawa pejapotacü, rü Tupana rü marü perü Cori ja Cristuxü̃ najaxĩxẽẽ —nhanagürü ga Pedru.
37 Rü jexguma jemaxü̃ naxĩnüẽgu ga jema duü̃xü̃gü ga jéma jexmagüxü̃, rü poraãcü nanaxi̱xãchiãẽgü. Rü Pedruna nacagüe, rü jema togü ga Pedrumücügüna rü ta nacagüe, rü nhanagürügü: —¿Rü ṯacü tá taxüexü̃ i nhu̱xmax, Pa Toeneẽgüx? —nhanagürügü.
38 Rü Pedru nanangãxü̃, rü nhanagürü: —¡Nüxü̃ perüxoe i pecüma i chixexü̃ rü Tupanaca̱x pedaugüe rü Ngechuchuégagu ípebaiü̃ na pexü̃́ nüxü̃ nangechaü̃xü̃ca̱x i perü pecadugü ja Tupana! Rü Tupana tá pexna nanamu i Naãẽ i Üünexü̃.
39 —Rü nhaã Tupanaãrü uneta, rü pexca̱x nixĩ, rü pexacügüca̱x, rü guxü̃ i duü̃xü̃gü i jaxü̃wa ngẽxmagüxü̃ca̱x nixĩ. Erü guxü̃ i duü̃xü̃gü i tórü Cori ja Tupana nügüxü̃tawa naxca̱x c̱axü̃ca̱x nixĩ i ngẽma uneta —nhanagürü ga Pedru.
40 Rü jema oremaã rü muxü̃ma ga to ga oremaã najaxucu̱xẽgü ga Pedru, rü nhanagürü: —¡Nüxna peixĩgachi i ngẽma duü̃xü̃gü i chixexü̃ ügüxü̃ na pema rü ta tama chixexü̃ pexügüxü̃ca̱x! —nhanagürü.
41 Rü jema duü̃xü̃gü ga naga ĩnüẽxü̃ ga jema ore ga Pedru namaã nüxü̃ ixuxü̃, rü ínabaiü̃. Rü jema ngunexü̃gu rü poraãcü najexera ga na jamuxü̃ ga jema jaxõgüxü̃. Jerü maneca 3,000 ga duü̃xü̃gü nixĩ ga Ngechuchuaxü̃́ jaxõgüxü̃ ga jexguma.
42 Rü jema jexwacax jaxõgüxü̃ rü guxü̃guma inarüxĩnüẽ ga jema ngúexü̃gü ga Ngechuchu imugüxü̃ãrü ngu̱xẽẽtae. Rü meã nügümaã nangaugü ga norü jemaxü̃gü. Rü guxü̃guma najumuxẽgüxü̃ rü chibüca̱x nangutaque̱xegüxü̃.
Nhuxãcü meã nügümaã namaxẽ ga jema jaxõgüxü̃
43 Rü jema ngúexü̃gü ga Ngechuchu imugüxü̃ rü nanaxügü ga muxü̃ma ga mexü̃gü ga Tupanaãrü poramaã naxügüxü̃. Rü jexguma jemaxü̃ nadaugügu ga togü ga duü̃xü̃gü, rü poraãcü naḇaixãchiãẽgü ga guxü̃ma.
44 Rü guxü̃ma ga jema jaxõgüxü̃, rü wüxigu narüxĩnüẽ. Rü meã nügümaã nangaugü ga norü jemaxü̃gü.
45 Rü namaã nataxegüxü̃ ga norü naãnegü rü guxü̃ma ga togü ga norü jemaxü̃gü. Rü nügümaã ngĩxü̃ nitojegüxü̃ ga jema dĩẽru jexgumarüü̃ na nhuxre natümawa̱xexü̃ ga norü õnatanü ga wüxichigü.
46 Rü guxü̃ ga ngunexü̃gu tupauca ga taxü̃newa nangutaque̱xegüxü̃, rü chibüca̱x nangutaque̱xegüxü̃ ga napatagüwa, rü taãẽãcüma nügümaã nachibüexü̃.
47 Rü guxü̃guma Tupanaxü̃ nicua̱xüü̃güxü̃. Rü guxü̃ma ga jema ĩãnecü̱̃ã̱x rü nüxü̃ nangechaü̃gü ga jema jaxõgüxü̃. Rü wüxichigü ga ngunexü̃gu rü nimuẽtanü ga duü̃xü̃gü ga jaxõgüxü̃, jerü nüma ga Cori ga Ngechuchu rü nüxü̃ narüngü̃xẽẽ na najauxgüãxü̃ca̱x ga norü maxü̃ i taguma gúxü̃.
