Puracügü 20:1-38
20 Rü jexguma marü nangupetügu ga jema na íjacuxcuxü̃ ga duü̃xü̃gü, rü Pauru naxca̱x nangema ga jema jaxõgüxü̃ na jaxucu̱xẽgüãxü̃ca̱x. Rü jexguma marü namaã nüxü̃ nachaugu, rü nüxü̃ narümoxẽ, rü inaxũãchi ga Machedóniããnewa na naxũxü̃.
2 Rü jexguma jema naãnewa jaxüpetügu, rü taãẽxü̃ ga oremaã najaxucu̱xẽgü ga jema jaxõgüxü̃ ga wüxichigü ga ĩãnewa jexmagüxü̃. Rü jemaãcü Gregugüchiü̃ãnewa nangu.
3 Rü jéma najexma ga tamaẽ̱xpü̱x ga tawemacü. Rü jexguma marü inaxũãchichaü̃gu ga Síriaanewa na naxũxü̃, rü tama wapurugu nixũ jerü nüxü̃ nacuáchiga ga na nhuxre ga Judéugü jama̱xgüchaü̃xü̃. Rü jemaca̱x nagu narüxĩnü ga dauxchitagu na nataeguxü̃, rü wenaxãrü Machedóniããnewa na naxüpetüxü̃.
4 Rü ínajaxümücügü ga Sopátru ga Beréacü̱̃ã̱x ga Píu nane, rü Aristácu rü Secũdu ga Techarónicacü̱̃ã̱xgü, rü Gaju ga Derbecü̱̃ã̱x, rü Timúteu, rü Tíquicu, rü Trófimu ga Áchiaanecü̱̃ã̱xgü.
5 Rü jema jatügü rü nüxĩra tope̱xegu naxãgü, rü Truádewa toxü̃ najarüṉg̱uxẽẽgü.
6 Rü nawena ga jema Judéugüarü peta ga üpetüchiga ga põũ ga ngearü puxẽẽruü̃ã́xü̃ nagu nangõ̱xgüxü̃, rü wapurugu Piripuwa itaxĩãchi. Rü wüxime̱ẽ̱xpü̱x ga ngunexü̃ ngupetügu, rü Truádegu nüxü̃ tajangaugü ga jema tope̱xegu ãgüxü̃. Rü jexma tarücho ga 7 ga ngunexü̃.
Truádegu nanaxũãne ga Pauru
7 Rü jema jüxüarü ngunexü̃gu rü tangutaque̱xegü namaã ga jema jaxõgüxü̃ na tanangṍxü̃ca̱x ga põũ ga bücuxü̃ jema Ngechuchu toxü̃ ngúexẽẽxü̃rüü̃. Rü jema jaxõgüxü̃maã nidexa ga Pauru. Rü nanama̱xẽẽ ga norü dexa nhu̱xmata ngãxü̃cüwa nangu, jerü moxü̃ãcü inaxũãchichaü̃.
8 20:8-9 Rü dauxü̃wa ga guma ĩpataarü tamaẽ̱xpü̱xchiü̃wa jexmaxü̃ ga ucapuwa tangutaque̱xegü. Rü namu ga omü ga jéma naĩgüxü̃. Rü najexma ga wüxi ga ngextü̱xücü ga Eutícugu ãẽ́gacü. Rü jéma wüxi ga jema ucaputapü̱xarü ĩã̱xwa narüto. Notürü ga Pauruarü dexa, rü poraãcü nama̱x. Rü jemaca̱x ga guma ngextü̱xücü rü poraãcü najaxta, rü düxwa nipeãchi rü jema ĩã̱xwa narüngu, rü nhaxtüanegu nangu. Rü jéma jucüma nanajauxgü.
9 Nüü̃ nadau 20:8
10 Rü ínarüxĩ ga Pauru, rü najanawüxüchi ga guma ngextü̱xücü, rü duü̃xü̃güxü̃ nhanagürü: —¡Tãṹ i peḇaixãchiexü̃, erü namaxü̃ nixĩ! —nhanagürü.
11 Rü jexguma wenaxãrü dauxü̃ naxĩ, rü inanabücu ga jema põũ, rü nanangõ̱x. Rü wenaxãrü nidexa nhu̱xmata jangune, rü jexguma inaxũãchi.
12 Rü guma ngextü̱xücü rü maxü̃cü napatawa nanagagü. Rü jemaca̱x poraãcü nataãẽgü ga guxü̃ma ga nümagü.
Truádewa inaxũãchi ga Pauru rü Miretuwa naxũ
13 Rü jexguma ga Pauru rü nhanagürü: —Dauxchitagu tá chixũ nhu̱xmatáta ĩãne ja Achuwa changu na ngẽ́ma pexü̃ chixüexü̃ca̱x —nhanagürü. Rü jemaca̱x ga toma rü wapurugu tichoü̃ rü joxni nape̱xegu taxĩ nhu̱xmata Achuwa tangugü.
14 Rü jexguma Achugu Paurumaã togü tajangauxgu, rü jéma toxü̃ nixüe. Rü tachopetü ga jéma nhu̱xmata Miterénewa tangugü.
15 Rü jéma itaxĩãchi rü moxü̃ãcü Quíuarü to̱xma̱xtawa tachopetü. Rü jemaãrü moxü̃ãcü Chamuwa tangugü. Rü jemaãrü moxü̃ãcüama Miretuwa tangugü.
16 Rü jemaãcü ítixĩ jerü ga Pauru rü tama Áchiaanegu nanuxcüchaü̃. Jerü nanaxwa̱xe ga paxa Jerucharéü̃wa na nanguxü̃ naxca̱x ga Pẽtecóstearü ngunexü̃. Rü jemaca̱x nagu narüxĩnü na tama Epéchiugu íjadauxü̃.
Jaxõgüxü̃ãrü ãẽ̱xgacügü ga Epéchiucü̱̃ã̱xmaã nidexa ga Pauru
17 Notürü jexguma Miretuwa tangugügu rü Epéchiuwa naxca̱x namuga ga Pauru na naxü̃tawa naxĩxü̃ca̱x ga jema jaxõgüxü̃ãrü ãẽ̱xgacügü ga Epéchiucü̱̃ã̱x.
18 Rü jexguma Pauruxü̃tawa nangugügu, rü nhanagürü nüxü̃: —Pema meã nüxü̃ pecua̱xgü ga nhuxãcü pepe̱xewa na chamaxü̃xü̃ ga guxü̃gu ga jexguma noxritama nuã Áchiaanewa chaxũxgu.
19 Rü guxü̃guma ga jexguma petanüwa chajexmagu, rü meãma chanaxü ga Cori ja Tupanaãrü puracü, taguma chaugü chicua̱xüü̃ãcüma. Rü woo muẽ̱xpü̱xcüna poraãcü changechaü̃gu, nagagu ga jema chixexü̃ ga chamaã naxügüchaü̃xü̃ ga Judéugü, notürü naẽ́tüwa chanaxüama ga jema puracü.
20 Rü taguma íchajachaxãchi ga pemaã nüxü̃ na chixuxü̃ ga guxü̃ma ga jema ore ga perü mexü̃ca̱x ixĩxü̃. Rü guxü̃ ga duü̃xü̃güpe̱xewa, rü pepatagüwa rü ta pexü̃ changúexẽẽ ga jema ore.
21 Rü Judéugümaã rü jema tama Judéugü ixĩgüxü̃maã nüxü̃ chixu na namexü̃ ga na nüxü̃ naxoexü̃ca̱x ga norü chixexü̃gü rü Tupanaga naxĩnüẽxü̃ca̱x, rü nüxü̃́ na jaxõgüãxü̃ca̱x ga tórü Cori ja Ngechuchu.
22 Rü nhu̱xma rü Jerucharéü̃wa chaxũ erü Tupanaãẽ i Üünexü̃ rü ngẽ́ma choxü̃ namu. Notürü tama nüxü̃ chacua̱x na ṯacü tá choxü̃ üpetüxü̃ i ngẽ́ma.
23 Rü ngẽma nüxü̃ chacuáxü̃ nixĩ i duü̃xü̃gü tá choxü̃ napocu rü guxchaxü̃gü tá choxü̃ naxüpetü i Jerucharéü̃wa. Rü ngẽxĩcatama nixĩ i chamaã nüxü̃ jaxuxü̃ i Tupanaãẽ i Üünexü̃ i guxü̃ne ja ĩãne i ngextá íchixũgüxü̃wa.
24 Notürü tama ngẽma ãũcümaxü̃gu charüxĩnü erü nüẽ́tama nixĩ ega woo chaju̱xgu. Notürü ngẽma chanaxwa̱xexü̃ nixĩ na taãẽãcüma chapuracüamaxü̃ na meã chajanguxẽẽxü̃ca̱x i ngẽma puracü ga tórü Cori ja Ngechuchu choxna ãxü̃ rü nüxü̃ chixuxü̃ca̱x i norü ore i mexü̃ na nhuxãcü Tupana tüxü̃ ngechaü̃xü̃.
25 Rü nhu̱xma rü marü nüxü̃ chacua̱x rü tagutáma wena choxü̃ pedaugü i pema ga marü pemaã nüxü̃ chixuxe na nhuxãcü ãẽ̱xgacü na jiĩxü̃ ja Tupana.
26 Rü ngẽmaca̱x i nhama i ngunexü̃gu rü pemaã nüxü̃ chixu rü marü tama chaugagu nixĩ ega texé petanüwa ijarütau̱xgu.
27 Erü marü meãma pemaã nüxü̃ chixu i guxü̃ma i ngẽma Tupana pexü̃́ naxwa̱xexü̃, rü taxuü̃ma ichicu̱x.
28 Rü ngẽmaca̱x i nhu̱xma rü penaxwa̱xe na pexuãẽgüxü̃ rü meã nüxna pedaugüxü̃ i guxü̃ma i jaxõgüxü̃ i petanüwa ngẽxmagüxü̃. Erü ngẽma nixĩ i Tupanaãxẽ i Üünexü̃ nagu pexü̃ mugüxü̃ na nüxna pedaugüxü̃ca̱x i ngẽma Tupanaãrü duü̃xü̃gü i jaxõgüxü̃ i Ngechuchu nagümaãtama naxca̱x taxexü̃.
29 Chama nüxü̃ chacua̱x rü ngẽxguma íchixũxgu, rü chawena tá pexca̱x nuã naxĩ i togü i duü̃xü̃gü. Rü tá nanachixexẽẽchaü̃ i ngẽma jaxõgüxü̃ nhama airugü i idüraexü̃ i carnerugüxü̃ ngĩãchixẽẽxü̃rüü̃.
30 Rü woo petanüwatátama nangẽxmagü i nümaxü̃ i tá doramaremaã nangúexẽẽxü̃ i ngẽma jaxõgüxü̃ na nügüwe naxĩxẽẽãxü̃ca̱x.
31 ¡Pegüna pedaugü, rü nüxna pecua̱xãchie na nhuxãcü tamaẽ̱xpü̱x ga taunecügu rü ngunecü rü chütacü rü taguma íchajachaxãchixü̃ ga pexca̱x chaxauxãcüma na pexü̃ chixucu̱xẽgüxü̃ ga wüxichigü!
32 Rü nhu̱xmax, Pa Chaueneẽgüx, rü Tupanana pexü̃ chamugü. Rü chanaxwa̱xe i naga pexĩnüẽ i norü ore i tüxü̃ nüxü̃ cua̱xẽẽxü̃ na nhuxãcü poraãcü tüxü̃ nangechaü̃xü̃. Erü ngẽma norü ore tá pexü̃ naporaexẽẽ na tórü Corica̱x pemaxẽxü̃ca̱x rü pexü̃́ nangẽxmaxü̃ca̱x i pechica namaã i guxü̃ma i duü̃xü̃gü i Tupana idexechixü̃.
33 Chama rü taxuguma chaugüca̱x chanaxwa̱xe ga texéarü dĩẽru rü texéchiru.
34 Rü pematama rü meã nüxü̃ pecua̱x ga nhuxãcü daa cha̱xme̱xmaã na chapuracüxü̃ naxca̱x ga jema choxü̃́ rü chamücügüaxü̃́ taxuxü̃.
35 Rü guxü̃guma meã pexü̃ changúexẽẽ na ngẽmaãcü pepuracüexü̃ na nüxü̃ perüngü̃xẽẽxü̃ca̱x i ngẽma duü̃xü̃gü i nüxü̃́ nataxuxü̃. Rü name nixĩ na nüxna pecua̱xãchiexü̃ i Cori ja Ngechuchuarü ore ga nümatama nhaxü̃:
“Rü narümemaẽ nixĩ i pema na toguena penaxãxü̃ rü tama i tüma pexna tanaxãxü̃”, nhaxü̃.
36 Rü jexguma jema nhaxguwena ga Pauru, rü inacaxã́pü̱xü namaã ga guxü̃ma, rü najumuxẽ.
37 Rü guxü̃ma poraãcü naxauxe, rü Pauruna nana̱ĩ̱xãchigü, rü nüxü̃ nawãĩxgü.
38 Jerü poraãcü nangechaü̃ẽ naxca̱x ga jema ore ga namaã nüxü̃ jaxuxü̃ ga:
“Marü tagutáma wena choxü̃ pedaugü” nhaxü̃. Rü nümagü ínajaxümücügü nhu̱xmata wapuruwa nangu.
