Puracügü 21:1-40
21 Rü jexguma nüxna itaxĩãchi ga jema jaxõgüxü̃, rü wapurugu tichoü̃. Rü Cochu ga capaxũca̱x noxtacüma tichaetaxü̃. Rü moxü̃ãcü rü Rodewa taxĩ. Rü jéma itaxĩãchi, rü Pátarawa tangugü.
2 Rü jexma nüxü̃ tajangau ga wüxi ga wapuru ga Peníchiawa ũxü̃ne. Rü nagu tichoü̃, rü itaxĩãchi.
3 Rü jixcamaxü̃ra nüxü̃ tadaugü ga Chipre. Rü torü ṯoxwecüwawaama naxü, rü nüxü̃ tachopetü. Rü itinhaxwetaxü̃ nhu̱xmata Síriaanewa tangugü. Rü Tiruwa ítachoü̃, jerü jéma nixĩ ga ínanuü̃ãcuxü̃ ga guma wapuru.
4 Rü jexma nüxü̃ tajangau ga jémacü̱̃ã̱x ga jaxõgüxü̃, rü 7 ga ngunexü̃ jéma natanüwa tajexmagü. Rü Tupanaãẽ i Üünexü̃ najadexagüxẽẽ ga jema jaxõgüxü̃, rü Pauruxü̃ nhanagürügü: —¡Tãṹ i Jerucharéü̃wa cuxũxü̃! —nhanagürügü.
5 Notürü jexguma nangupetügu ga jema 7 ga ngunexü̃gü, rü itaxĩãchi. Rü jema jaxõgüxü̃ rü towe narüxĩ. Rü naxma̱xmaãchigü rü naxãcügümaãchigü toxü̃ ínixümücügü ga guxü̃ma nhu̱xmata guma ĩãnechipenüwa tangugü. Rü jexma naxnücügu tacaxgüã́pü̱xü, rü tajumuxẽgü.
6 Rü jexguma ga toma rü nüxü̃ tarümoxẽgü, rü tichoü̃ ga wapuruwa. Rü nümagü rü napataca̱x nawoegu.
7 Rü toma rü Tiruwa itaxĩãchi rü Petomáĩdawa tangugü. Rü jéma ítachoü̃, jerü jexma najacua̱x ga wapurugu na taxĩxü̃. Rü nüxü̃ tarümoxẽgü ga jema jaxõgüxü̃ ga jéma jexmagüxü̃, rü wüxi ga ngunexü̃ natanügu tarücho.
8 Rü moxü̃ãcü itaxĩãchi ga jéma, rü Checharéawa tangugü. Rü Piripi ga Tupanaãrü orearü uruü̃patawa taxĩ. Rü nüma rü jema 7 ga ngü̃xẽẽruü̃gü ga tupaucana daugüxü̃tanüxü̃ nixĩ. Rü jexma naxü̃tagu tapegü.
9 Rü nüma nüxü̃́ ijexma ga ãgümücü ga naxãcügü ga taguma ixãtecü ga Tupanaãrü orexü̃ ixugüecü.
10 Rü jexguma marü nhuxre ga ngunexü̃ jéma tajexmagügu, rü Judéaanewa ne naxũ ga wüxi ga Tupanaãrü orearü uruü̃ ga Agabugu ãẽ́gaxü̃.
11 Rü jexguma toxü̃tawa nanguxgu ga Agabu, rü nanajaxu ga Pauruarü gojexü̃. Rü namaã nügü nina̱ĩ̱xgücutü, rü nügü nináĩme̱x, rü nhanagürü: —Tupanaãẽ i Üünexü̃ marü chamaã nidexa rü nhanagürü:
“Rü nhaãcü tá najana̱ĩ̱xgü i Judéugü i Jerucharéü̃wa i nhaã gojexü̃ãrü jora. Rü ngẽma duü̃xü̃gü i tama Judéugü ixĩgüxü̃na tá nanamugü”, nhanagürü.
12 Rü jexguma jema orexü̃ taxĩnüẽgu, rü toma rü jema Checharéacü̱̃ã̱xgümaã Pauruxü̃ taca̱a̱xü̃gü ga tama Jerucharéü̃wa na naxũxü̃ca̱x.
13 Notürü nüma ga Pauru rü toxü̃ nangãxü̃ rü nhanagürü: —¿Tü̱xcüü̃ pexauxe rü choxü̃ pengechaü̃xẽẽ? Chama rü íchamemare na chináĩxü̃. Rü ngẽxgumarüü̃ ta rü marü íchame na Jerucharéü̃gu chajuxü̃ naxca̱x ja Cori ja Ngechuchu —nhanagürü.
14 Rü jexguma marü taxuacüma tanachu̱xugu, rü tachianemare, rü nhatarügü: —¡Ẽcü jangu i Cori ja Tupanaãrü ngúchaü̃! —nhatarügügü.
15 Rü jemawena rü togü tamexẽẽgü, rü Jerucharéü̃wa taxĩ.
16 Rü towe narüxĩ ga nhuxre ga jaxõgüxü̃ ga Checharéacü̱̃ã̱xgü, rü Masṍũpatawa toxü̃ nagagü. Rü nüma nixĩ ga wüxi ga Chíperecü̱̃ã̱x ga ü̃pamama woetama jaxõxü̃. Rü naxü̃tagu tapegüxü̃.
Tiaguxü̃tagu nanaxũãne ga Pauru
17 Rü jexguma Jerucharéü̃wa tangugügu, rü jema jaxõgüxü̃ rü taãẽãcüma toxü̃ najauxgü.
18 Rü moxü̃ãcü ga Pauru rü tomaã Tiaguxü̃tagu nanaxũãne. Rü jéma nangutaque̱xegü ga guxü̃ma ga jaxõgüxü̃ãrü ãẽ̱xgacügü.
19 Rü nüxü̃ narümoxẽ ga Pauru, rü nhu̱xmachi meãma namaã nüxü̃ nixu ga guxü̃ma ga jema Tupana üxü̃ ga jexguma jema tama Judéugü ixĩgüxü̃maã nüxü̃ jaxuxgu ga Tupanaãrü ore.
20 Rü jexguma Pauruarü orexü̃ naxĩnüẽgu ga nümagü, rü Tupanaxü̃ nicua̱xüü̃gü. Rü nhanagürügü Pauruxü̃: —Dücax, Pa Toeneẽx, cuma nüxü̃ cucua̱x rü nangẽxma i muxũchixü̃ i Judéugü i jaxõgüxü̃. Rü guxü̃ma i nümagü rü nanaxwa̱xegü na nagu naxĩxü̃ i ngẽma mugü ga Muĩsé ümatüxü̃.
21 Notürü ga togü ga tama jaxõgüxü̃ rü marü namaã nüxü̃ nixugügü na cuma rü cunangúexẽẽxü̃ i guxü̃ma i Judéugü i togü i nachiü̃ãnewa ngẽxmagüxü̃, na tama naga naxĩnüẽxü̃ca̱x i ngẽma mugü ga Muĩsé ümatüxü̃. Rü marü namaã nüxü̃ nixugügü na cunangúexẽẽxü̃ na tama tüxü̃ ínawiü̃cha̱xmüpe̱xechiraü̃xü̃ca̱x ja nanegü, rü na tama naga naxĩnüẽxü̃ca̱x i tacümagü ga Muĩsé tüxü̃ muxü̃.
22 ¿Ṯacü tá ixüexü̃ i nhu̱xmax? Erü ngẽma Judéugü i jaxõgüxü̃ rü aixcuma tá nüxü̃ nacua̱xgü na marü nuã cunguxü̃.
23 ¡Rü ngẽmaca̱x name nixĩ na cunaxüxü̃ i ngẽma tá cumaã nüxü̃ tixuxü̃! Nuã totanüwa nangẽxma i ãgümücü i jatügü i janguxẽẽchaü̃xü̃ i wüxi i uneta i Tupanamaã nüxü̃ jaxuxü̃.
24 ¡Ngẽ́ma tupauca ja taxü̃newa nagagü, rü wüxigu namaã janguxẽẽ i ngẽma tacüma ga Muĩsé tüxna ãxü̃, rü Tupanape̱xewa pegü pejamexẽẽgü! ¡Rü nüxü̃́ naxütanü i nhuxregu nüxü̃́ naxãtanü na jadüpü̱xüerugüxü̃ca̱x i ngẽma jatügü na ngẽmaãcü janguxẽẽgüãxü̃ca̱x i norü unetagü! Rü ngẽmawa rü guxü̃ma i ngẽma Judéugü rü tá nüxü̃ nacua̱xgü na aixcuma cuma rü ta naga cuxĩnüxü̃xü̃ i ngẽma mugü ga Muĩsé ümatüxü̃ rü tama aixcuma na jiĩxü̃ ga jema ore ga cuchiga ga nüxü̃ jaxugüexü̃.
25 Rü nhu̱xmachi ngẽma jaxõgüxü̃ i tama Judéugü ixĩgüxü̃, rü marü naxca̱x tanaxümatü ga torü ore na tama nangõ̱xgüãxü̃ca̱x i ṯacü i namachi i marü togü norü tupananetachicüna̱xãgüxü̃ namaã icua̱xüü̃güxü̃, rü tama na nangõ̱xgüãxü̃ca̱x ja nagü, rü tama nangõ̱xgüãxü̃ca̱x i naẽxü̃gü rü e̱xna naxü̃nagü i wẽxnaãxü̃, rü tama naĩ i ngemaã rü e̱xna naĩ ja jatümaã inapexü̃ca̱x —nhanagürügü.
Tupauca ga taxü̃negu Pauruxü̃ nijauxgü
26 Rü jexguma ga Pauru rü jéma tupauca ga taxü̃newa nanagagü ga jema ãgümücü ga jatügü. Rü moxü̃ãcü rü Tupanape̱xewa nügü namexẽẽ ga Pauru wüxigu namaã ga jema jatügü. Rü nhu̱xmachi guma tupauca ga taxü̃negu namaã naxücu na paimaã nüxü̃ jaxuxü̃ca̱x na 7 ga ngunexü̃gu tá jiĩxü̃ na janguxẽẽgüãxü̃ ga jema norü uneta ga Tupanamaã nüxü̃ jaxugüxü̃, rü jemawena rü tá na inaxãmaregüãxü̃ ga norü ãmaregü ga Tupanaxü̃ namaã jacua̱xüü̃güxü̃ ga wüxichigü.
27 Rü jexguma marü nagúxchaü̃gu ga jema 7 ga ngunexü̃, rü nhuxre ga Judéugü ga Áchiaanecü̱̃ã̱xgü rü Pauruxü̃ nadaugü ga tupauca ga taxü̃newa. Rü jema Judéugü rü duü̃xü̃güxü̃ nanuẽxẽẽ na Pauruxü̃ jajauxgüxü̃ca̱x. Rü jemaca̱x Pauruna najuxgü.
28 Rü tagaãcü aita naxüe nhaxü̃maã: —Pa Tomücügü Pa Judéugüx, ¡Paxa toxü̃ perüngü̃xẽẽx! Nhaã nixĩ i ngẽma jatü i guxü̃wama jangúexẽẽchigüxü̃ i duü̃xü̃gü na tachi naxaiexü̃ca̱x i jixema i Judéugü, rü nachi na naxaiexü̃ca̱x i ngẽma mugü ga Muĩsé ümatüxü̃ rü daa tupauca ja taxü̃ne. Rü naẽ́tüwa i nhu̱xmax rü nuxa daa tupauca ja taxü̃negu nanamucu i nhuxre i duü̃xü̃gü i tama tacümagu ĩxü̃, rü ngẽmaãcü nanaxüxaxẽẽ i nhaã nachica i üünexü̃ —nhanagürügü.
29 Rü jema nhanagürügü jerü ü̃paacü Jerucharéü̃wa Paurumaã nüxü̃ nadaugü ga Trófimu ga wüxi ga Epéchiucü̱̃ã̱x ga tama Judéu ixĩxü̃. Rü nüxü̃ nacua̱xgügu rü Pauru marü jexma nanaxücuxẽẽ ga tupauca ga taxü̃negu.
30 Rü guxü̃ma ga jema ĩãnecü̱̃ã̱xgü rü poraãcü nanuẽ. Rü tupauca ga taxü̃neca̱x nibuxmü, rü Pauruxü̃ nijauxgü, rü tupaucaarü ĩã̱xtüwa nanatúchigügü. Rü jexguma paxa nanawãxtagü ga guma tupauca ga taxü̃neãrü ĩã̱xgü.
31 Rü jexguma Pauruxü̃ jama̱xgüchaü̃gu ga duü̃xü̃gü, rü Romacü̱̃ã̱x ga churaragüarü ãẽ̱xgacüxü̃tawa nanguchiga ga ore na guxü̃wama ga Jerucharéü̃wa rü na nanuẽxü̃ ga duü̃xü̃gü.
32 Rü jexgumatama ga guma churaragüarü ãẽ̱xgacü rü nanangutaque̱xexẽẽ ga jema norü capitã́ũgü namaã ga norü churaragü, rü paxa jema duü̃xü̃gü íjexmagüxü̃wa naxĩ. Rü jexguma guma ãẽ̱xgacüxü̃ rü jema churaragüxü̃ nadaugügu ga duü̃xü̃gü, rü ínajachaxãchigü ga na Pauruxü̃ jama̱xgüxü̃.
33 Rü jexguma ga guma ãẽ̱xgacü rü Pauruca̱x nixũ rü najajaxu. Rü nanamu na taxre ga curẽtimaã na jana̱ĩ̱xgüãxü̃ca̱x. Rü nüxna naca na texé jiĩxü̃, rü ṯacü naxüxü̃.
34 Notürü jema muxü̃ma ga duü̃xü̃gü rü toxica ga oremaã aita naxüe ga wüxichigü. Rü jexguma taxuacüma meã nüxü̃ nacua̱xgu ga ṯacüca̱x na nanuẽxü̃, rü guma ãẽ̱xgacü rü nanamu na churaragüpatawa Pauruxü̃ nagagüxü̃.
35 21:35-36 Rü jexguma churaragüpataarü toxõnewa nanguxgu ga Pauru, rü churaragü najangetaü̃gü naxchaxwa ga jema muxü̃ma ga duü̃xü̃gü, jerü nanuẽxü̃chi rü nawe nicaetanü rü nhanagürügü: —¡Jama̱xü̃chi! —nhanagürügü.
36 Nüü̃ nadau 21:35
Pauru rü duü̃xü̃güpe̱xewa nügüétüwa nidexa
37 Rü jexguma marü churaragüpatagu jamucuchigüchaü̃ãgu rü Pauru rü Gregugawa guma ãẽ̱xgacüna naca rü nhanagürü: —¿Cuxü̃́ namexü̃ na cumaã nüxü̃ chixuxü̃ i wüxi i ore? —nhanagürü. Rü nüma ga ãẽ̱xgacü nanangãxü̃ rü nhanagürü: —E̱xna nüxü̃ cucua̱x na Gregugawa cuidexaxü̃.
38 ¿Tama e̱xna cuma jiĩxü̃ i Ejitucü̱̃ã̱x ga ü̃paxüra rü duü̃xü̃güxü̃ cunuẽxẽẽxü̃ na ãẽ̱xgacümaã nügü naḏaixü̃ca̱x rü dauxchitawa ga taxúema íxãpataxü̃wa cunagagüxü̃ ga 4000 ga jatügü ga máẽtaxü̃gü? —nhanagürü.
39 Rü jexguma ga Pauru rü nanangãxü̃, rü nhanagürü: —Chama rü Judéu chixĩ, rü Tarsucü̱̃ã̱x chixĩ. Rü Chiríchiaanewa rü jima nixĩ ja wüxi ja ĩãne ja taxüchine. Rü ngẽxguma curü me jixĩgu, rü cuxna chaca na duü̃xü̃gümaã chidexaxü̃ca̱x —nhanagürü.
40 Rü jexguma ga guma ãẽ̱xgacü rü: —Ngü̃ —nhanagürü. Rü nüma ga Pauru, rü churaragüpataarü toxõnegu nachinagü, rü naxunagüme̱xẽ na nachiãchixü̃ca̱x ga duü̃xü̃gü. Rü jexguma nachiãchiegu, rü Judéugawa nidexa, rü nhanagürü nüxü̃:
