Puracügü 22:1-30
22 —Pa Chautanüxü̃güx, ¡rü choxü̃́ iperüxĩnüẽ i ngẽma nhu̱xma tá pemaã nüxü̃ chixuxü̃ na chaugüétüwa chidexaxü̃ca̱x! —nhanagürü.
2 Rü jexguma nüxü̃ naxĩnüẽgu ga na Judéugawa namaã jadexaxü̃, rü jexeraãcü inajarüchianegü. Rü jexguma namaã jadexagu ga Pauru, rü nhanagürü:
3 —Chama rü Judéu chixĩ, rü Chiríchiaaneãrü ĩãne ga Tarsugu chabu. Notürü dama ĩãne ja Jerucharéü̃wa chaja, rü Gamariéu nixĩ ga chorü ngu̱xẽẽruü̃. Rü meãma nawa changu̱x ga guxü̃ma ga mugü ga nuxcümaü̃güxü̃ ga tórü o̱xigü nagu ĩxü̃. Rü guxü̃guma naxca̱x chadau na guxü̃ma i chorü ngúchaü̃maã Tupanaãxü̃́ chapuracüxü̃, ngẽxgumarüü̃ i guxãma i pema i nhu̱xmax.
4 —Rü chama ga ü̃pa rü poraãcü nawe chingẽchigü ga jema Ngechuchuaxü̃́ jaxõgüxü̃ na chanaḏaixü̃ca̱x. Rü íchanajauxü̃, rü chanapocue ga muxü̃ma ga jema jaxõgüxü̃ ga jatüxü̃gü rü ngexü̃gü.
5 —Rü nüma ja paigüeru rü guxü̃ma i tupauca ja taxü̃neãrü ãẽ̱xgacügü i jaguã̱xgü rü nüxü̃ nacua̱xgü na aixcuma jiĩxü̃ i nhaã chorü ore. Jerü nümagü rü choxna nanaxãgü ga popera na choxü̃ nangü̃xẽẽgüxü̃ca̱x ga tatanüxü̃gü ga Judéugü ga Damacuwa jexmagüxü̃. Rü jéma Damacuwa chaxũ na naxca̱x chajadauxü̃ca̱x ga jema Ngechuchuaxü̃́ jaxõgüxü̃, rü nuã Jerucharéü̃wa na chanagagüxü̃ca̱x rü nuxã chajapocuexü̃ca̱x.
Pauru nüxü̃ nixu na nhuxãcü Ngechuchuaxü̃́ jaxõõxü̃
6 —Notürü jexguma namagu chixũjane rü marü chingaicaxgu ga Damacuwa na changuxü̃, rü meãma tocuchigu nixĩ ga jexguma. Rü ngürüãchi wüxi ga omü ga poraxü̃ ga dauxü̃wa ne baxixü̃ rü choxü̃ nabaxi.
7 —Rü nhaxtüanegu chajangu, rü nüxü̃ chaxĩnü ga wüxi ga naga ga nhaxü̃ choxü̃:
“Pa Chaurux, ¿tü̱xcüü̃ nawe cuingẽchigü i ngẽma duü̃xü̃gü i choxü̃́ jaxõgüxü̃?” nhaxü̃.
8 —Rü jexguma ga chama rü chanangãxü̃, rü nhacharügü:
“¿Rü texé cuixĩ Pa Corix?” nhacharügü. Rü nüma ga jema naga rü choxü̃ nangãxü̃, rü nhanagürü:
“Chama nixĩ i Ngechuchu ja Nacharétucü̱̃ã̱x, rü chorü duü̃xü̃gü nixĩ i ngẽma nawe cuingẽchigüxü̃”, nhanagürü choxü̃.
9 —Rü jema chamücügü rü nüxü̃ nadaugü ga jema omü, rü naḇaixãchiãẽgü, notürü tama nüxü̃ naxĩnüẽ ga jema naga ga chamaã idexaxü̃.
10 —Rü nüxna chaca, rü nhacharügü ga chamax:
“¿Rü ṯacü tá chaxüxü̃, Pa Corix?” nhacharügü. Rü jexguma nhanagürü choxü̃ ga Cori:
“¡Írüda, rü inachi, rü Damacuwa naxũ, rü ngẽ́ma tá cumaã nüxü̃ nixu ja wüxi ja jatü na ṯacü tá cuxüxü̃!” nhanagürü ga nüma ga Cori.
11 —Rü jexguma ga chama rü chixoxetü jema omüẽmamaã, rü jemaca̱x ga jema chamücügü rü cha̱xme̱xgu jangĩgüãcüma choxü̃ nigagü, rü jemaãcü Damacuwa changu.
12 —Rü jéma najexma ga wüxi ga jatü ga Ananíãgu ãẽ́gacü. Rü nüma nixĩ ga wüxi ga jatü ga aixcuma Tupanaga ĩnücü, rü nüma rü meãma najanguxẽẽ ga jema mugü ga Muĩsé ümatüxü̃. Rü guxü̃ma ga Judéugü ga Damacuwa jexmagüxü̃, rü meã nachiga nidexagü.
13 —Rü nüma ga Ananíã rü choxü̃ ínajadau. Rü jexguma chauxü̃tawa nanguxgu rü nhanagürü choxü̃:
“Pa Chaueneẽ Pa Chaurux, ¡wenaxãrü ingo̱xnaxẽtü!” nhanagürü. Rü jexgumatama wenaxãrü chingo̱xnaxẽtü rü meãma nüxü̃ chadau.
14 —Rü jexguma nhanagürü ta:
“Jima Tupana ja nuxcümaxü̃güxü̃ ga tórü o̱xigüarü Tupana cuxü̃ naxuneta na nüxü̃ cucuáxü̃ca̱x i norü ngúchaü̃, rü na nüxü̃ cudauxü̃ca̱x ja jima Cristu ja mecü, rü naã̱xwatama nüxü̃ cuxĩnüxü̃ca̱x i naga.
15 —Erü cuma tá nixĩ i guxü̃ i duü̃xü̃gümaã nüxü̃ cuixuchigaxü̃ ga nhuxãcü na Tupanaxü̃ cudauxü̃ rü cumaã jadexaxü̃.
16 —¡Rü nhu̱xma rü marü taxuü̃ma ícunaṉg̱uxẽẽ! ¡Rü írüda rü ínabaie! ¡Rü Cori ja Ngechuchuégagu naxca̱x ínaca na cuxü̃́ nüxü̃ nangechaü̃xü̃ca̱x i curü pecadugü!” nhanagürü choxü̃.
Pauru nüxü̃ nixu na nhuxãcü Tupana namuxü̃ na jema tama Judéugü ixĩgüxü̃tanüwa naxũxü̃ca̱x
17 22:17-18 —Rü jexguma Jerucharéü̃ca̱x chataeguxgu, rü tupauca ga taxü̃newa chaxũ na jéma chajumuxẽxü̃ca̱x. Rü chango̱xetü, rü nüxü̃ chadau ga Cori ja Tupana. Rü nhanagürü choxü̃:“¡Napaxaãẽ, rü inaxũãchi i nuã Jerucharéü̃wa, erü duü̃xü̃gü rü tãũxü̃táma naga naxĩnüẽ i ngẽma ore i chauchiga nüxü̃ cuixuxü̃!” nhanagürü.
18 Nüü̃ nadau 22:17
19 —Rü chama chanangãxü̃, rü nhacharügü:
“Pa Corix, nüma i duü̃xü̃gü rü nüxü̃ nacua̱xgü ga chama na jiĩxü̃ ga guxü̃ne ga ngutaque̱xepataü̃güwa chaxũxü̃ rü íchanajauxü̃xü̃ rü chanapocuexü̃ rü chajac̱uaixgüxü̃ ga jema cuxü̃́ jaxõgüxü̃.
20 —Rü jexguma jama̱xgüãgu ga guma curü duü̃cü ga Estéwãũ ga curü orearü uruü̃, rü chamatama jéma chajexma, rü chorü me nixĩ ga na jama̱xgüãxü̃. Rü chama nixĩ ga nüxna chadauxü̃ ga naxchiru ga jema jama̱xgüxü̃”, nhacharügü nüxü̃.
21 —Notürü nüma ga Cori rü nhanagürü choxü̃:
“¡Rü paxa cugü namexẽẽ rü inaxũãchi! Erü jaxü̃guxü̃ i nachiü̃ãnegüwa i ngẽma duü̃xü̃gü i tama Judéugü ixĩgüxü̃tanüwa tá cuxü̃ chamu” —nhanagürü.
Churaragüarü ãẽ̱xgacüme̱xẽwa najexma ga Pauru
22 Rü jexguma Pauru jema nhaxgu rü jexma najacua̱xẽẽgü ga na meã nüxü̃́ inaxĩnüẽxü̃ ga jema duü̃xü̃gü. Rü jexguma aita naxüeãcüma nhanagürügü: —¡Noxtacüma pejamá! Rü name nixĩ i na najuxü̃ rü ngẽxma na janaxoxü̃ —nhanagürügü.
23 Rü jexguma aita naxüegu, rü norü dejuxü̃chirumaã nibuatanücüü, rü ãte̱xeanexü̃ dauxü̃ niwogütanücüü.
24 Rü jexguma jemaxü̃ nada̱xgu ga churaragüarü ãẽ̱xgacü, rü nanamu ga churaragüpatagu na jamucuchigüãxü̃ca̱x ga Pauru. Rü nanamu na poraãcü nac̱uaixgüãxü̃ca̱x na jadexaxü̃ca̱x na nüxü̃ nacuáxü̃ca̱x ga tü̱xcüü̃ jiĩxü̃ na jemaãcü nachigamaã aita naxüexü̃ ga duü̃xü̃gü.
25 Rü jexguma marü jana̱ĩ̱xgüãgu na nac̱uaixgüãxü̃ca̱x, rü Pauru nüxna naca ga jema capitã́ũ ga jéma jexmaxü̃, rü nhanagürü: —¿E̱xna pexme̱xwa nangẽxma na penac̱uaxixü̃ i wüxi i Romacü̱̃ã̱x ega tama nüxna pecaxiragu? —nhanagürü.
26 Rü jexguma jemaxü̃ naxĩnügu ga capitã́ũ, rü guma churaragüarü ãẽ̱xgacüxü̃tawa naxũ, rü namaã nüxü̃ nixu, rü nhanagürü: —¿Ṯacü tá cuxü? Erü nhaã jatü rü Romacü̱̃ã̱x nixĩ —nhanagürü.
27 Rü jexguma ga guma churaragüarü ãẽ̱xgacü, rü Pauruca̱x nixũ, rü nüxna naca rü nhanagürü nüxü̃: —¿Aixcuma jiĩxü̃ na Romacü̱̃ã̱x cuiĩxü̃ i cumax? —nhanagürü. Rü nüma ga Pauru nanangãxü̃, rü: —Ngü̃ —nhanagürü.
28 Rü jexguma ga guma churaragüarü ãẽ̱xgacü rü nanangãxü̃, rü nhanagürü: —Chama rü poraãcü choxü̃́ naxãtanü na Romacü̱̃ã̱x chaugü chixĩxẽẽxü̃ —nhanagürü. Rü jexguma nachonagü ga Pauru, rü nhanagürü: —Notürü i chama rü woetama chorü bucüma Romacü̱̃ã̱x chixĩ —nhanagürü.
29 Rü jexgumatama nüxna nixĩgachi ga jema Pauruxü̃ c̱uaixgüchaü̃xü̃. Rü nümatama ga jema churaragüarü ãẽ̱xgacü rü ta namuü̃ ga jexguma nüxü̃ nacua̱xgu ga Romacü̱̃ã̱x na jiĩxü̃ ga Pauru, jerü marü curẽtimaã najana̱ĩ̱xchire̱x.
Judéugüarü ãẽ̱xgacügütücumüpe̱xewa najexma ga Pauru
30 Rü jema churaragüarü ãẽ̱xgacü meãma nüxü̃ nacuáxchaü̃ ga tü̱xcüü̃ na ínaxuaxü̃güãxü̃ ga jema Judéugü. Rü jemaca̱x ga moxü̃ãcü rü nanamu na nangutaque̱xegüxü̃ca̱x ga paigüarü ãẽ̱xgacügü rü guxü̃ma ga jema ãẽ̱xgacügütücumü ga Judéugüarü. Rü najawẽgü ga Pauruarü curẽti rü jéma ãẽ̱xgacügüpe̱xewa nanagagü.
