Puracügü 23:1-35
23 Rü Pauru meãma nüxü̃ nadawenü ga jema ãẽ̱xgacügü, rü nhanagürü nüxü̃: —Pa Chautanüxü̃güx, chamatama nüxü̃ chacua̱x rü guxü̃guma meã chamaxü̃ ga Tupanape̱xewa nhu̱xmata nhama i ngunexü̃wa nangu —nhanagürü.
2 Rü jexguma ga jema paigüeru ga Ananíã rü nanamu ga jema Pauruarü ngaicamana jexmagüxü̃ na naã̱xwa tajama̱xgüxü̃ca̱x.
3 Rü jexguma ga Pauru rü nhanagürü nüxü̃: —Tupana tá cuxü̃ napéax, Pa Ãẽ̱xgacüx. Cuma rü düxétüwaxica cume notürü aixepena rü nachixe i curü maxü̃. Rü nhu̱xma rü ngẽ́ma curüto na Muĩsé ümatüxü̃ i mugü nüxü̃ ixuxü̃ãcüma choxna cuc̱axü̃ca̱x. Notürü wüxi i chixexü̃ cuxü erü cumatama rü tama naga cuxĩnü i ngẽma Tupana tüxü̃ muxü̃ erü cunamu na choxü̃ napéaxü̃ca̱x —nhanagürü ga Pauru.
4 Rü jexguma ga jema jexmagüxü̃ rü nhanagürügü: —¿Tü̱xcüü̃ i ngẽmaãcü ṯacü namaã cuixugüxü̃ i paigüeru ja Tupana nüxü̃ unetacü? —nhanagürügü.
5 Rü Pauru nanangãxü̃, rü nhanagürü: —Tama nüxü̃ chacua̱x, Pa Chautanüxü̃güx, na paigüeru jiĩxü̃. Erü Tupanaãrü ore i ümatüxü̃wa nüxü̃ tadau rü nhanagürü:
“¡Tama curü ãẽ̱xgacümaã chixexü̃ cuixugü!”
nhanagürü.
6 Rü jexguma nüxü̃ nacua̱xgu ga Pauru ga na Chaduchéugü jiĩxü̃ ga togü, rü na Parichéugü jiĩxü̃ ga togü, rü jema ãẽ̱xgacügüpe̱xewa tagaãcüma nhanagürü: —Pa Chautanüxü̃güx, chama rü Parichéu chixĩ, rü Parichéu nane chixĩ. Rü ngẽmaca̱x choxna pecagü i nhu̱xmax, erü chajaxõ i wena tá na namaxẽxü̃ i juexü̃ —nhanagürü.
7 Rü jexguma jema nhaxgu ga Pauru, rü jema Parichéugü rü Chaduchéugü rü inanaxügüe ga nügümaã na ijaporagaexü̃, rü jexma nügü nitoje ga jema ngutaque̱xewa.
8 Erü ngẽma Chaduchéugü nagu rüxĩnüẽgu rü tama wena namaxẽ i ngẽma juexü̃, rü nataxuma i orearü ngeruü̃gü i dauxü̃cü̱̃ã̱x, rü nataxuma i naãẽgü —nhanagürügü. Notürü ngẽma Parichéugü rü najaxõgü na nangẽxmaxü̃ i guxü̃ma i ngẽma.
9 Rü jemaca̱x guxü̃ma aita naxüe. Rü nhu̱xmachi nhuxre ga ngúexẽẽruü̃gü ga Muĩséarü mugüwa ngu̱xẽẽtaegüxü̃ ga Parichéugütücumüwa ügüxü̃ rü inachigü, rü nhanagürügü: —Toxca̱x rü taxuü̃ma i chixexü̃ naxü i nhaã jatü. Bexmana wüxi i ṯacü rü naãẽ namaã nidexa rü e̱xna wüxi i orearü ngeruü̃ i dauxü̃cü̱̃ã̱x —nhanagürügü.
10 Rü jexeraãcü norü numaã nanaxi̱xãchiãẽgü ga jema duü̃xü̃gü. Rü jemaca̱x naxoegaãẽ ga guma churaragüarü ãẽ̱xgacü ga na Paurugu nagaugügüchaü̃xü̃. Rü norü churaragüxü̃ namu na jéma duü̃xü̃gütanüwa Pauruxü̃ napugüxü̃ca̱x rü wena churaragüpatawa na nagagüãxü̃ca̱x.
11 Rü moxü̃ãcüarü chütaxü̃gu Pauruca̱x nango̱x ga Cori ga Tupana, rü nhanagürü nüxü̃: —¡Rü nataãẽ! Rü ngẽxgumarüü̃ i núma Jerucharéü̃wa choxü̃ na cuixuchigaxü̃, rü ngẽxgumarüü̃ tá ta nixĩ i Romawa na choxü̃ cuixuchigaxü̃ —nhanagürü ga Tupana.
Judéugü naxca̱x nadaugü na nhuxãcü Pauruxü̃ jama̱xgüchaü̃xü̃
12 Rü moxü̃ãcü, rü nhuxre ga Judéugü rü nügümaã inaxunetagü ga tãũxü̃táma na nachibüexü̃ rü naxaxegüxü̃ nhu̱xmatáta Pauruxü̃ jama̱xgü. Rü nhanagürügü: —Tachixexü̃gugü tá ega ṯacü ingõ̱xgügu naxü̃pa na jamáxü̃ i Pauru —nhanagürügü.
13 Rü 40 arü jexera ga jatügü nixĩ ga jema nügümaã ixunetagüxü̃.
14 Rü paigüarü ãẽ̱xgacügütanüwa rü ãẽ̱xgacügü ga jaguã̱xgütanüwa nangugü, rü nhanagürügü nüxü̃: —Marü togümaã itaxuneta rü tachixexü̃gugü tá ega ṯacü tangõ̱xgügu naxü̃pa na tajamáxü̃ i Pauru.
15 Rü name nixĩ i pema rü ngẽma togü i pexrüü̃ ãẽ̱xgacügütücumüwa ügüxü̃, rü churaragüarü ãẽ̱xgacüna naxca̱x pejacagü i nhu̱xma na moxü̃ wena pepe̱xewa nagagüãxü̃ca̱x i Pauru. ¡Rü namaã nüxü̃ peixu na penaxwa̱xegüxü̃ na meã nüxü̃ pecuáxchaü̃xü̃ i nachiga! Rü toma rü tá marü ítamemare na namagu tajamáxü̃ca̱x naxü̃pa na ínanguxü̃ —nhanagürügü.
16 Notürü ngĩne ga Paurueja̱x rü nüxü̃ nacuáchiga ga Pauruxü̃ na jama̱xgüchaü̃xü̃, rü jemaca̱x churaragüpatawa naxũ na Paurumaã nüxü̃ janaxuxü̃ca̱x.
17 Rü Pauru naxca̱x naca ga wüxi ga capitã́ũ, rü nhanagürü nüxü̃: —¡Curü ãẽ̱xgacüxü̃tawa naga i nhaã ngextü̱xüxü̃, erü nüxü̃́ nangẽxma i ore i namaã nüxü̃ jaxuxchaü̃xü̃! —nhanagürü.
18 Rü jema capitã́ũ rü ãẽ̱xgacüxü̃tawa nanaga ga jema ngextü̱xüxü̃. Rü nhanagürü nüxü̃: —Ngẽma pocuxü̃ i Pauru rü chauxca̱x naca, rü choxna naca na nuã cuxü̃tawa chanagaxü̃ca̱x i nhaã ngextü̱xüxü̃, erü nüxü̃́ nangẽxma i ore i cumaã nüxü̃ jaxuxchaü̃xü̃ —nhanagürü.
19 Rü naxme̱xgu jajauxãchiãcüma toxnamana nanaga ga ãẽ̱xgacü, rü jéma nüxna naca rü nhanagürü: —¿Ṯacü jiĩxü̃ i ngẽma chamaã nüxü̃ cuixuxchaü̃xü̃? —nhanagürü.
20 Rü nüma ga ngextü̱xüxü̃ nanangãxü̃, rü nhanagürü: —Ngẽma Judéugü, rü nügümaã inaxunetagü na cuxna naxca̱x nacagüxü̃ca̱x na moxü̃ Judéugüarü ãẽ̱xgacügütücumüpe̱xewa na cunagaxü̃ca̱x i Pauru. Rü tá cumaã nüxü̃ nixugü na meã nüxü̃ nacua̱xgüchaü̃xü̃ i nachiga.
21 —¡Notürü tãũxü̃táma nüxü̃́ cujaxõ! Erü 40 arü jexera i jatügü rü marü nügümaã inaxunetagü, rü nhanagürügü:
“Tachixexü̃gugü tá ega ṯacü ingõ̱xgügu rü e̱xna ixaxegügu naxü̃pa na jamáxü̃ i Pauru”, nhanagürügü. Rü nhu̱xma rü marü ínamemare, rü namagu nanana̱ĩ̱xgü, rü curü orexicatama nixĩ i nhu̱xma ínaṉg̱uxẽẽgüxü̃ —nhanagürü.
22 Rü jexguma ga ãẽ̱xgacü rü ínajamu ga jema ngextü̱xüxü̃, rü nüxna naxãga na taxúemaã nüxü̃ jaxuxü̃ca̱x ga na namaã nüxü̃ jaxuxü̃ ga jemachiga.
Ãẽ̱xgacü ga Ferixü̃tawa Pauruxü̃ namu
23 Rü jexguma ga guma ãẽ̱xgacü rü taxre ga norü capitã́ũca̱x naca, rü nhanagürü nüxü̃: —¡Penamexẽẽ i 200 i churaragü i nacutümaãmare ixĩxü̃, rü 70 i churaragü i cowarutagu ĩxü̃, rü 200 i churaragü i wocaxemaã ixãxnexü̃ na 9 arü ngoragu i chütacü Checharéawa naxĩxü̃ca̱x!
24 —¡Rü ngẽxgumarüü̃ ta penamexẽẽ i nhuxre i cowarugü i Pauruca̱x na tórü ãẽ̱xgacü i Ferixü̃tawa naxũxü̃ca̱x rü na taxuü̃ma nüxü̃ üpetüxü̃ca̱x i namawa! —nhanagürü.
25 Rü jema capitã́ũgümaã jéma nanamu ga wüxi ga popera ga nhaxü̃:
26 “Chama i Cráudiu Ríchiu, rü cuxü̃ charümoxẽ Pa Ãẽ̱xgacü ja Mecüxü̃chi Pa Ferix.
27 Rü jima jatü ja cuxca̱x ngẽ́ma chanamucü, rü Judéugü najajauxgü rü wixguxü̃chi taa̱x najama̱xgü. Notürü jexguma nüxü̃ chacuáchigagu na Romacü̱̃ã̱x na jiĩxü̃, rü jéma chaxũ chorü churaragümaã, rü nüxna chanapu.
28 Rü nüxü̃ chacuáxchaü̃ ga ṯacü ga chixexü̃maã na ínaxuaxü̃güãxü̃, rü jemaca̱x Judéugüarü ãẽ̱xgacügütücumüpe̱xewa chanaga.
29 Rü jexguma nüxü̃ chacua̱x ga na Judéugüarü muchigaca̱xmare na ínaxuaxü̃güãxü̃. Notürü taxuü̃ma ga chixexü̃ naxü na tü̱xcüü̃ jamáxü̃ca̱x rü napocuxü̃ca̱x.
30 Notürü jexguma nüxü̃ chacuáchigagu ga na nügümaã inaxunetaxü̃ ga Judéugü ga na jama̱xgüãxü̃ca̱x, rü jexgumatama nagu charüxĩnü na cuxü̃tawa chanamuxü̃. Rü jema ínaxuaxü̃güxü̃, rü namaã tá nüxü̃ chixu na cuxü̃tawa naxĩxü̃ rü cumaã nüxü̃ na janaxugüxü̃ca̱x na ṯacüca̱x ínaxuaxü̃güãxü̃”,
nhanagürü.
31 Rü jema chütaxü̃gu inaxĩãchi ga jema churaragü, jexgumarüü̃ ga norü ãẽ̱xgacü na namuxü̃rüü̃. Rü Pauruxü̃ nigagü nhu̱xmata Ãtipátiwa nangugü.
32 Rü moxü̃ãcü rü nawoegu ga jema churaragü ga nacutümaãmare ixĩxü̃ rü naxpataü̃wa naxĩ. Rü jema churaragü ga cowarutagu ĩxü̃, rü Paurumaã inaxĩãma.
33 Rü jexguma Checharéawa nangugügu, rü ãẽ̱xgacü ga Ferina nanaxã ga jema popera, rü Pauruxü̃ rü ta inamugü.
34 Rü jexguma nüxü̃ nadaumatügu ga popera ga ãẽ̱xgacü ga Feri, rü Pauruna naca ga ngextácü̱̃ã̱x na jiĩxü̃. Rü jexguma nüxü̃ nacua̱xgu ga na Chiríchiaanecü̱̃ã̱x jiĩxü̃, rü nhanagürü nüxü̃:
35 —Cuxü̃́ tá icharüxĩnü i ngẽxguma ínangugügu i ngẽma cuxü̃ íxuaxü̃güxü̃ —nhanagürü. Rü jexguma nanamu ga churaragü na wüxi ga ucapu ga ãẽ̱xgacü ga Erudipatawa jexmaxü̃wa nüxna na nadaugüxü̃ca̱x.
